dalip greca – Page 18 – Dielli

Përkujtesë – 27 Qershor, Dita e Gjenocidit ndaj popullsisë Çame

June 27, 2020 by dgreca

MASAKRAT GREKE NË ÇAMËRI DHE NDERKOMBETARET

-Masakra greke ndaj çamëve është e njohur edhe nga amerikanët: Sipas kreut të Misionit të Shteteve të Bashkuara të Amerikës në Shqipëri, Jozef Xhejkobs(Joseph Jacobs) :” në Vjeshtën e vitit 1944 dhe në muajët e parë të vitit 1945, autoritet në Greqinë veriperëndimore, kryen me egërsi dhe brutalitet dëbimin e rreth 25 mijë çamëve nga shtëpitë e tyre…

– Deputeti i Parlamentit anglez z. Hutchinson, kishte denoncuar masakrat greke në Çamëri dhe kishte takuar refugjatët çamë në Shqipëri. Ai kërkoi Komision Ndërkombëtar për mbrojtjen e çamëve.

– Shoqata Çamëria në SHBA i kërkoi Imzot Nolit që t’i përfaqësonte në Londër për të kërkuar bashkimin e Çamërisë me Shqipërinë. Noli ia delegoi Misionin Dervish Dumës-

Nga Dalip GRECA *

Shqipëria vazhdon të fshihet si struci përballë Greqisë për çështjen Çame. Në 30 vite demokraci askush prej ministrave të Jashtëm, askush prej kryeminsitrave, Ministrave, Kryetarët e Partive kryesore, nuk kanë arritur ta artikulojnë qoftë dhe në mënyrë diplomatike kërkesën për të drejtën njerëzore elementare, të pronës, të shtëpisë, të varreve, pa lë që të guxojnë të kërkojnë hapur njohjen e gjenocidit të ushtruar nga Forcat e Lidhjes Kombëtare Greke ndaj popullsisë së pambrojtur. Askush nuk mund ta mbulojë e ta fshëhë një masakër të përgjakur që nën tymin dhe flakën e Luftës së Dytë Botërore, vrau, përdhunoi, përzuri me dhunë mijëra shqiptarë çamë nga trojet e tyre. Fatkeqsisht masakrat e grekëve, sipas studiueses Miranda Vickers , patën edhe e mbështetjen dhe autorizimin e britanikëve ( Miranda Vickers” The Cham Issue- Where to Now”, botuar nga Defence Academy of the United Kingdom, Jannuary, 2007, dhe sjelle ne gjuhen shqipe nga Xhevdet Shehu). Citoj: Kolonel Kris Udhauz (Chris Woodhouse), shef i Misionit Ushatark Britanik në Greqi, njoftonte:”I inkurajuar nga Misioni aleat që kryesoja, Zerva i shpërnguli çamët nga shtëpitë e tyre.”

Masakra më e përgjakur ishte ajo që ndodhi me 27 qershor 1944 në qarkun e Paramithisë, kur forcat e Lidhjes Kombëtare Republikane Greke(EDES) të gjeneral Zervës hynë në qytet dhe vranë rreth 600 shqiptarë çamë, burra gra dhe fëmijë. Të nesërmen një tjetër batalion i forcave zerviste u sul në Pargë dhe vrau 52 shqiptarë të tjerë. Më 23 shtator 1944, një tjetër masakër u bë në Spatar, ku përveç reprezaljeve, grabitjeve e shkatërrimeve, u vranë 157 vetë, gratë e reja dhe vajzat u përdhunuan, bashkë me burrat që ishin gjallë, u syrgjynosën në brigjet e Egjeut. Sipas statistikave, gjatë sulmeve mbi qytete e fshatra në vitet 1944-45, u vranë 2771 shqiptarë çamë dhe u përzunë dhunshëm 28 mijë çamë, që u vendosën në Vlorë, Durrës, Tiranë, Lushnjë etj.

Masakra është e njohur edhe nga amerikanët: Sipas kreut të Misionit të Shteteve të Bashkuara të Amerikës në Shqipëri, Jozef Xhejkobs(Joseph Jacobs) :” në Vjeshtën e vitit 1944 dhe në muajët e parë të vitit 1945, autoritet në Greqinë veriperëndimore, kryen me egërsi dhe brutalitet dëbimin e rreth 25 mijë çamëve nga shtëpitë e tyre.Ata u përzunë matanë kufirit pasi u ishin grabitur tokat dhe pronat e tyre.Qindra meshkuj çamë të moshës 15 deri në 70 vjeç, u internuan në ishujt e detit Egje.102 xhami u dogjën.( M.V. F 13).
Me 17 Tetor 1945, komuniteti çam i përzënë barbarisht nga trojet e shtëpitë e veta, kërkonte ndihmën e Shqiptarëve të Amerikës.
Në një letër drejtuar shqiptarëve të Amerikës, firmosur nga Këshilli Antifashist Çam, kryetar Vehip Demi dhe sekretar Dervish Dojaka, pasi denoconin masakrat greke, pasi përshkruanin Shën Bartolomeun e masakrimeve greke për më shumë se 22 mijë shqiptarë, kërkonin: Në emër të foshnjëve të mjeruara, në emër të grave të lebetitura nga tmerri dhe të mbetura pa burra, në emër të një popullate të martirizuar prej shovenëve katilë grekë, ne emër të Zotit, dëgjojeni zërin tonë për një ndihmë të menjëhershme dhe të shpejtë prej jush, vëllezër shqiptarë të Amerikës(Dielli tetor 1945). Me 12 Dhjetor 1945, Dielli botonte në Faqe të parë shkrimin”Çamët masakrohen nga monarko-fashistët grekë. Çamët kërkojën mbrojtje ndërkombëtare.
Bashkëpunëtori i Dielli dhe një nga miqtë e Vatrës, Dervish Duma, raportonte nga Londra se gazeta Daily Mail botonte një shkrim special nga Tirana prej korrespondentit të saj special Alexander Clifford, që shkruante “25 mijë çamë, muhaxhirët europianë në gjendje më mizerabël, kërkojnë përsëri të kthehen në shtëpitë e tyre në Çamëri, në Veri-Perëndim të Greqisë.Ata thonë se nuk guxojnë të kthehen pa mbrojtje ndërkombëtare.Të gjithë këta muhaxhirë janë muhamendanë nga feja, shqiptarë nga gjuha, subjekte (shtetsi) greke.
Korrespondenti shkruante:Në qershorin e vitit të kaluar u sulmuan prej ushtrisë greke monarko-fashiste të Gjeneralit Zerva, një shumicë e madhe u masakruan. Të tmerruar i tërë grupi kapërceu kufirin e Shqipërisë. Disa prej tyre u kthyen në Greqi vjet në Mars, por përsëri u goditën prej grekëve. Shumica e refugjatëve janë gra, fëmijë të vegjël e pleq.Gjendja e tyre këtë Dimër do të jetë shumë e tmerrshme.
***
Shoqëria Çamëria në SHBA, me 26 Shtator 1945, mbajti një mbledhje të posaçme, ku një komision u ngarkua me detyrën që të shkonte në Boston dhe të takonte Imzot Nolin dhe t’i propozonte atij që të përfaqësonte Çamërinë pranë Konferencës së Londrës për t’i kërkuar bashkimin e Çamërisë me shtetin shqiptar.
Me 10 tetor 1945 Komisioni urdhëroi të mbahej një mbledhje tjetër, nën kryesimin e Hysni R.Sejko dhe reporter të takimit R. I. Didani. Kjo mbledhje pati dy qëllime 1- Kryetari z. Hajredin Çeço të jepte hollsitë për udhëtimin e tij dhe të sekretarit pranë Imzot Nolit dhe 2-Zgjidhjen e një komisioni të posaçëm për organizimin e një fushate që synonte të ndihmonte financiarisht refugjatët çamë. Mbledhja vendosi: nëse Imzot Noli për shkak të ngarkesës nuk do ta pranonte Misionin, ishte i lutur që të ngarkonte një person të aftë që mund ta kryente misionin. Dhe kështu ndodhi; Noli propozoi patriotin Dervish Duma që ishte në Londër për të ndërmjetësuar për kërkesën e shoqërisë Çamëria.
Siç i shkruante gazetës Dielli të 19 dhjetorit 1945, z. Dervish Duma, deputeti i Parlamentit anglez z. Hutchinson, kishte denoncuar masakrat greke në Çamëri. Deputeti laburist kishte shkuar edhe në Shqipëri,ku ishte takuar me popullsinë çame të shpërngulur.
Gazeta londineze News Chronicle botoi deklaratën e deputetit me 11 dhjetor 1945 nën titullin” Grekët vranë 2500 shqiptarë dhe shpërngulën me maskra 25 mijë”. Deputeti anglez nga zona Rusholm të Machesterit kishte vizituar Shqipërinë dhe ishte i revoltuar nga barbarizmat greke ndaj popullsisë së pafajshme shqiptare. Ai paralajmëronte se në sesionin e Parlamentit do të kërkonte me forcë e zë të lartë ngritjen e një Komisioni Ndërkombëtar për përkujdesjen dhe mbrojtjen e refugjatëve shqiptarë, të cilët u zbuan forcërisht prej vatrave të tyre.
Përse i sollëm këto kronika? Thjesht për të treguar se çështja çame egziston, askush s’mund ta mohojë.

