Archives for March 2024

Historike/ Themelohet Lidhja e Mësuesve Shqiptarë në Mbretërinë E Bashkuar

March 19, 2024 by s p

Nga Anila Kadija/

Për herë të parë, në historinë e mësimdhënies së gjuhës shqipe, në Mbretërinë e Bashkuar, krijohet Lidhja e Mësuesve Shqiptarë!

17 mars 2024, një datë e shënuar kjo në Londër, ku me iniciativën e disa shoqatave: “Ardhmëria”, “Gjurmët Ilirjane”, shoqata “Drenica”, “Shoqata Akademike Shqiptare”, “Nënë Tereza”, “Arbëria”, “Bright Eagles” si edhe me pjesëmarrjen e mësuesve shqiptarë që punojnë dhe bashkëpunojnë për përhapjen e gjuhës shqipe, mbrojtjen e kulturës shqiptare, u hodh hapi më i rëndësishëm i një lidhje profesionistësh e nivelit të lartë.

Organizimi u bë në zyrat e shoqatës “Ardhmëria” nën kujdesin e veçantë të kryetarit të kësaj shoqate z.Lutfi Vata dhe stafit të saj.

Procedura e diskutimit të statutit dhe zgjedhjet u zhvilluan në frymë meritokratike dhe me votimin e mbi 40 bashkëthemeluesëve të kësaj lidhjeje.

E pranishme për të vëzhguar punën dhe zgjedhjet ishte zëvendës ambasadorja znj. Almona Bajramaj, e cila përshëndeti lidhjen dhe përcolli mirënjohjen e shtetit shqiptar si përfaqësuese e lartë e tij në Mbretërinë e Bashkuar.

Pas diskutimeve, propozimeve, ideve u miratua dhe u votua statuti i Lidhjes së Mësuesve dhe u propozuan tre kandidatë për kryetar:

Znj. Ardjana Gjoni

Z.Lutfi Vata

Znj. Alda Çapia

Votimi nga 28 të pranishëm në sallën e mbledhjes, 14 online, gjithsej 42 themelues përcolli këto rezultate:

1. Kryetar z.Lutfi Vata

2. Nënkryetar znj. Ardjana Gjoni

3. Nënkryetar z. Abedin Bajraktari

4. Zëdhënëse znj. Anila Kadija

5. Sekretare znj. Adelina Hysenaj

6. Financiere Ornela Gjeta

Anëtarë

7. Alda Capja

8. Lindita Bazina

9. Najada Fani

10. Esmeralda Spahia

11. Ilira Mucaj

12. Marsela Kalaja Hoxha

13. Vildane Dibra Zhubi

14. Euord Pajo

15. Migena Goga

16. Enxhi Lami

17. Dallendyshe Lashi

Në përfundim të zgjedhjeve zv/Ambasadorja uroi z. Lutfi Vata dhe përgëzoi të gjithë asamblenë, kryesinë e porsa zgjedhur, për këtë iniciativë në krijimin e një institucioni shumë të rëndësishëm për mësuesit shqiptarë në Mbretërinë e Bashkuar.

Pas përfundimit të procesit z. Lutfi Vata shprehu entuziazmin dhe falenderoi të gjithë për besimin që iu dha duke theksuar që kjo Lidhje do të jetë një portë e hapur për të gjithë mësuesit e gjuhës shqipe jo vetëm në Londër por edhe në çdo vend të MB ku janë apo do të hapen shkolla shqipe në vazhdim.

Znj. Almona Bajramaj, e cila siguroi mbështetjen e të gjitha autoriteteve shqiptare dhe Ministrisë së Jashtme theksoi mbi të gjitha mbështetjen ndaj mësuesve dhe nxënësve shqiptarë për t’i plotësuar nevojat me tekste shkollore në shërbim të mësimin e gjuhës shqipe, përhapjes së kulturës dhe ruajtjes të identitetit kombëtar.

“Bashkëpunimi me Ambasadën Shqiptare në Londër do të vijojë si përherë dhe mbështetja e tyre do të jetë e pa kursyer për Lidhjen e Mësuesve” – tha znj. Bajramaj.

