Zef Balaj – Dielli

FAMILJA, MIQTË DHE KOMUNITETI SHQIPTAR NË NEW YORK PËRKUJTUAN PATRIOTIN ZEF BALAJ NË 1 VJETORIN E KALIMIT NË AMSHIM

April 14, 2023 by s p

Sokol Paja/

New York, 13 Prill 2023- Familja Balaj, kumbarët Perpepaj, miqtë, veprimtarët, bashkëpunëtorët e ngushtë përkujtuan në New York patriotin e madh Zef Balaj në 1 vjetorin e kalimit në amshim. Zef Balaj ishte shqiptar i veçantë, fisnik, zemërbardhë e shpirtmadh, një mik, shok, vatran, patriot, familjar e veprimtar i pa shoq në mërgatën shqiptare të Amerikës. Gjatë jetës së tij, Zef Balaj mori pjesë aktive në proceset patriotike, demonstratat, protestat, lëvizjet, ndihmat për komunitetin e kombin për 60 vite nga Washingtoni, Bostoni, New York e Institucionet e Shtetit Amerikan, te Liga Shqiptaro-Amerikane e deri te Federata Vatra. Në ceremoninë përkujtimore, në varrezat ku pushon përjetë Zef Balaj “Gate of Heaven”, Dom Nikolin Përgjini udhëhoqi procesin solemn të Rruzarës së Shenjtë, uratë e lutje për pushim të pasosur, në dritën e pambaruar të Perëndisë. Z.Lush Binaku kushëriri i Zef Balës, foli në emër të familjes Balaj dhe falenderoi për respektin e përkujtimin e paharruar. David Balaj djali i Zef Balës nderoi kujtimin e miqve ndaj të atit duke i vlerësuar për pjesëmarrjen. Në Royal Regency Hotel ku familja zhvilloi drekën e përkujtimit, pas fjalës falënderuese të David Balajt, kumbara Prel Ademi- Perpepaj solli kujtime nga fëmijëria me Zef Balajn dhe familjen e tij. Ai gjithashtu drejtoi një pjesë rruzare dhe uratë për shpirtin e patriotit Zef Balaj. Kryetari Vatrës z.Elmi Berisha në fjalën e tij u ndal te 28 vite të miqësisë e bashkëpunimit me Zef Balaj sidomos në luftën e Kosovës, demonstratat e protestat për Kosovën e shqiptarinë. Nënkryetari i Vatrës z.Alfons Grishaj theksoi përkushtimin e Zef Balës për Dardaninë e krejt viset shqiptare. Zefi ishte diamant i çmuar, ishte një krenari e veçantë për miqtë e kombin. Ai luftoi pa u ndalur për idealet e tij, theksoi z.Grishaj. Presidenti i Nderit të Vatrës z.Agim Rexhaj në fjalën e tij veçoi njohjen prej dekadash me Zef Balajn, sakrificën e jetës së Zef Balaj, kapacitetin, vullnetin dhe pjesëmarrjen e Zef Balajt në të gjitha demonstratat e protestat që janë bërë për çështjen kombëtare. Sergio Bitici solli në memorie kujtime me Zef Balajn që nga Kosova e që prej vitit 1959, bashkëpunimin dhe organizimet patriotike, pritjen e Doktor Berishës më 1992 bashkë me Zef Balën, veprimtaritë në dobi të aktiviteteve për komunitetin dhe çështjen kombëtare. Qemal Zylo themelues i Shkollës Shqipe dhe Tv

Alba Live në emër të bordit të shkollës i akorduan Zef Balës çmimin e mirënjohjes për mbështetjen e pakursyer në dobi të mësimit shqip. Ish – kryetari i Vatrës Dritan Mishto theksoi mençurinë e Zef Balës, aftësinë për të mbetur në kujtimet e secilit prej nesh. “Zefi ishte i veçantë, mbaj mend shtrëngimin e fundit të dorës së tij. Do ta kujtojmë gjithmonë me respekt dhe nderim” kujtoi ndër të tjera z.Mishto. Adem Belliu nga Televizioni Kultura Shqiptare foli për amerikanizmin dhe patriotizmin e Zef Balaj. Dritan Haxhia organizatori dhe ideatori i dokumentarit për jetën e Zef Balaj, u tregoi të pranishmëve episode dhe veprimtari në dobi të komunitetit shqiptar në Shtetet e Bashkuara të Amerikës. Asllan Bushati solli në fjalën e tij veprimtari specifike të Zef Balajt, rolin dhe kontributin e tij në

vendime deçizive ku ka kaluar komuniteti dhe Vatra. Në drekën e lamtumirës, familja e miqtë e përkujtuan me lutje e heshtje Zef Balën, për shpirtin e tij fisnik dhe trashëgiminë e shkëlqyer patriotike që trashëgoi tek të gjithë ne.

