Në qoftë se ka njerëz që meritojnë të ngjiten në piedestalin e lartë “NDER I KOMBIT”, ata janë mësuesit vullnetarë të Gjuhës Shqipe…/
Ata janë Rilindës të Gjuhës Shqipe në mërgim…/
Nga Abdurrahim ASHIKU-Athine/
Suksese seminarit dhe zë e grusht demokratik, “Malit qeveritar që s’bëzan”…/
Të dielën, më 26 prill në sallën e madhe të leksioneve të Universitetit Pandio në Athinë, mësuesit misionarë të Gjuhës Shqipe në Greqi, Rilindës të Gjuhës Shqipe në një vend ku ajo ka qenë në prush, zhvillojnë seminarin e 8-të të mësimit plotësues të gjuhës shqipe.
Një lajm nga Tirana, i dëshiruar si pasim i vendimit të përbashkët të Qeverisë së Republikës së Shqipërisë dhe Qeverisë së Republikës së Kosovës për “Organizimin e Përbashkët të Mësimit të Gjuhës Shqipe dhe të Kulturës Shqiptare në Diasporë dhe Mërgatë, se në seminar do t’ ishte e pranishme edhe Ministria e Arsimit dhe Sporteve me një nëpunëse të saj, i gëzoi mësuesit dhe dashamirët e mësimit të gjuhës shqipe në Greqi.
Gëzimi u shtua kur Lidhja e Mësuesve Shqiptarë në Greqi përcolli njoftimin…
Me dëshirën dhe kërkesën e Ministrisë së Arsimit dhe Sporteve për të ndjekur një orë mësimi të hapur në një nga shkollat e mësimit plotësues të gjuhës shqipe të Athinës, ditën e shtunë, më 25 prill, ora 18:00 kjo orë mësimi do të zhvillohet nga mësuese Ilira Ndrio Bakalli në Bibliotekën e Bashkisë- pranë stacionit Larisi….
Janë të mirëpritur të gjithë mësuesit/et dhe dashamirësit që kanë mundësinë dhe dëshirën të marrin pjesë në këtë aktivitet.
Mësuesit nuk munguan të udhëtojnë nga Selaniku, Kalabaka, Korinthi, Dhomoko…për të qenë të pranishëm në një orë mësimi me të deleguarën e Ministrisë së Arsimit dhe Sporteve.
Ministria jonë e Arsimit në këto 14 vjet nga ora e parë e mësimit të Gjuhës Shqipe më 7 mars 2001 si dhe në 7 seminare të mësuesve zhvilluar gati në të gjithë hapësirën gjeografike të Greqisë…në Athinë, Korint, Selanik, Patra… jo nëpunës të saj por as edhe një përshëndetje të rëndomtë shkruar me email nuk ka dërguar. Të vetmen gjë që ka bërë (për të mos ia ngrënë hakun) ka qenë dërgimi pranë ambasadës dhe konsullatave të një sasie abetaresh me lajmërimin “Merrini vetë!”…
Ardhja e MAS në Athinë u prit me dëshirë dhe gëzim…
U morën masa që personaliteten e lartë ta prisnin me lule e ceremoni në portën dalëse për shqiptarët në aeroportin “Eleftherios Venizellos”. U sigurua një makinë e mirë për ta sjellë nga aeroporti në Athinë, u zu një dhomë në një nga hotelet e mira në qendër të kryeqytetit grek…
Mësuese Ilira, në mënyrë që të kishte hapësirë jo vetëm për nxënësit por edhe për të ardhurën e MAS dhe për mësuesit, e lëvizi klasën e saj nga mjedisi i ngushtë ku e zhvillon në “ilegalitet”, si të gjithë mësuesit e tjerët të pambrojtur nga një marrëveshje e ndërsjellë midis dy qeverive për zhvillimin e mësimit shqip të shtunave e të dielave në klasat e shkollave greke, dhe e vendosi në një nga sallat e bibliotekës së Bashkisë, me përkrahjen e Qendrës Kulturore-Rrjeti për të Drejtat e Fëmijëve.
Të njëmbëdhjetë nxënësit, me fletore e abetare përpara, zunë vend në tre tavolina. Të ftuarit, mësues e prindër, u ulën qetësisht në sallë duke i lënë bosh karriget në radhën e parë për të deleguarën e MAS…
Një tufë e bukur me lulet e pranverës athinase ishte e vendosur në tavolinën e mësueses Ilira gati për tu marrë në duar nga një vajzë sykaltër për t’ia dhënë të deleguarës…
Ora kaloi me pesë, dhjetë, pesëmbëdhjetë…njëzet minuta…
Kryetari i Lidhjes së Mësuesve Shqiptarë në Greqi hyri i fundit…
E deleguara e MAS nuk kishte ardhur. Nuk ishte ngjitur në avion. Nuk kishte zbritur nga avioni…
Ilira filloi mësimin…
Një orë mësimi mbresëlënëse. Për të, orën e mësimit, për fëmijët që e shqiptonin fjalën shqipe si të cicërojnë bilbilat…do të shkruaj veçan.
