Nga Keze Kozeta Zylo/Në restorantin Li Greci’s Staaten në Staten Island, New York u organizua nga qendra e mediave televizive, një drekë festive e përvitshme për çmimin “Nova 2014”. Bordi i mediave televizive në Staten Island nën drejtimin e z.Harold Wagner drejtor ekzekutiv i Bordit për çdo vit organizon dhe inkurajon të gjithë producentët dhe bashkëpunëtorët e tyre për programet që në kanale të ndryshme televizive shfaqin para publikut.
Disa producentë të TV të ndryshme amerikane fituan çmimet në kategori të ndryshme si emisionet për shëndetin, sportin, kulturën, fenë, fëmijët, të rinjtë, shkollën, etj.
Bashkëpunëtorët e TV Alba Life u ndjenë krenarë si shqiptarë që në kategorinë “Children Aktivities”, “Youth Category” përkthyer në “aktivitetet e fëmijëve dhe të rinjve” bordi i qendrës së mediave e kishte nominuar z.Qemal Zylo si producent për çmimin Nova 2014 midis dy konkurrueseve të tjerë, producentë amerikanë, për shfaqjen e emisioneve të ndryshme me profesionalizëm dhe kulturë.
Vlerësimi nga amerikanët tregon dhe njëherë fuqinë e shtetit demokratik dhe vëmendjen e tyre të posaçme për aktivitetet e fëmijëve si në rastin në fjalë për hapjen e shkollave shqipe dhe programet pas shkolle që organizohet me nxënësit shqiptarë dhe që kulmoi me pjesëmarrjen e tyre në Festivalin e parë të shkollave shqipe, festival që organizohej për herë të parë në Diasporë në Amerikë.
TV Alba Life në historinë e tij më shumë se 6 vjet emisionin e parë e ka hapur me orë mësimi të shkollës shqipe midis nxënësve në Staten Island, në këtë ishull dhe lagje të bukur të Nju Jorkut, çka tregon dhe qëllimin kryesor për mësimin e gjuhës shqipe, por edhe për të pasqyruar si media shqiptare pranë mediave amerikane, kulturën dhe traditën mijëravjecare shqiptare, të një ndër kombeve më të lashta në botë. Aktiviteti i përvitshëm nga qendra e mediave televizive në Staten Island është mbresëlënës dhe frymëzues për të organizuar dhe për të pasqyruar gjithcka të vlefshme që i shërben Diasporës Shqiptare dhe Kombit tonë.

11 Nëntor, 2014
Staten Island, New York