FAMILJA BALAJ FESTOI SHËN PJETRIN E SHËN PALIN, HOMAZH E PËRKUJTIM PËR GJERGJIN, PJETRIN E ZEF BALËN

June 30, 2022 by s p

Sokol Paja/

New York, 28 Qershor 2022 – Familja Balaj, farefisi, kumbarët, miqtë dhe dashamirësit e familjes festuan festën e dy shenjtorëve më të rëndësishëm të Kishës Katolike Shën Pjetrin e Shën Palin. Në një ceremoni sa festive dhe fetare, darka fisnike e familjes Balaj u kthye në një homazh nderimi, përkujtimi e vlerësimi për Gjon Balaj, Gjelosh Balaj, Pjetër Balaj, Gjergj Balaj e Zef Balaj që u ndanë shumë shpejt nga jeta tokësore. Familja e miqtë i kujtuan me lutje, dhimbje e shumë dashuri pjesëtarët që munguan më shumë se kurrë në këtë festë traditë të familjes që nga Mëziu i Pukës e deri në New York. David Balaj, Valentin Balaj, Ndue Balaj dhe Anton Balaj, në fjalën e mirëseardhjes falenderuan pjesëmarrësit dhe u ndalën në momente të veçanta lutje, përshpirtshmërie e falenderimi për veprat e mira, dashurinë e respektin që kanë lënë pas Gjoni, Gjeloshi, Pjetri, Gjergji e Zefi. Nën bekimin e Dom Nikolin Pergjinit, lutja dhe uratët vazhduan për shpirtrat në parajsë të familjarëve Balaj që mungonin fizikisht por jo shpirtërisht në tryzën bujare të familjes. Largimi në një kohë të shpejtë i Pjetër Balaj, Gjergj Balaj e Zef Balaj ka lënë shumë dhimbje e trishtim te të gjithë familjarët. Në krye të Tavolinës ishte zonja Lina, bashkëshortja e Zefit dhe motra e tij Mirja, djemtë e nipër e mbesa. Një mungesë e madhe që nuk e zëvendëson asgjë. Përkujtimi dhe lutjet janë një lehtësim për shpirtin që vuan mungesën e të ikurve tanë në amshim. Në mjediset familjare të “Tesoro D’Italia”, tri gjenerata të familjes Balaj festuan deri në mbrëmje vonë një festë fetare e familjare e kthyer në një traditë të veçantë si shenjë bashkimi të familjes e falenderimi ndaj Zotit për të mirat, sukseset dhe bekimet mbi familjen Balaj. “E kemi amanet prej babës me e vazhdu përgjithmonë organizimin dhe festimin e kësaj feste. Kjo është një festë fetare dhe familjare ku ne falenderojmë Zotin për krejt ç’ka na ka dhanë dhe ndajmë kohën dhe gëzimin me njëri-tjetrin si një familje e pa ndame dhe e bekume prej Zotit” – u shpreh djali i Zef Balës, David Balaj për Gazetën Dielli të Vatrës. Vëllezërit Balaj në rrëfimet e tyre kanë treguar se 70 vite më parë në 28-29 Qershorin e largët të vitit 1951, familja pasi ka kremtuar Shenjtët në vendlindje, në Mëzi të Pukës,edhe pse e rrethuar, ka arritur që ta çajë atë dhe ka marrë rrugën e vështirë të arratisjes. Familja e madhe BALAJ, kurrë nuk ka heqë dorë nga festimi i festës së Dy Shenjtëve, edhe në vendlindje, edhe në Kosovë kur u arratisën për t’i shpëtuar përndjekjes komuniste, edhe në Itali ku qëndruan pak kohë, ndërsa në Amerikë festimi ka qenë përherë masiv, me shumë pjesëmarrës. Kisha Katolike e kremton festën e shën Pjetrit e Palit Apostujt çdo vit me 28-29 qershor. Dy Shenjtorët-Apostuj janë Pajtorë të qytetit të Romës. Darka e familjes Balaj ishte një festë e vërtetë fetare e familjare ç’ka tregon rujtjen e traditave shqiptare e fetare në Amerikë por edhe dëshmi e vazhdimësisë fisnike të falenderimit ndaj Zotit e njëri-tjetrin për jetën që jetojnë e çastet që ndajmë çdo ditë me njëri-tjetrin.

