Bledar Prifti/

Dje, më datën 17 shkurt 2023, Federata Pan-Shqiptare e Amerikës VATRA, Dega Tampa Bay, Florida, organizoi një mbrëmje festive me rastin e 15 vjetorit të shpalljes së pavarësisë së Shtetit të Kosovës. Në mbremjen festive morën pjesë anëtarë të komunitetit shqiptar në Tampa Bay dhe të ftuar të tjerë. Në festime nderuan me pjesmarrjen e tyre edhe Dr. Anna Kohen, Presidente dhe krijuese e organizatës së grave Shqiptaro-Amerikane “Motrat Qiriazi”, dhe z. Ervis Zhilla, përfaqësuesi i Shqipërisë në komandën e forcave aleate në bazën e forcave ajrore në MacDill AFB, Florida.

Pas himneve kombëtare të Shteteve të Bashkuara të Amerikës, Kosovës, dhe Shqipërisë, fjalimin përshëndetës e mbajti kryetari i degës së Vatrës në Tampa Bay, z. Isuf Spahiaj. Në fjalimin e tij, z. Spahiaj theksoi sakrificat e panumërta të popullit shqiptar në Kosovë në luftën për pavarësi dhe rëndësinë që kjo pavarësi ka në lidhje me të ardhmen e kombit shqiptar. Të pranishëm të tjerë ndanë me bashkëkombasit e tyre kujtimet nga koha e luftës së pavarësisë së Kosovës dhe përpjekjet e tyre nga Shqipëria dhe Amerika në ndihmë të popullit shqiptar në Kosovë. Në fjalën e saj, Dr. Cohen solli kujtime nga koha kur ajo së bashku me organizatën “Motrat Qiriazi” dhe bashkëkombas të tjerë ndihmuan financiarisht kauzën e popullit shqiptar në Kosovë. Dr. Ardian Kraja ndau me pjesmarrësit një histori rrënqethëse nga koha e luftës kur ai ishte doktor ortoped në qytetin e Shkodrës dhe se si ai kishte ndihmuar një nënë kosovare të plagosur nga predhat serbe. Të gjithë folësit përçuan tek të pranishmit nevojën për të çuar më tej përpjekjet në ndihmë të kauzës mbarëkombëtare.

Festimet vazhduan deri në mesnatë nën tingujt e muzikës tradicionale shqiptare nga të gjitha trevat. Muzika, ushqimi, dhe pijet për mbrëmjen u bënë të mundur fal kontributeve të dhëna nga Dr. Ardian Kraja, z. Petro Dervishi, z. Fadil Neziri, z. Fabio Dikena, znj. Vjosa Bytyqi, dhe znj. Theranda Spahiu.

Gëzuar përjetë Republika e Kosovës.

Mirënjohje Shteteve të Bashkuara të Amerikës.