*Dielli-arkiv

REVISTA-KUQ E ZI- NJË THIRRJE PËR TË MOS HARRUE

June 20, 2020 by dgreca

NGA LEK PREVIZI*/

Në pranverën e vitit 1945 ose, më saktë, në muajt mars, prill e maj në Shqipni kanë ndodhë ngjarje të hidhura e tragjike. Sivjet ishte 75-vjetori dhe për arsye të pashpjegueshme këto ngjarje u lanë krejt në heshtje. Po a hyn minarja në thes? Ky përvjetor është një thirrje për të mos harrue, për të reflektue. Po përse flitet, në fakt, çfarë ka ndodhur para 75 vjetësh? Mund të thonë disa mendjelehtë se që nga ata tre muaj ka kalue tashmë treçerek shekulli. Të shkuara e të harruara! Pse t’i rikujtojmë? Atë do të dëshironim edhe ne, por ja që një kushtrim brenda nesh nuk na le të qetë e na trazon. Ai sikur na thotë: po si, o ju motra e vëllezër, na paskeni harrue? Vërtet ne s’jemi ma të gjallë që të na shihni, por mos harroni fatin tonë, që e keqja të mos kthehet ma. Por që dikujt kjo s’i pëlqente fare. Pse te na kaperdisen këto burra që i përkasin botës së vjetër, e mos t’ua zemë vendin ne, njerëzit e botës së re? Të fshihen fësht, të zhduken, se s’kemi nevojë për ta. T’i dënojmë e t’i shpallim armiq e tradhtarë e t’i pushkatojmë e t’i varim në litar. Jo që po na del se s’kanë bërë asgjë, as mizë s’kanë shtypur me dorë, e po thuhet. Eh! Po ata na zenë vendin, ore derdimenë, apo s’janë të shkolluar e me alamet diplomash ne xhep. Ata i përkasin botës së vjetër, të zhduken! Shpejt t’i nxjerrim para një Gjyqi Special, që ta marrë vesh bota se s’bëjmë shaka. Pse vetëm Nurembergu të përmendet, po ne çfarë jemi? Bota le të dridhet prej nesh, prej Partisë sonë Komuniste, që do të përmbysë botën e vjetër. Në vend të saj do të jetë një botë e re e njeriu i ri ! S’kemi gjykatës të shkolluar thoni? Pune e madhe! Është populli që ka marrë pushtetin në dorë, me shkollë e pa shkollë, gjyqi do të behet se s’bën! Ku? Atje në atë kinema e teatër të ndërtuar nga fashistët italianë. Në atë teatër që e quajtën “popullor” dhe “kombëtar”. Diktatori në atë tërbim s’u përmbajt e tha: Sot është klasa puntore që e ka marrë pushtetin në dorë me grykë të pushkës, e me grykë të pushkës do ta mbajë. Diktaturë? Po, diktaturë? Po! Diktaturë e proletariatit, e cila do të bjeri si grush çeliku mbi armiqtë e popullit e të Partisë! Kështu foli general- kolonel Enver Hoxha, i brohoritur nga dhjetra gjeneralë të tjerë pa asnjë klasë shkolle ushtrie. Dhe Gjyqi Special u hap. Në skenë rolet kryesore do t’i luanin shokët e partisë e partizanët e malit, me kryetar gjyqi general-kolonel, Koçi Xoxen, teneqexhiun e prokuror nëntogerucin llafazan, general-major Bedri Spahiun. Lum si na e lumë Shqipëria! E si mos të lumturohet vendi kur i bëhen fli 60 therorë të zgjedhur me gisht, të cilët, me gjakun dhe eshtrat e tyre do të forcohen themelet e partisë e të diktaturës së saj mizore?! Theroria me kurbanë, si në kohët parahistorike, ishte e vënë në urdhër dite. Kështu ndodhi që në skenën e atij teatri të luhej tragjedia shekspiriane, e një Makbethi shqiptar komunist, ku Makbethi i Shekspirit në krahasim me këtë në Tiranë duket si një xhuxh. Ç’ne ky krahasim ? – do të thotë dikush. Po a nuk e vrau ky Makbethi ynë kunatin ? Pse ? Për të vrarë edhe shokët e tij, që ta përcillnin në botën tjetër. Eshtë për të qarë ! Por ja, gomarit i vjen për të qeshur. S’kam parë të tillë gomar kaq budalla ! E populli i ve vulën : budallait liroji rrugën ! Këtu populli gaboi. Jo vetëm që iu lirue rruga, por iu hap bulevard që të bridhte pa teklif. Në po bejmë shaka, por shakaja thonë se është gjysma e së vërtetës. Por duke qenë se përjashtimi forcon rregullin, dhe në rastin tonë specifik, shakaja jo gjysmë, por del dyfish e vërtetë. Budallai, që s’ishte budalla por kriminel, kapi shpatën « edhe një herë për situatën » dhe ia flakëroi Shqipërisë anembanë, duke mos lenë burrë të mirë në kambë, por iu duk pak, dhe kaloi te gratë e fëmijët, duke i kositë pa iu dridhë mustaku, megjithëse nuk mbante mustaqe.