Pas mësimit mësueset, të malluara nga koha e gjatë larg njëra tjetrën nuk lanë rast pa e fiksuar çastin e bukur me fotografi, me nxënësit dhe njëra me tjetrën.
Në mbyllje fiksova në diktofon zëra protestues të mësueseve…
Ilira Bakalli Ndrio, mësuese në Athinë.
“Nuk është hera e parë që mbetemi të zhgënjyer nga Ministria e Arsimit. Si gjithnjë ata na kanë mbrapa listës. Ne e ndjejmë detyrë patriotike këtë që bëjmë. Kur them “ne”, them të gjithë mësuesit, jo vetëm në Greqi por në të gjithë botën për mësimin e gjuhës shqipe. Ndjehemi të varfër kur nuk kemi një përkrahje, mbetemi si jetimë pa nënë”.
Artemis Duri, kryetarë i Lidhjes së Mësuesve Shqiptarë në Greqi:
“Mos prania e Ministrisë së Arsimit dhe Sportit në seminarin tonë tregon se për ta ne jemi vrima e fundit e kavallit të arsimit. Nuk na është vënë asnjëherë rëndësi, me gjithë kërkesat tona. Me gjithë përpjekjet tona asnjëherë nuk u është dhënë vlerësimi i duhur mësimdhënësve të Gjuhës Shqipe në Greqi. Vazhdojmë me punë vullnetare, pa pagesë, pa mbrojtje ligjore, pa libra shkollorë në të gjitha nivelet e mësimit. Ju e vutë re tek fëmijët kur lexonin abetaren, cicëronin në gjuhën e bukur shqipe. Shteti amë për fat të keq nuk u ka dhënë asnjëherë rëndësinë e duhur mësuesve, fëmijëve të emigrantëve që ata ta mësojnë gjuhën e nënës. E kemi thënë dhe e përsërisim gjithnjë. Jemi përpara zgjedhjeve dhe ata kërkojnë votat…”
Alma Zekollari, mësuese tek “Porta”:
“Mosardhja vërteton edhe njëherë se sa rëndësi i jep shteti ynë mësimit të Gjuhës Shqipe në Greqi dhe kudo në botë.”
Alma Hani, mësuese në Dhomoko:
Shteti ynë na ka harruar. Jo thjeshtë ne, por gjuhën shqipe në mërgim.
Aurela Konduri, mësuese në Selanik:
“Kam ardhur nga Selaniku dhe kam bërë një rrugë si të shkoj nga Selaniku në Fier. U zhgënjyem. Erdhëm të takonim një përfaqësuese nga Ministria nisur nga lajmërimi që u bë në faqen e Lidhjes. Erdhëm të themi fjalën tonë për mësimin e gjuhës shqipe në Greqi. Askush nuk ka ardhur dhe nuk vjen të na dëgjojë…”
Merita Ymeri mësuese në Kallabaka:
“Ndjehem shumë keq, e injoruar. Ndoshta jam ajo që mund të flas më tepër se gjithkush. Ju e dini shumë mirë se sa përkrahje i kam dhënë kësaj qeverie duke e ndihmuar me vota, me ardhjen në pushtet. Unë kam qenë ajo që kam dalë shumë hapur. Kam dhënë mbështetjen me veten time dhe të familjes, por edhe me mësimin e gjuhës shqipe duke u bërë pjesë e programit të Partisë Socialiste për emigracionin.”
***
I pashë të mërzitura mësueset e mësimit plotësues të gjuhës shqipe në Greqi, të revoltuara, të zhgënjyera…
I pashë edhe optimiste që nismën e tyre të mos e lënë në rrugë.
E ndjeja se ato mësuese, ato nëna që bëjnë çdo ditë punët më të vështira, që përjetësojnë papunësinë dhe krizën e rëndë që ka pllakosur Greqinë, që mbajnë familjet, rrisin fëmijët e tyre, që ecin me kokën lart, askush nuk do t’i ndalte në misionin e tyre vullnetar për ta mbajtë gjallë Gjuhën Shqipe në Greqi.
Në qoftë se ka njerëz që meritojnë të ngjiten në piedestalin e lartë “NDER I KOMBIT” ata janë mësuesit vullnetarë të Gjuhës Shqipe në Greqi…
Ata janë Rilindës të Gjuhës Shqipe në mërgim…
***
Praktikisht me mësimin e hapur të mësueses Ilira Ndrio Bakalli, Seminari i 8-të për mësimin plotësues të gjuhës shqipe në Greqi u mbyll.
Pritet që nesër, e diele 26 prill 2015, orëve që do tu paraprijnë zgjedhjeve të reja në drejtimin e Lidhjes së Mësuesve Shqiptarë në Greqi, të flitet në një mendje për rastin e pa precedent të injorimit zyrtar të mësuesve shqiptarë të mësimit të Gjuhës Shqipe në Greqi, për braktisjen zyrtare që shteti shqiptar u bën fëmijëve shqiptarë në mërgim, për përshpejtimin e asimilimit gjuhësor e kombëtar të fëmijëve të mërgimtarëve.
Suksese seminarit dhe zë e grusht demokratik, “Malit qeveritar që s’bëzan”…
Abdurahim Ashiku
Gazetar
Athinë, 25 prill 2015