TI ISHE PJESË E PËRDITSHMËRISË SONË, DO T’NA MUNGOSH ZEF BALAJ!

April 25, 2022 by s p

Nga Dalip Greca

Shumë gjëra që kam brenda vetes nuk munda t’ia thosha Zef Balës. Ende vuaj.…

Unë sërish i kërkoj ndjesë familjes Balaj, siç i kërkova dhe të përndershmit dom Pjetër Popaj, pas ceremonisë së varrimit, për shkak se nuk munda t’i artikuloja fjalët që dilnin nga shpirti, dhe s’arrita të përcjell gjithçka kisha në mendje e në zemër për fisnikun Zef Balaj, njeriun e mirë që ishte bërë pjesë e përditshmërisë sonë.

Aty në elter, me arkivolin dhe portretin e Zefit përballë, me sallën e kishës mbushur plot, me familjen e pikëlluar, ngashërimet dhe lotët ishin të pashmangshëm dhe ndodhi që herë-herë, në vend të fjalëve të nxirrja veç frymë, tinguj, rrokje.

Fjalët qenë të pabindura.Nuk doja të ndodhte kështu, por dhimbja për Zefin ishte zotruse në qenien time.

Zefin e njoha para 23 viteve, kur nisa punën në gazetën Illyria. E takova në Arthur Avenue 24 korrik 1999, ku ndodhej atë kohë dhe redaksia e gazetës.Më kujtohet prezantimi: Jam Zef Gjoni prej Mziu të Pukës, më thërrasin edhe kosovari i Pukës…Dhe që atë kohë nuk u ndamë.Nuk kishte veprimtari të komunitetit, ku të mos merrte pjesë Zefi. Unë, që nuk kisha makinë për të udhëtuar, ndjehesha mirë kur ai më telefononte: -A ke me se shkon tek Legalistët për përkujtimin e Abaz Kupit?

Me tren ,- i përgjigejsha.
Mos u ngut se do të vij dhe unë e shkojmë bashkë me Asllanin, në grup.
A do të shkosh tek “Dita e Lirisë” kushtuar Nik Mrnaçaj?…Do të vij të marr tek shtëpia.
Do të shkojmë tek Mit’hat Frashëri…?
Ka protestë para OKB, po vij të marr….Dhe kështu nuk linim aktivitet të komunitetit pa marrë pjesë:Në veprimtaritë e Ligës, në ato të shkollave shqipe, ku ishte pjesë e bordit, në ato të Vatrës, të Kishës, të Shkrimtarëve e artistëve etj.Kemi udhëtuar me Zefin edhe për në Boston, Uashington, Miçigan, Virxhinia etj.

Zefi u bë ëngjëll në mënyrën e vet edhe për ringjalljen e gazetës Dielli, që nuk botohej prej 2 vjet e gjysëm dhe kështu e gjeti edhe 100 vjetori i numrit të parë. Zefi ishte një ndër ata që propozoi emrin tim për drejtimin e Diellit, pasi ish editori Anton Çefa e kishte lënë detyrën.Kryesia e aprovoi dhe e votoi në Këshill me unanimitet, siç shkroi i ndjeri kryetar i Vatrës, ing.Agim Karagjozi, në numrin e parë të Diellit të edituar prej meje, shtator 2009.

Në Vatër e ndjeva përherë përkujdesjen e ngrohtë të Zefit.Mëngjeseve pasi shkonte në zyrën e biznesit, linte zonjën e tij atje, vinte tek Vatra dhe më ftonte për kafe:- Dil nga “kulla” dhe shkojmë në kafe!Ke nevojë për pushim! Kur nuk mund të vinte në mëngjes, telefononte në drekë:- Po vij të marr për drekë! Nuk linte hapsirë për kundërshtim.

