Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

VATRA- NDERIM PËR JONUZ NDREUN, E BIJA ZË VENDIN E TË ATIT

by

*Të Shtunën, 22 Gusht 2020, Kryetari i Vatrës, Elmi Berisha u dorëzoi bijave të vatranit fisnik Jonuz Ndreu, Mirënjohjen e Artë-Postmortem, për kontributin 50 vjeçar të babait të tyre në VATËR-

*E bija, Desi Ndreu,u antarësua në Vatër, për të mos e lënë bosh vendin e të atit dhe dhuroi për Federatën dhurime e familjes dhe komunitetit në përcjelljen e Jonuz Ndreut.

      Me 22 gusht 2020, të shtunën në mëngjes, Kryetari i Vatrës, z. Elmi Berisha, priti vajzat e Jonuz Ndreut. Ai shoqërohej nga sekretarja e Vatrës Nazo Veliu, arkëtari Marjan Cubi, anëtar i Kryesisë Anton Raja dhe Kryeredaktori i Diellit Dalip Greca. Motrat Ndreu shoqëroheshin nga nipi Jonuz Ndreut, anëtar i Këshillit të Vatrës , Çezar Ndreu.

    Kryetari Berisha ka vlerësuar kontributin më se 50 vjeçar të Jonuz Ndreut në Federatën Panshqiptare të Amerikës” VATRA”, duke e përshkruar atë si një ikonë vatrane në shërbim të Kombit, ashtu siç ka bërë në shekuj e gjithë familja e Madhe Ndreu.

 Jonuz Ndreu ishte një ndër anëtarët e vjetër dhe besnik të Vatrës, dhe Vatra ndjehet e keqardhur për vdekjen e tij. Ai do t’i mungojë shumë Vatrës dhe vatranëve, por kurrë nuk do të harrohet. Ndërkohë e bija Desi Ndreu, tha se kishte marrë vendimin, që në respekt të të Atit dhe të Vatrës, që ai e deshi aq shumë, të anëtarësohej në Vatër, gjë që e bëri fakt të kryer, duke plotësuar formularin dhe duke paguar anëtarësinë. Vendi i babait, nuk do të mbesë bosh. Misioni vatran i familjes Ndreu vazhdon.

      Në fakt Desi ka disa vitë që nuk është ndarë nga veprimtaritë e Federatës Vatra. Ajo shoqëronte atin e saj,që nuk mungonte në veprimtaritë e Vatrës edhe pse ai qëndron në karrocë prej paralizës. Jonuzi nuk ndahej nga Vatra për Festën e Flamurit e të Pavarësisë së Shqipërisë, si dhe Pavarësisë së Kosovës. Shumë prej kushërinjëve dhe miqëve të Jonuzit e shoqëronin në raste të tilla, së bashku bëheshin mbi 2 veta. Në kujtesën  Vatrane mbetet dhe Torta gjigande Kuq e Zi me ngjyrat e Flamurit Kombëtar, që Jonuzi sillte në Festën e Flamurit.  Anëtarësimi i Desit në Vatër është një sinjal për komunitetin dhe miqtë e fisnikut Jonuz Ndreu. Siç e shoqëronin nëpër festa, ata duhet që së bashku të bëhen pjesë e Vatrës historike, në vijim të Misionit Kombëtar të Vatrës në mbi 108 vite histori, mision që Jonuz Ndreu e kishtë bërë pjesë të zemrës dhe të shpirtit. Jonuzi e deshi me shpirt Vatrën në të gjallë të tij, dhe pas vdekjes, shpirti i tij fisnik vazhdon e kontribuon për Vatrën.Ai e deshi Vatrën të bashkuar dhe në krye të Komunitetit, vend që ia jep historia dhe bëmat e saj Kombëtare. Kjo nuk mund të harrohet!

Kryetari i Vatrës, z. Berisha, i dorëzoi së bijës, Mirënjohjen e Artë(Pas vdekjes) për kontributin e jashtzakonshëm  50 vjeçar. E bija, Desi Ndreu, falenderoi në emër të familjes NDREU. Përmes lotëve ajo vlerësoi lidhjet shpirtërore të babait të saj me Vatrën dhe Vatranët deri në momentin e fundit të jetës!

