– Ndonëse nesër skadon afati ligjor për shqyrtimin e nominimeve për kandidatë për anëtarë të Gjykatës Kushtetuese, Komisioni, në mungesë kuorumi, as sot nuk ka arritur të mbajë mbledhje/
PRISHTINË, 26 Tetor 2015/ Procesi për anëtarë të Gjykatës Kushtetuese të Kosovës shkon drejt përsëritjes.
Ndonëse nesër skadon afati ligjor për shqyrtimin e nominimeve për kandidatë për anëtarë të Gjykatës Kushtetuese, Komisioni, në mungesë kuorumi, as sot nuk ka arritur të mbajë mbledhje.
Kryeparlamentari, Kadri Veseli, njëherësh kryetar i Komisionit për shqyrtimin e nominimeve për kandidatët për anëtarë të Gjykatës Kushtetuese të Kosovës tha se, mbledhja e radhës do të tentohet të mbahet nesër, duke filluar nga ora 11:00. Ai po ashtu njoftoi se, nëse Komisioni edhe nesër nuk do të arrijë të mbajë mbledhje, procesi do të përsëritet.
Mbledhja e Komisionit për shqyrtimin e nominimeve për kandidatët për anëtarë të Gjykatës Kushtetuese, e paraparë për 23 tetor ishte shtyrë për sot, poashtu në mungesë kuorumi.
Në 13 tetor njoftohej se ishte përmbyllur afati për dorëzimin e nominimeve (sipas ftesës-thirrjes publike) për paraqitjen e nominimeve të kandidatëve për zgjedhjen e dy gjyqtarëve të Gjykatës Kushtetuese të Republikës së Kosovës. Konfirmohej se nominimet i kishin paraqitur 15 kandidatë.
Opozita kosovare bojkoton komisionet dhe mbledhjet e Kryesisë së Kuvendit e të shefave të grupeve parlamentare si dhe komisonet, ndërsa shkon në seancat plenare për t’i pamundësuar ato.
Seanca parlamentare e ftuar vetëm nga përfaqësuesit e pozitës për pasditën e 23 tetorit u pamundësua nga opozita edhe duke hedhur gaz lotsjellës, disa herë, deri në mesnatë, e pas mesnatës në orët e para të 24 tetorit u mbajt një seancë në rrethana të jashtëzakonshme jo në sallën plenare, në të cilën qëndronte vetëm opozita e “përjashtuar”.
Kuvendi i Kosovës, kishte më shumë se një muaj nga fillimi i sesionit vjeshtor, nuk kishte arritur të përfundojë asnjë nga seancat plenare të ndërprera nga opozita edhe me hedhje gazi lotsjellës, të vezëve e shisheve të ujit, me “rrethime” të foltores e kryesuesit, mes fërshëllimash e fjalorit të ashpërsuar gjithnjë e më shumë, madje deri në banalitet, derisa jashtë Kuvendit në shesh kishte edhe protesta./b.j/