Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KOSOVA 15 VJET SHTET, FESTË MADHËSHTORE NË NEW YORK

by

Sokol Paja/

New York, 16 Shkurt 2023 – 15 vjetori i shpalljes së pavarësisë së Republikës së Kosovës bashkoi në një festë madhështore në New York dhjetëra patriotë shqiptarë, aktivistë të shquar të komunitetit, diplomatë, drejtues të organizatave e shoqatave patriotike në Amerikë, gazetarë e veprimtarë të komunitetit shqiptar në përkujtim të ngjarjes më të shënuar të popullit e shtetit të Kosovës, pavarësia. Në fjalën e mirëseardhjes Ambasador Blerim Reka ndër të tjera tha se: “Kjo Republikë siç e dini është një rrugëtim i gjatë, me shumë sakrifica gjeneratash e brezash për çka i përkulem gjithë atyre bijve e bijave të kombit që këtë e bënë realitet me mund dhe sakrifica, me mençuri dhe me dije, por mbi të gjitha me luftën çlirimtare të UÇK-së dhe ndihmën e Shteteve të Bashkuara të Amerikës. Zoti e bekoftë Kosovën dhe Zoti e bekoftë Amerikën” tha në mesazhin e tij Ambasador Reka. Ambasador Lisa Carty përcolli për të gjithë të pranishmit në festë fjalët e ngrohta të Ambasadores së Shteteve të Bashkuara të Amerikës në Kombet e Bashkuara Ambasador Linda Thomas-Greenfield. “Ne emër të Ambasadores Greenfield, të misionit në UN, të shtetit tonë, ju përcjellim urimet më të ngrohta popullit e shtetit të Kosovës për 15 vjetorin e Pavarësisë” tha në mesazhin e saj Ambasador Carty ku ndër të tjera theksoi rëndësinë dhe rrugëtimin e shtetit të Kosovës deri në pavarësi. Mbrëmja vazhdoi nën tingujt e muzikës klasike, koktejl dhe biseda mes miqsh që përkujtuan me respekt dhe nderim betejat dhe sakrificat për lirinë e pavarësinë e Kosovës.

Rroftë përjetë Republika e Kosovës.

Nder dhe lavdi luftëtarëve, çlirimtarëve, dëshmorëve dhe heronjve të lirisë.

Mirënjohje përgjithmonë Shteteve të Bashkuara të Amerikës.

KRYEPARLAMENTARI I KOSOVËS Z.GLAUK KONJUFCA, DREKË NDERIMI DELEGACIONIT TË VATRËS NË DITËLINDJEN E 114-TË TË DIELLIT

by

Sokol Paja/

Prishtinë, 15 Shkurt 2023- Kryetari i Parlamentit të Republikës së Kosovës z.Glauk Konjufca në shenjë nderimi, respekti e vlerësimi shtroi një drekë falënderimi për delegacionin e Federatës Pan-Shqiptare të Amerikës VATRA në ditëlindjen e 114-të të gazetës “Dielli”. Ky vlerësim i ngrohtë vjen në një ditë shumë të shënuar për Republikën e Kosovës, Federatën Vatra, gazetën Dielli, e krejt shqiptarinë anembanë globit: 15 vite pavarësi e shtetit të Kosovës. Në drekën vëllazërore të falënderimit, nën përkujdesjen e veçantë të Kryeparlamentarit Konjufca morën pjesë: kryetari i Vatrës z.Elmi Berisha, nënkryetari z. Alfons Grishaj dhe pjesëtarët e delegacionit zyrtar: Mondi Rakaj, Dr.Pashko Camaj, Besim Malota, Tony Kastrati, Pr. Dr. Pajazit Hajzeri, Edi Kola dhe Xhevdet Berishaj. Çdo shqiptar është krenar për arritjet, sukseset dhe konsolidimin e shtetit të Kosovës. Diplomacia Parlamentare e shtetit të Kosovës nën udhëheqjen e kryetarit z.Glauk Konjufca ka shënuar një stad dhe nivel shumë të arrirë në përpjekjet për demokracinë, shtetin e së drejtës, diplomacinë, konsolidimin dhe imazhin e shkëlqyer të shtetit të Kosovës në arenën ndërkombëtare. “Urimet më të përzemërta për gazetën Dielli. Është pjesë shumë e rëndësishme e historisë sonë dhe të shqiptarëve të Amerikës. Edhe sot i lexoj me ëndje shkrimet e gazetës Dielli. Do isha shumë i lumtur të kem kopjen e plotë të botimeve të Diellit. Mirënjohje, vlerësime dhe urime për punën e shkëlqyer” deklaroi në mesazhin e urimit Kryetari i Parlamentit z.Glauk Konjufca, drejtuar Editorit të Diellit. Në drekën vëllazërore z.Konjufca shprehi vlerësimin më të lartë për Federatën Vatra e gazetën Dielli për kontributin në çështjen kombëtare dhe sidomos për Pavarësinë e Kosovës dhe sfidat me të cilat përballet Kosova e kombi shqiptar. Gëzuar përjetë Pavarësia e Kosovës, mirënjohje përgjithmonë Shteteve të Bashkuara të Amerikës.

