Ambasadori amerikan Greg Delawie reagoi pas zhvillimeve që shoqëruan arrestimin e gjashtë shtetasve turq.

“I kam ndjekur nga afër zhvillimet. Transparenca dhe përkushtimi për këtë proces dhe sundimi i ligjit janë vitale”, shkroi Delawie.Gjashtë shtetas turq u arrestuan, ndërsa Kryeministri Ramush Haradinaj tha se ata janë deportuar në Turqi po dje në mesditë.Avokati i njërit nga të arrestuarit tha sot se disa prej tyre po mbahen në aeroportin e Prishtinës, e disa të tjerë në Ambasadën e Turqisë në Prishtinë.Kryeministri Ramush Haradinaj shkarkoi sot ministrin e Punëve të Brendshme dhe drejtorin e AKI-së.Në Kuvendin e Kosovës disa nga deputetët folën në lidhje me arrestimin e shtetasve turq, duke konstatuar në përgjithësi se shteti dështoi në lidhje me këtë çështje.

Limaj: Kush e qeveris Kosovën…?

Zëvendëskryeministri i Kosovës, Fatmir Limaj ka pasur një përgjigje të ashpër ndaj presidentit turk, Rexhep Tajip Erdogan i cili akuzoi Haradinajn se i ka përkrahur “terroristët”, pasi shkarkoi ministrin e Brendshëm dhe shefin e AKI-së.

Limaj me rastin e 4 vjetorit të themelimit të Nismës në Prizren, është shprehur i prerë: “Askush dhe asgjë nuk e kërcënon popullin e Kosovës. Populli ia ka dhënë mandatin kryeministrit, dhe vetëm ai mund ta largojë”.

Erdogan: Ja nga kush u kapën 6 shtetasit turq

Presidenti i Turqisë, Recep Taip Erdogan është deklaruar për të parën herë lidhur me deportimin e shtetasve turq, të cilët ishin mësimdhënës e drejtues të shkollave “Mehmet Akif” në Kosovë, raporton ‘Zëri.info”.

Me këtë rast, Erdogan ka bërë të ditur se kapja e gjashtë gylenistëve është realizuar nga AKI-ja e Kosovës dhe AKI-ja e Turqisë.“Së fundmi Agjencia jonë Kombëtare e Inteligjencës, në bashkëpunim me inteligjencën e Kosovës kapën gjashtë përfaqësues të lartë të FETO-s në Ballkan, i sollën dhe ia dorëzuan organeve policore. Ne kemi thënë se ata do të ikin, kurse ne do t’i ndjekim dhe sjellim këtu me lejen e Zotit kudo që gjenden. Do të kërkojmë llogari”, tha presidenti Erdogan”, raporton Anadollu Agency, përcjell “Zëri.info”.

Gjashtë të deportuarit, për të cilët Erdogan u zotua se do të japin llogari, janë: Cihan Özkan, Kahraman Demirez, Hasan Hüseyin Günakan, Mustafa Erdem, Osman Karakaya dhe Yusuf Karabina.

Erdogani, s’mund të përzihen në punët tona

Jetlir Zyberaj është zyrtari i parë i Ministrisë së Punëve të Jashtme që i ka reaguar deklaratave kërcënuese të Presidentit të Turqisë, Rexhep Taip Erdogan.

Ai ka thënë se do të kërkojnë llogari nëpërmjet kanaleve diplomatike për deklaratat e presidentit turk.

Duke reaguar për kërcënimin për rrëzimin e Qeverisë, Zyberaj ka shkruar se Kosova nuk lejon asnjë shtet tjetër të përzihet në punët e brendshme të Shtetit përfshirë edhe rrëzimin e Kryeministrit.

“Turqia është vend mik i Kosovës, vend që e ka mbështetur dhe e mbështet Kosovën në vazhdimësi.  Nëpërmjet kanaleve diplomatike në ditët në vijim do të sqarojmë arsyet e deklaratave të bëra nga presidenti Erdogan, në pajtim me marrëdheniet e mira që kemi si dy shtete dhe të parimeve të barazisë së shteteve sovrane dhe mos-përzierjes në punët e brendshme”, ka shkruar Zyberaj, në një reagim në FB./

“Ne jemi të përkushtuar të kultivojmë marëdhëniet ndërshtetërore me të gjithë partnerët ndërkombëtare dhe me Turqinë mike.  Dihet fare mire se Kosova është e hapur për bashkëpunim dhe dialog me Turqinë ne llë secilen fushë, pa pasur nevojë për interferim në punët e brendshme.  Kosova ka institucionet e veta dhe ato udhëhiqen me pergjegjesi dhe respekt nga udhëheqësit e zgjedhur me votën e popullit”, ka shtuar ai.

Reagimi i Zyberajt ka ardhur pas kërcënimeve të Erdoganit drejtuar Ramush Haradinajt, pasi ky i fundit shkarkoi nga pozita e Ministrit Flamur Sefajn dhe Driton Gashin e AKI’së./Zeri