Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

MINISTRIA E DIASPORES E REPUBLIKES SE KOSOVES, TAKIM NE VATER

by

Të Premten me 6 Maj, përfaqësues të Ministrisë së Diasporës të Republikës së Kosovës realizuan një vizitë në selinë e Federatës Panshqiptare të Amerikës”VATRA”. Kushtrim Sheremeti, shef i Kabinetit të Ministrit të Diasporës, dhe Avdyl Lipoveci, Drejtor i departamentit për Ruajtjen dhe Kultivimin e Arsimit dhe Kulturës në Diapsorë, shoqëroheshin nga Konsulli i Shtetit të Kosovës në Nju Jork, diplomati Fatmir Zajmi.

Mysafirëve ua ka uruar mirëseardhjen Kryetari i Vatrës, dr. Gjon Buçaj, i cili e përgëzoi shtetin e Republikës së Kosovës për vlerësimin që i bën Diasporës Shqiptare në Botë, duke krijuar një Ministri për Diasporën dhe duke u marrë seriozisht me problemet e saj. Nuk ndodh kështu me Shtetin Amë, e cila për 50 vjet investoi shumë në Diasporë, jo për t’i shërbyer asaj, por për ta përçarë atë. Fatkeqsisht, tha dr. Buçaj, Diaspora Shqiptare nuk e ndjenë praninë e shtetit shqiptar në Nju Jork dhe në shtete të tjera në Amerikë, nga që shërbimi diplomatik shqiptar është fare i zbehtë, ndërkohë që shërbimin Konsullor, shqiptarët e Amerikës, edhe pse e kanë pasë edhe në vitet ’20 të shekullit të shkuar, tash u mungon.

Më pas dr. Buçaj i njohu mysafirët për fokusimin e Vatrës në ruajtjen e traditave dhe gjuhës Kombëtare si dhe objektivin e saj madhor për Çështjen Kombëtare. Ai tregoi për përpjekjet që bëjnë degët e Vatrës për mësimin e gjuhës shqipe, edhe pse shteti shqiptar nuk po duket i inetersuar në këtë drejtim për të kontribuar dhe nuk na ka dhënë kurrfarë ndihme, me përjashtim të ndihmës që vjen prej Konsullatës së Kosovës.

Shef i Kabinetit të minisitrit të Diasporës, z. Kushtrim Sheremeti, i njohu përfaqësuesit e Vatrës, me punën e deritanishme që ka bërë Ministria e Diasporës për ngritjen e sistemi të shkollave shqipe në Diasporë, për ngritjen e rrjeteve të biznesit në diasporë si dhe veprimtaritë kulturore. Ai trajtoi edhe problemin e Samitit të Diasporës, që kanë në plan ta organozojnë dy Qeveritë ajo Kososovës dhe  e Shqipërisë në muajin Nëntor të këtij viti.

Në këtë çështje u debatua dhe u informua për format që mendojnë të përdorin dy qeveritë në organizimin e këtij Samiti. Përfaqësuesit e Vtarës, tahnë se për të parën herë shtrohej ky problem me Vatrën, Organizatën më të vjetër të Shqiptarëve në Botë, që vepron ën SHBA që prej 104 vitesh. Ata shfaqën shqetësimin se Qeveria shqiptare po “kap” individë dhe shoqata pa anëtarë, që të përfaqësojnë diasporën e Amerikës. Shefi i Kabinetit informoi se në këtë Samit do të thirren personalitete shqiptare në Diasporë si Ismail Kadare, Ferid Murat e të tjerë, ndërsa shoqatat, do të aplikojnë për t’u bërë pjesë e Samitit.

Z Avdyl Lipoveci, Drejtor i departamentit për Ruajtjen dhe Kultivimin e Arsimit dhe Kulturës në Diasporë, informoi për organizimin e sistemit të shkollave Shqipe në Europë dhe në SHBA si dhe projektin përt ë ardhmen.

Konsulli i Republikës së Kosovës në Nju Jork, z. Fatmir Zajmi, falenderoi për pritjen dhe përgëzoi Vatrën dhe degët e saj për ruajtjen e traditave dhe gjuhës shqipe përmes shkollave që po hapen nëpër shtete të ndryshme të Amerikës së Veriut.

Edhe zv/ kryetari i Vatrës z. Agim Rexhaj u uroi mirëseardhjen mysafirëve dhe i përgëzoi ata për punën që po bëjnë për diasporën, veçanërisht në drejtim të organizimit të rrjetit të shkollave shqipe, ndërsa për klasën politike të të dy vendeve, Shqipëri e Kosovë, jemi fare të pakënaqur , tha ai. Edhe Zef Balaj, anëtar i këshillit të Vatrës, u uroi mirëseardhjen mysafirëve dhe tregoi për punën që bëhet në Bronx nga shkolla shqipe, ku ai prej disa viteve është në bordin e saj.