Desi Ndreu dhuroi për Federatën kontributet dhe dhurimet për kurorat e luleve të komunitetit dhe të familjes, në përcjelljen e Jonuz Ndreut.

Pjesmarrësit në këtë ceremoni simbolike dhe nderuese shprehën vlerësime për atdhetarin dhe vatranin Jonuz Ndreu: Nazo Veliu, Marjan Cubi, Çezar Ndreu, Anton Raja dhe Dalip Greca, sollën kujtime e vlerësime.

Shembulli që dha e bija e jonuz Ndreut, duke zënë vendin e të atit, është një orientim dhe sinjal që duhet ta kapin në kohë bijtë e vatranëve. Misioni i Vatrës vijon, pas etërve nga bijtë e bijat e vatranëve, që me shembullin e tyre tërheqin rreth Vatrës komunitetin.

Faleminderit DESI! Pushoftë në Paqe Shpirti i Njeriut Fisnik Jonuz Ndreu!(Dielli)

VATRANËT MBËSHTESIN KONGRESISTIN REPUBLIKAN LEE ZELDIN

by

NGA DALIP GRECA-

Të Martën, 18 Gusht 2020, në 3 West Club, në 51 st, në Manhattan, u organizua veprimtaria fonmbledhëse për kongresmenin republikan Lee Zeldin, veprimtari që kishte për organizatore bashkatdhetaren Evi Kokalari. Thirrjes së saj iu përgjigj edhe Federata Panshqiptare e Amerikës VATRA. Nga Detroiti kishin udhëtuar enkas për këtë event nënkryetari i Vatrës Alfons Grishaj, kryetari i degës së Vatrës për Michigan Mondi Rakaj dhe anëtari i Këshillit Kolonel Dritan Demiraj. Bashkë me ta u bashkuan edhe:Presidenti i Nderit i Vatrës Agim Rexhaj, anëtarët e kryesisë Mark Mrnaçaj, Dalip Greca(Editori i Diellit), Asllan Bushati, Zef Balaj, Dritan Mishto, dhe shumë të tjerë që po i bëjnë donacionet përmes websitit të kongresistit.


Po ashtu kishte ardhë Marko Kepi, kandidati republikan për Asamblenë e Shtetit të New York-ut,Kryetari i Shoqatës” Atlantiku” Gani Shehu me përfaqësues të kryesisë, Ilir Ademi nga komuniteti çam etje.
Vatranët janë takuar dhe kanë biseduar para fillimit të veprimtarisë me kongresmenin Lee Zeldin dhe janë fotografuar me të.
Evi Kokalari ka hapur eventin duke e falenderuar kongresmenin Zeldin, si një mik i shkëlqyer i shqiptarëve,i dalluar për mbështetjen ndaj komunitetit shqiptar, veçanërisht ka dhënë kontributit të jashtzakonshëm për vëllezërit Bytyqi. Kongresmeni Zeldin është sponsor i Rezolutës në Kongresin Amerikan për vëllezërit Bytyqi.


Në fjalën e tij të duartrokitur kongresmeni Zeldin ka falenderuar pjesmarrësit për mbështetjen e dhënë. Duke iu referuar çështjes së vëllezërve Bytyçi ai tregoi për këmbënguljen amerikane në zbardhjen e krimit, duke i bërë presion të vazhdueshëm Serbisë për të gjykuar e dënuar vrasësit e vëllezërve Bytyqi. Familja Bytyqi ka nevojë për drejtësi. Ai tregoi edhe për takimet me presidentin e Sebisë Vuçiç,ku së bashku me kongresmenin Engel, i kanë kërkuar atij që shteti serb të gjejë e të gjykojë vrasësit e Ylli, Agron dhe Mehmet Bytyqi, shtetas amerikan me origjinë shqiptare, të cilët u ekzekutuan në mënyrë kriminale nga shteti serb.
….Historia tragjike e vëllezërve Bytyqi e ka zanafillën në korrik të vitit 1999. Vëllezërit Ylli, Agron dhe Mehmet Bytyqi, ishin luftëtarë të Lirisë në radhët e Batalionit Atlantiku në luftën kundër ushtrisë serbe, që ushtroi gjenocid ndaj qytetarëve të pambrojtur shqiptarë. Pas përfundimit të luftës ata u arrestuan pasi kishin ndihmuar qytetarët romë dhe sipas pretendimeve serbe kishin kaluar vijën kufitare të supozuar mes Kosovës dhe Serbisë. Pasi kryen dënimin për”shkelje kufiri” ata, çuditërisht u arrestuan sërish, ndërkohë që po largoheshin nga burgu i qytetit Prokuplje në Serbinë Jugore. Pasi u arrestuan u dërguan në qendrën e trajnimit policor në Petrovo Selo, ku u izoluan në një magazinë boshe. Në mënyrë kriminale u egzekutuan me 9 Korrik 1999, me plumba pas shpine, dhe i hodhën në një gropë që përdorej për mbeturina. Vrasësi i supozuar, Goran Radosavljeviçi, i njohur me nofkën”Guri” është i dyshuari kryesor për familjen Bytyqi. Departamenti Amerikan i Shtetit, që më 2018 i ka vënë Radosavljeviçit kufizime udhëtimi.
Falë punës këmbëngulëse të kongresistit Eliot Engel dhe Lee Zeldin, Komiteti i Punëve të Jashtme të Kongresit Amerikan, miratoi një rezolutë më 2018, dhe një të dytë në 2019, që synonte ushtrimin e presionit ndaj autoriteteve serbe për të zgjidhur një herë e mirë çështjen e Vëllezërve Bytyqi, qytetarë amerikanë me origjinë shqiptare. Rezoluta shënonte:” Është e dënushme që asnjë individ nuk është gjetur fajtor për ekzekutimin e vëllezërve Bytyqi ose për ndonjë tjetër krim që lidhet me vdekjen e tyre, dhe që asnjë individ nuk po përballet me akuza për këto krime”. Rezoluta diktonte:”Qeveria e Serbisë dhe ministritë dhe zyrat e saj përkatëse, duke përfshirë Prokurorinë e Serbisë për Krimet e Luftës, duhet t’i japin përparësi hetimit dhe gjykimit të zyrtarëve që besohet të jenë përgjegjës për ato vdekje”.
Me 22 tetor 2019, Dhoma e Përfaqësuesëve miratoi unanimisht Rezolutën ”Bytyqi”, që lidhej me vrasjet e sponsorizuara nga shteti i Serbisë për vrasjen e tre shtetasve amerikanë. Po ashtu edhe Senati e ka miratuar rezolutën BYTYQI.
Familja Bytyqi, udhëheqësit e Kosovës, Hashim Thaçi, Kadri Veseli, Ramusha Haradinaj e kanë falenderuar kongresmenin Lee Zeldin, që ka sponsorizuar Rezolutën dhe ka dhënë kontribut të jashtzakonshëm së bashku me kongresmenin Eliot Engel. Falë kësaj këmbëngulje Amerika është e vendosur për t’i shkuar deri në fund zbardhjes së krimit dhe dhënies së drejtësisë për vëllezërit Bytyqi.
Edhe gjatë bashkëbisedimit të së Martës, 18 gusht, kongresmeni Zelden, tha se Familja Byrtyçi ka nevojë për drejtësi dhe se Amerika nuk do të heqë dorë nga ndëshkimi i vrasësve të vëllezërve Bytyqi.
Ilir Bytyqi, në emër të familjes, ka falenderuar pjesmarrësit në event, organizatoren Evi Kokalari,dhe ka shfrytëzuar momentin e foltores për të përgëzuar e falenderuar komunitetin për pjesmarrjen në këtë veprimtari për të mbështetur kongresmenin.

