dgreca – Page 2688 – Dielli

REAGON KRYEMINISTRI: NUK KAM PAGUAR PËR FOTON ME PRESIDENTIN OBAMA

July 1, 2016 by dgreca

Pas shkrimeve të publikuara në mediat amerikane, ku flitet se një qytetar shqiptaro-amerikan ka paguar e 80 mijë dollarë për një fotot të Kryeministrit Edi Rama me presidentin Barak Obama në vitin 2012, ka ardhur dhe reagimi i Kryeministrisë.

Drejtoria e Informacionit në Kryeministri i cilëson shkrimet e botuara në mediat prestigjioze ndërkombëtare si manipulim mediatik. Nga ana tjetër, thekson se Kryeministri Edi Rama nuk ka paguar asgjë për foton me Presidentin e SHBA. Në deklaratë hidhet poshtë edhe pjesëmarrje e Ramës në takime elektorale në SHBA gjatë vitit 2012.

Nga ana tjetër, Drejtoria e Komunikimit në Kryeministri pranon se shtetasi shqiptaro-amerikan që akuzohet për pagesën e 80 mijë dollarëve është takuar në vitin 2012 më delegacionin shqiptar. “Por në mënyrë kategorike nuk ka patur asnjë lloj veprimi financiar nga ana e Edi Ramës për të realizuar fotografinë e takimit me Presidentin Obama”,- thuhet në njoftim.

Ndërkohë Departamenti i Drejtësisë në SHBA në një deklaratë zyrtare dje sqaronte procesin e hetimit ndaj shqiptaro-amerikanit Bilal Shehu. Departamenti shkruan se Shehu ka dhuruar 80 mijë dollatë për Obamën, për të futur një person të me shtetësi jo amerikane në takimet elektorale. Dyshimet që ngrënë mediat amerikane janë se personi i huaj është Kryeministri Edi Rama, në atë kohë kryetar i PS-së në opozitë.

Në deklaratë Kryeministri Rama i kërkon kreut të PD-së të votojë reformën në drejtësi.

Deklarata e plotë e Kryeministrisë:

Duke shprehur keqardhjen per manipulimin mediatik dhe propaganden e baltes lidhur me nje foto te vitit 2012 me Presidentin Obama, Kryeministri Edi Rama, sqaron se ai as nuk ka marre pjese ne ndonje organizim elektoral te Presidentit Obama dhe as nuk ka kryer ndonje pagese, per te marre pjese ne nje organizim te kesaj natyre. Sepse ligji amerikan ndalon perfshirjen e cfaredolloji te shtetasve te huaj ne fushate ne Shtetet e Bashkuara.

Bilal Shehu qe sot po gjykohet ne SHBA per ceshtjen ne fjale eshte pjesetar i komunitetit shqiptar ne Neë York dhe eshte takuar me delegacionin qe tone ne SHBA ne vitin 2012. Por ne menyre kategorike nuk ka patur asnje lloj veprimi financiar nga ana e Edi Rames per te realizuar fotografine e takimit me Presidentin Obama.

Nderkohe qe duke perfituar edhe nga ky rast, kryeministri i ben thirrje edhe njehere Lulezim Bashes te fokusohet tek reforma ne drejtesi dhe respektin e tij per drejtesine ne Shtetet e Bashkuara, ta tregoje duke mbeshtetur projektin kushtetues te Reformes ne Drejtesi qe eshte hartuar me kontributin e cmuar te Shteteve te Bashkuara dhe Bashkimit Europian.

Edi Rama nuk ka frike nga drejtesia, nuk ka frike nga Operacioni Nderkombetar i Monitorimit te drejtesise, nuk ka frike nga pavaresia e anetareve qe do te bejne vetingun e gjykatesve e prokuroreve, po Lulezim Basha me Sali Berishen pse i tremben faktit qe ata qe do te gjykojne prokuroret dhe gjykatesit, do te perzgjidhen nga Shba e BE?!

Eshte koha e te vertetes per krimet, akuzat, genjeshtrat dhe te verteten mund ta thote vetem nje drejtesi e çliruar nga kthetrat e vendeve te rezervuara te partive ne sistem. Edi Rama dhe shumica jane gati te heqin duart e partive nga sistemi, po Lulezimi, Saliu dhe Partia Demokratike pse nuk jane gati?!

