-Busti u inaugurua në Pallatin Presidencial San Anton në Attard të Maltës për të shënuar vitin e shenjtërimit të Nënës Terezë/

PRISHTINË, 28 Mars 2016-B.Jashari/ Presidentja e Republikës së Kosovës, Atifete Jahjaga dhe Presidentja e Maltës, Marie Louise Coleiro Preca, inauguruan sot bustin e Nënës Terezë të dhuruar nga Presidentja Jahjaga në emër të qytetarëve të Kosovës.“Busti i Nenë Terezës u inaugurua në Pallatin Presidencial San Anton në Attard të Maltës. Ky inaugurim u bë për të shënuar vitin e shenjtërimit të Nënës Terezë”, thekson njoftimi i sapodërguar.Presidentja e Republikës së Kosovës, Atifete Jahjaga, po zhvillon një vizitë shtetërore dy ditore në Maltë, ku  dje u prit nga presidentja Marie Louise Coleiro Preca, në pallatin presidencial në Valletta.

Presidentja e Republikës së Kosovës Atifete Jahjaga dhe Presidentja e Republikës së Maltës Marie Louise Coleiro Preca morën pjesë sot në nënshkrimin e Memorandumit të Bashkëpunimit në mes të Kryetarit të Odës Ekonomike të Kosovës Safet Gërxhaliut dhe kryetarit të Odës Ekonomike, ndërrmarjeve dhe industrisë të Maltës Anton Borg.

 “Nënshkrimi i kësaj marrëveshje është hapi i parë i zhvillimit të mardhënieve në mes të të dyja vendeve në fushën e ekonomisë. Ky memorandum do t’i mundësojë bizneseve të Kosovës dhe Maltës që të shtojnë aktivitetet afariste dhe të zgjerojnë tregjet e tyre”, theksonte njoftimi  i dërguar më herët.