-Republika e Kosovës  e mbështetë me një ekip menaxhimin e fatkeqësisë natyrore në Shkup/

PRISHTINË, 9 Gusht 2016-Gazeta DIELLI/ Me rastin e vërshimeve në Shkup  dhe pas kërkesë së shtruar nga  Drejtoria për Mbrojte dhe Shpëtim e Republikës së Maqedonisë, një ekip i Republikës së Kosovës nga Agjencia e Menaxhimit Emergjent e Ministrisë së Punëve të Brendshme, sot është nisur për të mbështetur Republikën e Maqedonisë në menaxhimin e kësaj fatkeqësie natyrore.

Drejtori i përgjithshëm i AME-së, Fadil Kodra, e përcolli këtë ekip duke e udhëzuar për rregullat, procedurat dhe operacionet që do t’i kryejnë atje ne mbështetje të qytetarëve të goditur nga fatkeqësia.

“Drejtoria për Mbrojtje dhe Shpëtim e Maqedonisë, tani për tani më së shumti  ka nevojë për pompa thithëse 800-1500 litra.  Pasi që ne kemi kapacitete të tilla, në përgjigje të kërkesës së kësaj drejtorie, ekipi i AME-së udhëtoi për në Shkup  me këtë përbërje: tetë pjesëtarë, tre automjete, dy automjete me 4 pompa thithëse, gjithsejtë katër pompa 800-1500 litra dhe një automjet i komandës dhe mbështetjes  logjistike”, tha ai.

Ekipi nga Kosova do të qëndrojë në mbështetje të drejtorisë për Mbrojtje dhe Shpëtim të Maqedonisë, deri  në 12 gusht, gjatë kësaj kohe, ky ekip  do të kryejë operacione të shkarkimit (thithjes) të ujërave nga shtëpitë e përmbytura nga vërshimet./b.j/