-Fondi do të ketë organet e veta drejtuese dhe selia e tij do të jetë në Tiranë-/
Nga Behlul Jashari/ PRISHTINË, 12 Nëntor 2015/ Qeveria e Kosovës miratoi sot nismën për nënshkrimin e Marrëveshjes për Themelimin e Fondit të Ballkanit Perëndimor.
“Nënshkrues të kësaj marrëveshjeje do të jenë Shqipëria, Bosnja dhe Hercegovina, Kosova, Maqedonia Mali i Zi dhe Serbia. Fondi do të ketë organet e veta drejtuese dhe selia e tij do të jetë në Tiranë”, u theksua në mbledhjen e qeverisë kosovare.
U bë e ditur se, Fondi synon të forcojë bashkëpunimin e vendeve nënshkruese dhe integrimin e tyre në Bashkimin Evropian.
Qeveria e Republikës së Kosovës, e drejtuar nga kryeministri Isa Mustafa, ka zhvilluar mbledhjen e 58-të të rregullt, në të cilën ka miratuar amendamentet për ndryshimin e Kushtetutës së Republikës së Kosovës dhe Koncept Dokumentin për Kryeqytetin e Republikës së Kosovës.
Kryeministri Mustafa, njoftoi kabinetin qeveritar për pranimin e Raportit të Progresit nga shefi i Zyrës së Bashkimit Evropian.
“Është një raport i rëndësishëm, i cili në mënyrë mjaft reale prezanton situatën në Kosovë, në rend të parë progresin të cilin e kemi bërë në shumë fusha, sidomos me nënshkrimin e Marrëveshjes për Stabilizim Asociim”, tha ai.
Natyrisht, vijoi kryeministri Mustafa, na mbetet që të punojmë në çështje të tjera që janë adresuar në Raportin e Progresit. “Janë çështje të cilat janë adresuar se jemi në fazën fillestare të marrjes me to”, shtoi ai.
Ne, tha Mustafa, do të lexojmë çdo pikë dhe çdo kapitull të këtij raporti, dhe do të marrim masa në sendërtimin e tyre, në mënyrë që progresi ynë në vitin e ardhshëm të jetë më i mirë.