Puna nisi, vullnetarisht për një qëllim, të gjithë së bashku.

Më 19 mars të vitit 1721 u nda nga jeta Gjon Françesk Albani, apo Papa Klementi XI, i mbiquajtur Albani

March 19, 2024 by s p

Muzeu Historik Kombëtar/

Papa Klementi XI ishte Papa i 243 i Kishës Katolike. Shërbeu si papë nga 23 nëntori i 1700-ës deri më 19 mars 1721. Papa Klementi XI, Albani, e drejtoi kishën katolike për 21 vjet dhe rreshtohet i katërti për nga vitet mbas Shën Pjetrit me 35 vjet, Papa Piut me 31 vjet, Papa Gjon Palit me 26 vjet. Në vitin 1660 pas kryerjes së shkollës fillore ai shkoi në Romë, për të ndjekur kolegjin romak. Aty studioi gjuhë të vjetra dhe drejtësi. Në vitin 1668 diplomohet në drejtësi. Dhe në vitin 1670 fillon karrierën kishtare. Nga Papa Inoçenti do të emërohet si sekretar i dekreteve papnore dhe në shkurt 1690 do emërohet kardinal. Më 9 tetor 1700 zgjidhet papë i kishës katolike. Ndihmesa ndaj Shqipërisë, shpresa e vazhdueshme e papës me origjinë shqiptare Klementit të Nëntë, për të bashkuar Krishterimin, dha rezultate të gjëra në Shqipëri. I përket asaj periudhe mbajtja e “këshillit fetar të parë kombëtar shqiptar” të vitit 1703, i njohur si Kuvendi i Arbrit, i cili shënoi ndryshimet rrënjësore në linjën e veprimit të klerit për çështjet dogmatike, morale, kanunore dhe ipeshkvore. Priftërinj të shumtë ortodoksë nga Shqipëria, i kishin drejtuar Papës kërkesa ndihme për mbështetje politike duke sjellë edhe një afrim fetar. Vdiq më 19 mars 1721 në Romë.

VENDIMET E KËSHILLIT TË FEDERATËS VATRA NË MBLEDHJEN E ZHVILLUAR NË BOSTON MË 17 MARS 2024

March 19, 2024 by s p

Federata Pan-Shqiptare e Amerikës Vatra zhvilloi në Boston më 17 Mars 2024 një mbledhje të përbashkët mes Kryesisë dhe Këshillit të Vatrës. Pas himneve kombëtare amerikane dhe shqiptare, Kryetari i Këshillit Kolec Ndoja, bëri apelin e të pranishmëve dhe delegimeve. Ai kërkoi plotësimin e vendeve të sekretarit dhe nënkryetarit për të drejtuar punimet . Pasi u votuan Dr. At Teofan Koja(nënkryetar) dhe Ylli Dosku ( sekretar ), z. Ndoja u shpalosi të pranishmëve (sallë dhe zoom) rendin e ditës, ku pjesëmarrësit u dakorduan. Z. Ndoja i dha fjalën Kryetarit të Vatrës z. Elmi Berisha, i cili bëri një ekspoze të arritjeve të Vatrës në vitet e fundit në arenën kombëtare dhe ndërkombëtare. Ai ndër të tjera tha: “Ku ishim, ku jemi dhe ku pretendojmë të shkojmë si Vatër dhe komunitet shqiptar në Amerikë ? Fjalimi i Kryetarit Berisha dhe ilustrimi i fotoreporterit Dritan Haxhia, me një dokumentar të përgatitur nga faqet e Gazetës Dielli dhe fotot e evenimenteve historike të dy viteve, u duartrokit shumë ngrohtë nga të pranishmit.