Ai tha: Unë do të doja të përfitoj nga ky moment për të falënderuar secilin prej jush për pjesëmarrjen në këtë ngjarje për të mbështetur zyrtarin tonë të zgjedhur për të qenë zëri ynë-pa zë- dhe shpresoj për të pashpresën. Siç e dini të gjithë, tragjedia goditi familjen time në duart e qeverisë serbe 21 vjet më parë. Ka shkatërruar familjen time gjatë gjithë këtyre viteve. Beteja për drejtësi nuk ka qenë e lehtë, megjithëse mbështetja ka qenë atje.

Faleminderit miqve dhe familjes organizatave të komunitetit Ameriko-Shqiptar shumë prej jush janë sot të pranishëm, dhe anëtarët e Kongresit si përfaqësues në Washington DC Lee Zeldin kemi arritur një përparim të madh.

Kongresmeni Lee Zeldin dhe stafi i tij i mahnitshëm kanë mbështetur familjen time në çdo aspekt. Ai kurrë nuk di si të thotë JO! Ai është gjithmonë në lëvizje dhe do të vazhdojë ta bëjë këtë jo vetëm për familjen time, por për Qarkun Suffolk(Distrikti nr. 1). Unë besoj se Lee Zeldin është Përfaqësuesi i duhur për të përfaqësuar Suffolk në Kongres.
Më pas kongresmeni Lee Zeldin u është përgjigjur pyetjeve dhe sugjerimeve. Mondi Rakaj, kryetari i degës së Vatrës në Michigan, ngriti problemin e qeverisë socialiste të Shqipërisë dhe kryeministrit të saj, që me politikat jo demokratike, ka shkatërruar demokracinë, ka pushtuar ekzekutivin dhe legjislativin, duke përqëndruar të gjithë pushtetet në dorën e tij, ka sjellë krizë ekonomike, ka varfëruar qytetarët, ka rritur krimin, ka nxitur trafikun dhe po zbraz vendin prej qytetarëve të saj. Rakaj i kujtoi kongresmenit edhe kritikat e kryeministrit shqiptar ndaj Presidentit të Amerikës Donald Trump më 2016. Ai e pyeti kongresmenin nëse diktatorë të tillë antidemokratë, abuzues të pushtetit,do të kenë përkrahjen e Amerikës?
Natyrisht që përgjigja e kongresmenit ishte diplomatike, duke analizuar diktatorët në Korenë e Veriut, Bjellrusi, Kinë, Rusi etj…

DARKE ME MINISTREN E JASHTME TE KOSOVES

by

VATRA, DARKË ME MINISTREN E JASHTME TË KOSOVËS NË RESTORANTIN”ALLORA”, PRONË E BASHKATDHETARIT ELIO AHMETAJ (ELIO ALBANESE)- Vatra ka një traditë të kahershme, të trashëguar nga paraardhësit Vatranë- për mysafirët e nderuar , pas takimeve në selinë e Federatës, me buajrinë e saj shtron drekë ose darkë sipas kohës së vizitës. Kështu u veprua edhe me Ministren e Jashtme e të Diasporës të qeverisë të Republikës së Kosovës, zonjën Meliza Haradinaj-Stublla. Pas një bashkëbisedimi të sinqertë në Vatër, pas debatit pyetje-përgjigje, pas fotografive në mjediset e Vatrës, nga ora 6 e mbrëmjes deri në 7,zonja ministre së bashku me ambasadoren Vlora Çitaku dhe ekipin e Konsullatës së Përgjithshme në New York, u ftuan nga Kryetari Elmi Berisha, për një darkë pune.Nder mysafiret e nderit edhe ata qe ksihin udhetuar nga Detroiti ne New York, per 13 ore me makine;Alfons Grishaj,nenkryetar i Vatres, Mondi Rakaj-Kryetar i deges se Michiganit dhe anetar i kryesise, Kolonel Dritan Demoraj, pjese e Keshillit te Vatres….
Për t’i nderuar mysafirët ishte zgjedhur restoranti ALLORA me pronar bashkatdhetarin Elio Ahmetaj(i njohur si Elio Albanese) në Manhattan.
Allora ndodhet në 47 Street, ndërmjet Lexinton Ave & 3rd Ave. Një pozicion i mrekullueshëm.Pronari Ahmetaj kishte zgjedhur për ne taracën e ndërtesës në katin 22. Një pamje magjike në lartësi,që nuk e prishi as rrebeshi i shiut që nisi nga mesi i darkës.Pronari dhe personeli i kamerierëve ishte përherë i gatshëm duke na shërbyer me kulturë e mirësjellje.Ishte një darkë për të mos e harruar.Menyja e pasur, ushqimet të freskëta e të shijshme,pijet e zgjedhura, gjithçka perfekte.Bisedat vazhduan deri në mesnatë. Në fund ambasadorja Vlora Çitaku, falenderoi Vatrën për bujarinë e saj tradicionale dhe mikpritjen vatrane. Një mbrëmje e paharruar.
*Fotografite i gjeni ne Facebook

