Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosova nis me vulë apostile, pranohet në 83 shtete

by

– Ministri i Jashtëm, Enver Hoxhaj u dorëzoi qytetarëve dokumentet e para me vulën apostile: Kosova fitoi edhe një betejë/

-Në 9 qershor 2016, Kuvendi i Republikës së Kosovës miratoi Ligjin për ratifikimin e Konventës për heqjen e Kërkesës për legalizim të dokumenteve zyrtare të huaja (5 tetor 1961)/

 PRISHTINË, 18 Korrik 2016-B.Jashari/ Kosova nisi sot pasdite procesin e vendosjes së vulës  apostile, në mënyrë ceremoniale, në Departamentin për Çështje Konsullore të Ministrisë së Punëve të Jashtme.

Ministri i Jashtëm, Enver Hoxhaj dha dokumentet e para me vulë apostile, për herë të parë pas aderimit së Republikës së Kosovës në Konventën e Hagës për Heqjen e Kërkesës së Legalizimit të Dokumenteve publike të huaja.Vendosjen e vulës apostile në dokumentet e qytetarëve të Republikës së Kosovës, ministri Hoxhaj e vlerësoi një ditë të veçantë por edhe sfiduese për vendin.

“Kjo ka qenë një betejë e madhe që Kosova të jetë pjesë e kësaj konvente pasi që është dashur të sigurohen votat e shumë shteteve anëtare dhe kjo është  dëshmia më e mirë që ne nuk bëjmë përpjekje që të anëtarësohemi vetëm në konventa dhe organizata ndërkombëtare por bëjmë përpjekje që ta ushtrojmë sovranitetin dhe ushtrimi i sovranitetit ka të bëj me binificione konkrete që qytetarët e Kosovës mund t’i përfitojnë”, deklaroi ministri Hoxhaj.

Me këtë rast ministri ka paralajmëruar se MPJ do të vazhdojë përpjekjet për anëtarësim edhe në konventa dhe organizata tjera me interes për qytetarët e Kosovës.

“Në të ardhmen ne do të aplikojmë edhe në konventa tjera meqë ne promovojmë një polikë të jashtme e cila i mbështet zhvillimet e brendshme, pra që ka të bëj me përmbushjen e kërkesave bazike të qytetarëve të Kosovës”, u shpreh ministri derisa ka falënderuar shtetet partnere që e kanë përkrahur Kosovën në anëtarësimin e Kosovës në Konventën e Apostile.

Përdorimi i vulës apostile që do të pranohet nga 83 shtete nënkupton se qytetarët e Kosovës përveç se do të shpenzojnë buxhet më pak do të kursejnë edhe kohë, pasi që vërtetësinë e dokumenteve publike që ju nevojiten për qëllime private apo biznesore mund ta bëjnë në Departamentin për Çështje Konsullore në Ministrinë e Punëve të Jashtme, me përjashtim të dokumenteve të gjendjes civile si: certifikatë të lindjes, martesës etj, të cilat duhet të vërtetohen në Agjencinë e Regjistrimit Civil dhe Ministrinë e Punëve të Brendshme.

Në 9 qershor 2016, Kuvendi i Republikës së Kosovës, me 83 vota pro, 1 abstenim e asnjë kundër, miratoi Ligjin për ratifikimin e Konventës për heqjen e Kërkesës për legalizim të dokumenteve zyrtare të huaja (5 tetor 1961), i prezantuar në emër të qeverisë  nga ministri i Punës dhe Mirëqenies Sociale, Arban Abrashi.

Ai theksoi se Mbretëria e Holandës, si vendi depozitues i kërkesës, e ka miratuar kërkesën e Republikës së Kosovës dhe duhet të hyjë në fuqi në 14 korrik 2016 për aderimin në këtë Konventë.

“Anëtarësimi i Kosovës në këtë Konventë fuqizon subjektivitetin e saj në arenën ndërkombëtare. Gjithashtu, Kosova përfiton mjaft në lehtësimin e procedurave dokumentare për qytetarët dhe bizneset”, tha ministri Abrashi.

 

KOSOVA NIS VITIN E RI SHKOLLOR

by

-Ministria e Arsimit, Shkencës dhe Teknologjisë e qeverisë së Kosovës ka bërë të ditur se i ka bërë të gjitha përgatitjet e nevojshme për një fillim të suksesshëm/
PRISHTINË, 1 Shtator 2015/ Në gjithë Kosovën sot nisi viti i ri shkollor në arsimin fillor dhe të mesëm.
Ministria e Arsimit, Shkencës dhe Teknologjisë e qeverisë së Kosovës ka bërë të ditur se i ka bërë të gjitha përgatitjet e nevojshme për një fillim të suksesshëm.
Presidentja e Kosovës, Atifete Jahjaga, ka drejtuar “një urim të veçantë për të gjithë nxënësit e klasave të para, për ata që po fillojnë një etapë të re të jetës së tyre dhe kur po fillojnë të përgatiten për të nesërmen”. “Uroj që ky vit shkollor 2015-2016 të sjellë ndryshimet e shumëpritura dhe të dëshiruara në ngritje të standardit dhe cilësisë të mësimdhënies dhe mësimnxënies”, ka shtuar ajo.
“Qeveria e ka prioritet shumë të rëndësishëm përkrahjen, reformimin dhe avancimin e vazhdueshëm të sistemit edukativ dhe arsimor në Kosovë”, ka siguruar kryeministri Isa Mustafa në urimin për nxënësit dhe mësimdhënësit me rastin e fillimit të vitit të ri shkollor.
Ai edhe më këtë rast ka shprehur “respektin dhe konsideratat më të larta për mësimdhënësit e Kosovës, njerëzit që me sakrificën dhe përkushtimin e tyre kanë pasur rol vendimtar për të gjitha të arriturat që Kosova ka bërë gjatë këtyre 20 vjetëve të fundit”.
Vitin e ri shkollor, që në Kosovë nis tradicionalisht në 1 shtator, e ka uruar edhe ministri i Arsimit, Shkencës e Teknologjisë, Arsim Bajrami.
“Jam i sigurt se të gjithë ne do të punojmë së bashku që vërtetë ky vit shkollor të jetë i suksesshëm, të rezultojë me ngritjen e cilësisë, me një angazhim të gjithëmbarshëm të shoqërisë kosovare, sepse nuk ka prioritet më të madh se sa investimi në edukim”, është shprehur ai.
Ministri Bajrami sot do të vizitojë shkollën fillore “Faik Konica” në Prishtinë, ku do të bëjë edhe shpërndarjen simbolike të Abetares për nxënësit e klasave të para.
Kryetari i AAK-së, Ramush Haradinaj, sot kishte zgjedhur Shkollën Fillore
“Ibrahim Rugova” në Obiliq, në mënyrë që, nga atje, të përcjell urimin e
tij, për fillimin e vitit të ri shkollor.
“Sot për ju fillon edhe një vit i betejës për dije, që sot për sot, i duhet
Kosovës më shumë se gjithçka tjetër. Unë jam i nderuar që në emrin tim dhe të gjithë anëtarësisë së AAK-së, nga
kjo Shkollë që mban emrin e Presidentit historik të Kosovës “Ibrahim
Rugova”, t’iu uroj një vit të mbarë shkollor”, u shpreh ai. /B.Jashari/