-Shtyn demarkacionin për 1 shtator. Tre javë ‘armëpushim’/

PRISHTINË, 11 Gusht 2016- Gazeta DIELLI-B.Jashari/ “Koalicioni nuk i ka votat, shtyn demarkacionin për 1 shtator”, shkruan sot shypi në Kosovë, pas vendimit të djeshëm të mbledhjes së Kryesisë së Kuvendit me shefat e grupeve parlamentare, ku partia më e madhe opozitare, Lëvizja Vetëvendosje, hodhi gaz lotsjellës.

Në kulmin e tensioneve dhe të paralajmërimeve për përshkallëzim të situatës, Kryesia e Kuvendit ka vendosur që Marrëveshjen e demarkacionit me Malin e Zi ta qesë në votim më 1 shtator, shkruan sot Koha Ditore.

Gazeta thekson se, edhe pse ka pasur zëra se demarkacioni do të shqyrtohet këtë javë, shtyrja është bërë me qëllim të blerjes së kohës. Sipas burimeve të gazetës, partitë në pushtet ende nuk i kanë të sigurta votat për ta kaluar marrëveshjen, veçmas në kampin e Lidhjes Demokratike. Arsye tjetër është edhe ‘”frika” se kjo çështje mund të çojë në tensionim të situatës, pak ditë para vizitës së zëvendëspresidentit amerikan, Joe Biden. “Por vizita e Bidenit mendohet të shfrytëzohet për t’i bindur edhe deputetët tjerë që janë kundër Marrëveshjes së koalicionit, në mënyrë që kalimi i saj të mos vihet në rrezik”, ka thënë burimi.

Por lëvizja “Vetëvendosje” shtyrjen e votimit për shtator e ka përkthyer si rezultat i rezistencës së tyre, shkruan gazeta.

“Tri javë ‘armëpushim’ për demarkacionin”, shtë kryetitulli i gazetës Zëri, e cila thekson se

partnerët e koalicionit qeverisës i kanë dhënë mbështetje Marrëveshjes, derisa opozita ka paralajmëruar masa radikale për pengimin e saj.

“Partnerët e koalicionit qeverisës shpresojnë se kjo Marrëveshje do të ratifikohet më 1 shtator, ndërsa subjektet opozitare kërkojnë që kjo Marrëveshje të hidhet poshtë në mënyrë që Kosova të mos i humbë mbi 8 mijë hektarë tokë.

Në shenjë kundërshtimi ndaj vendimit për përcaktimin e datës së seancës për demarkacionin, shefi i grupit parlamentar të Lëvizjes “Vetëvendosje”, Glauk Konjufca, ka hedhur gaz lotsjellës në sallën e Kryesisë duke e ndërprerë mbledhjen. Konjufca më vonë është arrestuar për këtë veprim”, shkruan gazeta.

Ndërsa, sipas shkrimeve të analistëve në media rreth marrëveshjes për demarkacionin e kufirit me Malin e Zi, “tash janë dalë edhe interesat krahinore dhe partiake dhe duket se është prishur edhe balansi i votave për ratifikim në Kuvend të Kosovës”.