TË RIKTHEJMË NË VATËR FRYMËN E SHENJTË VATRANE

by

Nga Dalip Greca*- Vatranët i bashkon fryma e shenjtë e Vatrës, fryma e bashkimit, e dashurisë për Vatrën, për Kombin, për njeri-tjetrin, frymë që e plazmuan krijuesit e saj. Në editorialin përcjellës të Kryetarit-Ikonë të Vatrës, të ndjerit Agim Karagjozi, lider i dy dekadave në krye të Federatës, pata trajtuar frymën e shenjtë të Vatrës. Editoriali është publikuar në numrin special, kushtuar përcjelljes të kryetarit Karagjozi, Dielli i prillit 2018.

Po citoj veten:” Agim Karagjozi dha për Vatrën gjithçka kishte, por mbi të gjitha shpirtin e tij e njësoi me shpirtin dhe frymën e Vatrës. Po po, Vatra është  Frymë, është shpirt.Është frymë Kombëtare, është shpirt atdhetar, ai që nuk e ndjen këtë nuk mund të bëhet vatran i përkushtuar. ..”

    Nuk ka qenë e lehtë për vatranët, mbajtja e Vatrës bashkë, me të gjitha degët, por me sakrifica, është arritur. Tendencat përçarse janë tejkaluar dhe Vatra pas sprovash të vështira, edhe kur është plasaritur nga përçarjet, zilitë, tendencat individualiste, familjare, krahinore, fetare, karrieriste, ka arritur të ngrihet mbi to dhe ka rikthyer frymën e shenjtë të bashkimit.

   Në dekadat e para përçarjen e nxiste edhe propaganda greke, por Vatra duke pasë në krye burra të ftilluar e të ditur, arriti që të fitojë mbi grekërit dhe ta mbajë bashkë frymën e  bashkimit. Fryma e bashkimit u rrezikua seriozisht në vitin 1917, kur Partia Politike e ish kryetarit K. Dako shkëputi një pjesë të konsiderushme të anëtarësisë, por Vatra sërish gjeti veten dhe përmes një aksioni Kombëtar siç ishte Fushata për shpëtimin e Shqipërisë, 3 qershor 1917, arriti të shpëtojë jo vetëm veten e vet, por edhe Pavarësinë e rrezikuar të Shqipërisë. Pikërisht në ato vite Vatra bëri punë të mëdha për Kombin.

     Një rrezik tjetër i madh iu turr Vatrës më 1936, kur mosmarrveshjet brenda vetes krijuan një të çarë të madhe në trupin e saj. U duk fillimisht se anija e Vatrës kishte pësuar dëme të mëdha nga dallgët e zemrimit. Çarja ishte e pariparushme për momentin. Ndarja nuk u shmang. U krijuan dy Vatra, njëra,- Vatra mëmë mbeti në Boston,- tjetra-bijëza në Michigan. U krijuan dy gazeta Dielli, për dy vatrat respektive. U nda e u përça Vatra, por në të dy pjesët e ndara, egzistonte në anëtarësi fryma e shenjtë e bashkimit. Pushtimi fashist i Shqipërisë i tronditi të dy Vatrat dhe sërish u bashkuan, bijëza u kthye tek Mëma.

