NË EUROPË – Dielli

Në Europë, klube “Miq të Vatrës”

January 7, 2019 by dgreca

MYSAFIRE NGA ZVICRA DHE GJERMANIA VIZITUAN VATREN/

– Së shpejti në Zvicër dhe Gjermani do të krijohen klubet e “Miqëve të Vatrës”-/

Të Premten, 4 Janar 2019 në Shtëpinë e Vatrës erdhën mysafirë të vecantë nga Zvicra dhe Gjermania. Atyre u printe biznesmeni dhe aktivisti i njohur Esat Likaj me banim ne Zvicer dhe inxhinieri Erton Axha me banim në Gjermani. Mysafirët shoqëroheshin nga anëtari i Këshillit të Vatrës, anëtar i Kryesë së degës Hudson Valley në Nju Jork, Anton Raja. Mysafirët u pritën nga Kryetari i Vatrës Dritan Mishto, anëtari i kryesisë Zef Balaj dhe Editori i Diellit, Dalip Greca.

Z./ Mishto i falenderoi për vizitën dhe u interesua për jetën dhe veprimtaritë e shqiptarëve në Zvicër dhe Gjermani. Gjithashtu kryetari i Vatrës i informoi mysafirët për veprimtaritë dhe qëndrimet e Federatës Panshqiptare të Amerikës”VATRA” dhe pikesynimet per vitin 2019.

Editori i Diellit shpalosi një pjesë të historisë së Federatës Vatra dhe Gazetës së saj Dielli, e cila këtë vit feston 110 vjetorin e numrit të parë.

Mysafirët shprehën kënaqësinë që vizituan Vatrën dhe u njohën me veprimtaritë e saj prej 107 vitesh. Ata u zotuan që të shtojnë radhët e miqëve të Vatrës në Zvicër dhe Gjermani duke krijuar Klubin e miqëve të Vatrës. Në mënyrë simbolike u anëtarësuan në klubin e miqëve të Vatrës: Esat Beqë Likaj, Agim Ramosaj-GASHI, Ertjon Axha dhe Milaim Ukëhaxhaj.

Mysafirët shkruan në librin e vizitorëve fjalë zemre për mbresat gjatë vizitës në Vatër dhe historisë së saj.

Nuk është hera e parë që shqiptarë në vendlindje apo në mërgim, kërkojnë të krijojnë klubet e Miqëve të Vatrës.

Rama më i dobti në Europë-Kryeministrit të Shqipërisë i pëlqen të zërë faqet e para të gazetave

April 29, 2016 by dgreca

Kryeministri i Shqipërisë Edi Rama është renditur si lideri më i dobët dhe i parëndësishëm i Europës nga revista prestizogje Politico, e cila konsiderohet si organi mediatik më afër zërit të Bashkimit Europian. Në një artikull të titulluar “Matrica e pushtetit: të rendisësh liderat dhe ambasadorët e Europës”, revista e cilëson Ramën dhe ambasadoren shqiptare në BE, Suela Janina si dy zyrtarët më të parëndësishëm në Europë.

Kryeministrit të Shqipërisë i pëlqen të zërë faqet e para të gazetave botërore duke i dhënë këshilla deri dhe superfuqive botërore për sfidat dhe politikën ndërkombëtare. Nga deklaratat për Trump tek letra drejtuar ministrit britanik të drejtësisë Michael Gove, kreu i qeverisë shqiptare është përpjekur të gjejë hapësirë në mediat ndërkombëtare. Por europianët duket se e kanë tashmë një vlerësim për Ramën dhe këshillat e tij. Renditja është një suplakë e fortë për ambicien e vetëshpallur ndërkombëtare të Ramës.

Sipas Politico, renditja paraqet se cilat lidera kombëtar janë efektivë në kombinimin e forcave me ambasadorët e vendit të tyre në Bashkimin Europian për të siguruar pushtet dhe influencë brenda BE. Sipas kësaj renditje Edi Rama rezulton i fundit, madje më poshtë edhe se Gruevski, lideri autoritar i Maqedonisë i urryer në Europë.

Sipas revistës në vendin e parë, si udhëheqësja më e rëndësishme në Europë renditet Angela Merkel. Pas kancelares së fuqishme gjermane, në vendin e dytë vjen kryeministri britanik david Cameron dhe në vendin e tretë Francois Hollande.

Çfarë vlerësohet

Revista ka shpjeguar edhe metodologjinë sipas të cilës janë vlerësuar udhëheqësit e vendeve europiane. Sipas saj, renditja vlerëson një sërë aspektesh. Më konkretisht sipas Politico, për kryeministrat dhe presidentët matrica e saj u përgjigjet disa pyetjeve si:

A kanë një qeveri stabël? A e qeverisin vendin dhe a e përcaktojnë axhendën e tij politike?

Po kështu ajo përpiqet ti përgjigjet pyetjeve nëse këta udhëheqës kanë një strategji koherente dhe nëse kanë pozita të forta negociuese në Europë./B.S/

TRI SKUADRAT SHQIPTARE NE EUROPE- Një fitore, një barazim, një humbje

July 2, 2015 by dgreca

Kukësi mposht bjellorusët 2 me 0 !/
Kukësi ka bërë një lojë të pëlqyeshme dhe si rrjedhojë e kësaj mposhti me rezultat 2:0 ekipin nga Bjellorusia, Torpedo Zhodino, në ndeshjen e parë të rrethit të parë të eliminatorëve për Europa League. Futbollistët e Kukësit në stadiumin “Qemal Stafa” në Tiranë, treguan nivel të lartë të lojës dhe heshtën bjellorusët. Qysh në minutën e nëntë, kuksianët kaluan në epërsi, kur Karioka shënoi supergol dhe tronditi bjellorusët. Në pjesën dytë, Kukësi shtroi lojën e tyre dhe dyfishoi rezultatin 2:0 në minutën e 54-të. Goditjen e merr përsipër Pero Pejiç i cili godet në mënyrë perfekte dhe topi përfundon në portë. Kuksianët deri në fund dhanë maksimumin dhe i kënaqët shikuesi me një fitore të madhe. Kukësi shënoi fitore të madhe dhe bën një hap drejt kualifikimit më tutje.

Laçi, barazim me Inter Baku/
Laçi barazoi 1:1 me ekipin nga Azerbajxhani, Inter Baku, në ndeshjen e parë të rrethit të parë të eliminatorëve për Europa League. Futbollistët e Laçit ishin shumë afër fitores, por një gabim iu kushtoi më barazim dhe tani i pret sfidë e vështirë në Baku. Në minutën e 20-të, Vuçaj kombinon bukur me Xhejms brenda zonës, ky i fundit gjuan fuqishëm me të djathtën por topi ndalet nga shtylla, aty përfiton Meto i cili e shtyn drejt rrjetës dhe 1:0. Në minutën e 48-të, goditje dënimi për azerët, e ekzekuton Kvekveksiri, ky i fundit gjuan fuqishëm me të djathtën dhe dërgon topin në portë, duke mposhtur malazezin Vujadinoviç, 1:1. Laçi tash mendon për takimin e kthimit, e cila do të jetë shumë i vështirë.

Partizani shkaterrohet 3 me 1 në Norvegji/
Partizani ka humbur me rezultatin 3 me 1 ndeshjen vajtëse për turin e parë eleminator në Europa Ligë.
Të kuqtë janë dorëzuar para Stromsgodset duke bërë një hap drejt eleminimit në këtë kompeticion.
Goli që mban ende në lojë Partizanin u shënua nga Fazliu megjithatë shpresat për ta janë të pakta.

