Specialistë të FBI mbërrjnë në Tiranë, takime me kreun e policisë së shtetit/

Atasheu ligjor i FBI-së, Jack Liao së bashku me Zv/atasheun Michelle Miller dhe Agjentin Special të Krimeve Kibernetike Dustin Overby, mbërritën në Tiranë këto ditë dhe  zhvilluan një takim me kreun e Policisë së Shtetit, Haki Çako.Përfaqësuesit e FBI-së janë oficerë rajonalë  me seli në Sofie – Bullgari, me përgjegjësi për marrëdhëniet e FBI-së me autoritetet shqiptare, në këtë status bëjnë vizita të rregullta koordinuese për të diskutuar çështje me interes të ndërsjelltë të zbatimit të ligjit.

Duke shprehur vlerësimin e tyre, Zyra Ligjore e FBI-së, kërkoi që takimin dhe prezantimin e parë ta bëjë me Drejtorin e Përgjithshëm të Policisë së Shtetit, Haki Çako.Atasheu i FBI-së vlerësoi bashkëpunimin e deritanishëm të Policisë së Shtetit me FBI-në, luftën që po bën Policia e Shtetit kundër Krimit të Organizuar dhe Terrorizmit.

Çako falënderoi Atasheun e FBI-së për mbështetjen dhe besimin, si dhe theksoi angazhimin maksimal të Policisë së Shtetit me autoritetet e zbatimit të ligjit të SHBA – së, për të shkëmbyer informacion në kohë reale mes dy institucioneve për të luftuar Krimin e Organizuar dhe Terrorizmin.Zyrtarët e dy vendeve, Çako dhe Liao theksuan domosdoshmërinë e thellimit të bashkëpunimit mes FBI-së dhe Policisë së Shtetit. {SH.K}