Nga Shefqet Kërcelli/
Mesditën e datës 8 janar 2015, Atasheu Ushtarak i SHBA, Kapiten i Rangut të II-të Ralph Shield, i cili plotësoi misionin e tij në këtë detyrë në vëndin tonë, zhvilloi një vizitë në Komandën e Forcës Detare. Në këtë vizitë Commander Shield shoqërohej nga Atasheu i Ri Ushtarak i SHBA në Shqipëri, Kapiten i Rangut të II-të Samuel G. Wartell. Ushtarakët amerikanë u pritën në një takim të vecantë nga Komandanti i Forcës Detare, Gjeneral brigade Ylber Dogjani dhe Zv/Komandanti i FD, Kapiten i Rangut të I-rë Adnand Agastra. Fillimisht Gjeneralbrigade Dogjani i uroi mirëseardhjen miqve amerikanë dhe një vit të mbarë, pasi kjo është dhe vizita e parë në Komandën e Forcëve Detare për vitin 2016. Më pas zoti Dogjani falenderoi atasheun Ralph Shield për mbështetjen që Zyra e tij ka dhënë për Forcat tona të Armatosura, vecanërisht për Forcën Detare. E kam ndjerë ndihmën e Departamentit të Shtetit dhe Ambasadës së SHBA në cdo detyrë që kam kaluar, nënvizoi Gjeneral Dogjani, si në Komandën Mbështetëse dhe këtu në Forcën Detare, ku kam parë konkretisht dhjetra projekte bashkëpunimi. Ndaj Dera e Komandës së Forcës Detare dhe bazave të saj, do jetë e hapur në cdo kohë nga Saranda në Shëngjin dhe për atasheun e ri, Commander Wartell. Këtu zoti Wartell do gjejë bashkëpunëtorët më të afërt theksoi Ai. Gjatë takimit ushtarakët e dy vendeve evidentuan fushat më të rëndësishme të bashkëpunimit ushtarak midis Forcës sonë Detare dhe Departamentit të Mbrojtjes e Forcës Detare të SHBA, që nga arësimimi e trajnimi i detarëve ushtarakë shqiptarë, vizita të anijeve ushtarake të SHBA në vendin tonë, stërvitjet e përbashkëta, anijet ushtarake të dhuruara nga Departamenti i Shtetit gjatë këtyre 20 viteve, {të cilat kanë shërbyer për operacionet më të rëndësishme në hapësirën tonë detare}, përpjekjet për ti mbajtur ato në gatishmëri nga specialistët tanë dhe amerikanë, Sistemi i Integruar i Vëzhgimit të Hapësirës Detare, etj. FD ka zhvilluar stërvitje me specialistët amerikanë jo vetëm në teatrin detar, sic janë grupet e bordingut dhe ato të zhytësave EOD, por dhe në Qëndrën e Simulimeve të Forcave të Armatosura, një institucion që ka qenë tepër rezultativ për Forcat tona të Armatosura. Gjatë bisedës tepër miqësore ushtarakët e dy vendeve shkëmbyen eksperiencën dhe vështirësitë e karrierës së tyre si ushtarakë në shërbim të vendit dhe paqes në botë. Gjithashtu u diskutua mundësia e perspektiva e bashkëpunimit të FD me Komponentin Detar të NATO-s, Napoli dhe Flotën e 6-të të SHBA, {Mesdhe dhe Afrika Perëndimore}, duke përfshirë të gjitha vendet Joniano-Adriatike, Greqi, Itali, Slloveni, Kroaci, Mali i Zi dhe Shqipëri. Për të gjitha projektet e bashkëpunimit midis Forcës Detare dhe Zyrës së Atasheut Ushtarak Amerikan në Tiranë u ra dakord që të diskutohet në takimet e ardhëshme. Në fund Komandanti i FD, Gjeneral Dogjani i uroi Kapiten Ralph Shield një fat të mbarë në detyrën e re, ndërsa Kapitenit Samuel G.Wartell, mirëseardhjen në vendin tonë si përfaqsues ushtarak i aleatit strategjik të shqiptarëve. Gjatë këtyre ditëve ushtarakët e SHBA të akredituar në vendin tonë zhvilluan vizita në QNOD, {Qendrën Ndërinstitucionale Operacionale Detare} dhe Komandat e tjera të Forcave tona të Armatosura.