Kur më gjente me fshesë në dorë tek pastroja para Vatrës, më thoshte me humor:-Po t’i përse nuk shkon të punosh në pastrime se merr dhe para më shumë se të japim ne ?…

Kur kalonim në 187 street drejt Arthur Ave, shpesh ndalte makinën afër një ndërtese me kolor zebrash,dhe më tregonte se dikur aty mblidheshin shqiptarët dhe kalonin kohën e lirë… pronar i kafesë ishte Zef Sadria.-Ja këtu, tek pallati përbri, kam punuar, kur jetoja në Mosholu Park, duke punuar si super itendent.Nuk dija anglisht, por pronarja ishte italiane dhe komunikoja italisht.Kjo ishte punë e dytë, se për shumë kohë kam bërë 2 dhe 3 punë në 24 orë…dhe vazhdonte t’më tregonte se si kishte rrjedhë jeta e tij, nga punët e rëndomta deri tek pronar ndërtesash e real state.

Zefi ishte pjesë e “protokollit” të pritjes së mysafirëve që vizitonin Vatrën për gjatë 12 viteve që unë drejtova Diellin.Nuk mungonte, dhe ishte përherë i sjellshëm dhe i dashur me mysafirët, pa harruar t’i ftonte për kafe,drekë a darkë, si të ishte koha.

Kishte dhe raste kur mbetesha keq dhe nuk gjeja njeri me makinë për të marrë gazetën nga shtypshkronja,ose për ta çuar nga Vatra në zyrat e postës, ai nuk kursehej t’më ndihmonte.

I miri Zef nuk i shmangej asnjëherë fushatave fondmbledhëse të Vatrës dhe kontributeve për gazetën Dielli, përkundrazi printe.Nuk ka fushatë që kam organizuar për Diellin, ku ai të mos printe, nuk ka numër festiv të 28 Nëntorit, ku ai të mos merrte faqen e tij me ngjyra për të përcjellë urimet për kombin për Ditën e shenjtë të Flamurit.

Kur u organizua numri special i Diellit për 100 vjetorin e Vatrës dhe paralelisht do të publikohej për të parën herë edhe një zhurnal, ai nuk nguroi të sponsorizojë.

Kur organizova konkursin me rastin e veprimtarisë “2016, Viti i Faik Konicës”, i thashë Zefit: – Më duhen pak para për fituesit e konkursit për veprën dhe studimet më të mirë për Konicën dhe Vatrën. Arka e Vatrës është bosh, si t’ia bëjmë, ku t’i gjejmë nja 3 mijë dollarë?

-Mos u merakos, unë do të ndihmoj.Dhe premtimin e mbajti.Janë shumë e shumë raste.

Zefi nuk kursehej, ai ndihmonte shkrimtarët që i trokisnin tek dera e biznesit, kur ata kërkonin sponsorizim për botimet e tyre. I ndjeri Luigj Çekaj, e ka përjetësuar në librin e tij”Një Shkrelas në Manhattan”, ku Zefit i kushtohet një poezi mirënjohëse për bujarinë e tij. Ka dhe shumë autorë të tjerë,që e kanë prekur bujarinë e Zefit me katër shifra, deri edhe në 5 mijë dollarë. Ai ishte filantrop i komunitetit për individë e për organizata, për Kisha e Katedrale, për xhami e çdo faltore tjetër të Zotit.

Na iku shpejt i miri Zef. Për nëntë muaj u shkri. Ende e kam brenda vetes zërin e tij të lodhur në telefonatën e fundit:Do të bëhem mirë dhe do të shihemi shpejt! Por nuk mundi. Shkoi të pushojë! Do t’na mungojë njeriu i mirë Zef Balaj…

Pusho në Paqe mik i dashur; pranë njerëzve të dashur që shkuan para Teje!

SALIKIMI I FUNDIT…

April 21, 2022 by s p

Në vend të një lamtumire për Zef Balaj.

