Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Gjuriç hyn në Kosovë ilegalisht, maskuar në një autoambulancë

by

-Ministria e Punëve të Jashtme e  Kosovës e konsideron të papranueshme sjelljen e Marko Gjuriç, zyrtar i qeverisë së Serbisë/

PRISHTINË, 15 Dhjetor  2016-Gazeta DIELLI/ Ministria e Punëve të Jashtme e Republikës së Kosovës deklaroi se e konsideron të papranueshme sjelljen e Marko Gjuriç, udhëheqës i të ashtuquajturës zyrë për Kosovën i cili hapur ka provokuar sot në veri institucionet e Kosovës dhe autoritetet e sigurisë.  “Hyrja ilegale në Kosovë është kundër marrëveshjes për vizitat e ndërsjella të arritur në Bruksel ndërmjet Kosovës dhe Serbisë, të cilat duhet të aprovohen apo ndalohen nga institucionet e të dyja shteteve të paktën 24 orë më herët.  Kjo sjellje është kundër frymës së dialogut dhe bashkëpunimit rajonal”, thekson deklarata.MPJ bën të ditur se i ka nisur tashmë një notë proteste BE-së dhe të gjitha institucioneve ndërkombëtare për këtë sjellje të papranueshme të Gjuriç dhe ka koordinuar hapat e mëtejshëm me institucionet relevantë në Kosovë. “Kjo përpjekje e tij i cili u kontrabandua në Kosovë duke u maskuar në një autoambulancë flet për qasjen dëshpëruese që ka vendosur ta ndjek në karrierën politike”, përfundon deklarata.Shefi i Zyrë për Kosovën në qeverinë e Serbisë, Marko Gjuriç u shfaq sot në inaugurimin e një pike ilegale karburantësh në veri të Kosovës, megjithëse kishte urdhër ndalese për të hyrë në Kosovë./b.j/

Oda Amerikane: Qeveria të pezullojë implementimin e Ligjit për Sigurime Shëndetësore

by

-ODA EKONOMIKE AMERIKANE NË KOSOVË: Qëndrim mbi Ligjin për Sigurimet Shëndetësore/

1-oda-ekonomike-amerikane-kosove

PRISHTINË, 15 Dhjetor 2016 – Gazeta DIELLI/ Ligji për Sigurimin Shëndetësor është  përcjellë me vonesa të shumta në implementim që nga miratimi i tij në prill të vitit 2014. Këto vonesa rezultojnë si arsye e gabimeve fillestare në fazën e hartimit dhe miratimit të tij të shpejtë, pa strukturim të detajuar dhe konsultim me të gjithë akterët kyç, përfshirë këtu edhe sektorin privat. Aq më tepër, një sesion informativ i organizuar së fundmi nga ana e Odës Ekonomike Amerikane ka nxjerrë në pah të meta të shumta, të cilat si të tilla e bëjnë zbatimin e ligjit më të vështirë dhe konfirmojnë mungesën e dialogimit me të gjitha palët e interesit. Shumë dispozita të rëndësishme të ligjit janë specifikuar mangët ose nuk janë specifikuar fare, duke dhënë kështu përshtypjen se qëllimi i të pasurit të një ligji të tillë është mbledhja e të hyrave shtesë për buxhetin e vendit dhe jo përmirësimi i indikatorëve shëndetësor dhe sigurimi i mbrojtjes financiare nga varfërimi për shkak të shpenzimeve të mëdha për kujdesin shëndetësor, që thuhet të jetë qëllimi i këtij ligji.Oda Amerikane dëshiron të theksojë se mbledhja e premiumeve shëndetësore para përmbushjes së parakushteve të përcaktuara, është shkelje e ligjit dhe në rrethana të tilla, premiumet nuk mund të ngarkohen dhe mblidhen. Poashtu, pagesa e premiumeve për shërbime të cilat nuk mund të sigurohen as në sektorin publik e as privat, është në kundërshtim me parimet e ekonomisë së tregut.Oda Amerikane është e shqetësuar me faktin se Ministria e Shëndetësisë ka theksuar publikisht se të gjitha shërbimet do të kontraktohen nga institucionet publike, ndërsa vetëm ato shërbime të cilat nuk mund të ofrohen në sektorin publik, do të kontraktohen në institucione private të kujdesit shëndetësor. Sipas Ligjit për Shëndetësi, parim kyç i sistemit shëndetësor në Kosovë është trajtimi i barabartë i sektorit publik dhe privat.Oda Ekonomike Amerikane në Kosovë beson fuqishëm që zbatimi i këtij ligji të rëndësishëm nuk duhet të trajtohet si eksperiment dhe si fazë testuese, sepse qasja universale ndaj shërbimeve cilësore shëndetësore është një e drejtë bazike për të gjithë të qytetarët e Republikës së Kosovës, ndërsa trajtimi i barabartë i sektorit publik me atë privat është e drejtë e garantuar me kushtetutë dhe legjislacionin i cili promovon konkurrencën e drejtë dhe trajtimin jodiskriminues, derisa zbatimi i Ligjit për Sigurimin Shëndetësor e cenon këtë të drejtë.Shqetësuese është edhe mënyra e kalkulimit të premiumeve shëndetësore si përqindje e të ardhurave bruto për individin. Përderisa kuptojmë frymën solidare të ligjit për të siguruar qasje në shërbime shëndetësore për gjithë popullatën, çështja e kontributeve duhet të rregullohet më tej, në kuptim të vendosjes së një tavani të kontributeve për të punësuarit, ngjashëm si në rastin e të vetëpunësuarve. Në të kundërtën, legjislacioni i tanishëm përkundër synimeve të mira mund të rezultojë në nxitjen e informalitetit në punësim, fenomen ky që patjetër duhet të luftohet.Duke u nisur nga kjo, Oda Ekonomike Amerikane në Kosovë kërkon nga Qeveria e Kosovës që të pezullojë fillimin e mbledhjes së premiumeve të paraparë për 1 janar të vitit 2016 deri në qartësimin e plotë të të gjitha dispozitave të legjislacionit primar dhe sekondar, si dhe në eliminimin e të gjitha të metave, përfshirë këtu edhe diskriminimin ndërmjet institucioneve private dhe publike të kujdesit shëndetësor. Në të njejtën kohë, Oda Amerikane i bën thirrje Ministrisë së Shëndetësisë dhe Qeverisë që të udhëheqin një proces gjithpërfshirës konsultimi, me të gjitha organizatat e interesit në Republikën e Kosovës.Shqetësimet kryesore të komunitetit profesionist shëndetësor lidhur me këtë ligj kanë të bëjnë me:

  • Moshartimin e detajuar të listës së shërbimeve, listës së barnave dhe çmimores të cilat paraqiten si parakusht para fillimit të mbledhjes së premiumeve shëndetësore;
  • Mosplotësimin e kritevere të cekura në nenin 37, paragrafi 10  në LSSH si kritere të domosdoshme për fillimin e grumbullimit të premiumeve. Për më shumë, askush nuk është në dijeni se ku qëndron procesi i plotësimit të këtyre kritereve;
  • Vonesat dhe paqartësitë në kontraktimin  e institucioneve të licencuara shëndetësore private  për ofrimin e shëbimeve të kujdesit themelor;
  • Mosinicimin e procesit për zhvillimin e një softueri për menaxhimin e sigurimeve shëndetësore dhe pajisjen e punonjësve me kartela të sigurimit shëndetësor, duke qenë njëri ndër kriteret kryesore të cekura në dispozitat kalimtare të ligjit.

Kërkesa e Odës Amerikane për pezullim të implementimit të ligjit bazohet edhe në dinamikën e ngathët të institucioneve të Kosovës dhe vonesat e vazhdueshme në shumë aspekte, që nga nxjerrja e akteve të nevojshme dytësore ligjore e deri te kompletimi i bordeve të agjencive të pavarura.

 

Ramush Haradinaj: Në Mitrovicë, ura-JO mure

by

1-ramushi2

PRISHTINE- 15 Dhjetor 2016 – Gazeta DIELLI/ Nga Aleanca për Ardhmërinë e Kosovës sot u dërgua kjo deklaratë e liderit të saj, Ramush Haradinaj/

Sot e vizitova Mitrovicën dhe e pash murin që ishte ndërtuar aty. Është e pakuptueshme se si mendësia provinciale e nacionaliste, në këtë kohë ndërton mure ndarëse. Më mirë do të ishte që ato mjete të ishin shpenzuar në ndërtimin, edhe të një ure në Mitrovicë, e cila do t’i duhet atij qyteti, atij komuniteti.Prishtina dhe Mitrovica, kanë nevojë të ndërtojnë më shumë ura, sepse fati ynë i përbashkët, janë urat e jo muret.Kjo një dhe e dyta, Qeveria e Kosovës nuk mund të justifikohet me asnjë gjë, pse ishte shkaktari kryesor i ndërtimit të këtij muri, që tani po na harxhon kohë, nerva e mund që ta rikthejmë në një situatë të pranueshme.Ndërtimi i mureve, nuk mund të jetë as në interesin e vetë komunitetit serb atje. Ata duhet të mos bien pre e politikave ekspansioniste e nacionaliste të Beogradit, apo të kujtdo tjetër, sepse e ardhmja e tyre është në Kosovë!