Diskutuan edhe anëtarët e kryesisë Pashko Camaj, Marjan Cubi, Dalip Greca(editor i Diellit), anëtarët e Advisoru Board të Vatrës Zef Përndocaj dhe Agim Aliçkaj.

Në fund në emër të mysafirëve, Z. Kushtrim Sheremeti, shef i Kabinetit të Ministrit të Diasporës, la një shënim në librin e vizitorëve.

Sot, e Shtunë 7 maj 2016, përfaqësuesit e Minsitrisë së Diasporës, janë pranë shkollës Shqipe në Bronx, NY.

(Korresp i Diellit)

 

 

Letërsia fantastiko-shkencore në botën arabe Takim me shkrimtarin sirian Taleb Omran

by

“Njeriu modern duhet të lexojë më shumë libra, që ta zhvillojë fantazinë dhe të mos bëhet rob i teknologjisë, sepse kështu ruan ndjeshmërinë dhe natyrën e tij njerëzore”. Ky ishte një nga mesazhet e shumta që përcolli shkrimtari dhe shkencëtari sirian dr. Taleb Omran në takimin e radhës të ciklit “Bisedë me autorin” organizuar me 6 Maj ne Tirane.
Ndryshe nga herët e tjera, Libroteka e AIITC u dhuroi lexuesve të saj mundësinë për të bashkëbiseduar me një shkrimtar të huaj, i njohur si një nga pionierët e letërsisë fantastiko-shkencore në botën arabe.
Takimi me të u zhvillua në Amfiteatrin e AIITC. Aty morën pjesë studentë dhe intelektualë të ndryshëm.
Dr. Omran Talib e filloi bisedën, duke bërë një historik të shkurtër të zhanrit fantastiko-shkencor. Ai përmendi se ky zhanër i ka fillesat me veprën letrare “Histori e vërtetë” të shkrimtarit të lashtë Lucian nga Siria. Pastaj përmendi një seri veprash të autorëve mesjetarë muslimanë, të cilat mund të konsiderohen të këtij zhanri, siç janë:“Qyteti i virtytshëm” i Farabiut, “Letra e faljes” e poetit Ebu-l Aëla el-Ma’arri etj. Ndërsa theksoi se ky zhanër mori hov në mesin e shek. XIX dhe shkëlqeu me shkrimtarë të tillë si Zhyl Verni, H. G. Uells etj.
Më pas dr. Omran përshkroi shkurt lidhjen e tij me këtë lloj letrar. “Që i vogël lexoja shumë, aq shumë saqë fëmijëria ime qe shumë e shkurtër. Kjo bëri që tek unë të krijohej një bagazh i madh njohurish, të cilat më pas më ndihmuan të shkruaj. Fillimisht e nisa me poezi, pastaj shkrova një tregim të shkurtër fantastiko-shkencor” – tha mes të tjerash. Ai rrëfeu se si mes përkushtimit dhe vështirësive arriti të bindte botues të ndryshëm, derisa nxori në qarkullim mbi njëzet romane dhe dhjetëra tregime fantastiko-shkencore përgjatë 40 viteve.
Ndërsa më 2007-ën themeloi Lidhjen e Shkrimtarëve Arabë të Fantashkencës, të cilën vazhdon ta kryesojë. Duke shpjeguar shtysat që e nxitën të merrej me letërsinë fantashkencore, ai tha se bagazhi i njohurive që merr njeriu në jetë e frymëzon atë të shprehet për të ardhmen. “Këto parashikime nuk janë profeci, por përfundime që nxirren nga analizimi i kushteve dhe rrethanave të ndryshme, nën dritën e njohurive shkencore” – shtoi ai.
Në vështrimin e tij, letërsia fantastiko – shkencore ndahet në dy llojesh: në letërsi serioze dhe në fantazi. Karakteristika e së parës është se ajo ka në qendër njeriun dhe shqetësimet e tij për të ardhmen. Ndërsa karakteristika e së dytës është se ajo përmban hiperbolizime, fantazi dhe teprime për qëllime argëtimi. “Me keqardhje them se në botë mbizotëron letërsia e llojit të dytë. E njëjta situatë vlen edhe për botën arabe” – tha autori.
Në shkëmbimet e shumta që pati me të pranishmit, shkrimtari theksoi rëndësinë e vënies së një ekuilibri midis kënaqësisë dhe arsyes, me qëllim që njeriu ta jetojë jetën natyrshëm. “Në qoftë se kënaqësia e mbizotëron arsyen, produkt i saj është njeriu mendjengushtë, i cili synon që mendimin e tij t’ua imponojë të tjerëve me çdo mjet.
Është pikërisht ky një nga rreziqet më të mëdha që i kanoset njerëzimit. Ilaçi i kësaj situate është vetëm lidhja me librin, me leximin, me diturinë.” Ishte ky një nga mesazhet mbyllëse të takimit.
Më pas të pranishmit i falënderoi Kryetari i Bordit Drejtues të AIITC dr. Faruk Borova, i cili i ftoi ata t’i vazhdonin bisedat në koktejin e shtruar me këtë rast.

