Foto Gazeta Dielli – Behlul Jashari: Biblioteka Kombëtare e Kosovës “Pjetër Bogdani”, në Prishtinë/

-Organizime së bashku Biblioteka Kombëtare e Kosovës dhe Biblioteka Kombëtare e Shqipërisë/

-Edicioni XIV: Biblioteka dhe dokumentimi i realitetit historik të Kosovës/

Nga Behlul Jashari/ PRISHTINË, 11 Prill 2016/ Java e Bibliotekës në Kosovë 2016 hapet solemnisht nesër, në 12 prill, me një veprimtari të zhvilluar në Bibliotekën Kombëtare “Pjetër Bogdani”, në Prishtinë, ku do marrë pjesë e flasë edhe Persida Asllani, drejtore e Bibliotekës Kombëtare të Shqipërisë.Sipas axhendës së dërguar, fjalë rasti do mbajnë edhe Fazli Gajraku, drejtor i Bibliotekës Kombëtare të Kosovës “Pjetër Bogdani” dhe Mark R. Naylor, zëvendësdrejtor për marrëdhënie me publikun në Ambasadën Amerikane në Prishtinë. Dhënia e mirënjohjeve dhe e shpërblimeve është poashtu në axhendën e hapjes së edicionit XIV me temën “Biblioteka dhe dokumentimi i realitetit historik të Kosovës”.

Në vazhdim mbahet konferencë shkencore me temë “Ismail Kadare – leximi dhe interpretimi”, organizuar nga Biblioteka Kombëtare e Kosovës dhe Biblioteka Kombëtare e Shqipërisë, e më pas zhvillohet prezantimi “Një rol i ri për bibliotekat: mbledhja, ruajtja dhe shkëmbimi i rrëfimeve gojore të bashkësisë”, ku referues do jetë Alexandra Kelly nga Biblioteka Publike e Nju Jorkut.

Ekspozita “Qytetet e Kadaresë” organizuar nga Biblioteka Kombëtare e Shqipërisë pasohet edhe me aktivitetet tjera të saj me promovime botimesh profesionale dhe bibliografike.

Në 13 prill, aktivitetetet në Bibliotekën Kombëtare të Kosovës nisin me prezantimin “Hartimi i projekteve në fushën e rrëfimeve gojore në bashkësi: mjetet dhe praktikat më të mira”, ndërsa vazhdojnë me tre sesionet – “Dokumentimi i realitetit historik në Kosovë: qasje antropologjike dhe sociologjike”, “Metodologjia e mbledhjes dhe angazhimi i bashkësisë në projektet e rrëfimeve gojore” dhe “Dokumentimi i realitetit historik të Kosovës – e tashmja dhe perspektiva”.

Ndërsa, në Ferizaj, organizuar nga Biblioteka Rajonale hapet ekspozita “Ferizaj në shkrimet e viteve 1990-1999”.

Në 14 prill, në Prizren, organizuar nga Biblioteka Rajonale zhvillohet prezantimi “Metodologjia e mbledhjes dhe angazhimi i bashkësisë në projektet e rrëfimeve gojore” dhe  sesioni “Dokumentimi vizual i traditave dhe i ngjarjeve historike”. Një aktivitet tjetër është “Dhjetëvjetori i Këndit Amerikan në Prizren”.Në 15 prill, “Dita e Donacioneve” zhvillohet në Bibliotekën Kombëtare të Kosovës. Në Pejë, organizuar nga Biblioteka Rajonale, zhvillohet sesioni “Bibliotekat, sfidat dhe e ardhmja e tyre”, e më pas hapet Biblioteka e Shkollës së Mesme Teknike “Shaban Spahiu”.

Në 16 prill, zhvillohen aktivitete të organizuara nga Këndi Amerikan në Bibliotekën Kombëtare të Kosovës: “Punëtori mbi të drejtat pronësore të gruas në Kosovë”, sesionet “Hulumtimi antropologjik në Kosovë – pikëpamja e antropologut vendas dhe e antropologut të huaj”  dhe “Narracionet për monumente: rrëfime dhe legjenda”. Në përfundim bëhet përmbyllja e Javës së Bibliotekës në Kosovë 2016.