Një pasqyrë të punës për pregatitjen dhe regjistrimin e Kanunores Re, foli Dr. Pashko Camaj, i cili menaxhoi në mënyrë profesionale lidhjen me të pranishmit në zoom: Dr. Dritan Demiraj , Mirela Kanini, Dr. Iris Halili, Dr. Paulin Marku , Sokol Paja , Nesti Nika , Gëzim Nika, Ndrek Tonaj, Viktor Popaj. Dr. Pashko, e quan Kanunoren : “ Bibla e Vatrës” dhe pas kësaj i dha fjalën, Bashkim Musabelliut, respektivisht , shefi juridik i Vatrës. (Dr. At Theofan Koja , bëri një ndërhyrje teknike në drejtimin e votimit të Sekretarit Pashko Camaj, i cili u votua unanimisht). Fjala e Bashkim Busabelliu, ishte e shtruar, e kujdesshme . Ai shpjegon rrugën e gjatë të sistemimit dhe axhustimit Kanunores së Re… Hapësirat , rregullat dhe shkeljet e ligjeve. Ai u shpjegoi pjesëmarrësve se tabani i Kanunores vjetër nuk është prekur.

Dr. Elmi Berisha kërkoi përsëri fjalën duke u kërkuar anëtarëve të Këshillit votbesimin e tij… Ai ndër të tjera u shpreh: “ Edhe pse jam shumë i sigurtë që kolegët që kemi punuar katër vite nuk do te jenë të lumtur me këtë veprim, them se mjegulla artificiale duhet me u largu prej vetes. Pra me qenë mirë me Zotin, me vetveten, me kombin , me familjen dhe me përgjegjësinë time civile, unë sot kërkoj votëbesimin tuaj!” Dhe pse Kanunorja e thotë prerë që, “vetëm Kuvendi ka të drejtë shkarkimin e Kryetarit të Vatrës”, Berisha kërkoi votbesim prej shkakut të baltës, shpifjeve të disa gjoja anëtarëve, të cilët janë të përjashtuar, ose që në vite nuk kanë paguar koutizacionin, ku automatikisht skualifikohen si anëtarë të organizatës. Megjithatë , z.Berisha, kërkoi votëbesimin në mënyrë morale. Akti i tij, sjell një kulturë të re demokratike, sjell përgjegjësi lidershipi dhe vizion. Rivotimi rikonfirmoi unanimisht kryetar Dr. Elmi Berisha.

Arkëtari Besim Malota dha një pasqyrë të detajuar mbi financat e Vatrës. Raporti i Arkëtarit fillon me 1 Mars 2022 deri në Mars 2024 , duke sjellur ledger book (gjitha rekordet) dhe raportet e të gjitha raportet pagesave mujore . Po ashtu, ai raportoi pagesat e gjitha Degëve të Vatrës në Amerikë.

Një përmbledhje të shkurtër bëri dhe Drejtori i Degëve z.Mond Rakaj, duke sjellur në vëmendje Degët e reja.

Të gjithë pjesëmarrësit diskutuan dhe dhanë mendimet e tyre për mbarëvajtjen e organizatës, Kolec Ndoja (Kryetar) , Dr. At Theofan Koja , (Nenkryetar), Ylli Dosku(Sekretar), Prof. Thanas Gjika, Isuf Spahia, Endri Filipi, Toni Suafaj, Adem Melellari , Gjokë Deçkaj, Drita Vushaj, Angjelina Nika, Eduard Aranitasi,Anton Raja, Flamur Vezaj, Mirela Kanini, Ndrek Tona, Iris Halili, Nesti Nika, Effi Qeleshi, Mentor Maksutaj, Subi Cako, Bardh Tomaj, Dritan Haxhia, Astrin Gjonpali.

Kryesia : Elmi Berisha, Alfons Grishaj, Pashko Camaj, Besim Malota, Mondi Rakaj, Dritan Demiraj, Bashkim Musabelliu , Ilir Cubi, Paulin Marku, Tasim Ruko, David Balaj, Paulin Mrnaçaj.