Ç’hyn kjo kët ? – do të thotë përsëri dikushi ? More, ti dikushi, po mos, vallë, je qorr nga sytë e shurdh nga veshët, që s’i sheh ato pleq, gra e fëmijë mjeranë, të mbyllur në qark telash me ferra, më keq se bagëtia? A nuk i sheh fëmijët që vdesin si miza në prehrin e nënave të shkreta që kuja e tyre ther dhe qiellin ? Ku shkuan e nga u zhdukën pa lenë gjurmë varri gjëkundi, mijërat e shqiptarve, që u kositën nga ajo shpatë vrastare ? Nuk po shtyhemi më gjatë, e lemë me kaq, kush don të kuptojë le të kuptojë. Për ata që s’kuptojnë ose s’duan të kuptojnë, le të mbeten ashtu siç janë.

Editorial I revistes “Kuq e ZI”

***

Shënim i Dielli

Edhe pse në kushtet e kufizuar të Pandemisë së Koronavirusit(Covid-19), revista Kulturore Euro-Shqiptare me emrin simbolik kombëtar”KUQ E ZI”, e vazhdoi rrugëtimin e saj në edicionin e XXVII- Nr.153.

Edhe redaksia e Diellit e mori numrin e ri dhe falenderon botusin Lek Previzi. Ballina e revistës i kushtohet gjyqit të ashtuquajtur Special, gjyqit të përgjakur të diktaturës komuniste, që coi para skuadrës së pushkatimit ajkën e intelektualëve nacionalistë shqiptarë. Sivjet ishte 75 vjetori i këtij gjyqi, dhe botusi Lek Previzi, i kushtoi editorialin përvjetorit të harruar si dhe analiza e komente.Po ashtu në nderim të viktimave revista boton specialen kushtuar 75-VJETORIT TË GJYQIT SPECIAL, 1 mars- 1 prill 1945”- Nderohet kujtimin I viktimave të komunizmi, dhe me këtë rast publikohet lista emrat e tyre, duke i rikujtuar që të mos harrohen. Revista sjell Lista e plota të të pushkaturëve dhe të burgosurëve.

Një analizë e vecantë i kushtohet nga botuesi Lek Previzi edhe harresës tjetër:” Maj 1945, 75-vjetori i kampëve të internimit-Heshtje i pashpjegueshme”.

Në këtë numër lexuesi do të gjejë artikuj të shumtë, informacione, analiza, refleksione, cikle poetike, cikle vizatimore.. etj. Revista sjell artikullin e studuesit Thas L. gjika me titull” KATARSA KOMBËTARE KËRKON DËNIMIN E KRIMEVE TË KOMUNIZMIT QË NË FILLIMIN E TYRE”.

Me interes është edhe PROLOG I DRAMËS “DALLANDYSHET E LOTËVE TË PASTREHË” të Arshi Pipës;- Dërguar për revistën nga Gjergj Jozef Kola-Vjenë; me shumë interes është publikimi i shkrimit historik-studimor kushtuar- 320-vjetorit të hypjes në fronin e Selisë së Shenjtë në Vatikan të Papa Klementi XI, Gjon Françesk Albani, me orgjinë shqiptare nga Laçi i Kurbinit…

Po në këtë numër vjen edhe analiza e studiuesit Mërgim Korça

“VEPRA E VISAR ZHITIT, KUFIRI QË NDAN REALIZMIN SOCIALIST SI PROPAGANDË, NGA LETËRSIA E MIRËFILLTË ARTISTIKE E TË VËRTETAVE HISTORIKE “. Në këtë numër revista sjell kronikën e ndarjes nga jeta të shkrimtarit dhe studiuesit Moikom Zeqo, së cilës i bashkëngjitet edhe ngushëllimi i revistës.

Përmes artikullit të Fatbardha Mulleti Saraci, revista sjell “MEMORIE PËR ZNJ. LAURA KEQI (1957-2020)”- si dhe ngushëllimin e Redaksisë.

Nga numri i kaluar, në këtë numër vijon Kapitulli i dytë i librit- “Shqipëria-Nga Origjina në ditët tona” i Lek Previzit.

