Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosove-‘Home Sweet Home’ shfaqet premierë në Karlovy Vary

by

PRISHTINË, 7 Korrik 2016-Gazeta DIELLI/Filmi ‘Home Sweet Home’ me skenar nga Zymber Kelmendi, regji nga Faton Bajraktari dhe producent Trim Musliun, do të jepet premierë sot në ora 16:00 në festivalin e madh Karlovy Vary.

Filmi flet për Kosovën e pasluftës dhe për historinë e Agronit i cili për disa vite ka qenë i zhdukur dhe pasi kthehet në shtëpi, ai përballet me rrethin, të cilët, emrin e tij e kanë përdorur për përfitime personale.

Në rolet kryesore luajnë: Donat Qosja, Arta Muçaj, Shkumbin Istrefi etj.

‘Home Sweet Home’ është në garë me 11 filma të tjerë në konkurrencën East of the West të cilët konkurrojnë për çmimin e parë në kategorinë East of the West si dhe për çmimin  special të jurisë.

Ky film është shfaqur edhe dje (06.07.2016) për media ndërkombëtare ku edhe ka ngjall interesim të madh dhe gjithashtu ka marr ftesa për në shumë festivale tjera të rëndësishme. Poashtu filmi do të shfaqet edhe nesër.

‘Home Sweet Home’ në Karlovy Vary do të prezentohet nga skenaristi Zymber Kelmendi, regjisori Faton Bajraktari, aktorët Donat Qosja dhe Shkumbin Istrefi, nga drejtori i Qendrës Kinematografike të Kosovës Arben Zharku si dhe nga drejtoresha e Agjencisë së Filmit në Maqedoni Mimi Gjorgoska Ilievska.Filmi është prodhim i kompanisë filmike ‘Cineproduction’ i mbështetur nga Qendra Kinematografike e Kosovës dhe nga Agjencia e Filmit në Maqedoni./b.j/

 

Kosovë-Filmi “Home”, shfaqet premierë

by

-Dita Botërore e Refugjatëve shënohet  në Prishtinë si në Londër, me premierën e filmit “Home”. Filmi do të jetë edhe pjesë DokuFest-it të sivjetëm, i cili do të mbahet nga 5 deri13 gusht në Prizren/

-Filmi “Home” është realizuar me mbështetjen financiare të Ekipit të Kombeve të Bashkuara në Kosovë, Fondacionit për Shoqëri të Hapur Londër dhe USAID-it, duke përfshirë edhe Ministrinë e Punëve të Jashtme të Kosovës dhe Komunën e Prishtinës/

 Nga Behlul Jashari/ PRISHTINË, 20 Qershor 2016/ Në Prishtinë, në organizim të Festivalit Ndërkombëtar të Filmit Dokumentar dhe të Shkurtër – DokuFest të Prizrenit dhe ekipit të Kombeve të Bashkuara  në Kosovë (UNKT), Dita Botërore e Refugjatëve, 20 Qershori, u shënua me premierën e filmit “Home”, në të njëjtën ditë me premierën në Londër.Vitin e kaluar DokuFest-i ia ka kushtuar një edicion të veçantë të festivalit temës së migracionit.

Ishte kjo kohë kur Daniel Mulloy, një partner i respektuar i Festivalit DokuFest, u frymëzua për të filmuar “Home”, film i cili për qëllim primar ka inkurajimin e një perspektive të re për krizen e refugjatëve.

“Unë besoj se flas për të gjithë ne kur them se iu bashkuam këtij projekti për shkak të ndjenjës empatike për gjendjen e refugjatëve në mbarë botën. Ne vetëm mund të shpresojmë se ‘Home’ do të frymëzojë një dhembshuri të ngjashme në audiencat në mbarë botën”, u shpreh një nga producentët kryesorë në realizimin e filmit, Shpat Deda.

Filmi përshkruan historinë e një familje të rëndomtë britanike, e cila duke u përballar me rreziqet që lidhen me humbjen e sigurisë lufton për shpresë dhe sigurimin e një jete më të mirë për të dhe femijët e tyre.

Drejtori ekzekutiv i DokuFest, Eroll Bilibani, tha se, “derisa ne kemi qenë duke punuar në video promovuese për edicionin e fundit të festivalit me Daniel, kriza më e madhe e refugjatëve në historinë moderne ishte duke u zhvilluar në kufijtë e Evropës”.

“Izolimi i Kosovës, kriza e refugjatëve dhe përballja e Danielit me refugjatët në kalimet kufitare frymëzuan atë për të treguar një histori paralele: të një çifti që jeton në siguri dhe që i marrin fëmijët e tyre dhe shkojnë në një zonë lufte”, vijoi ai.

“Ne jemi krenarë të jemi pjesë e fushatës Me Refugjatët për Ditën Botërore të Refugjatëve të vitit 2016”, tha Bilibani, në kinemanë ABC në Prishtinë, ku u shfaq filmi.

Në njoftimin e dërguar theksohet se, premiera paralele e filmit “Home” në Londër, po ashtu, është pritur mirë nga publiku i atjeshëm.

Filmi “Home” është realizuar me mbështetjen financiare të Ekipit të Kombeve të Bashkuara në Kosovë, Fondacionit për Shoqëri të Hapur Londër dhe USAID-it, duke përfshirë edhe Ministrinë e Punëve të Jashtme të Kosovës dhe Komunën e Prishtinës.

 Film i shkurtër “Home”, me Jack O’Connell dhe Holliday Grainger në rolet kryesore, në regji dhe skenar nga regjisori fitues i Çmimit BAFTA, Daniel Mulloy, me produksion të DokuFest (Kosovë), Black Sheep Studios dhe Somesuch (Angli),  do të jetë pjesë e programit të sivjetëm të DokuFest-it, i cili do të mbahet nga 5 deri 13 gusht, në Prizren.

Në 3 mars nga organizatorët në Prizren njoftohej zyrtarisht se, kanë mbërritur mbi 4500 aplikime për DokuFest 2016, edicionin e 15-të të Festivalit Ndërkombëtar të Filmit Dokumentar dhe të Shkurtër.

DokuFest e nisi udhën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë.