-Qeveria miratoi Raportin e Komisionit Shtetëror, si dhe vendimin për t’i rekomanduar Presidentes së Republikës së Kosovës autorizimin e zëvendëskryeministrit dhe ministër i Punëve të Jashtme dhe ministrit të Punëve të Brendshme për nënshkrimin e Marrëveshjes për Kufirin Shtetëror ndërmjet Republikës së Kosovës dhe Malit të Zi/
– Kryetari i AAK-së, Ramush Haradinaj, nesër do të mbajë konferencë shtypi me temë: Demarkacioni i kufirit me Malin e Zi. Ai, në 6 gusht, u ka shkruar letër përfaqësuesve më të lartë shtetërorë e institucionalë dhe u ka kërkuar atyre pezullimin e nismës për marrëveshjen mbi kufirin Kosovë-Mali i Zi/
Nga Behlul Jashari/ PRISHTINË, 12 Gusht 2015/ Qeveria e Kosovës ka miratuar sot vendimin për t’i rekomanduar Presidentes së Republikës së Kosovës autorizimin e zëvendëskryeministrit dhe ministër i Punëve të Jashtme dhe ministrit të Punëve të Brendshme për nënshkrimin e Marrëveshjes për Kufirin Shtetëror ndërmjet Republikës së Kosovës dhe Malit të Zi.
Qeveria e Kosovës në mbledhjen e sotme të 44-të, drejtuar nga kryeministri Isa Mustafa, miratoi Raportin e Komisionit Shtetëror për Shënjimin dhe Mirëmbajtjen e Kufirit Shtetëror ndërmjet Republikës së Kosovës dhe Malit të Zi.
Kryeministri Mustafa ka theksuar se gjatë muajve të fundit janë mbajtur disa takime dhe se janë bërë përpjekje që të sqarohen të gjitha çështjet dhe që të mos mbetet asgjë pa u sqaruar.
U bë e ditur edhe për takimet e mbajtura, ku kanë marrë pjesë përfaqësuesit e Pejës duke përfshirë kryetarin e komunës edhe disa përfaqësues tjerë, të cilët janë marrë me këtë çështje, ndërsa nga qeveria e Kosovës kanë qenë kryeministri Mustafa dhe zëvendëskryeministrat Thaçi e Shala.
Kryeministri Mustafa tha se në këto takime që janë mbajtur janë interesuar se a ndryshon sipërfaqja e Republikës së Kosovës me rastin e përcaktimit të këtij kufiri. “Komisioni ka dëshmuar se sipërfaqja nuk ndryshon për asnjë centimetër katror”, tha kryeministri Mustafa, duke kërkuar nga kryetari i Komisionit që edhe një herë ta vërtetojë këtë para qeverisë, duke përfshirë edhe faktet se nuk ndryshon sipërfaqja e komunës së Pejës.
Zëvendëskryeministri i parë dhe ministri i Punëve të Jashtme, Hashim Thaçi pasi ka prezantuar procedurat e krijimit të Komisionit Shtetëror për Shënjimin dhe Mirëmbajtjen e Kufirit Shtetëror, ka theksuar se në pajtim me detyrat dhe përgjegjësitë e tij, për tre vite me radhë ky Komision ka hulumtuar, mbledhur, shqyrtuar dhe analizuar gjithë informacionin, hartën dhe dokumentacionin për vijën kufitare ndërmjet Republikës së Kosovës dhe Malit të Zi.
“Përgjatë gjithë kësaj kohe janë ngritur debate me ekspertë, me zyrtarë të lartë të qeverisë së Republikës së Kosovës, me kryetarë komunash dhe këshilltarë të komunave të brezit kufitar me Malin e Zi, si komunat e Junikut, Deçanit, Pejës dhe Istogut, si dhe me banorë në terren pranë zonave kufitare. Në bazë të Raportit të Punës së Komisionit Shtetëror, shënimi i vijës kufitare me Malin e Zi është në përputhshmëri të plotë me linjën kufitare sipas Kushtetutës së vitit 1974, me Planin e Ahtisaarit, dhe me Kushtetutën e Republikës së Kosovës, dhe se Komisioni Shtetëror garanton se me përcaktimin e vijës kufitare me Malin e Zi nuk tjetërsohet asnjë milimetër katror i territorit të Republikës së Kosovës”, tha zëvendëskryeministri Thaçi, duke shtuar se është bërë një punë tejet e madhe prej Komisionit, gjithashtu se ka qenë një përkushtim i vazhdueshëm i gjithë mekanizmave shtetërorë.
Raportin e Punës së Komisionit Shtetëror për Shënimin dhe Mirëmbajtjen e Kufirit Shtetëror e ka prezantuar para kabinetit qeveritar kryesuesi, Murat Meha.
“Komisioni me përgjegjësi të plotë, me transparencë të plotë dhe me argumente të dokumentacionit që i kemi këtu edhe në formë analoge dhe në formë digjitale, e thotë dhe e dokumenton që territori i Republikës së Kosovës nuk ndryshon për asnjë centimetër katror dhe komuna e Pejës, që e ka pasur territorin e vetë 602.2 kilometra katrorë, të njëjtat i ka pasur edhe në ’74, të njëjtat i ka edhe sot. Do të thotë, nuk ka ndryshim të vijës kufitare në bazë të dokumentacionit ekzistues dhe vijës administrative të cilën e ka menaxhuar edhe Kosova Autonome atëherë, dhe tash është kufi shtetëror i Republikës së Kosovës”, tha Meha
Më parë, në 5 gusht, qeveria e Kosovës ka miratuar nismën për lidhjen e Marrëveshjes për vijën shtetërore kufitare me Republikën së Malit të Zi, duke vlerësuar se “është tepër e rëndësishme për zhvillimin tonë, sepse shënon një fazë të rëndësishme të përkufizimit shtetëror të Kosovës me vendet fqinje dhe ndërtimit të marrëdhënieve të reja mbi bazën e respektimit të kufijve shtetëror”.
Ndërsa, në 6 gusht, kryetari i AAK-së dhe deputet i Kuvendit të Kosovës, Ramush Haradinaj, u ka shkruar letër përfaqësuesve më të lartë shtetërorë e institucionalë dhe u ka kërkuar atyre pezullimin e nismës për marrëveshjen mbi kufirin Kosovë-Mali i Zi, me arsyetimin se “ky proces është korruptuar”.
Aleanca për Ardhmërinë e Kosovës sot paralajmëron se, kryetari i kësaj partie opozitare, Ramush Haradinaj, nesër do të mbajë konferencë shtypi me temë: Demarkacioni i kufirit me Malin e Zi.