Me rastin e 70 vjetorit të Ditës së lindjes të gazetarit, ish drejtor i Divizionit të Eurazisë në Zërin e Amerikës, z. Frank Shkreli, revista sjell urimet e saj dhe boton një shkrim të z. Shkreli publikuar me 16 shkurt 2020 në Gazetën Illyria me titull” Shqipëria postkomuniste lëngon ende nga nostalgjia për komunizmin”…

Profesori Sami Repishti ka sjellë në këtë numër të rvistës artikullin” Lady Macbeth del nga skena”, ku analizohet roli i Nexhmije Hoxhës në diktaturën shqiptare,duke analizuar edhe “Letrën-testament” të saj, duke arritur në përfundimin se ajo ishte një “ e sëmurë pa shërim!”…

Numri i ri i revistës “Kuq e Zi” mbyllet me cikle poetike, vizatime nga koha e internimit, në punë të detyruar-Pluk –Lushnje 1980-1990, cikël me forografi nga Pandemia”Si dukeshin disa qytete gjatë izolim”…

*Në këtë numër revista boton edhe një artikull nga arkivi i Diellit: Dalip Greca :”Revolta e Spaçit përkujtohet e nderohet në Nju Jork”- që ka në fokus: Përkujtimin e së dielës të 17 Majit 2015, në Kolegjin Monroe të Nju Jorkut, ku është organizuar një veprimtari nderuese dhe përkujtimore për heronjtë, martirët dhe qendresatrët e Revoltës së Spaçit dhe Qafë Barit. Në përvjetorin e 42 -të Revoltës së Spaçit, Asambleja e Shtetit të Nju Jork-ut, me sponsorizim të z. Mark Gjonaj,(atë kohë) ansambleist i Distriktit 80-të, si dhe nga Këshilli i Bashkisë të qytetit të Nju Jork-ut, sponsorizuar nga anëtari i këshillit të Bashkisë për distriktin 15, Ritchie Torres, nderuan me proklamatë qendrestarin e burgjeve të diktaturës komuniste Pëllumb Lamaj. Proklamatën e ka lexuar dhe më pas dorëzuar ansambleisti i Shtetit të Nju Jorkut, z. Mark Gjonaj.

Faleminderit botuesit Lek Previzi për këtë numër të pasur me informacione e analiza të revistës”Kuq e Zi”!

VATRA NË KOHËN E KORONAVIRUSIT-DEGA E VATRËS NË NEW JERSEY

June 19, 2020 by dgreca

-SIPAS BISEDËS ME KRYETARIN E DEGËS Z. ADEM MALELLARI-/

PAK HISTORI: Dega e tanishme e Vatrës në New Jersey u organizua në prag të Kuvendit të Federatës “VATRA” të 19 Janarit 2020, me kontributin e nënkryetarit të Federatës Adriatik Spahiu. Si datë krijimi është 12 Janar 2020. Kryetar i degës është z. Adem Malellari.
Nuk është hera e parë që Federate Vatra organizon degë në shtetin e New Jersey-t. Dega e parë në New Jersey u themelua me 29 Shtator 1914 dhe u regjistrua në librin e Federatës – dega me Nr 36. Ajo e kishte qendrën në Atlantik City, New Jersey. Fillimisht pati 23 anëtar, por shpejt e shtoi numrin e anëtarëve. Pleqësia e parë në kohëformimin e degës përbëhej nga këta zotërinj: Kryetar- Z. Lazar Shajko, arkëtar z.Andon Myzeqari, Sekretar z. Panajot Kissi, ndërsa pleq u zgjodhën: Nikolla Panxho dhe Spiro Leka.
Në fushatën historike “Për Shpëtimin e Shqipërisë” që u organizua me 3 Qershor 1917, dega u bë pjesë aktive duke dhuruar kursimet e çdo anëtari të saj.Në Librin e nderit të fushatës janë shënuar këta kontributor të degës me shumat përkatëse. Saktësojmë se rroga mesatare e një punëtori ishte $5-7 në javë :
1- Thoma V. Goga $25.00
2- Spiro Leka $ 20.00
3- Konstandin & Philip Kona $ 10.00
4- Margarit Kondilli $10.00
5- Taqi Minxhali $ 15.00
6- Anastas Kovaçi $ 10.00
7- Vell. K . Avrami $ 30.00
8- Dhimitri At Thimi $ 10.00
9- Anastas Luka $ 5.00
10- Gjergj M. Tutulani $15.00
11- Panajot Kissi $10.00
12- Kristo Dhaskali $10.00
13- Petro J. Xoxa $ 10.00
14- Philip Mishti $ 7.00
15- Athanas Xega $ 10.00
16- Vell. Goxhumana $ 15.00
17- Vell. Myzeqari $ 20.00
18- Lambi Karafili $ 5.00
19- Spiro Koliani $ 5.00
20- Vangjel Blumbi $ 2.00
21- Vell. Beqari $15.00
22- Nikolla Qendro $ 7.00
23- Spiro Kosta $10.00
24- George Vulpe $ 20.00
25- L.P. Papas $ 7.00
26- Vell. Kotori $ 5.00
27- Naum Droboniku $ 5.00
28- Vell. Vesho $ 10.00
29- Koçi Minxhari $ 5.00
30- Lambi Xoxa $ 5.00
31- Vangjel Gjata $ 5.00
Shuma e përgjithshme e mbledhur nga Dega e Vatrës në Atlantik City-NJ $338.00. Numri i kontributorëve 31. Rekordin e shënoi z. Thoma V. Goga me $25.00. Mesatarja për person $10.90.
***
Dy vjet pas degës në Atalantic City një tjetër degë u ngrit në shtetin e New Jersey-t, ajo me nr. 56 në Librin e Federatës. Kjo degë e kishte qendrën në Camden të NJ. Dega filloi organizimin me 6 nëntor 1916. Pleqësia e parë u zgjodh kështu: Kryetar- z. Varfe Dervish Zejnel Konitza, Sekretar-Z. Ismail Mahmut Gostivishti, Arkëtar- z. Sali Shefki Leshnja, dhe Pleq: Abas Etem Kaica, Dylber Qamil Taçi dhe Nesim Osman Vrepcka.
Në shtetin e NJ u ngrit një degë edhe në vitet ’80 e organizuar nga anëtari i bordit të Federatës z. Ymer Doda.
Në Federatën Vatra ka shumë bashkatdhetarë që jetojnë në Shtetin e New Jersey-t, që janë anëtarësuar në Qendër, ndërsa një pjesë janë anëtar të degës Hudson Valley-NY.
Dega që u organizua me 12 Janar 2020, është relativisht e re dhe ende nuk e ka provuar veten me ndonjë veprimtari serioze. Pandemia ka qenë një nga faktorët e frenimit, por gjithësesi kryetari i saj z. Adem Malellari është optimist se dega do të forcohet dhe do të shtojë anëtarsinë. Po si po e kalon Pandeminë dega e re?
Ja si iu përgjigj pyetjeve të reaksisë kryetari Adem Malellari:

