-Kryeministri Isa Mustafa vizitë në komunën e Vitisë- atje ku u hap shkolla e para shqipe  në Kosovë dhe NënëTereza ka filluar misionin si murgeshë/

PRISHTINË, 28 Maj 2016/ Kryeministri i Kosovës, Isa Mustafa, gjatë qëndrimit dje në Komunën e Vitisë së bashku me kryetarin Sokol Haliti vizituan fshatrat Letnicë dhe Stubëll.

Pas kësaj vizite, kryeminsitri Kosovar në një postim në ‘facebook’ ka treguar:

Në Letnicë, vizituam edhe Kishën e Letnicës ku takuam shumë qytetarë dhe përfaqësuesit e klerit katolik. Kisha e Letnicës është një shtëpi e cila respektohet shumë, ka një të kaluar të pasur dhe historike për kulturën tonë dhe identitetit kombëtar. Vërejta me vëmendje kujdesin që bëhej ndaj kroatëve dhe të gjitha komuniteteve tjera. E veçanta e Kishës së Letnicës është se Nëna Tereza ka filluar misionin e saj si murgeshë nga ky vend.

Se Vitia është unike në kontributin dhënë kulturës, dijes, tolerancës dhe identitetit tonë vërtetohet se dy shkollat e para shqipe në Kosovë ishin nga Vitia. E para, shkolla e Stubllës, kishte mësues një famulltar. E dyta, kishte për mësues një hoxhë. Në Muzeun e Shkollës së Parë Shqipe në Kosovë e cila drejtohej nga Don Mikel Tarabulluzi pamë brenda edhe figura historike të cilat kanë quar përpara gjenerata të tëra.

Ndërsa në njoftimin e dërguar nga zyra e shtypit e qeverisë së Kosovës theksohet:

Gjatë qëndrimit në Letnicë, kryeministri Mustafa ka vizituar Kishën e Letnicës dhe ka takuar shumë qytetarë dhe përfaqësuesit e klerit katolik.

Kryeministri Mustafa vlerësoi lartë pritjen që iu bë.

“Është një pritje dhe një nderim i veçantë. Për ne është gjë e mrekullueshme që gjendemi në një vend të shenjtë, në një shtëpi e cila respektohet shumë, e cila ka një të kaluar dhe një të tashme historike, sepse këtu kanë ndodhur ngjarje historike që lidhen me historinë dhe me kulturën tonë, që lidhen me luftën tonë çlirimtare, që lidhen me një përkrahje shumë të madhe dhënë luftës sonë për liri dhe pavarësi, dhe identitetit tonë kombëtar. Më vjen mirë që kujdesi është shumë i madh edhe për komunitetet tjera jo shqiptare, edhe kroatët dhe për të gjithë. Por më vjen mirë që është një vend që tregon për tolerancën tonë fetare, por edhe për lidhjen tonë të madhe dhe për përkushtimin tonë që të çojmë të gjitha proceset tona përpara me një mirëkuptim të madh dhe me një angazhim të vazhdueshëm”, theksoi kryeministri.

Don Kristë Gjergji tregoi historikun e Kishës, si dhe të vetë fshatit Letnicë, duke veçuar që pikërisht tek Kisha e Zonjës së Bekuar, Nëna Terezë ka filluar misionin e saj si murgeshë.