Kosova është një dhe e pandashme.

Ramush Haradinaj

Zyrtari i DASH, takohet me Ramën e Bashën për vettingun

by

1-dash

Zbatimi i ligjit të Vettingut ka qenë në fokus të takimeve që Drejtori për Europën Jugore dhe Qendrore në Departamentin Amerikan të Shtetit, Mathew Palmer, ka zhvilluar me krerët e politikës shqiptare më datën 14 dhjetor 2016. Fillimisht ai është takuar me Kryeministrin Edi Rama, ku ky i fundit me anë të një postimi në Facebook thotë se, ka marrë zotimin e Uashingtonit se “administrata e re e SHBA, do të këmbëngulë fort tek Vettingu”. Më pas zoti Palmer është takuar me kreun e opozitës, Lulzim Basha, ku kreu demokrat i ka shprehur shqetësimet lidhur me situaten e krimit, korrupsionit dhe  drogës. Ndër të tjera Basha shprehu mbështetjen për reformën në drejtësi, duke shtuar se “Shqipëria ka nevojë për një drejtësi të pavarur dhe jo të kapur nga Qeveria”.  Sipas zyrës së shypit të Partisë Demokratike, Mathew Palmer ka theksuar se, Shtetet e Bashkuara të Amerikës i ndjekin me shumë kujdes zhvillimet në Shqipëri.

RAPORTI:ÇFARE PO NDODH NE ALEPPO?

by

Për Iranin, fitorja e Assadit në Alepo është fitore kundër SHBA-së/

1-aleppo-51-okay-aleppo4-aleppo1-aleppo-te-vrare2-ok-aleppo-1

Presidenti iranian, Hassan Rohani e ka telefonuar homologun e tij sirian, Bashar al Assad, që ta urojë për mundjen e forcave rebele në qytetin e Alepos. Për iranianët, beteja për këtë qytet është një fitore kundër Shteteve të Bashkuara.“Fitorja në Alepo…paraqet një fitore të madhe për popullin sirian kundër terroristëve dhe atyre që i kanë përkrahur ata”, i ka thënë Rohani liderit sirian mbrëmjen e 14 dhjetorit, sipas faqes së internetit të presidentit iranian.Thirrja telefonike është kryer derisa konservatorët në Iran fitoren në Alepo e konsiderojnë si fitore kundër SHBA-së.Kjo është parë edhe nëpër pano të vendosura nëpër kryeqytetin iranian, Teheran ku shkruan: “Lufta kundër Shteteve të Bashkuara edhe njëherë është shpaguar. Alepo është çliruar”.Rohani ka thënë se Irani do të vazhdojë ta përkrahë Assadin derisa ai të mund të gjithë kundërshtarët e tij, disa prej të cilëve e kanë përkrahjen e Shteteve të Bashkuara.“Irani mbetët në anën e Sirisë derisa të bie terroristi i fundit”, ka thënë ai.

3-aleppo-2ok3-ok-aleppo2-aleppo3-alepo

Irani dhe Siria, të gjitha grupet që janë ngritur kundër tyre, përfshirë edhe ata që e kanë përkrahjen e perëndimit i quan si “terroristë”.Rohani gjithashtu i ka kërkuar Assadit që të lëjojë korridore humanitare për qytetarët e Alepos, derisa ka ofruar ndihmë për këtë përmes Kryqit të Kuq iranian.Lideri sirian thuhet se ka deklaruar se Irani ka qëndruar “në anën e popullit dhe qeverisë siriane në momentet më të vështira, dhe ne këtë nuk do e harrojmë kurrë”.Sidoqoftë, festa e kësaj fitoreje është bërë në kohën kur një zyrtar i lartë i OKB-së ka thënë se Assadi dhe aleatët e tij me gjasë kanë kryer “krime lufte” duke vrarë qindra civilë në betejën brutale për rimarrjen e kontrollit mbi Alepo.Komisioneri i Lartë i OKB-së për të Drejtat e Njeriut, Zeid bin Raad Zeid Al Hussein, ka thënë se Siria dhe aleatët e saj, Rusia dhe Irani sipas të gjitha gjasave kanë shkelur ligjin ndërkombëtar të luftës dhe ndoshta kanë kryer krime lufte gjatë bombardimeve të fundit ndaj civilëve të cilët shpresonin të evakuohen nga Alepo lindore.Reagimet ndërkombëtare për bombardimin e Alepos dhe krimet që dyshohet se po kryhen atje kanë vazhduar pandërprerë. Kryeministri francez, iu është drejtuar dhomës së ulët të parlamentit francez duke folur për situatën në qytetin sirian.