Sokol Paja

New York më 20 Prill 2022 – Shqiptarët e Amerikës, miq, familjarë, patriotë, vatranë, autoritete e bashkëpunëtorë i dhanë lamtumirën e fundit Zef Balajt i cili u shua shumë shpejt duke lënë pas shumë kujtime, vepra të mira, dhimbje e trishtim tek të gjithë ata që e njohën e bashkëpunuan me të. Një bekim i fundit kur trupi i viganit Zef Balaj u fut për herë të fundit në kishën Zoja e Shkodrës, mbi trupin e vdekshëm e shpirtin e pavdekshëm të tij, Dom Pjetër Popaj bekoi trupin e Zef Balës para rrugës pa kthim për jetën në amshim. Në libri liturgjik të “Dijes” u shkëput një lexim për pleqërinë dhe mençurinë, përsosmërinë, shpirtin e bardhë e të pastër, ashtu siç Zef Balaj jetoi jetën e tij tokësore. Në Psalmin fetar: Zoti është Bariu im asgjë nuk më mungon, Dom Pjetri famullitari i Kishës Zoja e Shkodrës, kujtoi se çdokush që beson në Zot është i shpëtuar dhe do ta gëzojë jetën e përtejme teksa citoi edhe Ungjillin e Shenjtë të Gjonit: “Unë jam ringjallja dhe jeta, kush beson në mua nuk do të vdesë kurrë”. Zef Balaj vendosi të ikë prej nesh në javën e shenjtë të Pashkëve, iku në javën e ringjalljes së Krishtit si për ta treguar se pas vdekjes triumfon një tjetër jetë, dhe se vdekja është veçse një rrugëkalim qiellor. Ungjilli sipas Gjonit citoi Dom Pjetri “Unë Jam Udha e vërteta dhe jeta” i përngjasojnë jetës së shenjtë e të mirë që ka pasur Zef Balaj si familjar e besimtar i devotshëm. Në fjalën ngushëlluese Dom Pjetri u shpreh se familja e nderuar Balaj pati 3 vdekje të rënda në një vit dhe u lut qe Zoti ta forcoje kete familje. Zoti na ka krijuar me jetu jo me vdekë, jeta tokësore nuk është e përgjithmonshme, jeta tokësore një shteg për kalimin në jetën e pasosur. Zef Balaj beri vepra të mira dhe kishte veç mirësi njerëzore. Zefi ishte fisnik e nuk ankohej kurrë. Zefi ishte bujar e shpirtmirë, kontribuoi për Kishat në USA e Shqipëri e Kosovë. Zefi ishte i dashtun i qeshur e fjalë mirë. Zefi ishte i fortë dhe i sigurtë për jetën tjetër, përfundoi fjalën e tij Famullitari Dom Pjetër Popaj. Drane Balaj mbesa e Zefit falenderoi në emër të familjes të gjithë ata që i mbështetën në këtë moment të vështirë dhe përshkroi jetën e Zef Balajt dhe të familjes që nga arratisja nga diktatura komuniste dhe ndërtimi i jetës në Shtetet e Bashkuara të Amerikës. Ajo shprehu e tregoi mbështetjen që Zefi u kishte dhënë familjes nipërve e mbesave e mbi të gjitha mësimet e jetës e fjalët e shtrenjta. Presidenti i Nderit të Vatrës Agim Rexhaj në fjalën e lamtumirës tha se familja Balaj është ndër më të nderuarat në bashkësinë shqiptaro-amerikane, emri dhe veprimtaria e tij do jetë frymëzim dhe krenari për të gjithë si familjar, veprimtar, patriot, vatran e njeri i përkushtuar i çështjes kombëtare. Fotoreporteri Dritan Haxhia lexoi telegramin e ngushëllimit dërguar nga Presidenti i Republikës së Shqipërisë Ilir Meta në të cilën shkruhet se Zef Balaj ishte veprimtarit të devotshëm, patriotit të përkushtuar, me kontribut të vazhdueshëm dhe të jashtëzakonshëm për demokratizimin e