Dielli: Si është gjendja shëndetsore juaja dhe e familjes në këtë kohë Pandemie? A ka njeri nga rrethi juaj familjar e miqësor të prekur nga COVID-19?
Z. Adem Malellari: Faleminderit Zotit, kujdesit të treguar nga perfaqesuesit e shtetit dhe kujdesit të treguar nga ana jonë, nuk kemi pasur asnjë të prekur si familje dhe si miqësi ketu ne SHBA, Europe dhe vendlindje Pogradec.
Dielli: Si është situata në New Jersey përsa i përket Koronavirusit?

Z. Adem Malellari: Situata ne New Jersey ka qenë mjaft e rëndë nga prekja dhe humbja e jeteve nga koronavirusi. Shteti ku ne jetojmë vjen i dyti, pas New Yorkut, si për numrin e të infektuarëve ashtu edhe për numrin e vdekurëve. Deri ditën e Mërkurë, 17 Qershor 2020, numri i të infektuarëve u raportua 170 mijë e 559 persona, ndërkohë që vetëm në 24 orëshin e fundit u regjistruan rreth 350 persona të prekur. Shteti ka raportuar se ka realisht të infektuar aktiv 123 mijë e 745 persona. Për 1 milion banorë ka regjistruar 19 mijë e 207 të infektuar. Është i dyti shtet edhe për numrin e viktimave. Deri tani janë raportuar 12 mijë e 891 të vdekur. Për 1 Milion banorë ka 1 mijë e 451 të vdekur. Beteja nuk përfunduar. Parashikimi është që deri me 1 tetor të ketë shifrën e përgjithshme rreth 14 mijë e 231 të vdekur. Numri i shëruarëve është 33 mijë e 963.
Zona më me shumë viktima, ku jetojnë dhe shumë shqiptarë është Bergen , ku janë regjistruar 1 mijë e 681 të vdekur(8 të vdekur gjatë ditës së mërkurë, 17 qershor), ndërsa numri i të infektuarëve bë Bergen kap shifrat 18 mijë e 939. Ka dhe qarqe që janë mbi këët shifër si Hudson me 19 mijë e 238 të infektuar(numri i të vdekurëve 1, 290), Passaic me 18 mijë e 988 të infektuar(numri i vdekurëve 1,007), Essex me 18, 437 të infektuar(1, 755 të vdekur, 4 të vdekur të mërkurën), Middlesex me 16 mijë e 513 të infektuar(1,094 të vdekur- 9 të vdekur të mërkurën), Union me 16 mijë e 337 të infektuar dhe 1, 131 të vdekur etj…
Dielli- Po në zonën tuaj, si është gjendja? A u morën aty masa kufizuse? A ka filluar rihapja e bizneseve , parqeve, plazheve?