9 MAJI 1945-70 VJETORI I ROBNISË STALINISTE NË EUROPË

May 7, 2015 by dgreca

Nga Fritz RADOVANI*/
9 Maji 1945 “PËRANDORIA E SË KEQES” ME DISA MILJON SKLLAVË/
■Ma në fund u gjet edhe mënyra per me shkatrrue Europen e qytetnueme!
■Edhe pse të gjithë e kishin kuptue se kush ishte Bashkimi Sovjetik dhe udhëheqësi i tij diktatori Stalin, as Rusvelti dhe as Çërçilli nuk ishin në gjendje me i caktue cakun se deri ku mund të shtrihej sundimi i tij, madje, shpesh, edhe tue harrue barbarizmin e tij.
Fatkeqsia e popujve të Europës e ma vonë të Azisë, ishte se Rusvelti asnjëherë nuk arrijti me kuptue mjeshtrinë diplomatike të Stalinit per me sigurue zonat e influences së vet!
■Atëherë kur Stalini dukej sikur kishte dalë nga vetvetja e po fliste në Jalta, pra në muejn Shkurt 1945, per “zgjedhje të lira dhe të drejtën e vetvendosjes në zonat e lirueme”, ishte ajo kohë kur ushtria sovjetike i kishte pushtue të gjitha ato, e do të vepronte si donte ai!
Stalini shkoi edhe ma perpara tue propozue edhe “Qeveri Demokratike në të gjithë Europën Lindore, të daluna nga zgjedhjet e Lira nder ata shtete!” Pikrisht, kur ushtria sovjetike vazhdonte marrshimin drejtë pushtimit të Tokave të tjera drejtë Berlinit!
■Prova ma e sakta e mashtrimeve të Stalinit për ata “premtime” ishin zgjedhjet që po përgatiteshin në Jugosllavi, dhe shtetin e varun prej saj në Shqipninë komuniste. Pra, Stalini zgjodhi dy shtete që nuk ishin çlirue nga ushtritë sovjetike, po influenca e tij ishte vendimtare në zgjedhjen e Titos e Enver Hoxhës, në këto “zgjedhje të lira e bolshevike”!
■Me 9 Maji 1945, Stalini kishte arrijtë shtrimjen e vet deri në lumin Elba…
■Në të gjitha shtetet e Europës Lindore (e ma shumë nder ata Perëndimore), Stalini, jo vetem, nuk lejoi zgjedhje të lira, po edhe perforcoi poziten e partive komuniste nder të gjitha shtetet ku kishte kjoftë edhe vetem një ushtar sovjetik, ndersa, nga pikpamja e tyne “demokratike”, ata ishin dhe mbeten deri diten e fundit “parti staliniste”…
■”Perandoria e së keqes” Bashkimi i Republikave Socialiste Sovjetike ase BRSS, me datën 9 Maji 1945 kishte 16 “republika bolshevike” që shtriheshin deri nder kufinjtë e Koresë dhe në Lindjen e Largët… poshtë me dalje në Detin e Zi dhe Adriatik e Jon… dhe me një territor të pushtuem ku, mbizotnonte diktatura staliniste nder këto shtete: Letoni, Estoni, Lituani, Poloni, Gjermani Lindore, Çeki e Sllovaki, Hungari, Rumani, Bullgari, Jugosllavi dhe Shqipnia ynë “Dera e Adriatikut”, e “Paktit të Varshavës”!
■Sikur të kalonim para syve tanë vetem portretet e udhëheqësve komunistë të këtyne vendeve para vitit 1990, tue fillue nga Oneker i Gjermanisë apo Çaushesku i Rumanisë, e deri tek anadollaku i Shqipnisë Ramiz Alia… Vetem atëherë, do të kuptonim fatin e zi të Popujve tanë, që per 70 vjetë vuejten nën diktaturen e pashoqe staliniste bolshevike.
■Nëse historia e BRSS nuk do ti harrojë kurrë “Gulagët” e Stalinit, apo ata tmerret e kampeve të shfarosjeve në Siberi… As Populli Shqiptar nuk do të fundosin në “Arkivin e Harresës” asnjëherë: Torturat, masakrat dhe zhdukjet e bame nga hetuesit dhe vrasësit komunistë, nder 26 Burgjet dhe hetuesit e Shkodres nga viti 1944… e përgjithmonë!
***
■Në këte 70 vjetor të datës 9 Maji 1945, Putin i Rusisë… ka mendue me dekorue edhe
24 vetë, që po i thonë se janë “shqiptarë’’: Rustem PEÇI, Odhise PORODINI,
Sul DOMI, Gjike KURTIQI, Ziqiri MERO, Faik ALIAJ, Servet AGALLIU, Orhan FRASHËRI, Gjemal KACANI, Spiro JANI, Llutfie MERO, Gjon BANUSHI,
Manushaqa MIKO, Lefkoshe PAPAJANI, Alfred MOISIU, Rita MARKO, Ballëm META, Kadri DINGU, Asllan GROPASI. Nuk i njoh! Edhe mund të jenë…
■Më çuditë vetem një fakt: Si përputhet mendimi i Putin me veprimin e kryeministrit Edi Rama, që në gjithë listen nuk ka mujtë me gjetë asnjë emen “katolik” ashtusi, edhe kryeministri Rama, tash dy vjet “nuk gjenë asnjë katolik, per ambasador në Vatikan”!!
A mos asht një kujtesë kjo e vitit 1945…Që, përkon me Sulltan Mehmetin e II…në 1478…
■“Në Shqipni, të mos mbetet …Asnjë Katolik!”…
*Në 70 vjetorin e përmbytjes së Shqipnisë…
Melbourne, 7 Maji 2015.