-Ambasadori Delawie do të marrë pjesë në takimin e ftuar nga Jahjaga/
-Presidentja e Kosovës, Atifete Jahjaga, 2 muaj para përfundimit të mandatit, në përpjekjen e tretë për takimin maxhorancë-opozitë. Ajo ka ftuar liderët “në takim të përbashkët të të gjitha subjekteve politike parlamentare për të diskutuar tejkalimin e gjendjes së krijuar në vend”/
-Kushtetuta përcakton: Nëse në votimin e tretë, asnjëri kandidat nuk zgjidhet President i Republikës së Kosovës, shpërndahet Kuvendi dhe shpallen zgjedhjet e reja, të cilat duhet të mbahen brenda dyzet e pesë (45) ditësh/
Nga Behlul Jashari/ PRISHTINË, 6 Shkurt 2016/ Diskutimi me ftesën për të hënën të Presidentes së Kosovës për “tejkalimin e gjendjes së krijuar në vend” në një tryezë të përbashkët të liderëve të partive parlamentare të maxhorancës së koalicionit qeverisës dhe të opozitës së bashkuar, sipas reagimeve nuk do të ndodhë apo nuk do jetë i plotë me praninë. “Jemi kundër dhe nuk do t’i përgjigjemi pozitivisht ftesës së presidentes” është deklarimi nga subjekti më i madh opozitar, Lëvizja Vetëvendosje, Aleanca për Ardhmërinë e Kosovës sot “gjatë ditës do të merr qëndrim nëse do të shkojë apo jo”, kundër është deklaruar edhe Nisma duke theksuar se, “nëse presidentja thërret takim me rend të ditës organizimi i zgjedhjeve të parakohshme atëherë padyshim shkojmë”.
Presidentja e Kosovës, Atifete Jahjaga, ka ftuar liderët “në takim të përbashkët të të gjitha subjekteve politike parlamentare për të diskutuar tejkalimin e gjendjes së krijuar në vend”. “Takimi do të mbahet të hënën, më 8 shkurt, në orën 09:00 në zyren e Presidentes së Republikës së Kosovës”, thuhet në ftesën e presidentes Jahjaga, të cilën media e citon nga ftesa e dërguar një prej liderëve të opozitës.
“Mbështes iniciativën e presidentes së Kosovës për të ftuar në takim të hënën. Liderët e Kosovës duhet të gjejnë gjuhë të përbashkët”, ka shkruar në Tëitter ambasadori i Shteteve të Bashkuara të Amerikës në Prishtinë, Greg Delaëie.
Përfaqësuesi i BE-së në Kosovë, Samuel Zhbogar, ka deklaruar se “e mirëpret nismës e presidentes së Kosovës që të ftojë të hënën liderët e partive politike, për të gjetur një mënyrë që të dalë nga kriza aktuale politike”. “Në interes të Kosovës dhe popullit të saj, u bëj thirrje partive politike që të tregojnë përgjegjësi dhe t’i përgjigjen pozitivisht ftesës. E përgëzoj presidenten Jahjaga për lidershipin që ajo tregoi për të marrë këtë nismë”, citohet Zhbogar nga një komunikatë për media.
Pas pikërisht dy muajëve, në 6 prill 2016, Presidentja Atifete Jahjaga përfundon mandatin, ndërsa sipas Kushtetutës “zgjedhja e Presidentit të Republikës së Kosovës duhet të bëhet jo më vonë se tridhjetë (30) ditë para përfundimit të mandatit të Presidentit aktual”. Zgjedhja e Presidentit të Republikës bëhet nga Kuvendi i Kosovës, me votim të fshehtë.
Kushtetuta e Kosovës, poashtu, përcakton: “Zgjedhja e Presidentit bëhet me dy të tretat (2/3) e votave të të gjithë deputetëve të Kuvendit. Nëse asnjëri kandidat nuk merr shumicën prej dy të tretave (2/3) në dy votimet e para, organizohet votimi i tretë në mes të dy kandidatëve të cilët kanë marrë numrin më të lartë të votave në votimin e dytë dhe kandidati që merr shumicën e votave të të gjithë deputetëve, zgjedhet President i Republikës së Kosovës. Nëse në votimin e tretë, asnjëri kandidat nuk zgjidhet President i Republikës së Kosovës, shpërndahet Kuvendi dhe shpallen zgjedhjet e reja, të cilat duhet të mbahen brenda dyzet e pesë (45) ditësh”.
Ndërsa, situata e “ngrirë” e Kuvendit të Kosovës me bllokime nga opozita që prej fundverës 2015 vazhdon edhe këtë dimër dhe drejt pranverës, e gjatë kësaj periudhe ftesa më e re e presidentes së Republikës është përpjekja e tretë për t’i ulur në një tryezë pozitën dhe opozitën, por dy herët e kalauara ka zhvilluar vetëm takime të veçanta.