Nexhmije Pagarusha-Bilbili i Kosovës, sot ditëlindjen e 83-të

by

Foto arkiv, maj 2010: Nexhmije Pagarusha e Presidenti i Kosovës Fatmir Sejdiu – dorëzimi i Dekoratës Presidenciale/

-Zë i fuqishëm i shpirtit dhe vlerave estetike shqiptare/

PRISHTINË, 7 Maj 2016-B.Jashari/ Bilbili i Kosovës, Nexhmije Pagarusha, ka sot ditëlindjen e 83-të.  Me këtë rast, kryeministri i Kosovës, Isa Mustafa, ka uruar ditëlindjen e këngëtares së madhe shqiptare. “‘Bilbili i Kosovës’, ‘Mbretëresha e muzikës shqiptare’, ‘Këngëtarja e Shekullit’, ‘Artiste e Merituar’ , ‘Nderi i Kombit’, janë vetëm disa prej epiteteve dhe dekoratave që këngëtarja më e madhe kosovare e të gjitha kohërave, Nexhmije Pagarusha, i ka merituar gjatë dekadave të këndimit”, ka shkruar sot Mustafa.

“Sot, Nexhmije Pagarusha feston ditëlindjen e 83-të, duke qenë idhull i të gjithë brezave të Kosovës nga viti 1948 e deri më sot. Me zërin e saj mbresëlënës, Nexhmija u shndërrua në institucion kulturor të Kosovës. Urime, edhe shumë vite të tjera.
Kosova krenohet me ty!”, është shprehur kreu i qeverisë së Kosovës.

Poashtu, ministri kosovar i Kulturës, Rinisë dhe Sportit, Kujtim Shala, ka uruar këngëtaren e shquar shqiptare. Ai u shpreh se Pagarusha me zërin e saj të mrekullueshëm, i ka dhënë kulturës së Kosovës vlera të përhershme, duke u bërë njëherësh burim frymëzimi për breza të tërë. “Zëri i saj ka kumbuar fuqishëm përgjatë dekadave të tëra, duke na mbajtur gjallë dashurinë për kulturën, të bukurën dhe shpresën për një të ardhme ma të ndritshme”, u shpreh Shala, dhe shtoi se popujt që kanë këngëtare si Pagarusha janë të bekuar.

 Ai më tej u shpreh se arti i Pagarushës, është dëshmi e fuqishme e identitetit të Kosovës dhe një vlerë e jashtëzakonshme me të cilën krenohet vendi ynë. Po ashtu, Shala u shpreh se Institucionet e Kosovës janë të përkushtuara që të përkrahin dhe ndihmojnë kulturën e pasur të Kosovës, duke e promovuar, nxitur dhe ruajtur atë si vlerë për brezat e ardhshëm.

 Shala u shpreh se artistet si Nexhmije Pagarusha na nxisin që të punojmë edhe më shumë dhe më me përkushtim për Kosovën tonë.Nexhmije Pagarusha, e njohur edhe si Bilbili i Kosovës, në maj 2010, është dekoruar nga atëherë Presidenti i Republikës së Kosovës, Fatmir Sejdiu, me çmimin “Artiste e Merituar” për veprimtarinë dhe kontributin e veçantë dhënë kultivimit të muzikës dhe këngës së përsosur shqipe, teatrit dhe filmit.

Dekorata është dorëzuar solemnisht në ambientet e zyrës së Presidentit të Kosovës. Në arsyetimin e dekorimit të znj. Pagarusha, Presidenti Sejdiu theksonte se “kontributi i Nexhmije Pagarushës në fushën e krijimit, kultivimit, interpretimit dhe të promovimit të artit muzikor shqiptar është i një rëndësie të jashtëzakonshme”.