GAZETA “DIELLI”, GËZUAR DITËLINDJEN E 114-TË

by

Sokol Paja/

“Dielli” i Vatrës, “Dielli” i shqiptarëve të Amerikës, “Dielli” i botës shqiptare, “Dielli” i mërgatës përtej Atlantikut, “Dielli” i kombit shqiptar sot feston ditëlindjen e 114-të. Që prej 15 Shkurtit 1909, Gazeta “Dielli” – “Nderi i Kombit” është gazeta më e vjetër në botën shqiptare, regjistri, arkiva, historia, krenaria, identiteti, lavdia dhe vazhdimësia e Vatrës, vatranëve e shqiptarëve të Amerikës.

Gazeta “Dielli” është institucion atdhedashurie, shkollë gazetarie, referencë historie.

“Dielli” është dritë që do ndriçojë përjetë qiellin e shqiptarisë. “Dielli” është e shkuara e tashmja dhe e ardhmja e mërgatës shqiptare në Shtetet e Bashkuara të Amerikës.

Gazeta “Dielli” është një dëshmi autentike e përpjekjeve të shenjta për shqiptarinë prej patriotëve, atdhetarëve e veprimtarëve të shquar të çështjes kombëtare. Gazeta “Dielli” është fillimi i shekullit të dytë të frymëzimit kombëtar, ruajtjes, trashëgimit dhe konsolidimit të vlerave më të çmuara të kombit tonë.

Gazeta “Dielli” është pasuri e çmuar historisë së lavdishme të kombit tonë, gjuhës, kulturës, medias, traditës dhe identitetit kombëtar të shqiptarëve të Amerikës dhe mbarë trojeve shqipfolëse.

“Diell”, ndriço, qëndro, shkëlqe e vezullo në shekuj të shekujve.

Nga “Patronazhistët” te “Aktivistët”, dhe çelikosja e unitetit popull-parti-pushtet

by

Sokol Paja/

Zgjedhjet lokale të 14 majit prodhuan prej “partisë-shtet” që keqqeveris Shqipërinë prej gati 10 vitesh, një superskemë politike survejimi të ashtuquajtur “aktivisti”, skemë tipike e regjimeve diktatoriale. Regjimet autoritare dhe totalitare, skemat dhe strukturat e survejimit, përndjekjes, shantazhit e presionit i përdorin me çdo mjet e çdo kusht për të survejuar, nënshtruar, frikësuar, e mposhtur kundërshtarët politikë e qytetarët e thjeshtë. Qeveria që keqqeverisë Shqipërinë, vepron në mënyrë tipike komuniste në ideologji, marrëdhënie ndërinstitucionale, qasje ndaj pushteteve të varësisë, ndërvarësisë e qytetarëve të thjeshtë. Regjimet totalitare veprojnë masivisht; në emër të partisë dhe të popullit.