“Ne nuk do të pranojmë që bombardimi dhe luftimet të arrijnë një nivel të tillë të barbarizmit. Një luftë kjo e deklaruar nga regjimi i Bashar al Assadit, me përkrahjen e Rusisë, kundër popullit të vet”, ka thënë kryeministri francez, Bernard Cazeneuvenë parlamentin francez.Mirëpo, megjithë paralajmërimet ndërkombëtare, situata në Alepo shihet krejt ndryshe nga Irani.Fakti se në Alepo ka mbetur vetëm një zonë e vogël nën kontrollin e rebelëve, konservatorët në Teheran thonë se ofensiva për këtë qytet sirian e tregon rritjen e ndikimit të Iranit në rajon.“Koalicioni në mes të Iranit, Rusisë, Sirisë dhe Hezbollahut ka çuar deri te çlirimi i Alepos, ndërsa tani do e çlirojë Mosulin”, ka thënë Jahja Safavi, këshilltari kryesor për politikë të jashtme i liderit suprem iranian, Ajatollah Ali Khamenei.

Safavi, ish udhëheqës i Gardës Revolucionare Islamike, nuk e ka përmendur që fushata për çlirimin e Mosulit nga Shteti Islamik merr përkrahje të madhe nga sulmet ajrore amerikane dhe forcat këshilldhënëse që SHBA-të i kanë në tërren në Irak.

Safavi ka thënë se fitorja në Alepo dërgon mesazh të qartë për presidentin e zgjedhur amerikan, Donald Trump, i cili është zotuar për të mbajtur qëndrim më të ashpër ndaj Iranit.“Presidenti i ri amerikan duhet ta pranojë realitetin se Irani është fuqia udhëheqëse në rajon”, ka thënë Safavi sipas faqës së internetit të Gardës, “Sephanews”.Irani nuk e ka përfshirë ushtrinë e saj të rregullt në konfliktin e Sirisë, por Grada Revolucionare e saj e ka luajtur një rol të rëndësishëm koordinues.Mijëra vullnetarë iranian, shumica e të cilëve të motivuar nga dëshira për të mbrojtur vendet e shenjta shiite në Siri, besohet se po luftojnë në vijën e frontit.