LULZIM BASHA: EDI RAMA KA KRYER KRIM FEDERAL

July 1, 2016 by dgreca

Rama, 80 mijë dollarë në mënyrë të paligjshme për një foto me Obamën, prokuroria të hetojë. Paratë e korrupsionit dhe krimit qëndrojnë në themel të pushtetit të djeshëm dhe të sotëm të Edi Ramës.

Ky fakt tronditës për çdo vend demokratik të botës i njohur fare mirë në sytë e shumicës dërrmuese të shqiptarëve tashmë u faktua para partnerëve ndërkombëtarë dhe botës mbarë.

Hetimet e bëra publike nga Departamenti Amerikan i Drejtësisë dhe mediat prestigjioze ndërkombëtare tregojnë se Edi Rama qëndron pas një krimi të rëndë federal të kryer në Shtetet e Bashkuara të Amerikës, si dorovitës i 80 mijë dollarëve të dhëna në një mbledhje fondesh për presidentin Barack Obama. Një akt i ndaluar nga ligji amerikan, që rreptësisht përjashton futjen e parave në fushatë nga një burim i huaj.

“Departamenti Amerikan i Drejtësisë bën të ditur se një shtetas shqiptaro-amerikan kishte marre 80 mijë dollarë nga një burim i huaj duke e ditur se ai do t’i derdhte ato para në fushatën elektorale…. Ai kishte shkuar në San Francisko në përpjekje për të siguruar një hyrje në një event për mbledhjen e fondeve me një shtetas të huaj,që është Edi Rama, të cilit i ishte ndaluar hyrja, por të cilit iu mundësua një foto me Presidentin,”- thuhet në deklaratën zyrtare të Departamentit Amerikan të Drejtësisë.

80 mijë dollarë ka paguar Edi Rama për një foto.

80 mijë dollarë për një mashtrim.

80 mijë dollarë për t’iu hedhur hi syve shqiptarëve.

Në rrugën e tij drejt marrjes së pushtetit Edi Rama nuk u ndal para asgjëje, nuk ngurroi të thërrasë nën armë gjithfarë kriminelësh, e nuk kurseu askënd me gënjeshtrat e me mashtrimet e tij, madje as partnerin tonë strategjik, SHBA.

Ky krim i rëndë federal i porositur dhe i paguar nga Edi Rama, tregon edhe një herë se si e nisi rrugën drejt pushtetit.

E nisi me krim, e vazhdoi me krim dhe sot sundon me krimin.

E veshi krimin me pushtet dhe pushtetin me krim.

E mbushi parlamentin me vrasës, me banditë, me trafikantë droge e me tutorë prostitucioni.

I nxori nga çdo vrimë ku ishin fshehur përdhunues, trafikantë dhe kriminelë dhe i bëri kryetar bashkish, drejtorë dhe shefa zyrash.
Por nuk mjaftoi kjo. Me një mendësi kriminale, në një shtet ku ligji dhe drejtësia nuk blihen as shantazhohen, ai guxoi të shkelë ligjet e SHBA-ve, të mashtrojë ekipin e presidentit Obama për një foto-mashtrim.

Ajo foto tregon shumë, tregon qartë mendësinë e Edi Ramës, për të cilin me paratë e pista të krimit dhe të korrupsionit blihet gjithçka, qëndrohet mbi ligjin dhe mbi drejtësinë.
Kjo foto është në të njëjtën kohë prova se në SHBA drejtësia nuk mund të kapet nga Edi Rama, as të blihet e të shantazhohet nga ai.

Drejtësia atje është drejtësia që nuk do Edi Rama.

Drejtësia që do Edi Rama është drejtësia që shantazhohet prej tij si në rastin e skandalit, megaskandalit të përgjimeve ku sulmon gjyqtarët duke i quajtur “killer”.

Gjyqtarët që dëshiron Edi Rama janë të prerjes së zonjës Sadushi, bashkëshortes së ekspertit të Ramës e cila ktheu dje në detyrë dhe dy të fundit të krimit të tmerrshëm shtetëror të përgjimit të paligjshëm.

Drejtësia që do Edi Rama është drejtësia që shantazhohet dhe gjunjëzohet për të mos hetuar lidhjet e Tahirit me krimit, të Beqajt me korrupsionin, të Ahmetajt me pazarin e pasurive publike, të Gjiknurit me aferën CEZ, e kështu me radhë.

Në fund të fundit, drejtësia që do Edi Rama i ngjan asaj drejtësie që përfytyron e dëshiron çdo i kapur në krime e korrupsion, pra një drejtësi të njëjtë me të, ortak me të, të kapur në krim e korrupsion.

Por i ka bërë llogaritë gabim. Drejtësia në SHBA nuk shantazhohet, nuk blihet sado para të kesh mbledhur nga krimi dhe korrupsioni.

Unë sot dua t’i bëj thirrje Prokurorit të Përgjithshëm dhe prokurorisë shqiptare që paralel me hetimet që po kryen FBI, të nisë menjëherë hetimet brenda juridiksionit shqiptar dhe sipas ligjit shqiptar për këtë rast të pastër të korrupsionit politik.

Ku i gjeti Edi Rama 80 mijë dollarë në një kohe kur kishte deklaruar një pasuri prej 3 mijë eurosh?

Apo janë para ryshfeti e korrupsion?

Cili është burimi i tyre?

Çfarë ka marrë në këmbim të këtyre parave sponsorizuesit?

Sot, çdo shqiptar por dhe partneri ynë strategjik SHBA duhet ta dinë të vërtetën e këtij krimi të shëmtuar dhe të njohin kështu pa maskë, pa maskën që përdor me propagandën e tij Edi Rama.

Ai duhet e do të japë llogari për rolin dhe përgjegjësitë e tij lidhur me këtë krim për të cilin sot drejtësia e SHBA-ve përgatitet të dënojë dorasin, por jo porositësin dhe përfituesin. Sepse kjo e fundit është detyrë e drejtësisë shqiptare, është detyrë e votuesve shqiptarë.

SHBA printojnë Kushtetutën e re, Berisha: Votoni nenin 88

July 1, 2016 by dgreca

Zyrtarisht, reforma në drejtësi është në programin e punës së Kuvendit të Shqipërisë. Konferenca e Kryetarëve vendosi që seanca e shqyrtimit të amendamenteve kushtetuese të jetë me 21 korrik, njësoj sic kishte parlajamëruar ambasadori amerikan. Dhe që deputetët ta kenë sa më të qartë se nga fjalët është kaluar tek veprat, mbi tryezën e tyre të punës ata kanë gjetur paraditen e së enjtes një botim të ri të Kushtetutës. Botimi përmban një variant të përditësuar me amendamentet e reja, që propozohen për t’u miratuar. Por ajo çfare bie menjëherë në sy është logoja e Ambasadës Amerikane dhe një shënim nën të “se ky është një botim i mundësuar nga Shtetet e Bashkuara të Amerikës”. Ky është një tjetër hap konkret që Ambasada Amerikane bën për të bërë publike dhe zyrtare mbështetjen e vet për ndryshimet kushtetuese të reformës. Megjithatë, ish-kryeministri Sali Berisha i bëri Kuvendit një kërkesë tjetër. “Ju lutem shumë drejtuesve të Kuvendit që nenin 88 t’ja dorëzojë çdo deputeti”, tha Berisha. Opozita e interpreton paragrafin 88 të Venecias si një rekomandim që opozita të përfaqësohet në të 4 institucionet e reja që zgjedh Parlamenti, përfshirë edhe ato që bëjnë vetingun e njerëzve të drejtësisë.Në të kundërt, opozita thotë se drejtësia kapet politikisht. Kështu ish-kryeministri Berisha lexoi edhe mesazhet që dha në Tiranë përfaqësuesi i Bundestagut gjerman. “Thirrjet janë që Qeveria që tenton të kapë drejtësinë nuk çon vendin në BE. Thirrjet janë që po nuk e votuat, do të rishikojmë statusin. Më e rënda që ka ndodhur ndonjëherë”, tha ish-kryeministri. Opozita kundërshtoi përfshirjen në kalendarin e punës së Parlamentit të 7 projektligjeve të reformës në drejtësi. Sipas saj, draftet nuk kanë bazë ligjore, sepse i referohen një projekti kushtetues të pamiratuar. “Është një draft, një listë dëshirash ende, por nuk ekziston. Pra po shkelni Kushtetutën me të dyja këmbët. Nëse nuk ka konsensus është e kotë, jo vetëm këto ligje nuk miratohen, por edhe ajo Kushtetuta që doni ju nukmiratohet”, u shpreh deputeti demokrat Oerd Bylykbashi. Ilir Meta foli edhe për shpejtësi, edhe për konsensus. “Po ecim në këtë mënyrë për të fituar kohë që të realizojmë atë objektiv që ndryshimet kushtetuese, besoj me konsensus, por edhe disa ligje të rëndësishme që vetë opozita i ka kërkuar që bashkë me to të miratohen brenda muajit korrik”, tha kreu i Kuvendit.

