Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Prizren-DokuFest 2016 me 238 filma nga 57 shtete

by

-DokuFest po feston edicionin e tij të 15-të, e nisi udhën e tij në vitin 2002, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë/

PRIZREN, 17 Korrik 2016-B.Jashari/Festivali Ndërkombëtar i Filmit të Shkurtër dhe Dokumentar DokuFest ka shpallur programin e edicionit të 15-të, jubilar, i cili do të mbahet nga 5 deri në 13 gusht në  qytetin e Prizrenit në Kosovë. Të zgjedhur nga një numër rekord i aplikimeve, festivali do të prezantojë 238 filma nga 57 shtete në 6 programe garuese dhe në disa speciale.
“Korrupsioni është tema qendrore e festivalit të këtij viti, konteksti social lokal dhe global si dhe pasojat e tij, të cilat do të theksohen dhe eksplorohen përmes një numri të eventeve, përfshirë panele, diskutime me filmëbërës dhe eskpertë të ftuar ndërkombëtarë dhe lokalë, punëtori dhe në një konferencë të teknologjisë” , bëjnë të ditur organizatorët.
“DokuFest po feston edicionin e tij të 15-të me një program eklektik të filmave. Ne shpresojmë që ata do të ju mahnisin, emocionojnë dhe befasojnë aq sa edhe neve”, thekson drejtori artistik, Veton Nurkollari.

“Ne jemi të kënaqur që jemi në gjendje të prezantojmë veprat e cilësisë më të lartë nga filmëbërës të ri dhe mjeshtërat e kinemasë në këtë edicion jubilar”, shprehet ai.

Në fillimin e muajit mars të këtij viti  njoftohej se kishin mbërritur mbi 4500 aplikime për DokuFest 2016 dhe se ishte mbyllur  thirrja për aplikim  e hapur në 24 nëntor 2015.

Verën e kaluar, në DokuFest 2015 në qendër ishte tema e migrimit me filma nga e gjithë bota dhe rajoni. Nga 228 filma të metrazhit të gjatë dhe të shkurtë, 124 bënin pjesë në programet garuese.

DokuFest e nisi udhën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë.

Prizren-DokuFest 2016 me 4500 aplikime

by

-DokuFest nisi në vitin 2002, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë/

 PRIZREN, 3 Mars 2016-B.Jashari/ Kanë mbërritur mbi 4500 aplikime për DokuFest 2016, edicionin e 15-të të Festivalit Ndërkombëtar të Filmit të Shkurtër dhe Dokumentar, që do mbahet në qytetin e Prizrenit, në Kosovë, nga 5 deri 13 gusht.

“Thirrja për aplikim për edicionin e 15-të të DokuFest është mbyllur. Falënderojmë të gjithë 4500+ filmëbërësit të cilët kanë aplikuar me filmat e tyre”, shprehen organizatorët.

Bëhet e ditur se, programi i plotë i festivalit do të shpallet në fillim të muajit korrik. “Një numër i programeve speciale do të shpallen më herët. Festivali do të mbahet nga data 05 – 13 gusht në Prizren, Kosovë”, thekson DokuFest.

Në 24 nëntor 2015 ishte hapur ftesa për të gjithë autorët e dokumentarëve, filmave të shkurtër dhe animacioneve të aplikojnë me filmat e tyre për edicionin e 15-të të Festivalit.

Në DokuFest 2015 në qendër ishte tema e migrimit me filma nga e gjithë bota dhe rajoni. Nga 228 filma të metrazhit të gjatë dhe të shkurtë, 124 bënin pjesë në programet garuese.

DokuFest e nisi udhën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë.