PRISHTINË, 25 Maj 2016/ Në gjashtë muaj asnjë kosovar nuk ka shkuar në luftëra të huaja, shprehet Presidenti Hashim Thaçi, pasi Kuvendi i Republikës së Kosovës votoi sot projektligjin për luftimin e financimit të terrorizmit.
“Kemi miratuar ligjin që synon parandalimin e qytetarëve të Kosovë që t’u bashkohen luftërave të huaja dhe Strategjinë për Parandalimin e Ekstremizmit të Dhunshëm dhe Radikalizmit që shpie në Terrorizëm. Ndërsa, fakti që në gjashtë muajt e fundit nuk është regjistruar asnjë kosovar të ketë shkuar të marrë pjesë në luftëra të huaja përbën sukseset e para të angazhimit tonë të përbashkët”, thekson ai.
Njëherësh, vijon Thaçi, mbetemi të përkushtuar që të punojmë në deradikalizimin dhe riintegrimin e ish-luftëtarëve të huaj nga Kosova.
“Kosova vazhdon të jetë e vendosur dhe kampione në luftën kundër ekstremizmit dhe terrorizmit”, përfundon Presidenti Thaçi postimin në ‘facebook’./b.j/