Shqipërisë, lirinë dhe pavarësinë e Kosovës, si dhe avancimin e të drejtave të shqiptarëve kudo që jetojnë në trojet e tyre. Miku i Zef Balës në Ligën Shqiptaro-Amerikane Joseph DioGuardi në fjalën e lamtumirës u shpreh së Zef Balaj ndërtoi identitetin e shqiptarëve në Amerikë dhe frymëzoi lirinë e shqiptarëve me arratisjen nga diktatura. Dalip Greca mes lotësh, në rrëfimin e jetës së tij të përditshme me Zef Balën u shpreh: “Zefi u bë pjesë e përditshme e jetës sonë. Do jetë në shpirtrat tanë përjetë. Zefi ishte një shenjt i padukshëm. Ringjalli gazetën Dielli dhe kontribuoi përherë për Vatrën” kujtoi z.Greca. Kryetari i Vatrës Elmi Berisha me dhimbje e pikëllim u shpreh në fjalën e lamtumirës: “Sot u shprehi mirënjohje familjes e të afërmve, dashuri e krenari për Zef Balën, për vëllanë tonë, për kontributin e tij, veprat e mira, shpirtin e zemrën e tij të bardhë”. Kryetari Berisha në emër të Federatës Panshqiptare të Amerikës VATRA e vlerësoi Zef Balën me titullin SENATOR I PËRJETSHËM I VATRËS me motivacion: “Shembull i atdhetarit të vërtetë, anëtarit të denjë të Federatës Vatra, kontribues dhe veprimtar i palodhur, bamirësit të madh dhe mbi të gjitha, njeriut të mirë”. Pas salikimeve të fundit të arkëmortit, trupi i shkatërrueshëm i jetës së pashkatërrueshme të Zef Balës u nis me respekt e dhimbje drejtë banesës së përjetshme. Pas fjalës përmbyllëse të procesit të lamtumirës Dom Pjetër Popaj kujtoi ngjalljen me shpresën e jetës së pasosur dhe lutjen e pranimit në mbretërinë e Zotit të Zef Balës. Në varrezat familjare “Gate of Heaven” ku u përcoll në paqen e amshuar, miku i ngushtë e Zef Balës Dritan Mishto në emër të familjes Balaj i pikëlluar u shpreh: “Mirënjohje e falenderim mijëra shqiptarëve që janë bashkuar dhimbjes së familjes. Ikja jote o Zef Balaj na lë shkretëtirë në shpirtrat tanë. Flm Zef se ti na ke mësuar si duhet të jetë një bashkëshort, baba, mik, shok, ti na mësove si të jesh njeri. Ti ike me kokën lart e me faqen e bardhë në një kohë që nuk është e lehtë. Nuk do ketë lamtumirë por mirupafshim në botën e përtejme, me po kaq mall sa po ndahemi sot me ty o Zef” u shpreh Mishto. Mëhill Velaj lexoi me trishtim dy telegrame ngushëllimi për familjen e Zef Balës nga Imzot Dodë Gjergji dhe Imzot Rrok Gjonlleshaj. Djali i Zef Balajt Davidi falenderoi të pranishmit e pjesëmarrësit në dhimbjen e familjes, mbi arkëmortin e atit të tij e mbylli me fjalët: “Do të dua përjetë Babë. Faleminderit për gjithçka që ke bërë për ne. S’do të harroj kurrë, pusho në paqe Bab”. Në drekën e shtruar në “Tesoro d’Italia” për shpirtin e Zef Balaj, teksa një foto fisnike e Zefit në sallë që zbuste dhimbjen e të gjithë të pranishmëve, pas uratëve e qiririt të ndezur për shpirtin e pashuar, miku i ngushtë i Zefit Asllan Bushati recitoi një elegji përkujtimi “Lot për Zef Balën”, elegji që shënoi fundin e drekës dhe lamtumirën tokësore të Zef Balës me familjen e miqtë e tij. I përjetshëm kujtimi, veprat e mira, dhe gjithçka që Zef Balaj i dha Vatrës, Ligës e Komunitetit shqiptar në Amerikë.