Përfshirja me detyrim dhe presion në skemën “aktivisti” të punonjësve të administratës publike me status civil, të përfaqësuesve të institucioneve të pavarura kushtetuese, të institucioneve të sigurisë kombëtare, përbëjnë një skandal të paprecedentë për të cilin duhet të reagojnë fort ambasadat e vendeve perëndimore në Shqipëri, shoqëria civile e çdo institucion kombëtar e ndërkombëtar i akredituar në Shqipëri. Në diktaturë, populli, pushteti, partia konsiderohen e njëjta gjë. Çdo veprim organizohet, dirigjohet, orkestrohet dhe realizohet me qëllimin madhor komunist: “për çelikosjen e unitetit popull-parti”. E njëjta gjë po shfaqet dhe sot 3 dekada pas rënies së komunizmit. Fatkeqësisht në Shqipëri qeveris një diktaturë moderne: Kryeministri=partia-shtet, pasi ka shpartalluar opozitën duke lobuar deri në FBI kundër saj, pasi mban peng opozitën me vendim gjykatash, ka shkatërruar demokracinë duke pushtuar çdo institucion të pavarur kushtetues. Gjithçka dhe çdo gjë në Shqipëri është vënë nën shërbim të partisë-shtet.

Me qëllim mbajtjen me çdo kusht të pushtetit, eleminimin, përndjekjen e kundërshtarëve dhe mbajtjen nën survejim, përndjekje, panik, frikë, e shantazh të qytetarëve të zakonshëm, qeveria me armatën “aktivisti” po vë në rrezik sigurinë kombëtare, paqen, ligjshmërinë dhe kohezionin social. “Aktivisti” është skemë fatale e shkeljeve të lirive dhe të drejtave themelore të njeriut. Është shkelje flagrante e ligjit zgjedhor shqiptar. Skema politike survejuese “Aktivisti” është e njëjtë si skema “patronazhisti” një skandal i paprecedentë në historinë e shtetit modern shqiptar. Asnjë strukturë politike, partiake dhe e jashtëligjshme nuk guxon të intimidojë njerëz të lirë, të posedojë të dhëna personale, sensitive, të mbrojtura me ligj prej institucioneve shtetërore e ti vërë në shërbim të partisë-shtet. Asnjë prej strukturave në shërbim të qeverisë nuk guxon në një shtet demokratik që të ndërsejë çdo individ të lirë e ta vendosë në shërbim të qeverisë. Çdo skemë tipike komuniste në një shoqëri të lirë dhe demokratike duhet të refuzohet prej të gjithëve. Nesër do jetë vonë. Liria mbi gjithçka.

Photo by: Getty Images “iStock”

NJË BIBLIOTEKË PËR QYTETIN E ALFABETIT SHQIP

by

Emira Selimi, aktiviste në qytetin e Shkupit, në një rrëfim për Diellin e Vatrës në New York, dhënë Editorit Sokol Paja, shpjegon me detaje përpjekjet për ndërtimin e bibliotekës në qytetin e alfabetit shqip dhe thirrjen për diasporën që të ndihmojë në këtë nismë në dobi të popullsisë shqiptare në Manastir, gjuhës, historisë dhe identitetit kombëtar shqiptar.

LIBRA PËR MANASTIRIN

Ideja lindi kur unë fillova të hulumtoj për shqiptarët ortodoks atje, konkretisht familjen Qiriazi. Më pas kisha kuriozitet për shqiptarët atje që kanë mbetur, ne kishim informacion se aty kanë mbetur 5% shqiptarët, por unë zbulova propaganden maqedone atje, 2% ishin vetëm ato shqiptarë me mbiemra të shqipëruar, ndërsa pjesa më e madhe e shqiptarëve atje i kanë mbiemrat e sllavizuar, nenkupton në Manastir mund të jesh gjithçka vetëm shqiptar jo. Shqiptarët atje e flasin shqipen me shumë pengesa, kjo si pasojë e literatures shqiptare, përposë presioneve të vazhdueshme që kemi berë të ketë një shkollë të mesme shqipe kjo kurrë nuk është realizuar. Shqiptarët kishin vetëm një shkollë fillore ku mësonin Goce Dellçev, tani edhe ajo po boshatiset nga shqiptarët. Fëmijët tani regjistrohen në shkollat maqedone dhe mësojnë edhe Alfabetin në atë cirilik.

