-Përkujtim viktimave të sulmit në Munih, ndizen qirinjë sot në mbrëmje nga ora 20:30 në Sheshin Zahir Pajaziti në Prishtinë/

Foto Gazeta DIELLI-Behlul Jashari: Prishtina /

PRISHTINË, 24 Korrik 2016-Gazeta DIELLI/ Në Kosovë sot është ditë zie e shpallur nga presidenti i Republikës, Hashim Thaçi, në nderim të viktimave të sulmit në Mynih-Gjermani, ku në mesin e viktimave janë edhe shtetasë kosovarë, dhe në solidarizim me popullin gjerman.

Flamujt ulen në gjysmë shtizë në të gjitha objektet shtetërore të Republikës së Kosovës, brenda dhe jashtë vendit.

Ministria kosovare e Diasporës ka ftuar të gjithë bashkatdhetarët që janë në atdhe dhe të gjithë qytetarët e Kosovës të përkujtojnë bashkatdhetarët tanë të rënë në sulmin e Mynihut, Sabina Sula, Dijamant Zabergja dhe Armela Segashi, por edhe të gjitha viktimat e sulmit kriminal në Mynih, përmes ndezjes së qirinjve, sot në mbrëmje nga ora 20:30 në Sheshin Zahir Pajaziti në Prishtinë.

Ndezja e qirinjve i paraprin aktivitetit të paraparë për Ditët e Diasporës, Albanian Beauty, të mbështetur nga Ministria e Diasporës, me projeksione të filmave të filmbërësve nga diaspora, e që nesër do ti dedikohen Sabinës, Dijamantit e Armelës.

Ministri i Jashtëm i Kosovës, Enver Hoxhaj, ka shkuar në Mynih, ku në vendin e tragjedisë vendosi lule në nderim për të gjitha viktimat./b.j/