-Ambasadori amerikan William Walker 17 vjet pas kohës kur ishte shef i Misionit verifikues të OSBE-së gjatë luftës në Kosovë, sot në Deçan u nderua më çmimin që mbanë emrin e Heroit të Kombit Shkëlzen Haradinaj dhe me Mirënjohje Qyteti/
Nga Behlul Jashari/ PRISHTINË, 16 Janar 2016/ E kam menduar një Kosovë më ndryshe, tha ambasadori William Walker 17 vjet pas kohës kur ishte shef i Misionit verifikues të OSBE-së gjatë luftës në Kosovë. Ai foli sot në Deçan, ku u nderua më çmimin që mbanë emrin e Heroit të Kombit Shkëlzen Haradinaj dhe me Mirënjohje Qyteti nga kryetari i komunës, Rasim Selmanaj.
Në njoftimin e komunës theksohet: Sot Deçani është shumë i privilegjuar sepse i pranishëm ishte njeriu i shquar,diplomati e ushtaraku, humanisti e misionari, Gjenerali dhe Ambasadori i nderuar, Wiliam Walker .
Wiliam Walker në mbamendjen tonë nacionale dhe në historinë tonë, do ngel përjetësisht emwri i cili në momente të rënda, kruciale e jetike për Kosovën, në momentet kur regjimi famëkeq vrante, digjte e masakronte çdo gjë në vendin tonë, pa kursyer as fëmijët, as gratë as pleqtë, ngriti zërin e fuqishëm dhe dërgoi mesazhin po aq të fuqishëm për gjithë botën e civilizuar, nga Reçaku, ku ishin vrarë e masakruar njerëz moshash e shtresash të ndryshme se në Kosovë po ndodh gjenocid mbi popullatën shqiptare. Ky mesazh i dërguar qartë e prerë nga Walker vuri në lëvizje gjithë diplomacinë botërore me të gjithë mekanizmat ndërkombëtar.
Kështu u tha sot në Deçan ku William Walker në Deçan, u nderua më çmimin që mbanë emrin e Heroit të Kombit Shkëlzen Haradinaj dhe me Mirënjohje Qyteti nga Kryetari i Komunës së Deçanit , Rasim Selmanaj.
Më këtë rast kryetari i komunës, Rasim Selmanaj tha se unë sot ndihem jashtëzakonisht mirë ku në mesin tonë gjendet William Walker , na nderon më prezencën e tij .
Pasi pranoi Çmimin Shkëlzen Haradinaj dhe u nderuar me Mirënjohje Qyteti, William Walker tha se në Deçan ka kalur shumë shpesh.
“Kujtoj edhe kohët më të këqija kur regjimi serb shkatërroi gjithçka por dua të them se ju jeni njerëzit më të mirë që kam njohur në gjithë vendet ku kam qenë, jeni popull i dashur, mirëpritës dhe bujar. Nuk jam këtu që të jap deklarata politike por dua të them se nuk jam i kënaqur më situatën në Kosovë. E kam menduar një Kosovë më ndryshe e jo si kjo”, tha Walker, i cituar në njoftimin e komunës.
Ambasadori amerikan William Walker, i cili ishte shef i Misionit verifikues të OSBE-së gjatë luftës në Kosovë, mbërriti në Kosovë në prag të 17 vjetorit masakrës së Reçakut.
Me homazhet në Kompleksin Përkujtimor dhe me një akademi është kujtuar në 17 vjetor masakra në Reçak, fshat i Kosovës në komunën e Shtimes, ku në 15 janarin e vitit 1999 forcat serbe rrëmbyen nga shtëpitë e tyre dhe ekzekutuan mbi 40 banorë civilë.
Me atë rast, në 15 janar 2016, u zhvillua edhe ceremonia e vendosjes së gurthemelit të shtatores së ambasadorit amerikan William Walker, që do të ndërtohet afër Kompleksit Përkujtimor në Reçak.
Pjesëmarrës në përkujtime, si edhe në vitet tjera të pasluftës, ishte edhe ambasadori amerikan William Walker, i cili derisa ishte shef i misionit verifikues të OSBE-së në Kosovë, në vizitën në vendin e masakrës e cilësoi atë krim kundër njerëzimit.
Rreth dy muaj pas masakrës së Reçakut, aviacioni i NATO-s, në ndërhyrjen shpëtimtare për popullin e Kosovës, filloi bombardimet kundër caqeve të forcave kriminale serbe, të cilat zgjatën 78 ditë, deri në kapitulimin e Slobodan Milosheviçit, kreut shtetëror në Beograd, i njohur edhe si “kasapi i Ballkanit”, i cili përfundoi në Gjykatën Ndërkombëtare për Krime Lufte në Hagë.
Në Kompleksi Përkujtimor Masakra e Reçakut, në Murin e Përkushtimit janë skalitur në mermer fotografitë e 44 martirëve-dëshmorëve.
Masakra e Reçakut është një nga dëshmitë rrënqethëse të krimeve në luftën e fundit në Kosovë, kur forcat serbe vranë, masakruan, por edhe zhdukën, më shumë se 12 mijë shqiptarë, e në fushatën e gjenocidit e spastrimit etnik rreth një milion i dëbuan, shumicën drejt Shqipërisë.
Në Kosovë, edhe pas mëse 17 viteve pas luftës, sipas Institutit për Hulumtimin e Krimeve të Luftës, janë ende 1229 të pagjetur nga 6027 personat që nga Kryqi i Kuq Ndërkombëtar evidentoheshin të zhdukur, të lajmëruar nga familjarët, menjëherë pas luftës së përfunduar në 12 qershor 1999.
Të zhdukur ende të pagjetur janë 173 femra, 1056 meshkuj, 104 nën moshën 18 vjeçare, të cilët konsiderohen fëmijë sipas konventave ndërkombëtare dhe legjislacionit të Kosovës.