TË MBROJMË SHQIPTARËT E MANASTIRIT NGA ASIMILIMI

Shqiptarët në Manastir po asimilohen, ato çdo ditë e më shumë po rrezikohen dhe askush nuk i mbron dhe nuk i kujton ato. Kanë nevojë për përkrahje. Shqiptarët nuk janë as 5% dhe as 2% por janë mbi 15% ato i kanë detyruar të asimilohen me pa dëshirë duke ua ndryshuar mbiemrat. Duke i sllavizuar me prapashtesat ( ski) por dhe duke i turqizuar.

NJË BIBLIOTEKË PËR QYTETIN E ALFABETIT SHQIP

Biblioteka shqiptare në Manastir do formohet në katin e parë të muzeut të alfabetit, aty ku janë shitur pllaka më parë. Aty më nuk do të shiten pllaka, por as nuk do shfrytëzohet muzeu ynë i alfabetit për tregti, por ajo pjesë do mbushet me libra shqip. Manastirasit aty do lexojnë dhe do e ruajnë gjuhën shqipe. Kërkoj ndihmë nga gjithë shqiptarët që të mos më lënë vetëm në këtë betejë shumë të vështirë.

NJË PËRPJEKJE PËR TË RIKTHYER MANASTIRIN

Për herë të parë të gjithë shqiptarët u ngritën në këmbë për qytetin e alfabetit. Momenti kur morën vesh se në çfarë situate jetojnë shqiptarët atje të gjithë shqiptarët e Kosovës dhe të Shqipërisë u emocionuan, vazhdimisht më kanë pyetur si mundet? Manastirin e detyruan të heshte për ta folur të vërtetën. Politikanët e shitën dhe e tradhtuan, bën pazare me qytetin më të rëndësishëm të kombit shqiptar. I mbyllën perdet dhe e falën Manastirin.Por Shqipëria dhe Kosova sot po e rikthejnë.

NEVOJA E MBËSHTETJES INSTITUCIONALE

Asnjë institucion nuk më ka ndimuar, përposë dy Komunave ajo e Gostivarit dhe Çairit që më dhanë mbështetje me libra. Ministrat e Arsimit me vite të tëra kanë qënë shqiptarë në Maqedoninë e Veriut dhe kurrë nuk e hapën një shkollë shqipe në Manastir. Ato e tradhtuan Manastirin, ato i tradhtuan shqiptarët. Dhe është tejet normale se as nuk do më mbeshtesin tashi. Përkundrazi kanë dashur të më pengojnë por nuk kanë mundur se kam pasur mbështetjen maksimale nga Shqipëria dhe Kosova.

NJË LUTJE DHE THIRRJE PËR DIASPORËN

Kam një lutje për diasporën, kati përdhesë në muzeun e alfabetit aty ku po themelohet edhe biblioteka është në gjendje mjerimi, pasiqë aty deri para dy vitëve një maqedonas ka shitur pllaka për dysheme. Kam nevojë për mbështetjen tuaj për rinovimin e saj. Ju lutem kur të vini në vendlindje ejani dhe vizitojeni qytetin e alfabetit pasiq qyteti me historinë më me peshë shqiptare e tradhtuan të gjithë, e falën tek sllavët, ju lutem më ndimoni ta rikthejmë, duke vizituar shpesh dhe duke e folur shqipen nëpër qendren e Manastirit ju tregojmë atyre se nëse e kanë falur politikanët jo edhe shqiptarët.