-Në mbledhjen e sotme, qeveria e Kosovës ishte e kompletuar edhe me emërimin, në 2 qershor, të zëvendëskryeministrit të parë, Hajredin Kuçit, i cili vazhdon të jetë edhe ministër i Drejtësisë, dhe ministrit të Punëve të Jashtme, Enver Hoxhajt, të cilat poste i mbante Hashim Thaçi deri në zgjedhjen President i Republikës në muajin shkurt/

 -Pas mbledhjes së tretë, të 3 qershorit në Prishtinë, të qeverive Kosovë-Shqipëri nis zbatimi i marrëveshjeve të reja të nënshkruara/

Nga Behlul Jashari/ PRISHTINË, 8 Qershor 2016/ Qeveria e Republikës së Kosovës, e pas zgjedhjeve të pikërisht para dy viteve – 8 qershorit 2014, zhvilloi sot mbledhjen e 91-të të rregullt, të 24-tën në vitin 2016, nën drejtimin e kryeministrit Isa Mustafa, në të cilën ka miratuar dokumente dhe vendime të përgjegjësive kushtetuese dhe ligjore.

Në mbledhjen e sotme, qeveria e Kosovës ishte e kompletuar edhe me emërimin, në 2 qershor, të zëvendëskryeministrit të parë, Hajredin Kuçit, i cili vazhdon të jetë edhe ministër i Drejtësisë, dhe ministrit të Punëve të Jashtme, Enver Hoxhajt, të cilat poste i mbante Hashim Thaçi deri në zgjedhjen President i Republikës në muajin shkurt.

Në hapje të mbledhjes, kryeministri Mustafa uroi zëvendëskryeministrin e parë Kuçi dhe ministrin e Jashtëm Hoxhaj, e në vazhdim qeveria miratoi Projektligjin për Ratifikimin e Marrëveshjes Përkitazi me Themelimin e Fondit të Ballkanit Perëndimor.

Ky projektligj është hartuar pas miratimit të nismës dhe nënshkrimit të Marrëveshjes për themelimin e Fondit të Ballkanit Perëndimor nga qeveria e Republikës së Kosovës.

U miratua edhe Nisma për lidhjen e Marrëveshjes Financiare për IPA 2016, ndërmjet Republikës së Kosovës dhe Bashkimit Evropian.

Qeveria gjithashtu miratoi vendimin per themelimin e Grupit Ndërministror për hartimin e Strategjisë nacionale për mospërhapjen e armëve të shkatërrimit në masë dhe Planin e Veprimit, që përbëjnë edhe përmbushje të obligimeve  ndërkombëtare të Republikës së Kosovës që dalin nga Rezoluta 1540 e Organizatës së Kombeve të Bashkuara dhe obligime tjera që dalin nga marrëveshje dhe traktate tjera ndërkombëtare.

Kabineti qeveritar mori edhe  vendimin për ndarjen e mjeteve financiare për pagesën e kontributit në Fondin e Inovacionit të Mekanizmit të Zhvillimit të Ndërmarrësisë dhe Inovacionit të Ballkanit Perëndimor.

Mbledhja e sotme e qeverisë së Kosovës ishte e para pas mbledhjes së tretë të përbashkët me Këshillin e Ministrave të Shqipërisë, në Prishtinë, në 3 qershor, pas së cilës nis zbatimi i marrëveshjeve të reja të saponënshkruara.

“Thellimi i bashkëpunimit ndërmjet dy qeverive tona është në interes të qytetarëve tanë, është në interes nacional dhe shtetëror, prandaj në këtë interes dhe mbi këtë interes do të gjejmë gjithnjë gjuhën e përbashkët për të çuar proceset tona përpara”, është shprehur kryeministri kosovar në mbledhjen e përbashkët.
“Afrimi dhe bashkëpunimi ynë s’ka qenë kurrë më i mirë e më vëllazëror se sa në këtë epokë, sepse ne tani e kemi të njëjtë edhe orientimin tonë politik, atë të integrimeve euroatlantike, e kemi të njëjtë edhe gjuhën ekonomike, atë të integrimit të lirë dhe konkurrues, por edhe gjuhën shtetërore, atë të forcimit të shtetit të së drejtës, luftës kundër krimit dhe korrupsionit”, ka theksuar ai në mbledhjen e qeverive Kosovë-Shqipëri.Qeveria e Kosovës, e koalicionit të dy partive më të madha PDK e LDK, ku përfshihen edhe minoritetet, është votuar në 9 dhjetor 2014, një ditë pas konstituimit të Kuvendit të zgjedhjeve të parakohëshme parlamentare që ishin mbajtur gjashtë muaj më parë – në  8 qershor.