-Pandeli Majko në takim me Dardan Gashin në Tiranë: Organizimi i diasporës shqiptare bëhet bashkë, pavarësisht prejardhjes, dhe ky organizim ka rezultuar me një migracion shumë të suksesshëm/
-U diskutua për tre marrëveshjet që presin të nënshkruhen në mbledhjen e qeverive Shqipëri-Kosovë në 27 nëntor 2017 në Korçë për bashkëpunim në fushën e diasporës dhe migracionit/
TIRANË-PRISHTINË, 7 Nëntor 2017-Gazeta DIELLI/ Zv/kryeministri dhe ministri Kosovar i Diasporës, Dardan Gashi në ditën e dytë të vizitës në Republikën e Shqipërisë u takua me homologun, ministrin e Shtetit për Diasporën, Pandeli Majko.Në këtë takim, konkret sa i përket detyrimeve karshi diasporës, ashtu edhe miqësor për nga natyra, dy ministrat biseduan për projektet që dy ministritë do t’i udhëheqin në të ardhmen në të mirë të diasporës shqiptare.Pikënisja e takimit ishte dakordimi që diaspora shqiptare është unike dhe e pandarë, potenciali i së cilës duhet që të promovohet si dhe të shërbejë në avancimin e bashkëpunimit të mëtejmë mes institucioneve të Kosovës dhe Shqipërisë dhe bashkatdhetarëve tanë.“Jemi dy shtete që përfaqësojmë një diasporë. Duke thënë këtë, dihet që organizimi i diasporës shqiptare bëhet bashkë, pavarësisht prejardhjes, dhe ky organizim ka rezultuar me një migracion shumë të suksesshëm”, theksoi ministri Majko duke uruar Gashin për punën dhe emërimin.Ministri Gashi u shpreh jashtëzakonisht i kënaqur që tashmë është një adresë në Qeverinë e Republikës së Shqipërisë me të cilën do të intensifikohet bashkëpunimi në të mirë të diasporës, posaçërisht në ruajtjen e identitetit në diasporë.“Emërimi i ministrit Majko është një lajm jashtëzakonisht i mirë për të gjithë shqiptarët, pasi që nuk mund të gjendet një figurë më unifikuese dhe është fat për mua të bashkëpunojmë në të mirë të diasporës shqiptare. Na presin shumë punë së bashku, dhe pres me padurim që të fillojmë projektet e përbashkëta”, theksoi ministri Gashi.Gjatë takimit u diskutua edhe për tre marrëveshjet që presin të nënshkruhen në mbledhjen e dy qeverive në 27 nëntor 2017 në Korçë për bashkëpunim në fushën e diasporës dhe migracionit.Zv/kryeministri Gashi, në kuadër të axhendës, gjatë ditës do të takojë ministren e Arsimit, Sportit dhe Rinisë, Lindita Nikolla si dhe Presidentin e Republikës së Shqipërisë, Ilir Meta./b.j/