-Patrullime të përbashkëta në mes të Policisë së Kosovës dhe Policisë së Shtetit të Shqipërisë/
Nga: Behlul Jashari/ PRISHTINË,6 Korrik.-Kosova këtë javë, në pjesën dërmuese, do të ndikohet nga masat e nxehta të ajrit, të cilat burimin e kanë nga Afrika Veriore. Temperaturat minimale do të lëvizin ndërmjet 15-17 gradë celsius, kurse maksimalet ditës, nga e hëna deri të mërkurën, do të lëvizin ndërmjet 31-35. Të enjtën ka mundësi që vende-vende të ketë riga shiu.
Instituti Hidrometeorologjik i Kosovës jep parashikimin e motit edhe për bregdetin shqiptar, drejt të cilit pritet të rritet edhe më shumë fluksi i pushuesëve kosovarë në këtë sezon vere.
Thekson se, edhe përgjatë vijës bregdetare pritet të mbajë mot i nxehtë me temperatura tipike verore. Temperaturat më të ulëta do të lëvizin ndërmjet 17-23, derisa maksimalet e ditës do të lëvizin nga 31-38 gradë celsius.
Në vendkalimet kufitare Kosovë-Shqipëri, në qershor 2015 ka pasë gjithësej 500288 hyrje dalje të personave, 142763 ose 39% më shumë se në qershor 2014, kur kishte 357525 personave, e që ishin 105179 më shumë se në 2013-tën.
Në Vërmicë kishte 234167 hyrje e 198513 dalje. Në Qafë Morinë 25688 hyrje e 19530 dalje. Në Qafë Prush 13457 hyrje e 8933 dalje. Këto janë shifrat për hyrje-daljet e personave.
Ndërsa, për automjetet: Në Vërmicë kishte 70258 hyrje e 69590 dalje. Në Qafë Morinë 10009 hyrje e 8664 dalje. Në Qafë Prush 5466 hyrje e 4690 dalje.
Shifratat e hyrjeve-daljeve në tre portat kufitare i bëri të ditura ekskluzivisht për ATSH-në Major Baki Kelani, Shef i Zyrës për Infomim dhe Marrëdhënie me Publikun – Drejtoria e Përgjithëshme e Policisë së Kosovës, në Prishtinë.
Në 1 korrik 2015 ka nisur zbatimi i Marrëveshjes së Mirëkuptimit për patrullime të përbashkëta në mes të Policisë së Kosovës dhe Policisë së Shtetit të Shqipërisë. Pas një konference të përbashkët për shtyp në vendkalimin kufitar në Vërmicë-Morinë, ku u theksua rëndësia e bashkëpunimit mes dy agjencive policore në përpjekje për rritjen e elementëve të sigurisë rrugore, nisi turni i parë i zyrtarëve policorë të trafikut nga Kosova për të patrulluar bashkërisht me njësitet e trafikut të Policisë Shqiptare, në Shqipëri.
U bë e ditur se, gjatë sezonit turistik, ka një rritje të ndjeshme të numrit të shtetasëve nga Kosova që shkojnë për pushime në zonat turistike të Shqipërisë, si dhe të mjeteve që qarkullojnë në akset kryesore rrugore që lidhin të dy vendet, prandaj është parë e nevojshme realizimi i kësaj marrëveshje të përbashkët.
Me synim intensifikimin e mëtejshëm të marrëdhënieve dhe për të forcuar bashkëpunimin midis policive të dy vendeve, nëpërmjet planifikimit dhe zbatimit të masave të përbashkëta si dhe me qëllim ngritjen e sigurisë në trafik për pjesëmarrësit e të dy vendeve janë vlerësuar të nevojshme dhe të suksesshme patrullimet e përbashkëta në Shqipëri.
Patrullimi i përbashkët është siguri e përkujdesje për të gjithë qytetarët në fluksin e rritur në verë në akset rrugore Shqipëri-Kosovë.
“Daily Mail”: Bregdeti shqiptar, vendi për pushime familjare
Çmimet në bregdetin shqiptar sjellin buzëqeshje në fytyrën tuaj, është titulluar artikulli i “Daily Mail”-it/
Mediat dhe agjencitë turistike në botë vijojnë të kenë në fokus turizmin shqiptar, duke e renditur Shqipërinë si një nga vendet më të bukura në Evropë.
Gazeta britanike “Daily Mail”, ne rubrikën e saj “Travel” këtë herë ka vendosur Shqipërinë duke e përshkruar atë si një vend të përshtatshëm për pushime familjare, ku dhe kostot janë krejtësisht të volitshme.
Çmimet në bregdetin shqiptar sjellin buzëqeshje në fytyrën tuaj, është titulluar artikulli i “Daily Mail”-it, transmeton abcnews.
Kryeqyteti shqiptar është vlerësuar duke u nisur edhe nga gjërat elementare, si pikat e shitjes së ushqimeve, “fast foodet” madje edhe vetë gjuha, shprehitë e saj dhe kodet e mirësjelljes.
„Vitet e fundit Shqipëria ka pasur një zhvillim të bujshëm në fushën e turizmit, ku mijëra turistë vijnë për pushime çdo vit në vendin tonë. Bukuritë natyrore, plazhet, qytetet antike janë ndër preferencat parimore të turistëve“, shkruan “Daily Mail”. Por siç duket numri i atyre që do ta vizitojnë Shqipërinë do të rritet edhe për vitet e ardhshme si rezultat i promovimit që po i bëhet nga ndërkombëtarët.
Sipas ”Daily Mail”, shumë prej vizitorëve e cilësojnë Shqipërinë si një nga sekretet e fundit që po zbulojnë në Evropë.
Me këtë rast u rekomandohet turistëve që kanë kureshtjen për ta parë Shqipërinë të nxitojnë për ta bërë sa më parë udhëtimin.