Pas shumë diskutimeve, ideve dhe debateve demokratike, Këshilli i Vatrës mori këto vendime:

1.U votëbesua unanimisht kryetari i Vatrës, kryesia dhe strukturat drejtuese të Vatrës

2.U votëbesuan me 98% të votave Këshilli i Vatrës, strukturat drejtuese: Kryetari Kolec Ndoja, Nënkryetari At Theofan Koja,Sekretari i Këshillit të Vatrës Ylli Dosku dhe Këshilltarët e rinj: Anton Raja, Subi Cako, Flamur Vezaj, Dritan Haxhia, Orest Cipa, Bardh Tomaj, Rafael Floqi, Endri Filipi.

3. Këshilli i Vatrës autorizoi Drejtorin e Degëve të Vatrës z.Mondi Rakaj që të marrë në shqyrtim listat dhe të rakordojë me Degët e Vatrës që kanë pasur probleme me organizimin, pagesat, zgjedhjet, dhe nënshkrimin e marrëveshjes me Federatën Vatra.

4.Me propozim të kryetarit të Vatrës, u votua unanimisht që z.Idriz Lamaj ti hiqej përjashtimi nga Vatra. Të përjashtuarit me votë absolute 98% të votave nga Këshilli i Vatrës VL, AM, MM dhe NV që gjenden në procese gjyqësore me Vatrën i lihen në dorë drejtësisë amerikane për të thënë fjalën e saj. Të përjashtuarit me votë absolute 98% të votave nga Këshilli i Vatrës RM, PQ, MO ti drejtohen Këshillit të Ankesave për shqyrtim të pretendimeve të tyre dhe kërkesës për falje.

5. Z.Ilir Cubi u votua unanimisht si zv.Arkëtar i Vatrës

6. Këshilli i Vatrës unanimisht i dha 30 ditë kohë Degës Manhattan Branch që të riorganizohet me zgjedhje të reja të degës dhe të paraqesë në Këshillin e Ankesave: Dokumentacionin e plotë, listë pagesat, nënshkrimin e marrëveshjes me Vatrën dhe çdo detyrim tjetër si degë ndaj Federatës Vatra.

7. U miratua unanimisht rezoluta e paraqitur nga dega e Vatrës Ridgewood që Vatra t’u kërkojë institucioneve shqiptare, që të bëjnë të mundur votën e diasporës shqiptare, rezoluta u lexua nga Ylli Dosku.

8- U miratua unanimisht nga Këshilli i Vatrës raporti financiar i paraqitur nga arkëtari Besim Malota.

9- Këshilli i Vatrës miratoi unanimisht Komisionet që do të ndihmojnë Kryesinë dhe Këshillin e Vatrës në mbarëvajtjen e veprimtarisë së Federatës Vatra:

1. KOMISIONI I ANKESAVE/KËRKESAVE

Pashko Camaj

Drita Vushaj

Subi Cako

Efi Qeleshi

Toni Sufaj

2. KOMISIONI I MBROJTJES KOMBËTARE

Dritan Demiraj

Paulin Mernaçaj

Eduard Arianitasi

Enri Filipi

Sabi Cako

3. KOMISIONI I FINANCAVE

Besim Malota

Ilir Cubi

Theofan Koja

Mondi Rakaj

4. KOMISIONI I LIGJEVE DHE RREGULLORES

Bashkim Musabelliu

Mehmet Kadria

Kujtim Porja

Mentor Maksutaj

Flamur Vezaj

5. KOMISIONI I DIASPORËS

Pashko Camaj

Isuf Spahiu

Anton Raja

Endri Filipi

Tasim Ruko

6. KOMISIONI I TITUJVE TË NDERIT

Alfons Grishaj

Mondi Rakaj

Mirela Kanini

Iris Halili

Nesti Nikaj

7. KOMISIONI I GJUHËS DHE KULTURËS

Gezim Nika

Thanas Gjika

Angjelina Nika

Iris Halili

Dritan Haxhia

DEKLARATË E DIASPORËS SHQIPTARE TË GREQISË

March 18, 2024 by s p

Ne, përfaqsues të organizimeve të shkallës së dytë dhe dhjetra shoqata dhe organizata të emigrantëve, si edhe veprimtarë të shquar të emigracionit shqiptar në Greqi, të mbledhur në qytetin e Selanikut më datë 25 shkurt 2024, shpallim njëzëshëm dhe zyrtarisht themelimin e Diasporës Shqiptare në Greqi.

