Mësuese Fabjola Gjinaj – Marku/

Shkolla shqipe “Gjergj Fishta” – Long Island, New York, festoi festat e fundvitit, Krishtlindjen dhe Vitin e Ri 2026. Shkolla shqipe “Gjergj Fishta” – Long Island festoi një semestër të shkëlqyer me arritje të jashtëzakonshme edukative, kulturore, patriotike e kombëtare. Shtimi i numrit të nxënësve, interesimi i mësuesve për të kontribuar në staf mësimor, shtimi i klasës së nxënësve të rritur 11-15 vjeç, interesimi e bashkëpunimi i ngushtë me prindërit e shkollës shqipe përbëjnë një arritje të qenësishme jo vetëm për shkollën por për mbarë komunitetin shqiptar në Long Island.

Pas përfundimit të mësimit të përjavshëm, nxënësit e shkollës tonë shkëmbyen dhuratat e festave ku secili kishte përzgjedhur me short të rastësishëm një nxënës dhe solli dhuratën me urimin e tij dhe e vendosi poshtë pemës së Vitit të Ri. Gjithashtu, u festua edhe ditëlindja e nxënëses tonë, Era Bajraktari. Të gjithë të pranishmit, nxënës dhe prindër i uruam edhe 100 vite të lumtura, të bukurës Era. Festa vazhdoi me muzikë dhe ushqime tradicionale përgatitur nga familja e Erës. Mes urimeve, dhuratave dhe suksesit të shkëlqyer të shkollës shqipe këtu në Long Island u mbyll mesimi dhe ceremonia festive për festat e fundvitit.

Komuniteti jonë në Long Island ndihet krenarë, i bashkuar, i përfaqësuar dhe i suksesshëm për bashkëpunimin dhe arritjet e shqiptarëve që jetojnë e veprojnë në diasporën e New York-ut e më gjerë. Mësimdhënesit e shkollës tonë janë të përkushtuar çdo ditë të shtunë për mesimin e gjuhës, historisë e kulturës shqiptare si dhe për mësimin e këngëve e valleve shqiptare. Ky mision do të vazhdojë me përkushtim, pasion e dedikim të veçantë edhe vitin që vjen në mënyrë që të rritet numrin e nxënësve dhe bashkëpunimin me bashkatdhetarë shqiptarë në shërbim të fëmijëve shqiptarë e çështjes kombëtare shqiptare në Amerikë. Qëllimi ynë është t’i shërbejmë komunitetit dhe të ruajmë vlerat atdhetare shqiptare në Amerikë.

Shkolla shqipe “Gjergj Fishta” New York ju uron Gëzuar Krishtlindjet dhe Vitin e Ri 2026! Mirë u takofshim pas festave të fundvitit me të gjithë ju nxënës të dashur dhe prindër të nderuar të shkollës shqipe “Gjergj Fishta” New York për të çuar përpara misionin tonë të shenjtë për gjuhën shqipe dhe flamurin kuq e zi.