Rezultati:Kosova-Shqipëria 2:2/
Stadiumi i qytetit në Prishtinë.
Shikues: 20.000.
Gjyqtar: Lorenc Jemini.
Shënues: Celina (59′-nga penalltia), Rashani (70’) – Manaj (55′), Rrahmani (73′).
Formacionet/
Kosova: Ujkani, Përdedaj, I.Berisha, Alushi, Paçarada, Sadiku, Zejnullahu, Brahimi, Halimi, B.Berisha, Celina. Përzgjedhës: Trajner: Albert Bunjaku.
Shqipëria: Berisha, Gjimshiti, Cana, Rrahmani, Hysaj, Aliji, Xhaka, Basha, Memushaj, Cikalleshi, Sadiku.
Përzgjedhës: Gianni De Biasi.
Kosovë – Shqipëri, ndahen vëllazërisht me rezultat 2:2. Ndeshje miqësore me karakter festiv që u zhvillua në stadiumin e Prishtinës, ku ishin të tubuar mbi 20 mijë tifozë (i tërë stadiumi ishte i mbuluar me ngjyra kuqezi), panë një lojë spektaklare e me katër gola.
Dy kombëtare kënduan himnin kombëtar, futbollistët e të cilës dhuruan emocione të pakufishme, thurën veprime të shpejta, krijuan raste, por edhe shpërthyen me gola në pjesën e dytë, duke i ngritur në këmbë tifozët. Rezultati fare nuk ishte më rëndësi, sepse ishte një ndeshje e karakterit festiv. Të gjithë festuan në mënyrë më madhështore, mbi të gjitha ishin të emocionuar nga kjo lojë e bukur e yjeve tanë. Përzgjedhësi i kombëtares së Kosovës Albert Bunjaki dhe ai i Shqipërisë, Gianni de Biasi, panë formën e futbollistëve të tyre. Pa dyshim se duhet veçuar edhe talentin e madh shqiptar Rey Manaj që debutoi me gol për kombëtaren e Shqipërisë. Në minutën e 3-të, Ilir Berisha shkaku i lëndimit u largua nga fusha, duke u zëvendësuar nga Alban Pnishi.
Bersant Celina futet brenda 16-shit, kombinon bukur me Halimin dhe del i vetëm përballë Berishës, nga një pozitë e mirë, gjuajtjen e tij mezi e mbrojti portieri Etrit Berisha pikërisht në minutën e 22-të. Në stadium ishte një atmosferë e zjarrtë ku dëgjoheshin brohoritjet: Shqipëria, Shqipëria, Kosova, Kosova. Lojë e hapur, me kombinime të bukura e të sakta, kur Mërgim Brahimi i Kosovës nga rreth 15 metra gati sa shënoi, por për fat të portierit Etrit Berisha topi ndalet nga tërthorësja (40′).
Anëtari i Napolit, Elseid Hysaj, në minutën e 45-të, ndalë topin me gjoks dhe del i vetmuar me portierin e Kosovës, Samir Ujkanin, por gjuajtja e tij shkopi mbi portë. Në minutën e 49-të, Celina shërben bukur brenda zonës për Halimin, ky i fundit e shtyn drejt portës, por topin kalon ngjitur me shtyllën pingule. Pas disa rasteve të mira, bie goli i pari. Në minutën e 55-të, nga gjuajtja e lirë një harkim i bukur dhe futbollisti i talentuar i Interit, Rey Manaj, me kokë nga rreth 10-11 metra shënoi për epërsinë (0:1) të Shqipërisë.
Pas katër minutave (59’) penallti për Kosovën. Taulant Xhaka luan me dorë në zonë, gjyqtari Jemini akordon penallti. Bersant Celina, talent i Manchester City, merr përsipër penalltinë, gjuajti fortë topin qëllon shtyllën dhe futet brenda në rrjetë, 1:1. Stadiumi shpërthen në festë, kur në minutën e 70-të Elbasan Rashani për mrekulli kaloi Rrahmanin dhe nga afërsia, nga një pozitë e vështirë pothuajse te vija fundore, me gjuajtje të fortë mposhti portierin Berisha dhe 2:1. Në minutën e 73-të, Naser Aliji për mrekulli harkoi, ndërsa Amir Rrahmani nga afërsia mposhti portierin Ujkani dhe 2:2. Një ndeshje e fortë, e pëlqyeshme dhe përfundoi pa fitues.