Krijimi i DSHG përbën një përqasje të re, të domosdoshme, kalimin në një nível tjetër për organizimin dhe përfaqësimin e shtetasve shqiptarë rezidentë në Greqi në baza gjithëpërfshirëse dhe demokratike, me kulturë bashkëpunimi dhe etikë komunikimi.

Në datë 12 dhjetor 2023, ne publikuam Thirrjen për themelimin e Diasporës Shqiptare në Greqi, duke ftuar të gjithë të interesuarit të marrin pjesë në diskutimin e hapur për të hartuar Statutin e këtij organizimi, që tu përgjigjet sa më mirë kërkesave dhe sfidave të kohës.

U zhvilluan mjaft takime me përfaqsues organizatash dhe veprimtarë të shquar me një shtrirje gjeografike nga e gjithë Greqia; nga Atika, Greqia e Veriut, Kreta, Peloponezi, Epiri, Thessalia, Greqia Perëndimore etj.

Diskutimet, këmbimi i ideve, përvojat pozitive të organizatave dhe veprimtarëve të shquar në diasporë u shoqëruan me aksione konkrete pranë faktorëve politikë dhe institucionalë të nivelit më të lartë në Greqi.

Brenda periudhës dhjetor 2023 deri në muajin shkurt 2024, përfaqsitë e DSHG kryen takime zyrtare pune me kryetarë partie, me ministra dhe deputetë të tre partive kryesore parlamentare greke, Nea Dhimokratia, SYRIZA dhe PASOK-KINIMA ALLAGIS.

Në takimet e përfasuesve të DSHG me faktorët politikë grekë, u dëshmua aftësia jonë e bashkëpunimit dhe bashkërendimit, kultura e lartë e dialogut me politikën greke me jehonë dhe ndikim të madh në opinionin e gjerë grek dhe shqiptar, në të dy vendet tona.

Përfaqësuesit tanë ligjor kanë kryer të gjitha proceduarat e nevojshe konform ligjeve në fuqi dhe kanë depozituar pranë gjykatës së Athinës kërkesën dhe Statutin për njohjen ligjore të themelimit të organizimit të shkallës së tretë me emrin “Diaspora Shqiptare në Greqi” (Η Αλβανική Διασπορά στην Ελλάδα) me qendër në Athinë.

Diaspora Shqiptare në Greqi është organizatë e shkallës së tretë, gjithëpërfshirëse, jo qeveritare, jo fitimprurëse dhe jo partiake.

Diaspora Shqiptare në Greqi ndër të tjera ka si qëllim:

– Ruajtjen e identitetit të emigracionit shqiptar: të gjuhës shqipe, të kulturës, të traditave dhe zakoneve shqiptare.

– Kuptimi gradual midis shoqatave, organzatave dhe grupimeve të ndryshme shqiptare në Greqi, bashkëpunimi dhe veprimtaritë e përbashkëta me qëllim integrimin e emigrantëve në shoqërinë greke, duke ruajtur paralelisht kulturën dhe identitetin kombëtar.

– Integrimi i emigrantëve shqiptarë në shoqërinë greke dhe europiane, kryesisht nepermjet njohjes ligjore, punësimit dhe qëndrimit të tyre në Greqi, barazise përballë ligjit, mësimit te gjuhës greke, si dhe gjuhëve të tjera që ndihmojnë në kontaktet dhe forcimin e marrëdhënieve, si dhe lidhur me barazinë në punë, në shkollë, në arsim e në shërbimet publike.

– Kultivimi i frymës së miqësisë së mirë ndërmjet shqiptarëve, grekërve dhe të çdo lloj kombësie tjetër emigrantësh në Greqi.

Këshilli i Përkohshëm Drejtues i DSHG merr përsipër drejtimin, organizimin, dhe gjithë veprimtarinë deri në zgjedhjet përfundimtare të organeve të DSHG.