Por me kaq nuk u sosën hallet e Vatrës së moçme.Një tjetër ndarje ndodhi në vitet e turbullta të Luftës së Dytë Botërore, me 28 Dhjetor 1941, Kostë Çekrezi, patriot, demokrat, antimonarkist, shkrimtar, gazetar, që kishte miq me influencë në administratën Amerikane, i shkëputi një pjesë të konsiderushme Vatrës dhe mori shumë emigrantë në radhët e Organizatës oponente që krijoi përballë Vatrës dhe që e emërtoi “Shqipëria e Lirë”. Shqipëria e Lirë dhe Vatra ishin ballëpërballë në një rrugëtim të gjatë, ashtu siç ishin në përballje dhe dy gazeta”Dielli” e “Shqipëria e Lirë”. E para u shfrytëzua nga qeveria komuniste e Tiranës dhe u bë instrument i saj. Çekrezi e nuhati shpejt dhe bëri divorcin me krijesën e vet. Gjithësesi Vatra e vuajti hemoragjinë që krijoi Shqipëria e Lirë dhe iu drejtua për ndihmë Mbretit Zog, që në atë kohë ishte në Kanë të Francës.Mbreti iu përgjigj pozitivisht kërkesës së vatranëve për të anëtarësuar në Vatër legalistët. Kështu që në vitin 1959 Vatra rinisi rimbushjen e radhëve duke pranuar si vatranë jo vetëm legalistët, por  nga të gjitha kategoritë e nacionalsitëve që kishin lënë Shqipërinë e pas Luftës së Dytë Botërore.

          Tash ka nisur një goditje tjetër, e pesta sipas radhës, që edhe pse është në minorancë, nuk i bën mirë frymës së shenjtë të bashkimit.

Po, kush e cënon sot frymën vatrane dhe kush po përçanë Vatrën? Është një grupim fare i vogël që me deklarata e komunikata të pa pamatura, dhe së fundi me një aventurë të rrezikshme për Federatën, krijimin e degës, ka kaluar në eksterm, pa i llogaritur dëmet që po i bën me ndërgjegje Vatrës. Nuk dua të besoj se pas kësaj aventure fshihen interesa që kanë të bëjnë me VATRA FOUNDATION INC., Presidenti i të cilit, ka kohë që në mënyrë arbitrare ka shpallë pavarësinë nga Vatra dhe prej vitesh nuk pranon të informojë strukturat e Vatrës për veprimtarinë financiare!!. Përveç presidentit Kaliqi, kush ka interes ta mbajë larg Vatrës këtë fondacion? Çfarë veprimtarie ka kryer ai deri me sot? Pa zgjidhur këtë enigmë nuk mund të kuptohen motivet e vërteta të arkitetktëve të përçarjes së Vatrës me vatër paralele. Si mund të krijohen degë të Vatrës pa patur autorizim me shkrim nga qendra? Pretendohet për mosrespektim të institucioneve nga qendra, dhe shkelen symbyllurazi institucionet e Federatës, prej këtyre që pretendojnë të vendosin në vend drejtësinë e munguar!

Vendimet e rëndësishme, historikisht Vatra i ka marrë në Kuvende. Edhe në Kuvendin e fundit, të 19 Janarit të 2020-ës, Vatra nuk e njohu të vetshpallurin”Komision të 5 tetorit”-, por edhe i panjohur, ky komision paska nisë krijimin e degëve! Por natyrisht nuk është e lehtë që të gjenden vatranë të vërtetë, nga ata me frymën e shenjtë vatrane,(përjashtojmë nga ky gjykim të mashtruarit) që  vullnetarisht të ndërmarrin aventurën e përçarjes së Vatrës duke u anëtarësuar në një vatër të paligjshme? Kur Federata paralajmëroi krijimin e degëve të reja, këta vrapuan dhe sajuan një degëz në Staten Island-NY, me 8 apo 10 veta. Në fakt në fotografitë e publikuar duken 10 persona, por Dielli kontaktoi me njerin prej anëtarëve të Këshillit të Federatës, i pranishëm në fotografi, i cili ishte i ftuar në atë “themelim illegal”, pa e ditur fare qëllimin. Ai pohoi se nuk ka pranuar të bëhet pjesë e asaj dege, sepse siç tha ”Nuk jam për përçarje”… Vazhdoj të jem anëtar i Federatës dhe i Këshillit të saj, ndërsa një tjetër prej dhjetshes, nuk ia vlen t’ia përmendim emrin sepse ka vite që  ai e  qëllon me gurë Vatrën dhe nuk besojmë se do të ketë dashuri të madhe për të ashtuquajturin “Komision i 5 Ttetorit”.