“Jemi në një vend të shenjtë, e cila quhet Kisha e Zonjës së Bekuar, kushtuar Nënës së Jezus Krishtit. Festa kryesore është me 15 gusht, ku në atë ditë bashkohen njerëz të ndryshëm, pelegrinë, të ndryshëm të besimit tonë krishterë por edhe të besimeve tjera, llogarisim prej 10 mijë deri në 15 mijë njerëz që vijnë në këtë vend dhe gjithnjë e kanë moton, “Po shkoj te nëna Zojë”. Në bashkëpunim me institucionet komunale, të gjitha drejtoritë na përgjigjen dhe mundohemi sa më mirë me i prit. Po ashtu ky vend njihet edhe si vend kroat. Në 2003  kemi festuar 700 vjetorin e ardhjes së kroatëve. Për fat të keq, luftërat e ish-Jugosllavisë, e tërë popullata 6 mijë e 500 kroatë janë shpërngul prej vitit 1992-1998. Në mënyrë sistematike janë shpërngulur përgjithësisht në Kroaci. Megjithatë kanë mbet pak kroatë, i kemi 33 kroatë. Kemi 670 shqiptarë të besimit katolik, i kemi edhe vëllezërit tanë, të cilët unë i quaj gjithmonë mysafir, refugjatë nga Maqedonia, afër 15 familje. Probleme të rënda nuk kemi, pos papunësia, varfëria, përndryshe e kalojmë jashtëzakonisht mirë. Është fshat multietnik. Gjuha zyrtare në Kishë është shqip dhe kroatisht, kemi çdo ditë meshë. Për festa i kemi dy mesha, në gjuhën kroate dhe shqipe. Njëkohësisht është me rëndësi që kjo kishë vizitohet prej njerëzve të ndryshëm, si brenda vendit, si nga shtetet përreth Kosovës, si në aspektin evropian por ka marrë përmasat ndërkombëtare, sepse njerëzit vijnë në kategori të ndryshme për bekim, me sëmundje të ndryshme psikike, fizike, djallëruese, çiftet martesore që nuk kanë mundësi me pas fëmijë dhe këtu ne i bekojmë, dhe në shumicën e rasteve kthehen shëndoshë e mirë.

Po ashtu vlen të përmendet edhe e Lumja Nëna Tereze, që është edhe viti i saj, që edhe kryeministri dhe ne të gjithë po mundohemi që sa më mirë të përgatitemi për këtë vit. Më 1928 këtu e ka fituar thirrjen e shenjtë dhe prej këtu e ka filluar misionin e vet si murgeshë, me përmasa botërore që ka dëshmuar dashurinë dhe gjithmonë e ka përmendur Zonjën e Bekuar e cila është 400 vite e vjetër, dhe supozohet që është prej nxënësit të Mikelangjelos, dhe  e Lumja Nëna Tereze gjithmonë e ka pas në mendje, shpirt, këtë Zonjë të Bekuar të Letnicës dhe për herë të fundit ka qenë në vitin 1988 këtu”, tha Gjergji.

Më pas, kryeministri Mustafa vizitoi Stubllën, ku u ndal në Muzeun e Shkollës së Parë Shqipe në Kosovë e cila drejtohej nga Don Mikel Tarabulluzi, dhe ka takuar përfaqësuesit e fshatit si dhe të klerit katolik

Kryeministri Isa Mustafa u shpreh i nderuar që pa nga afër shkollën e parë shqipe.

“Ne të gjithë jemi të nderuar, edhe unë, edhe ministrat, edhe kabineti qeveritar që sot kemi rastin të jemi tek një shkollë e parë shqipe, burim i diturisë, një vënie e themeleve të gjuhës tonë dhe të shkrimit tonë, të mësimit tonë, që është e rëndësisë themelore. Ne mburremi me të gjithë patriotët tanë që kanë punuar, që i kanë dhënë frymë kësaj shkolle. Ne pamë brenda edhe figura historike të cilat kanë quar përpara gjenerata të tëra, të cilat kanë bajt dhe frymën shqipe dhe vullnetin tonë për liri. Prandaj, edhe për ne sot është një frymëzim i veçantë që të jemi këtu të vizitojmë këtë tempull të diturisë, tempull të fesë, dhe tempull të bashkësisë sonë, sepse të gjitha këto objekte, këta tempuj na bëjnë bashkë, na frymëzojnë dhe na çojnë përpara”, theksoi kryeministri Isa Mustafa.

Don Albert Jakaj falënderoi kryeministrin për vizitën.

“Stublla mburret me mësuesin e  parë të gjuhës shqipe, të Dom Mikel Tarabulluzit. Stublla si komunitet ka kontribuar shumë, qoftë në rrafshin kishtar, sepse është edhe vendlindja e Ipeshkvit tonë, imzot Dodë Gjergjit, Dom Lush Gjergjit dhe shumë priftërinjve tjerë. Është një fabrikë, një minierë e ashtuquajtur e thirrjeve meshtarake, por ka ndihmuar edhe në rrafshin kombëtar me shkollën e parë shqipe në Kosovë. Prandaj, falënderoj z. kryeministër në emër të komunitetit, në emër të drejtorit të shkollës, në emër të bashkëpunëtorëve, në emër të Stubllës, për kohën që ka gjetur të na vizitoj këtu në Stubëll”, theksoi Jakaj./b.j/