– Organizuar nga Ministria e Diasporës: Panair me veshje kombëtare, punime dore e ushqime tradicionale. Një nga 200 aktivitetet këto ditë për dhe me diasporën/

PRISHTINË, 12 Korrik 2016-Gazeta DIELLI-B.Jashari/ Një panair me veshje kombëtare, punime dore dhe ushqime tradicionale, organizuar nga Ministria e Diasporës e qeverisë së Kosovës, u hap sot në Prishtinë, në sheshin “Zahir Pajaziti”.

Në këtë panair, i katërti me radhë, po marrin pjesë  60 prodhues e shoqata nga Kosova, Shqipëria e viset e tjera shqiptare, të cilët gjatë katër ditëve do t’i promovojnë produktet e tyre.

Qëllimi kryesor i këtij panairi është ruajtja e identitetit kombëtar. Përmes këtij panairi, që karakterizohet për veshje kombëtare, punime dore e ushqime tradicionale,  bashkatdhetarëve do t’u prezantohet tradita shqiptare.

Panairin e hapi Kushtrim Sheremeti, shef  i kabinetit të ministrit, i cili tha se ky panair tashmë tradicional është një prej aktiviteteve të organizuara të MeD-së gjatë muajit të diasporës.

“Ky është një nga 200 aktivitetet që Ministria e Diasporës po i organizon në këto ditë për dhe me diasporën. Është një aktivitet ku marrin pjesë prodhues nga të gjitha trevat shqiptare. Besojmë se edhe sivjet, si vitet e kaluara, interesimi i bashkatdhetarëve për ta vizituar këtë panair do të jetë i madh. Ata do të kenë rast jo vetëm të shohin punime dore që janë unike, ta shijojnë ushqimin, por edhe t’i blejnë produktet vendëse”, tha Sheremeti.

Në këtë panair, që do të qëndrojë i hapur katër ditë, të interesuarit mund të gjejnë qilima të ndryshëm të punuar me dorë, punime të punuara me fleta bakri, piktura me motive të ndryshme, si dhe ushqime tradicionale.