         Krijues i degës me 8 veta qenka Uk Gjonbalaj, i cili iu bashkëngjit “Komisionit 5 Tetorit 2019”, ndërkohë që jo shumë kohë më parë(Dhjetor 2018) shkroi në statusin e tij në fb me rastin e nderimit me Mirënjohje nga Kryetari Dritan Mishto:” Se Vatra është në rrugë të drejtë dhe po bën atë që duhej të bënte shteti shqiptar! Faleminderit Vatrës! Faleminderit Kryesisë!…Faleminderit Kryetarit!”…

  Ku shkuan gjithë këto falenderime për qendrën? Çudi e madhe, kur u prish Uka me qendrën?…Gjithësesi Federata nuk e ndjen fare largimin e Ukës sepse më shumë se dhjetë Gjonbalaj janë anëtarësuar në VATËR, pas ikjes së tij tek Komisioni i paligjshëm!

         Të gjitha këto përpjekje, përfshi dhe paralelizmin në facebook, në ndonjë portal të rëndomtë, apo të ndonjë gazete, që bëhet strehë e paligjshmërisë së këtij grupimi, janë të destinuara të dështojnë, siç kanë dështuar në 108 vite të gjitha tentaivat përçarse.

         Qendra e Vatrës ka ruajtë gjakftohtësinë dhe nuk ka ndërmarrë veprime publike, nuk ka përmendur emra, por ajo do të veprojë sipas Kushtetutës së vet dhe ligjeve të shtetit ku jetojmë.

   Veprimet e pamenduara që kanë ndërmarrë disa persona për të dëmtuar Vatrën, për të krijuar Vatër të dytë, vetëm frymë vatrane nuk mund të kenë. Le të presim dhe të shikojmë se deri ku do të shkojnë veprimet e tyre; historia do t’i gjykojë….

  Tash është koha që sejcili të gjykojë veprimet e veta. Është koha që të kthejmë frymën e shenjtë vatrane, përçarjet nuk bëjnë gjë tjetër veçse baltosin individët dhe vënë në pikëpyetje motivet e punës së tyre të deritanishme në Vatër.

 Vatra duhet të nxjerrë mësime nga krijimi i këtij fraksioni dhe të punojë më shumë për të kultivuar frymën bashkuse. Edhe veprime që duken të parëndësishme; ato që nuk i shohim, por i ndjejmë, telefonatat, email-et që zgjojnë zili,ky tha kështu për ty, ai tha ashtu,… por ai të do, ky s’të do… thashethemet, mund ta vrasin frymën e bashkimit. KUJDES!

I ndjeri Karagjozi na e la Vatrën e bashkuar, le ta rikthejmë sërish frymën e Tij sepse është vlerë për Vatrën e sotme dhe duhet t’i shërbejë vatranëve si model përkushtimi. Që ta rikthejmë këtë frymë duhet ta çlirojmë shpirtin nga qejfmbetjet, grindjet,dukja, xhelozirat profesioanle por dhe sociale, shpirti karrierist, dhe të vendosim mbi gjithçka frymën kombëtare, e cila qëndron në themelet e Federatës. Vatra do punë, jo fjalë!