KËSHILLI I PËRKOHSHËM DREJTUES I DSHG

Selanik, 25 shkurt 2024

Unioni i Shoqatave Shqiptare në Greqi

I përbërë nga Shoqata dhe Organizata si vijon:

1. – Shoqata e Emigrantëve Shqiptarë “Mëmëdheu”, Megara

2. – Shoqata e Emigrantëve Shqiptarë “Elbasani”, Athinë

3. – Shoqata e Emigrantëve Shqiptarë “Aspropirgos”

4. – Shoqata e Emigrantëve Shqiptarë në “Larisa”

5. – Shoqata e Emigrantëve Shqiptarë “Iliria”, Volos

6. – Organizata “Omiros”, Athinë

7. – Shoqata e Emigrantëve Shqiptarë “Egjialia”, Egjio

8. – Shoqata e Emigrantëve Shqiptarë “Skënderbeu”, Ierapetra, Kretë

Lidhja e Shoqatave Shqiptare në Kretë

E përbërë nga Shoqata dhe Organizata si vijon:

1. Shoqata e Emigrantëve Shqiptarë në Hanja, Kretë

2. Shoqata e Emigrantëve Shqiptarë në Rrethimno, Kretë

3. Shoqata “Bashkimi” Shqiptarë në Iraklio, Kretë

4. Shoqata e Emigrantëve Shqiptarë Kasteli, Kissamo, Hanja, Kretë

5. Shoqata e Emigranëve Shqiptarë në Sitia, Kretë

Komuniteti Shqiptar i Selanikut

Ku përfshihen edhe Organizatat e mëposhtme:

1. Unioni i Emigrantëve të Imathias

2. Shoqata e Pensionistëve në Selanik

3. Shoqata “Sithonia”, Halkidhiki

4. Shoqata “Vatra e Cerrikut”

5. Shoqata “Elbasani” në Selanik

6. Qendra Kulturore Shqiptaro-Greke “Pegasus”

Organizata e Gruas në Greqi “JETA”

Shoqata Kulturore dhe Artistke “Lushnja” në Greqi

Bashkimi i Delviniotëve në Greqi

Lidhja e Gruas Shqiptare në Greqi

Shoqata e Emigrantëve Shqiptarë në Greqi

Lobi Euroatlantik Shqiptar në Greqi

Shoqata e Emigrantëve Shqiptarë në Patra

Shoqata e Emigrantëve Shqiptarë në Nafpakto

Shoqata e Emigrantëve Shqiptarë në Bashkinë Velvendo, Kozani

Gjithashtu edhe shumë aktivistë dhe figura të shquara të Diasporës Shqiptare në Greqi, siç:

Z. Fatos Malaj, ish kandidat për deputet në Parlamentin e Greqisë, specialsitë i çështjeve të Emigracionit

z. Lefter Kuqo, biznesmen, aktivist në politikën shqiptare dhe politikën greke,

z. Ardi Toska, aktivist i dalluar në Rrethin e Fthiotidës, njohës i çështjeve të migracionit.

z. Sokrat Lambro, poet, skulptor, akivist i shquar, etj.

Për më shumë informacion:

Website: www.diasporashqiptare.gr

e-mail: info@diasporashqiptare.gr

facebook: Diaspora Shqiptare e Greqisë – Αλβανική Διασπορά Ελλάδας

Një Penelopë legjendare në dy kryevepra arti dhe në dy shpirtje shprehëse

March 18, 2024 by s p

Albert Vataj/

Ajo është Penelopa e Homerit, e Odises, e mitit të shndërruar në ikonë të gruas besnike, e bashkëshortes që pret burrin që sfidoi detet gjatë kthimit nga Lufta e Trojës për në Itakë. Dhe ajo e ndërtoi këtë madhështi, përmes së një simbolike që gjeti një inspirim për shumë krijues dhe artistë që gjithnjë u pamjaftuan më çfarë pavdekësuan ata këtë grua. Ditën end dhe natën sh’end, është ngulitur thellë si një thirrje e ligjësisë së shpirtit të një gruaje, e hyjnisë së saj që lartësohet në beskim. Së andejmi morën shkas gjithë epikat e qëndresës së gruas, duke u bërë këtë një fill që lidh çdo legjendë apo trill, çdo të vërtetë apo idealizim.