Z. Adem Malellari: Tek gjendja është në kontroll. Ne zonen tone u moren masa efikase te domosdoshme per nje mbrojtje sa me te mirë të jetës së qytetarëve. Rihapja e bizneseve te cilat u mbyllen po vijon te rihapen gradualisht, hap pas hapi, duke respektuar fazat. Hapja e parqeve u krye ne total, kurse hapja e plazheve është ende ne menyre te kufizuar, ndërkohë që janë aktizuar bizneset e ndërtimtarisë, pylltarisë, shitjet me pakicë etj…
Dielli: – U bënë më shumë se tre muaj që jeni të izoluar, si i keni mbajtë lidhjet me kryesinë e degës dhe me anëtarët e saj?

Z. Adem Malellari: Lidhjet me kryesine dhe anteresine i kemi mbajtur te vazhdueshme duke komunikuar nepermjet rrjeteve sociale, telefonatave, jemi interesuar per shendetin e tyre, te familjeve dhe me gjere. Me disa qe jemi afer dhe jemi takuar duke ruajtur distancen e duhur.
Dielli: Po me qendrën i keni mbajtë lidhjet?
Adem Malellari: Lidhje me qendren i kemi mbajtur kryesisht me presidentin e Federatës Pan Shqiptare të Amerikës”VATRA” Z. Elmi Berisha dhe me editorin e gazetës Dielli, Dalip Greca. Gjithashtu, gjate kesaj kohe kam kominikuar disa here me z. Adriatik Spahiu, nen/kryetar i Vatrës.Komunikimet kane qene nepermjet lidhjeve telefonike dhe mesazheve nga rrjetet sociale. Gjithashtu kemi ndjekur informacionet dhe intervistat qe ka realizuar gazeta Dielli.
Dielli: – Dega juaj është më e reja, që u krijua në prag të Kuvendit të 19 Janarit. Cila është gjendja reale e saj. A e keni ruajtë anëtarësinë e krijimit të degës? Ka të larguar apo keni shtuar anëtar të rnj?

Adem Mallellari: Dega e Vatres New Jersey eshte dege e re e cila u krijua ne 12 Janar 2020, me ndihmën e nënkryetarit të Vatrës, njekohesisht kryetar i deges së Vatrës ne Jacksonville –Florida, z. Adriatik Spahiu, si dhe prej njërit nga antarit e kesaj dege z. Kujtim Mançellari. Kjo dege ka ne gjirin e saj anëtarë të moshave te ndryshme, kryesisht të rinj e te reja, te cilet jane perfaqesuar nga krahina te ndryshme të Shqiperise. Nuk kemi të larguar. Presim rihapjen e plotë të shtetit që të nisim nga veprimtaritë dhe shtimin e anëtarëve të rinj.(Pergatiti:Dalip greca)

LIBRAT E DR. BESIM MUHADRI NË BIBLIOTEKËN E VATRËS

June 17, 2020 by dgreca

Sot, e Mërkurë 17 Qershor, Dr. Besim Muhadri, profesor në fakultetin e Filologjisë të Universitetit të Gjakovës”Fehmi Agani”, i dhuroi bibliotekës së Vatrës librat e tij:

”Prof. Dr. Rexhep Krasniqi-Një jetë në shërbim të Shqipërisë Etnike”, 2 kopje, botim në Gjakovë, viti 2019.
Esencat e Mendimit Letrar, botim në New York ”Adriatic Press”(dy kopje)
Riza Daci-Pesëdhjetë Vjet me Sharki në Dorë, botim në New -2020

Librat u pranuan me falenderime nga Kryeredaktori i gazetës”Dielli”, Dalip Greca. Të interesuarit mund të vijnë t’i marrin për t’i lexuar me detyrim kthimi.

VATRA NË KOHËN E KORONAVIRUSIT- DEGA NË JACKSONVILLE (NORTH FLORIDA)

June 12, 2020 by dgreca

-Sipas bisedës me nënkryetarin e Vatrës,kryetar i degës North Florida, Adriatik Spahiu-/