* EDITORIAL I DIELLIT- PRINT- KORRIK 2020

IU DHA LAMTUMIRA ATDHETARIT, BAMIRËSIT, “AMBASADORIT” TË NËNË TEREZËS, LEKË GOJÇAJ….

by

NGA DALIP GRECA-*

Shkoi të pushojë atdhetari i përkushtuar Lek Gojçaj. Shqiptaro-amerikanët ia dhanë të gjithë respektin që meritonte. Kisha po ashtu. Po shtetet shqiptare sa e vlerësuan? Njeriu që së bashku me vëlla, sponsorizoi dhe vendosi shtatoret e Shënjtëreshësh Nënës TEREZË në Trojet Shqiptare,njeriu që dhuroi shtatoret e argjendta për Vatikanin(Papen) dhe Washingtonin, kongresmenëve e senatorëve, për t’i afruar ata më shumë më Kombin e Nënë Terezës, nuk u vlerësua nga shtete shqiptare as me dekoratën që mbanë emrin e shenjtëreshës ”Nënë Tereza”,-ndërkohë që patriotë të dyshimtë u ngjitën deri në titujt dhe urdhërat më të lartë, që mbajnë emrin e heroit kombëtar , tituj e urdhëra kalorësie, Nder e Flamur… etj….!Natyrisht se të turpëruar mbeten shtetet shqiptare, Jo Leka.Ai shkoi me nder e respekt edhe pa dekorimet e merituara!


Komuniteti shqiptaro-amerikan e ka nderuar me plot respekt patriotin me sjellje e bëma fisnikërije Lekë Gjeto Gojçaj, i cili ndërroi jetë me 4 gusht 2020. Të Enjten me 6 gusht, edhe pse në kushtet e rrepta të diktuara nga Pandemia e koronavirusit, me rregulla strikte të mbrojtjes dhe ruajtjes së distancës sociale, kanë qenë të panumërt pjesmarrësit në homazhet e organizuar në në Shtëpinë Mortore YORKTOWN FUNERAL HOME,New York. Për shtatë orë vargu i bashkatdhetarëve (po edhe i amerikanëve) që kryenin homazhe nuk pushoi. Vatra ngushëlloi familjen Gojçaj me një pjesmarrje të madhe.


Në meshën e Dritës, që u drejtua nga famullitari Don Pjetër Popaj, ditën e Premte, 7 gusht 2020, duke filluar që nga ora 11 A.M.,pjesmarrja ishte e jashtzakonshme duke marrë parasyshë distancimin social dhe rrezikun e koronavirusit.


Në Meshë dhe në ceremoninë e varrimit ishin të pranishëm edhe përfaqësues të Vatrës: Kryetari Elmi Berisha, Presidenti i Nderit Agim Rexhaj, anëtari i Kryesis Zef Balaj,Arkëtari Marjan Cubi me Familje,anëtarët e kryesisë Anton Raja, Mark Mrnaçaj,vatarni Aleks Mrnaçaj, Mhill Gjuraj-anëtar i Këshillit, Kryeredaktori i Diellit Dalip Greca, e të tjerë.
Gjatë Meshës Dom Pjetër Popaj vlerësoi Lek Gojçaj, jo vetëm se besimtar i përkushtuar i fesë, por edhe si një atdhetar, që punoi pa u lodhur dhe pa u kursyer për Kombin, e vlërësoi për bamirësi, por edhe si qytetar i sjellshëm, komunikues,si njeri fisnik, I shkueshëm me të gjithë, i qeshur, i dashur. Leka të bënte për vete me karakterin e tij, të qeshurën e tij, shpirtin e tij fisnik.Leka shkoi, por pas ka lënë gjurmët e një jete që i bën krenarë pasardhësit dhe miqtë e tij. Dom Pjetri tha se ne po japim lamtumirën për ndarjen fizike prej nesh, por ai do të jetë përherë mes nesh me veprat dhe kujtimet që ka lënë pas. Kontributi i Gojçajve është aty në Kishën Zoja e Shkodrës, që nga fillimi, ndërtimi, është tek Shtatorja e Shenjtëreshës Nënë Tereza,para Kishe, që u uron e para mirëseardhjen besimtarëve të gjakut të saj. Atë e dhuruan vëllezërit Gojçaj. Shtatore të tilla ata ndërtuan e dhuruan jo vetëm në New York, por edhe në Michigan, Tuz (Malësi), Prishtinë, Mitrovicë, Strugë etj.


Varrimi i të ndjerit u bë në varrezat “GATE OF HEVEN”, New York.(Më shumë lexoni në Gazetën Dielli në print)

*Me shume fotografi gjeni ne FB