Alepo: Hyn në fuqi armëpushimi i ri, aktualizohet evakuimi/

Raportohet se të shtënat me armë në Alepo janë ndalur, derisa palët e ndryshme në konfliktin në Siri, janë pajtuar për një marrëveshje të re për evakuimin nga pjesa e fundit e qytetit Alepo, që ishte nën kontroll të kryengritësve.Marrëveshja e mëparshme për armëpushim dhe për evakuimin e luftëtarëve kryengritës dhe civilëve, e ndërmjetësuar nga Rusia dhe Turqia, ishte shkelur dje pasi ka pasur luftime.Por, burime të kryengristësve thanë se armëpushimi tashmë është fuqizuar dhe evakuimet mund të kryhen gjatë ditës së sotme.Burime nga ushtria e Sirisë dhe lëvizja proqeveritare myslimane shiite Hezbollah, thanë se përgatitjet për evakuim janë në zhvillim e sipër.Observatori sirian për të drejtat e njeriut me seli në Londër, që i ka vëzhguesit në terren në Siri, më vonë ka thënë se konvoji i parë i njerëzve që kërkonin kujdes mjekësor ka filluar të largohet nga pjesa lindore e Alepos.Njëherësh, sipas urdhërave të presidentit Vladimir Putin, Qeveria e Rusisë tha se ushtarët e saj ishin përgatitur për t’i udhëhequr luftëtarët kryengritës, për tu larguar nga Alepo.Ministria e mbrojtjes e Rusisë tha se autoritetet e Sirisë u kanë garantuar siguri kryengritësve dhe familjeve të tyre, që do të evakuohen kah qyteti Idlib, në veriperëndim të Sirisë.Kjo ministri tha se ushtarët rusë do të përdorin aeroplanë pa ekuipazh për monitorimin e transportimit të tyre me 20 autobusë, të shoqëruar nga 10 autoambulanca, nëpër një korridor humanitar.Nga zhvillimet e tjera lidhur me Alepon, duhet përmendur bisedën telefonike të presidentit të Iranit, Hassan Rohani, në të cilën ai e uroi presidentin e Sirisë, Bashar al-Assad, për fitoren kundër krynegritësve në betejën për qytetin Alepo. Këtë trimuf në Alepo, iranianët e festojnë si fitore kundër Shteteve të Bashkuara.“Fitorja në Aleppo…paraqet trimuf të madh për popullin e Sirisë kundër terroristëve dhe atyre që i mbështesin ata”, i tha Rohani Assadit, gjatë bisedës së djeshme telefonike, informon faqja në Internet e presidencës iraniane.Kjo thirrje telefonike u bë derisa pjesëtarët e linjës së fortë në Iran, fitoren në Alepo e shohin si triumf kundër Shteteve të Bashkuara, derisa parullat dhe mbishkrimet e kanë përfshirë kryeqytetin Teheran. Në to shkruan “luftimi kundër Shteteve të Bashkuara edhe njëherë ka dhënë rezultat dhe Alepo është çliruar”.Presidenti Rohani tha se Irani do të vazhdoj ta mbështes regjimin e Assadit, derisa ai u ka shkaktuar disfatë të gjithë kundrshtarëve, disa prej të cilëve ishin mbështetur nga Shtetet e Bashkuara.“Irani mbetet në anën e Sirisë deri në rënien përfundimtare të terroristëve”, tha Rohani.Irani dhe Siria u referohen si “terroristë” grupeve kryengritësve, që janë bashkuar kundër regjimit të Sirisë, dhe atyre grupeve kryengritësve që mbështeten nga perëndimi.Derisa ka uruar për fitoren në Alepo, zoti Rohani ka kërkuar nga Assadi që ta lejojë hyrjen e ndihmave humanitare për shtetasit në Alepo, duke ofruar ndihmë nëpërmjet gjysmëhënës së kuqe të Iranit.Lideri sirian raportohet se është përgjigjur se Irani ka qëndruar “në anën e popullit dhe qeverisë së Sirisë në momentet më të vështira të tyre” dhe se kjo nuk do të harrohet kurrë.Derisa Teherani dhe Damasku kanë festuar, zyrtarë të lartë të Kombeve të Bashkuara kanë thënë se Assadi dhe aleatët e tij me gjasë, kanë kryer krime të luftës, duke i vrarë qindra civilë në luftën e tyre brutale për ta rimarrë Alepon.

Komisionari i lartë i Kombeve të Bashkuara për të drejtat e njeriut, Rupert Colville, tha se bombardimet, me shumë gjasë, paraqesin “krime të luftës”.

“Mendoj se kur ju e shihni këtë lloj të intensitetit të bombardimeve, në një hapësirë të vogël të mbushur me mijëra e mijëra civilë, është gati e sigurt se kjo paraqet shkelje të së drejtës ndërkombëtare dhe me shumë gjasë përbën krime të luftës që janë kryer tash, pasi ju nuk mund t’i dalloni luftëtarët nga civilët, në këto rrethana, kur ata të gjthë gjenden shumë afër njëri-tjetrit së bashku”, tha Rupert Colville.

Ai tha se është obligim i qeverisë së Sirisë dhe aleatëve të vet që të lejojnë evakuimin e njerëzve.

Bota mat muskujt në Alepo

Lajmet e fundit nga Alepo janë se forcat qeveritare kanë përparuar në rikthimin e territorit, të kontrolluar për një kohë të gjatë nga rebelët. Por, beteja kryesore rreth qytetit, në fakt, zhvillohet jashtë territorit të tij. Seanca e fundit e Këshillit të Sigurimit të OKB-së, me debate të ashpra midis fuqive botërore, shpërfaq sesa larg shkon rëndësia e këtij qyteti.

Sarajeva solidarizohet me Alepon

Qindra njerëz u mblodhën në qendër të Sarajevës, në shenjë solidarizimi me civilët e rrethuar në Alepo të Sirisë. Banorët e kryeqytetit të Bosnjë dhe Hercegovinës mbajtën pankarta në mbështetje të popullit të Alepos.((REL))