LAMTUMIRE ZEF BALAJ

April 20, 2022 by s p

Nga Agim Rexhaj/

E nderuar Familja Balaj!

E nderuar zonja Lina Balaj, bashkëshorte e vëllait, mikut, bashkëatdhetarit dhe bashkëpunëtorit tonë, tanimë i ndjerë Zef Balaj!

E nderuar Zonja Mire!

Të dashur David, Gjeraldina, Daniel, dhe Joseph!

……………………

E di që sot është një ditë e vështirë për të gjithë juve, pasi po ndaheni nga njeriu juaj më i dashur i jetës. Po ndaheni me njeriun që ju dha jetë, dashuri, sakrifica, përpjekje mbinjerëzore, e si rezultat edhe LIRINË, Lirinë që i mungonte në vendin e tij ne Shqiperi. Iu dha mirëqenje, atë që nuk e gjente dot në vendin e tij, as ai dhe as prindërit tuaj, qoftë nga ana e Zefit qoftë nga ana e Linës;

Ju dha prosperitet, shkollë, dinjitet njerëzor. Ju bëri të jeni të gjithë, djem e vajza, nipa dhe mbesa pjestarë të familjes së njohur e të nderuar tanimë botërisht në bashkësinë tonë Shqiptaro – Amerikane si:

FAMILJA BALAJ.

Ju po ndaheni nga Zefi me lot e me dhimbje, për atë që ishte ai Burri Ballëlartë, flokëbardhë, që reflektonte burrërinë malësore, vendosmërinë dhe përkushtimin për familjen dhe të afërmit. Ndarja me Zefin tuaj të dashur është e vështirë dhe e dhimbshme.

E megjithatë, kur e dini se çfarë trashëgimie po ju len ai në çdo aspekt të jetës tonë në këtë vend të lirisë dhe begatisë, dhimbja juaj kthehet në krenari dhe emri i tij ju bën dritë ju, nipave dhe mbesave dhe brezave që vijnë. Sakrificat e tij qysh në vogëli e deri në ditën që mbylli sytë kanë qenë dhe mbeten një burim frymëzimi dhe kranarie.

I ndritë Shpirti dhe Lavdi Vepres se Tij!

Të nderuar pjesmarrës, miq e shokë të hershëm e të vonë të zotit Zef Balaj!

Zef Balaj vërtetë ishte një familjar i mrekullueshëm dhe këtë e kemi parë në të gjallë të tij dhe po e shohim edhe sot. Por ai ishte edhe një ndër veprimtarët më të dalluar të Bashkësisë Shqiptaro – Amerikane.

Si një patriot i shquar, një njeri që e donte Shqipërinë dhe Kosovën, si dhe tërë çështjen shqiptare kudo që jemi, ai ishte një ndër njerëzit tanë më të shquar në bashkësinë tonë.

Një Vatran i dalluar që në kohët e hershme, mik i vatranëve tanë më të shenjuar për mirë siç ishte Ingj. Agim Karagjozi e shume Vatran te tjere, ai nuk reshti kurrë duke punuar për të mirën e çështjes shqiptare. Vitet dhe dekadat që punuam bashkë janë të karakterizuara nga përpjekje të pareshtura sa për demokratizimin e Shqipërisë aq edhe për çlirmin e më vonë njohjen e Pavarësisë së Kosovës.

Kontributet e Zef Balajt janë të panumërta, ashtu si vëllau ynë i shtrenjtë Zefi ka qenë i jashtëzakonshëm. Ai kontribuoi e ndihmoi fort Shqipërinë e Kosovën, e deshti me zemër Atdheun e tij e nuk iu dhimbs asgjë me qëllim që kombi ynë të përparojë e lulëzojë.

Zef Balaj ishte zëri i shqiptarëve të Amerikës, përçuesi i shqetësimeve të kombit tonë në demonstratat e fuqishme, protestat e lëvizjet me qëllim mbrojtjen e të drejtave të shqiptarëve në trojet tona, për demokratizim e shqiperise, pavaresin e Kosoves, zhvillim e përfaqësim të drejtave te shqiptarëve ne Maqedonin e Veriut, Mali i Zi, Presheve, Çamëri e kudo ku ka shqiptarë.

Zef Balaj u priu protestave të fuqishme në Washington, New York, Detroit, Dejton, , për zhdukjen e komunizmit, demokratizim të Shqipërisë për liri e pavarësi të Kosovës.

Zef Balaj ishte njeri i Zotit dhe financoi gjithë jetën e tij Tempujt e Zotit.Katedrale dhe Kisha Katolike, Kisha Ortodokse shqiptare, Xhami shqiptare, Qendra Fetare, klerikë fetarë të të gjitha feve njohën në çdo kohë zemrën e bardhë të Zef Balajt.

Zefi e ndihmoj Ushtrin Clirimtare te Kosoves, Ushtrin Clirimtare Kombetare ( ne Maqedonin e Veriut, Ushtrin Clirimtare per Presheve, Medvegje dhe Bujanovc.