Ankthi i kohëve shqiptare

July 1, 2016 by dgreca

(Një revoltë e pashuar)/

Nga Rexhep Kasumaj/Berlin/

Megjithë emblemat e ndryshme ndër vite, kohët shqiptare i njëjtësonte prorë një tipar unik, si postament i shekujve të tyre.

Ishte njëherë turku zotnues me të drejtën e "gjatësisë së shpatës" dhe njeriu i nënshtruar shqiptar, i vogli, i numërti – kishte ankth për bukën, për "katil-fermanin" e andejdetit, për ditën e nesërme të fëmijëve që lindnin njëj Moti statik e obskur, t'pandrrueshëm e të vjetër sa vetë fillimi i botës…

Do t'vinin pastaj monarkistët në gjysmën e atdheut matanë kufijëve, por Indipendenca e varme herë nga Roma e herë nga Belgradi dhe, mbanë tjetër, feudokapitalizmi primitiv, prodhonin sërish atë t'vetmen shenjë të trishtuar: ikonën e përjetshme të ankth-ziut.

Në trojet e jashtme, ndërkaq, kje më keq akoma: shërbëtor tragjik i sllavëve të jugut, veriu i Arbërit vuante, si pat thënë përmbledhshëm Noli, doktrinën "treaktshe të shpronsimit, shpërnguljes e shfarosjes"…Rrjedhimisht ndaj, mbahej konstante gjëndja e ngrirë e ankthit se ç'do sillte muzgu, e a do çelte agu me varrezë masive në Kodrën e madhe…

Më vonë, kur Europa u dogj në flakët e Ariozofisë, do të hidhte rrënjë ideja, e fill pas saj, praktika e sistemuar komuniste. Nismërisht një alternativë altruiste në vëndet skamnore që duhej të ndante barazisht varfërinë, ajo, si keqkuptim historie a dështim njerëzie, do të përdhoste shpejt idealin e vet…Absurdi do prekte kulmin kur një simbol i marrëzisë, aziati i quajtur Pol Pot, për të zhdukur borgjezinë desh të bënte rrafsh me tokë qytetet e pafajshme. "Njeriu i ri", jo i Niçes, por i Josifit s'do kishte më trashëgimi biologjike e as rreth ndikues social…Do lindte vetëm si organizëm nul, të cilin Partia do ta kultivonte në agronom, punëtor a kopshtar…Në fakt, këtej në truallin shqiptar, do të shpallej me fuqi religjioni adhurimi i zjarrtë për bashkëkombësin e lodhur, por do vritej njeriu brenda tij, e s'mbetej veçse lëvozhga etnike, e rrudhur, e thatë dhe e mbështjellë hijes së ankthit si fat i parathënë gjenetik.