Dega e Vatrës në Jacksonville është krijuar nga kryetari i sotëm i saj, njëkohësisht nënkryetar i Federatës z. Adriatik Spahiu me 18 nëntor 2012, 8 vite të shkuara.
Rrethanat e krijimit të degës janë këto: Z, Spahiu i kishte lidhjet shpirtërore me Vatrën përmes gjyshit të tij Asllan Maksut Tolari, i cili ishte pjesë e bordit të degës së Vatrës në Neë Hampshire, që në krijimin e asaj dege. Kur po bëheshin përgatitjet për festimin e 100 vjetorit të themelimit të Federatës Pan Shqiptare të Amerikës “Vatra”, z. Spahiu kontaktoi me editorin e sotshëm të Diellit dhe shfaqi dëshirën që me gjithë familjen të merrte pjesë në festën madhështore të Vatrës në Neë York. Gjatë mbrëmjes gala, u shkel protokolli, dhe Adriatiku e mori fjalën dhe përshëndeti në emër të komunitetit të Floridës dhe u zotua se do të ngrinte degën e Vatrës në Jacksonville. Fjalën e mbajti dhe dega u krijua.
Po si e kanë kaluar vatranët në Jacksonville Pandeminë e Koronavirusit?
Për t’iu përgjigjur pyetjes, biseduam me z. Adriatik Spahiu.
Vatranët që jetojnë në Jacksonville e kanë përballuar Pandeminë pa ngjarje të jashtzakonshme, duke respektuar vendimet dhe urdhëresat e Guvernatorit.
Pyetjes :Nëse ka pasur në radhët e vatranëve apo familjeve të tyre të prekur nga COVID-19, si dhe për gjendjen e komunitetit shqiptar atje- Z. Spahiu përgjigjet: Fatmiresisht nuk ka te prekur as nga vatranët dhe familjet e tyre, as nga komuniteti. Në Jacksonville vazhdon të ndiqet situata e Pandemisë me vëmendje dhe respektohen fazat e rihapjes së bizneseve. Krahasuar me zonat e tjera të Floridës, Jacksonville ka tregues më të ulët, veçanërisht po t’i krahasosh me Miami, apo Palma Beach.
Si paraqitet situate e tanishme në shtetin e Floridës?
– Për numrin e të infektuarëve, Shteti i Floridës renditet i teti(pas Michiganit) me 69 mijë e 100 të infektuar deri në mbrëmjen e së Enjtes, me 11 qershor 2020. Gjatë ditës së enjte u raportuan 1 mijë 698 të infektuar të rinj. Numri më i madh i të infektuarëve i takon Miamit me mbi 20 mijë të infektuar(gjatë së enjtes u raportua për 271 të infektuar të rinj), ndërsa numri i të vdekurëve në të gjithë Floridën deri të enjten, u regjistruan gjithsej 2 mijë e 851 viktima, vetëm të enjten u regjistruan 48 të vdekur. Sërish qëndron në krye Miami me 798 të vdekur në tërësi, më pas vjen Palm Beach me 407 të vdekur, dhe me rreth 8 mijë të infektuar ,ndërkohë që Jacksonville ka rreth 1 mijë e 800 të infektuar dhe mbi 50 të vdekur.
Florida i ka kushtuar kujdes testimit të popullatës duke arritur që të testojë deri tani rreth 1 milion 307 mijë e 728 persona(duke testuar 60 mijë e 888 persona për 1 milion banorë). Gjithësesi beteja nuk ka përfunduar dhe parashikimet janë se deri në tetor numri i viktimave do të rritet.
Spahiu tregon për Diellin se ai dhe kryesia e degës i ka mbajtë lidhjet me anëtarësinë e degës, por edhe me degët e tjera të Vatrës.
Vatranët ashtu si e gjithë masa e qytetrave i janë bindur urdhërave dhe udhëzimeve të karantinës duke mos shkaktuar asnjë problem.
Komunikimet, thotë Spahiu, i kemi patur të rregullta dhe me shoqatat e tjera të komunitit, me qendrat dhe institucionet fetare si dhe me Konsullatat dhe Ambasaden Shqiptare dhe atë të Kosovës.
Pyetjes për gjendjen e anëtarësisë pas Kuvendit të Janarit 2020 në Detroit, Spahiu iu përgjigj: Nuk kemi rënie të anëtarësisë. Dega e Vatres në Jacksonville, si një nga deget më të mëdha të Federatës, vazhdon zgjerimin me antaresime të reja.
Ka kohë që në Jacksonville, ashtu si në të gjithë Floridën, ka filluar rihapja e bizneseve dhe po ecet hap pas hapi sipas udhëzimeve të kalimit nëpër faza.
Gjendja e bizneseve të bashkatdhetarëve, natyrisht nuk është e mirë, pasi janë duke u përballur me veshtiresite dhe pasojat e korona virusit dhe tash pas hapjes ka kufizime.

Për Spahiun situata e vështirë ka mbetë pas dhe ai beson se situate do të vijë duke u përmirësuar. Vështrimi është hedhur tek e ardhmja.
Madje ditën e sotme, 11 qershor, gjatë një konferencë shtypi në Viera, Guvernatori i Floridës, Ron DeSantis, njoftoi se shteti ka hartuar edhe një plan për hapjen e shkollave publike me “kapacitet të plotë” këtë vjeshtë.