Në 22 janar 2016, Kryesia e Kuvendit të Kosovës mbajti mbledhjen e parë për sesionin pranveror, në të cilën ishin prezentë edhe kryetarët e grupeve parlamentare, por nuk u përcaktua ndonjë datë për seancë plenare. Opozita ka ritheksuar se “thirrja eventuale e seancave plenare nuk i kontribuon zgjidhjes së krizës politike”, ndërsa ka paralajmëruar protestën e ardhëshme për në ditën e festës së 8 vjetorit të shpalljes së Pavarësisë së Kosovës -17 shkurt, në Prishtinë.
Në 9 janar 2016, në protestën në Prishtinë, kundër qeverisë, sipas opozitës ishin rreth 100 mijë pjesëmarrës, ndërsa sipas Policisë së Kosovës ishin 8 mijë. Më parë, në ditën e festës së 28 nëntorit 2015, në manifestimin e opozitës në Prishtinë sipas vlerësimeve të saj ishin 35 mijë pjesëmarrës.
Nga ana e koalicionit qeverisës, dje në një konferencë shtypi, kryeministri Isa Mustafa, tha pas një takimi se mirëpret deklarimin e anëtarëve të Bashkimit të Sindikatave të Pavarura të Kosovës “që çështjet në Kosovë të zgjidhen me dialog, të zgjidhen në Kuvendin e Republikës së Kosovës, të zgjidhen përmes rrugëve institucionale, dhe jo me protesta të dhunëshme”. Zëvendëskryeministri i parë dhe njëherësh ministër i Punëve të Jashtme, Hashim Thaçi, po në këtë konferencë shtypi, tha se metodat dhe kauzat e opozitës janë të gabuara, ndërsa duke theksuar se PDK dhe LDK janë partitë më të mëdha u shpreh: “Ne për dy ditë mund t’i mbledhim 1 milion njerëz në mbrojtje të Republikës në sheshet e Kosovës, dhe cila do të ishte përgjigjeja pastaj. Kështuqë, nuk do të tërhiqemi para asnjë shantazhi të kujdoqoftë”.
Në dy përpjekjet e deritashme, të vitit 2015, për t’i ulur në një tryezë dialogu pozitën e opozitën, së pari në 19 tetor, presidentja e Republikës së Kosovës, Atifete Jahjaga, ka zhvilluar takim me Hashim Thaçin dhe Isa Mustafën në cilësinë e kryetarit të Partisë Demokratike të Kosovës, respektivisht të Lidhjes Demokratike të Kosovës dhe shefat e grupeve parlamentare të këtyre dy subjekteve, Adem Grabovcin dhe Ismet Beqirin. Në takim ishte edhe kryetari i Kuvendit të Kosovës, Kadri Veseli. Ndërsa, për të nesërmen, në 20 tetor presidentja ftoi për takim kryetarët e tre subjekteve politike opozitare, Lëvizja Vetëvendosje, Aleanca për Ardhmërinë e Kosoivës dhe Nisma për Kosovën.
Në 7 dhjetor njoftohej se, presidentja e Republikës Jahjaga priti në takim kryetarët e subjekteve politike opozitare, Visar Ymeri, kryetar i Lëvizjes Vetëvendosje, Ramush Haradinaj, kryetar i Aleancës për Ardhmërinë e Kosovës dhe Fatmir Limaj, kryetar i Nisma për Kosovën, në përpjekje për të tejkaluar situatën e krijuar në vend.
Gjatë ditës, Presidentja ka takuar edhe kryeministrin Isa Mustafa dhe kryetarin e Kuvendit, Kadri Veseli, bënte të ditur njoftimi dërguar në mbrëmje nga Presidenca e Kosovës, pa dhënë hollësi të tjera.
Në kundërshtim të katër marrëveshjeve të 25 gushtit 2015 me Serbinë, veçmas asaj për asociacionin e komunave me shumicë serbe në Kosovë, si dhe të marrëveshjes për demarkacionin e kufirit me Malin e Zi, tre subjektet opozitare, Lëvizja Vetëvendosje, Aleanca për Ardhmërinë dhe Nisma, me gjithësej 31 deputetë në parlamentin 120 anëtarësh, kanë organizuar protesta, aksione simbolike e manifestime, si dhe kanë bllokur Kuvendin e Kosovës edhe me hedhje gazi lotsjellës në sallën e seancave plenare e jashtë saj, ndërsa në këto zhvillime kishte edhe të arrestuar, përfshirë deputetë opozitarë.
“Numri total i deputetëve opozitarë të arrestuar në datën 14 dhjetor është nëntë, ndërsa numri total i deputetëve të arrestuar është 13”, theksonte në një njoftim Lëvizja Vetëvendosje në mesnatën e mesit të dhjetorit 2015, ndërkohë që Kuvendi i Kosovës, në orët e vona të natës kishte mbajtur seancë në sallë alternative, derisa deputetët e opozitës kishin qëndruar në sallën plenare, të cilën, sipas diskutimeve të pozitës, e kishin uzurpuar dhunshëm.
