Veseli në Uashington: USAID, shumë përkrahje Kosovës

-Kryetari i Kuvendit të Kosovës, Kadri Veseli takoi zëvendës-administratoren e USAID-it për Evropë dhe Euroazi, Susan Kosinski Fritz/

UASHINGTON, 12 Prill 2016/ Në kuadër të vizitës zyrtare në Shtetet e Bashkuara të Amerikës dhe pjesëmarrjes në Konferencën ndërkombëtare parlamentare të shteteve anëtare të Bankës Botërore dhe Fondit Monetar Ndërkombëtar, kryetari i Kuvendit të Kosovës, Kadri Veseli, sot në selinë e USAID-it në Uashington është pritur në një takim të veçantë nga Susan Kosinski Fritz, zëvendës-administratore e lartë për Evropë dhe Euroazi. 

Kryetari Veseli e falënderoi Fritz për ndihmën e pareshtur të Misionit të USAID-it ndaj Kosovës dhe Kuvendit të saj në veçanti, duke e konsideruar këtë përkrahje shumë të çmuar dhe tejet të nevojshme për institucionet e vendit, gjatë procesit të ndërtimit dhe konsolidimit demokratik. 

Kreu i Kuvendit kosovar shfaqi shpresën se ky bashkëpunim do të vazhdojë edhe në të ardhmen, thekson njoftimi i dërguar. 

Gjatë këtij takimi u diskutua edhe për zhvillimet aktuale në Kosovë, tejkalimin e sfidave me të cilat ballafaqohet Kuvendi dhe shteti i Kosovës, si dhe për fokusin e projekteve zhvillimore, që kanë për qëllim zhvillimin ekonomik, sundimin e ligjit dhe qeverisjen e mirë./b.j/