Penelope duke fjetur nga Cavalier Jules, 1849, e vendosur në sallën qendrore, Musée D Orsay, Paris dhe derdhja e mermertë e Penelopës së trishtuar, nga Leonidas Drosis, vepër e cila ndodhet në Luvër, janë dy prej shumë e shumë trajtimeve të kësaj tematike, në të gjitha gjinitë e artit. Këto janë dy skulptura në mermer, të krijuara në idealizim të një prej legjenda e besnikërisë së gruas, të asaj që e bëri atë një pikë kulmore të një vepre që qëndron në themel të klasicizmit.

Skulptori akademik francez, Pierre-Jules Cavelier (30 gusht 1814 – 28 janar 1894) e përjetëson këtë grua ikonike duke fjetur, ndërkohë që neoklasiku grek i shekullit të 19-të, Leonidas Drosis e nxori nga mermeri Penelopën në një prehje të pikëllimtë, ulur mbi fronin e saj mbretëror.

Si, Jules Cavelier ashtu edhe Drosis, përcjellin, rengun e endëses që e simbolizon atë. Në të dy skulpturat ajo mban në dorë lëmshat e fillit që end e sh’end qefinin për babain e Odises. Francezi ka zgjedhur ta sjell ndërsa ajo fle, e lodhur dhe e rraskapitur në qëndresën prej besnikeje, ndërkohë që greku e skalit me një portret të pikëlluar nga mundimi dhe pritja e stërgjatë.

Siç dihet Penelopa është e martuar me personazhin kryesor, mbretin e Itakës, Odiseun (Uliksi në mitologjinë romake), dhe vajzën e Icarius të Spartës dhe Periboea (ose Polikastës). Ajo ka vetëm një djalë me Odisen, Telemakun, i cili lindi pak para se Odiseu të thirrej për të marrë pjesë në Luftën e Trojës. Ajo pret njëzet vjet për kthimin e Odises, kohë gjatë së cilës ajo sajon strategji të ndryshme dinake për të vonuar martesën me njërin nga 108 pretenduesit (të udhëhequr nga Antinous dhe duke përfshirë Agelaus, Amphinomus, Ctessippus, Demoptolemus, Elatus, Euryades, Eurymachus dhe Peisand).

Pas kthimit të Odises, i maskuar si një lypës i moshuar, ai zbulon se Penelopa ka mbetur besnike. Ajo ka shpikur truke dinake për të vonuar kandidatët, një prej të cilave është të pretendojë se është duke thurur një qefin varrimi për babain e moshuar të Odises, Laertes, dhe me të përfunduar ajo do të zgjedhë një nga ata që e synojnë atë. Çdo natë, Penelopa, për tre vjet, zhbën një pjesë të qefinit që end ditën, derisa Melantho, një skllav, zbulon mashtrimin e saj dhe ua bën prezent rivalëve.

Përpjekjet e Penelopes për të vonuar rimartesën shpesh shihen si një simbol i besnikërisë ndaj burrit të saj, Odises.

Arti është përpjekur ta ruaj të pavdekshëm simbolikën e besnikërisë së kësaj gruaje, duke e mëtuar në vepra dhe hymnizuar në aktin sublim të besnikërisë, që përcillet si një trofe i një gruaje, të cilën mund ta lodhi pritja por jo ta gjunjëzojë. Sepse ky është arti, kjo është ajo çfarë shpirtrat krijues kanë tentuar t’u shpërfaqen gjeneratave, duke e ofruar besnikërinë e kësaj gruaje si një flijim të shenjtë, si një premtim që pëshpërit thellë në brendinë e një gruaje, aq thellë sa mund të depërtojë vetëm koha dhe arti.