Nga Shefqet Kërcelli/

Në një raport të datës 21 qershor 2016, të kapitenerisë së portit Durrës thuhet se, dy anije peshkimi në Durrës me emrat në bord, “Çelepia-2” dhe “Qamili”, kanë humbur kontaktet me Kapitanerinë dhe ende nuk ka asnjë sinjal prej tyre. Fillimisht ndërsa për anijen “Qamili” u identifikua vendndodhja, pasi ka aparaturën “Blueboks”, për anijen “Çelepia 2”, nuk pati asnjë lajm. Në këtë peshkatore ndodhen 3 marinarë në bord, kapiten Dhimitër Malja, motorist Luan Mema dhe marinar Muhamed Salam (egjiptian). Vendndodhja e saj nuk mund të identifikohej për shkak të mungesës së aparaturës “Blueboks”. Ajo ka dalë në det më 18 qershor 2016, në orën 14:30, dhe prej atij momenti kanë humbur kontaktet midis familjarëve, pronarit të anijes dhe tre anëtarëve të ekuipazhit. Bujar Bala, kryedispeçeri i peshkimit Durrës, bëri me dije se peshkatorja e zhdukur në det me marinarë, nuk është gjendur akoma sepse nuk i punojnë aparaturat e identifikimit të tyre, “Blubox” dhe radiot, duke e bërë edhe më të rëndë situatën, për gjetjen e marinarëve të zhdukur. Familjarët e dy marinarëve që ndodhen në peshkarexhën “Çelepia 2”, që pretendohet të jetë rrëmbyer nga një marinar egjiptian, i cili kërcënon se do ta mbysë nëse nuk i paguhen 70 mijë euro, ndodhen në ankth për fatin e njerëzve të tyre. Lulzim Mema, babai i motoristit të anijes “Çelepia”, Luan Memës, i bën apel shtetit të gjejë djalin e tij gjallë apo vdekur. Lulëzimi është detar i vjetër, më shumë se 35 vjet në det, dhe shenja se djali ka 5 ditë pa kontaktuar nuk i duket e mirë. Qëndron përpara Dispeçerisë së peshkimit Durrës me shpresë se nga radio e kryedispeçerit do të dëgjojë edhe një herë zërin e të birit. “Ka pesë ditë që nuk përgjigjet. Sot në drekë bëhen 5 ditë. Që kur ka ikur nuk ka folur në telefon. Duhet të dalin e ta kërkojnë anijen, ta gjejnë e të na e sjellin gjallë apo vdekur”, thotë babai me lot në sy. “Jam detar i vjetër, kam punuar gjithë jetën në det. Nuk ka mundësi që të mos kontaktohet pesë ditë me radhë, asnjëherë”, shton ai. Ndërsa Damian Malja, djali i kapitenit të anijes thotë se, “Nuk e dimë fare si është. Jemi të gjithë në ankth. Më 21 qershor anija duhej të kthehej. Fillimisht u alarmuam për ndonjë mbytje, derisa egjiptiani kontaktoi vetë. I kemi kërkuar një foto të babit që ta shohim si është. Babai thoshte se ai ishte djalë i mirë e punëtor. Qeveria të angazhohet e të na japë një lajm, cilido të jetë, i mirë a i hidhur, pasi mami ngeli në spital”, vijon Damiani. Përmes komunikimit në rrjetin social Facebook dhe në Whatsapp, ditën e djeshme, datë 23 qershor, Adel Sallam dërgoi dy foto të motoristit të anijes, Luan Mema, të lidhur me zinxhirë. Ngjarja ka tronditur Flotën e Peshkimit në Durrës. “Ngjarja mbart të gjithë elementet e një akti territorist me rrëmbim personi dhe pasurie dhe vënie gjobe. Jemi të tronditur. Edhe pse sinjali i tij i telefonit është në përdorim, ne nuk kemi informacion ku ndodhen”, thotë Klodian Kapiti, Kryetar i Sindikatës së peshkatarëve të Shqipërisë. Edhe pse pretendohet e rrëmbyer dhe është kërkuar dhe dëmshpërblim, deri tani nuk ka patur asnjë komunikim me pengmarrësin dhe as kërkesë për mënyrën se si dhe ku mund të paguhen paratë. Egjiptani Adel Sallam është 29 vjeç dhe ka lindur në Beheira të Egjiptit. Më 18 janar 2016, ai mori lejen e qëndrimit për një vit në Shqipëri. Në zgjidhjen e kësaj situate duhen angazhuar dhe strukturat diplomatike të shtetit shqiptar, pse jo dhe cdo bashkëatdhetar që ka mundësi, thonë disa peshkatarë