-Në 6 nëntor, Kosovën do të vizitojë Komisioneri për Zgjerim i Bashkimit Evropian, Johannes Hahn, i cili pritet të mbajë një fjalë rasti në Kuvendin e Kosovës/
-Kryesa e Kuvendit të Kosovës në mbledhjen e tretë në tre ditë, anulohet seanca e caktuar më parë/
-Shtypi: Plani i opozitës për bllokimin e Kuvendit/
-Sot opozita shpalosi dy pankarta gjatë seancës së veçantë për nder të presidentit të Austrisë/
Nga Behlul Jashari/ PRISHTINË, 29 Tetor 2015/ Të hënën, më 2 nëntor, në orën 10:00, Kuvendi i Republikës së Kosovës do të mblidhet në seancë plenare, në të cilën do të shqyrtohet Projektligji për Ratifikimin e Marrëveshjes së Stabilizim-Asociimit (MSA) ndërmjet Kosovës dhe Bashkimit Evropian.
Kështu vendosi sot Kryesia e Kuvendit të Republikës së Kosovës, në mbledhjen e përbashkët me kryetarët e grupeve parlamentare, të drejtuar nga kryetari Kadri Veseli.
Ndërsa, seanca plenare e përcaktuar ditë më parë nga Kryesia, për të njëjtën ditë dhe orë, është shtyrë.
Në mbledhjen e sotme, kryetari Veseli e njoftoi Kryesinë se më 6 nëntor, Kosovën do të vizitojë Komisioneri për Zgjerim i Bashkimit Evropian, Johannes Hahn, i cili njëherësh pritet të mbajë një fjalë rasti në Kuvendin e Kosovës.
Kryesia e Kuvendit të Republikës së Kosovës dhe kryetarët e grupeve parlamentare janë ftuar në një mbledhje të përbashkët edhe për sot në mesditë, të tretën në tre ditë, derisa pritjet ishin që Kuvendi në seancë plenare ta ketë së shpejti në axhendë ratifikimin e Marrëveshjes për Stabilizim-Asociim, të nënshkruar mes Kosovës e Bashkimit Evropain në Strasbourg, dy ditë më parë.
Liderët e opozitës kanë pasur një takim ku megjithë rezervat e shprehura për Marrëveshjen e Stabilizim-Asociimit të qeverisë së Kosovës me BE-në, se “ajo nuk është e plotë, se ka mundur të negociohej më mirë dhe gjëra të tjera”, është konfirmuar se “opozita nuk do ta bllokojë procesin e votimit për ratifikimin e projektligjit për MSA-në”.
Deri sot, në Kuvendin e Kosovës nuk është renditur në axhendë ratifikimi i Marrëveshjes për Stabilizim-Asocim, e cila është nënshkruar ndonjë orë pas kohës së mbajtjes së mbledhjes së Kryesisë me shefat e grupeve parlamentare, ku u përcaktua rendi i ditës për seancën vijuese të hënën, në 2 nëntor, e cila sot u anulua.
Dje, Kryesia e Kuvendit të Republikës së Kosovës, në mbledhjen ku ishin prezentë edhe kryetarët e grupeve parlamentare, ndërsa munguan ata të grupeve opozitare, vendosi që sot Kuvendi të mbante mbledhje të veçantë për nder të presidentit të Austrisë, Heinz Fischer, i cili po qëndron për vizitë zyrtare në Kosovë.
“Plani i opozitës për bllokimin e Kuvendit”, është kryetitulli sot i gazetës Zëri, ku theksohet se fronti opozitar për të hënën ka një plan të ri operativ për t’i bllokuar dyert e Kuvendit nga jashtë, duke mos lejuar futjen e deputetëve dhe ministrave në objekt.
Gazeta shkruan se, kthimi i opozitës në seancën e sotme plenare nuk nënkupton se gjërat po vihen në binarë, pasi që tri partitë opozitare kanë hartuar një plan operativ edhe më të rrezikshëm se ai i gazit lotsjellës për paralizimin e Kuvendit. Opozita synon që të hënën t’i bllokojë hyrjet e Kuvendit të Kosovës me simpatizantët e tyre të zjarrtë, që t’ua pamundësojë deputetëve të koalicionit të futen brenda në Parlament. E nëse kjo praktikë nuk jep rezultatet konkrete, atëherë alternativa mbetet sërish “kallja” nga brenda e Kuvendit me gaz lotsjellës dhe gjësende të tjera, të konsideruara “demokratike”. Blloku opozitar shprehet i vendosur se do të përdorë të gjitha mjetet për ta stopuar punën e legjislativit, në shenjë kundërshtimi të marrëveshjeve të arritura për Asociacionin e Komunave Serbe dhe Demarkacionin e Kufirit me Malin e Zi. Por edhe partitë në pushtet, PDK e LDK, nuk po qëndrojnë duarkryq në hartimin e planeve rreth veprimeve që do të ndërmerren në përpjekje për ta normalizuar punën e Parlamentit.
Në Kuvendin e Kosovës, gjatë seancës së sotme të veçantë për nder të presidentit të Austrisë, Heinz Fischer, opozita shpalosën dy pankarta në pjesën e ulëseve të tyre, ku kishin shkruar: “Mjaft me heshjten e hegjemonisë serbe” dhe “Ruaje shpinën zotri president, rrencat dhe të korruptuart qëndrojnë pas jush”.
Fajon-Çitaku: Kosova do ndihmohet në rrugën drejt integrimit në BE
Nga B.Jashari/.- Eurodeputetja Tanja Fajon, sot në Prishtinë, theksoi se së bashku me kolegët e saj nga Parlamenti Evropian do të bëjë gjithçka që është e mundur për të ndihmuar Kosovën në rrugën e saj drejt integrimit në Bashkimin Evropian. Gjatë një takimi me ministren kosovare të Integrimit Evropian,Vlora Çitaku, Fajon theksoi rëndësinë që fokusi i angazhimit të institucioneve të vendit të jetë në implementimin e standardeve të caktuara për këtë proces.
Eurodeputetja Tanja Fajon dhe ministrja Çitaku diskutuan për progresin në Kosovë, liberalizimin e vizave dhe për avancimin e proceseve integruese evropiane.
Ministria e Integrimit bën të ditur se Çitaku dhe Fajon kanë biseduar më në detaje për finalizimin e procesit të liberalizimit të vizave për Kosovën, në mënyrë që ky kapitull të përfundojë sa më parë dhe të fillojë realizimi i lëvizjes së lirë për qytetarët e Kosovës. Po ashtu, u diskutua për Marrëveshjen e Stabilizim Asociimit, por edhe subjektivitetin ndërkombëtar të Kosovës, duke marrë për bazë qasjen proaktive dhe kontributin e Kosovës në raport me përmirësimin e marrëdhënieve fqinjësore dhe progresin rajonal.
Duke vlerësuar lart kontributin dhe përcaktimin e Fajon për avancimin e Kosovës në raport me integrimin evropian, ministrja Çitaku tha se “institucionet e Republikës së Kosovës janë duke bërë maksimumin për t’i përmbushur rekomandimet dhe obligimet që dalin nga udhërrëfyesi për liberalizimin e vizave për Kosovën”.
Ministrja Çitaku shprehu vullnetin e qeverisë së Kosovës për fuqizimin e gjithanshëm të bashkëpunimit bilateral me të gjitha vendet anëtare të Bashkimit Evropian, gjithashtu theksoi edhe rëndësinë e bashkëpunimit me Parlamentin Evropian.