Nga Shefqet Kërcelli/

Sot paradite në molin Nr.4 të portit të Durrësit u zhvillua ceremonia e pritjes së anijes “Oriku”, e cila e mbylli me sukses misionin e saj në përbërje të Grupit Të NATO-s, “Sea Guardian”, në detin Egje. Në këtë ceremoni morën pjesë Ministri i Mbrojtjes, Zonja Olta Xhacka, Shefi i Shtabit të Përgjithshëm të FA, Gjeneral Brigade Bardhyl Kollcaku, Komandanti i Forcës Detare, Gjeneral Major Ylber Dogjani, Komandantë Repartesh, Drejtorë Drejtorish në Shtabin e FA, kuadro dhe detarë të Flotiljes Detare, drejtues të institucioneve detare, familjarë të ekuipazheve të “Orikut”, media të ndryshme etj. Fillimisht ekuipazhit të anijes  “Oriku” i uroi mirëseardhjen Ministrja Xhacka, Shefi i shtabit Gjeneral Kollcaku dhe Komandanti i FD, Gjeneral Dogjani. Në vijim ekuipazhin e përshëndeti Komandanti i FD, Gjeneral Dogjani i cili në emër të efektivit të FD i uroi mirëseardhjen ekuipazhit të anijes “Oriku” dhe kontigjentit të 6-të, pjesmarrës në operacionin “Sea Guardian”. Gjeneral Dogjani tha se. ndjehem krenar që anija “Oriku” e ka përmbushur me sukses misionin e ngarkuar nga Komanda e FD, MM dhe Komanda e NATO-s. Gjatë misionit një vjecar detarët tanë duke u përballur me detin e egër të Egjeut kanë shpëtuar jetën e 917 personave , nga të cilat 150 gra dhe 95 fëmijë kryesisht nga Siria, Jemeni, Nigeria, Iraku dhe Somalia, të cilët janë nisur nga brigjet e Turqisë për në bregdetin Grek, drejt vendeve të Bashkimit Evropian, theksoi zoti Dogjani.  Ministrja e Mbrojtjes zonja Xhacka, mbasi i uroi mirëseardhjen Ekuipazhit të Anijes, vlerësoi përkushtimin dhe profesionalizmin e treguar nga marinarët tanë në këtë mision, për të cilën ka marrë dhe vlerësime nga ushtarakët e NATO-s.  Ishte kënaqësi që në përbërje të këtij misioni ishin dhe dy femra, nderi dhe krenaria e këtij misioni. Vlerësoj profesionalizmin e ushtarakëve shqiptare të cilin e pashë dhe në Afganistan. Ndaj operacionet tona paqeruajtëse do të vazhdojnë ne te ardhmen, theksoi Ministrja Xhacka. Në fund të ceremonisë Komandanti i anijes “Oriku” i dorëzoi flamurin Ministres Xhacka, të cilën do ta mbajë anija “Butrinti”, që do vazhdojë misionin në detin Egje gjate vitit 2018.

Ishte një ceremoni e bukur sot që përkoi dhe me 26 nëntorin, ditën e ngritjes së flamurit në qytetin e Durrësit, plot 105 vjet më parë.