E Kosova, me vise rreth e rrotull, përveç tiranisë së dogmës, do t'përjetojë krusmën e kohës së dytë serbiane, që do të vente përtej sprovës apokaliptike të "njeriut të ri socialist". Inxhinieringu i saj kolonialist ishte shumë më i errtë e specifik: u rrek të krijonte një "homo-shqiptar" të veçantë. Të ostracizuar. Pa vullnet për lirinë dhe admirues të çuditshëm të robnisë së vet…Dhe ankthi kje, ashtu, sërish qendra e dhimbjes shqiptare…

Së fundmi, demokracia e ligjëruar në "shtetet e shumta shqiptare", e brohoritur si alkimi e lumnisë, nuk arriti ta çlirojë njeriun e tyre nga ankthi kujdestar, nga roja e mizore në shpirtin e tij. Krimi ordinar, tashmë me status të lirë qytetarie, cilësohet – një zotësi e kooperativës politike, kurse dorëvënja në pasurinë publike – një krenari e denjë ekzemplare…Në sferat e epërme, si ana hijesore e diellit, improvizohet pothuajse gjithëçka. Ndërsa të gjithë shkruajnë më shumë se ç'lexojnë, censura e dikurshme politike është pasuar nga një tjetër më pikëlluese: indiferenca ndaj librit të pluhnosur dhe zhvendosja e betejës intelektuale në rrjetët socialë ku, si ankohej Eco, flasin me kompetencë prej nobelisti injorantët më të pështirë…Për pasojë, prapë e gjithnjë, vrujon thershëm apotheoza e një cope buke, në avullin e së cilës (Remark në "Nata e Lisbonës"), ndryhet gjithë shpresa e botës dhe, njëkohësisht, tortura e heshtur e "vrimës së zezë interesante në dysheme", drejt së cilës vështrojnë të poshtëruar sytë e ulur të ankthit…

Ambasadorja Kadare i paraqet letrat kredenciale Sekretarit të Përgjithshëm të OKB-së

July 1, 2016 by dgreca

Ambasadore në Organizatën e Kombeve të Bashkuara në Nju-Jork, tani është znj. Besiana Kadare, vajza e shkrimtarit të njohur Ismail Kadare/

Nga Beqir SINA New York/

UNITED NATIONS NY: Pëfaqësuesia e Përhershëme i Shqipërisë, në OKB, thuhet në një njoftim në faqen zyrtare të Sekretarit të Përgjithshëm i Kombeve të Bashkuara Ban Ki-moon, nga “Pallati i Qelqtë” në New York, ku ajo paraqiti më 30 Qershor letrat kredenciale.

Në njoftimin e saj, zyra për shtypin e Ban Ki-moon, shkruan duke postuar edhe dy fotografi nga cermonia e dorzimit të letrave kredenciale se Znj. Besiana Kadare, tashmë është përfaqësuesia më e re e Misonit të Përhershëm i Republikës së Shqipërisë në Kombet e Bashkuara, mbasi ajo i paraqiti kredencialet e saj tek Sekretari i Përgjithshëm Ban Ki-moon.

Ambasadorja e Shqipërisë në Organizatën e Kombeteve të Bashkuara, e ka marrë detyrën e re në OKB – New York, mbas largimit të Ambasdorit Ferit Hoxha .

“Çfarë kënaqësie dhe privilegj të përfaqësosh Shqipërinë në OKB”, shkroi znj. Besiana Kadare, pas këtij takimi, duke postuar edhe fotografinë e ceremonisë së dorzimit të kredencialve, në rrjetet sociale Facebook dhe Tweeter.

Shtypi shqiptar shkruan se Sqipëria mbushi vitin e kaluar 60- vjet si anëtare e organizatës më të madhe të botës dhe ardhja e ambasadores së re përkon me fillimin e përgatitjeve për Debatin e Përgjithshëm të Sesionit të ri të Asamblesë së Përgjithshme në New York, më 23 Shtator.

Znj. Besiana Kadare, ka një CV të pasur në diplomacinë shqiptare. Ajo ka qenë pjesë e misionit të OKB-së në New York, në vitet 2002-2005, ndërkohë, që ka mbajtur postin e ambasadores në Francë dhe në UNESCO.

Ajo zëvendëson në këtë detyrë, Ambasadorin Ferit Hoxha, që e mbylli me sukses mandatin e tij gati gjashtëvjeçar, në nëntor, të vitit të kaluar.

Ambasadorja Kadare ka marë pjesë tashmë në një numër votimesh të rëndësishme përfshi edhe ato për vendet e reja anëtare të Këshillit të Sigurimit për vitet 2017 dhe 2018, si dhe në votimin për Presidentin e ri të Asamblesë së Përgjithshme të OKB-së për Sesionin e saj të 71-të, thuhet në njoftimin zyrtar.