Me shpirtin e tij të madh, Zef Balaj mbështeti veprimtaritë kulturore: Shkollen shqipe, botime e promovime librash të autorëve nga Kosova, Shqipëria e diaspora në Amerikë e Europë. Artistët, gazetarët, historianët, albanologët, veprimtarët e çështjes kombëtare i shprehin mirënjohje sot Zef Balajt për kontributin e tij të pa kursyer për kulturën kombëtare dhe jetën artistike të komunitetit tonë ne SHBA e dhe shteteve tona ne Shqiperi dhe Kosove.

Zef Balaj ndihmoi kombin e tij duke mbështetur fuqishëm Senatorë e Kongresistë, Ligjvënës e Këshilltarë që mbrojtën Shqipërinë , Kosovën dhe shqiptaret ne trojet e veta etnike: në Senat, Kongres, Shtëpinë e Bardhë, Pentagon e në të gjitha institucionet Amerikane.

Zefi ishte mik i Presidentit Historik te Kosoves Dr. Ibrahim Rugova, ish Presidentit dhe Kryeministrit te Shqiperis Dr. Sali Berisha, i heroit te demokracise Azem Hajdari, i Mandeles shqiptar Pjeter Arbnori, i Arber Xhaferit e shume e shume etj. Ai ishte mik i cdo shqiptari demokrat, perparimtar, i atyre qe mbi gjithca kane idealin kombetar.

Kjo pjesëmarrje masive në funeral tregon se Zef Balaj e deshti dhe respektoi deri ditën e fundit komunitetin shqiptar në Shtetet e Bashkuara e më gjërë. Në çdo rast, Zefi ishte aty, fisnik dhe njerëzor, patriot e veprimtar, zemërbardhë e kombëtar.

Janë të paktë ata të cilët kanë bërë më shumë në këtë vend për Federaten Pan Shqiptare te Amerikes VATRA.

Por VATRA nuk ishte e vetmja “Vatër” ku “ngrohej” Zef Balaj. Ai ishte një ndër aktivitët më të shquar të Ligës Qytetarë Shqiptaro Amerikane të drejtuar nga i nderuari, ish Kongresmeni Joseph Dioguardi bashkë me zonjën e tij Shirley Cloyse Dioguardi. Kontributi i Zef Balaj, ndoshta si rrallë i ndonjë veprimtari tjetër të komunitetit tonë, shtrihet në të dy organizatat tona më të njohura në Amerike, VATRA dhe LIGA QYTETARE SHQIPTARO AMERIKANE.

E përveç këtij kontributi ai shquhej edhe për ndihmat humanitare të cilat u shtrinë në trojet tona sa në Shqipëri edhe në Kosovë e më tej në trojet e banuara prej shqiptarëve.

Si një sipërmarrës, ai mbetet shumë i njohur për aktivitetin e tij nëpërmjet të të cilit janë ka parë hajrin me qindra familje shqiptare, emigrantë të rinj të sapoardhur, nëpërmjet të mundësisë që ai ju jepte sot kanë ndërtuar një jetë të mirë e të begatshme, këtu në Amerikë.

Është e vërtetë se fjalët e mira janë përherë ato që përcjellin një njeri që ndërron jetë.

Por sikundër në të gjallë të tij, ashtu edhe sot që po i japim lamtumirën e fundit, unë përsonalisht, edhe si individ edhe si bashkë – drejtues i Vatrës, kurrë nuk gjeta një gjest, një veprim apo një sjellje e cila të më bëntë të mos flisja gjithçka të mirë për këtë burrë.

Me këtë rast, i përcjell ngushellimet e mia më të sinqerta, familjes, Juve Zonja Lina, që u rrite dhe plake me Zefin, Ngushellime Zonja Mire ( motra e Zefit), ngushellime fëmijëve, : David, Gjeraldina, Daniel dhe Joseph, nipave dhe mbesave, miqëve dhe dashamirësve, Vatraneve dhe tërë patriotëve tanë shqiptaro – amerikanë këtu dhe të afërmve të tij në Shqipëri e Kosove.

Lamtumire Miku im I dashtun Zef Balaj!

Te qofte i lehte dheu’ i Tokes se lire! Lavdi Vepres tuaj!

Zoti te bekofte! Shpirti yt u preftë në paqë!

Agim Rexhaj! 20 Prill 2022