Në 23 dhjetor 2015, Gjykata Kushtetuese, pas kërkesës që i është bërë nga Presidentja e Republikës të vlerësojë përputhshmërinë e dokumentit të emërtuar “Asociacioni/Bashkësia e komunave me shumicë serbe në Kosovë – parimet e përgjithshme/elementet kryesore”, ka vendosur se, “këto Parime nuk janë tërësisht në përputhje me standardet kushtetuese përkatëse dhe ka konkluduar se akti ligjor i qeverisë së Republikës së Kosovës dhe Statuti duhet të jenë në përputhje”.
Pas këtij vendimi, qeveria e Kosovës ka siguruar se, “i tërë procesi dhe çdo akt juridik për të finalizuar asociacionin e komunave me shumicë serbe do bëhet duke u bazuar dhe respektuar konkluzionet e Gjykatës Kushtetues” dhe se “edhe Statuti i asociacionit do dërgohet në Kushtetuese”.
Në 21 dhjetor 2015, qeveria kosovare deklaronte se, “shpreh mirënjohje për punën verifikuese dhe përshëndet deklaratën e Departamentit të Shtetit të Shteteve të Bashkuara të Amerikës lidhur me Raportin për Demarkacionin e Kufirit ndërmjet Republikës së Kosovës dhe Malit të Zi”.
“Duke pasur parasysh përkrahjen e jashtëzakonshme e të gjithanshme të SHBA-ve për Kosovën, si dhe rishikimin e detajuar të vijës kufitare nga ana e Departamentit të Shtetit, qeveria e Kosovës konsideron se qëndrimi i Departamentit Amerikan të Shtetit dëshmon se procesi i shënimit të kufirit ndërmjet Kosovës dhe Malit të Zi është kryer në përputhje me të gjitha aktet juridike dhe realitetin faktik në terren”, theksonte deklarata.
Ndërkohë, në 27 janar 2016, në Bruksel është zhvilluar raundi 30 i dialogut në nivel të lartë kryeministror me Serbinë, ku Kosova ka kërkuar krahas axhendës së hartimit të statutit të asociacionit të komunave të banuara me shumicë nga komuniteti serb edhe axhendën e zhbërjes së strukturave paralele serbe.
“Ajo çfarë ne kemi kërkuar, është që ne do ta bëjmë punën ashtu siç jemi zotuar me marrëveshje dhe siç rezulton edhe vendimi i Gjykatës Kushtetuese lidhur me këtë. Por, po ashtu, kemi kërkuar që krahas axhendës së hartimit të statutit të asociacionit të komunave duhet ta kemi edhe axhendën e zhbërjes së strukturave paralele të cilat veprojnë, në mënyrë që të arrihen efektet të cilat ne pastaj do t’i quanim si efekte të normalizimit, sepse duhet t’ju mundësojmë që komunat me shumicë serbe ta kryejnë në suaza të plota përgjegjësinë e tyre si ua lejon ligji në të gjitha fushat, dhe nuk kemi nevojë që më tutje të kemi struktura paralele të cilat veprojnë”, ka deklaruar kryeministri i Kosovës, Isa Mustafa, pas kthimit nga Brukseli, në mbledhjen e qeverisë, në 29 janar.
Nga gjithësej 38 komuna të Kosovës, 10 janë me shumicë serbe, 5 prej tyre të reja –Graçanica, Kllokoti, Ranillugu, Parteshi dhe Mitrovica e Veriut, të formuara sipas Propozimit Gjithpërfshirës për Zgjidhjen e Statusit të Kosovës të kryenegociatorit Martti Ahtisaari – emisarit special të OKB-së.
Po sipas Paketës Ahtisaari, katër komunave me shumicë serbe që ekzistonin në Kosovë, Leposaviçit, Zubin-Potokut dhe Zveçanit, që të trija në veri, dhe Shtërpcës në jug, i është shtuar edhe një tjetër – Novobërda, me zgjërimin e saj.
***
Ambasadori Delawie do të marrë pjesë në takimin e ftuar nga Jahjaga

Prishtinë, 6 shkurt 2016 – Në takimin e së hënës të liderëve politikë të Kosovës, të thirrur nga Presidentja e vendit, Atifete Jahjaga, do të marrë pjesë edhe ambasadori amerikan në Kosovë, Greg Delawie.
Zëdhënësi i ambasadës amerikane, Philip Drewry, konfirmoi për Kosovapress se ambasadori Delawie është pajtuar të marrë pjesë në këtë takim.
“Ambasadori është pajtuar që të marrë pjesë në këtë takim, të thirrur nga presidentja, dhe i mbështet përpjekjet e saj që të ndihmojë partitë politike të gjejnë gjuhën e përbashkët”, tha Drewry.
Pjesëmarrjen në takim e kanë konfirmuar liderët e dy partive të koalicionit qeveritar, Kryeministri Isa Mustafa dhe zëvendësi i tij Hashim Thaçi.
Dy partitë opozitare, Vetëvendosje dhe NISMA, kanë thënë se nuk do të marrin pjesë në takim, kurse AAK ka paralajmëruar për të dielën marrjen e vendimit përfundimtar.