“E përkushtuar gjithë jetën për të  ngritur vlerat e artit muzikor, duke krijuar identitet referues kulturor, duke qenë zë i fuqishëm i shpirtit dhe vlerave estetike shqiptare, ajo ishte dhe mbetet shenjë identifikuese  e Kosovës dhe simbol i artistit që me veprën e vet komunikon në mënyrë autentike dhe përherë frymëzuese me një audiencë të gjerë muzikore”, theksohej në arsyetim.

Po ashtu vlerësohej se Nexhmije Pagarusha “është shembulli më i mirë i personalitetit që tërë jetën ia kushtoi zhvillimit dhe ngritjes së artit dhe kulturës shqiptare dhe si e tillë ajo është frymëzim nxitës për brezat krijues dhe interpretues të artistëve”.Presidenti Sejdiu ka dekoruar znj. Pagarusha në 77-vjetorin e lindjes së saj dhe dekorimi u bë në  bazë të Nenit 84, pika 28 të Kushtetutës së Republikës së Kosovës, si dhe në bazë të Nenit 3, 34 dhe 49 të Rregullores mbi Dekoratat, Urdhrat dhe Titujt e Nderit të Kosovës që i jep Presidenti i Republikës së Kosovës dhe Procedurat e Dhënies së tyre.

 

Kadri Veseli zgjedhet kryetar i ri i Partisë Demokratike të Kosovës

by

PRISHTINË, 7 Maj 2016-B.Jashari/.-Kadri Veseli është krytari i ri i Partisë Demokratike të Kosovës, i dyti pas Hashim Thaçit, i zgjedhur me unanimitet në votim të hapur, pak më parë.Partia Demokratike e Kosovës, subjekti më i madh politik kosovar, nisi sot para mesditës Konventën e VII-të të Jashtëzakonshme Zgjedhore, ndërsa nesër pasdite në përmbyllje kryetari i ri i zgjedhur nga delegatët, do t’u drejtohet të pranishmëve dhe qytetarëve.

Kandidati i vetëm për kryetar, kryeparlamentari kosovar Kadri Veseli, ka paralajmëruar angazhimet për mobilizimin dhe forcimin e strukturave të PDK-së, ndërsa ka theksuar se oferta e tij i ka rrënjët në sukseset e njëpasnjëshme historike të partisë dhe se do të ndjek rrugën e trasuar prej ish-kryetarit, por që ofron edhe një vizion të tij për një parti bashkëkohore evropiane të qendrës së djathtë.Duke shpallur zyrtarisht kandidaturën për kryetar të PDK-së, Veseli ka thënë se ka ndërmarrë një vendim shumë të rëndësishëm dhe ka shprehur besimin se në këtë detyrë të re mund ta përmbush më së miri vokacionin e tij politik dhe mund t’i shërbejë më së miri Republikës së Kosovës.PDK-ja, që nga themelimi në tetor të vitit të parë të lirisë 1999 e deri në shkurt 2016 udhëheqej nga Hashim Thaçi, i cili dha dorëheqje pasi Kushtetuta e Republikës së Kosovës përcakton se, “pas zgjedhjes, Presidenti nuk mund të ushtrojë asnjë funksion në parti politike”.

Në një konferencë shtypi pas zgjdhjes kryetar në detyrë i Partisë Demokratike të Kosovë, Veseli ka vlerësuar se kjo parti është një organizatë shumë e çmuar e jetës politike të Kosovës, e cila ka luajtur rol protagonist në shpalljen e pavarësisë dhe në konsolidimin e shtetit të ri.I kandiduar për kryetar të PDK-së, Veseli ka theksuar se mbështetjen e anëtarëve dhe votuesve për të marrë përsipër detyrën e drejtimit të kësaj organizate politike nuk e sheh vetëm si privilegj, por edhe si obligim për të punuar më shumë për konsolidimin e partisë.Para Konventës zgjedhore që po zhvillohet, në përgatitje të saj, Këshilli Drejtues i Partisë Demokratike të Kosovës, ka aprovuar axhendën e punimeve dyditore dhe ka marrë vendim për themelimin e komisionit statutar, i cili do të merret me propozimet për ndryshimet dhe plotësimet e Statutit të partisë, të ardhura nga strukturat e degëve.

 

XHEVAT NDREU NDËRROI JETË NË NJU JORK NE MOSHEN 76 VJECARE

by

NJOFTIM MORTOR/

STATEN ISLAND NY : Të Premten mbasdite, 6 Maj 2016, Xhevat Xhetan Ndreu, pas një sëmundje të rëndë, ndërroi jetë në  Staten Island University  Hospital, New York, duke patur pranë bashkëshorten, deri ne momentet e fundit , dy djemtë, të gjithe te afërmit, miqtë e dashamiret e tij.

Xhevat Xhetan Ndreu, u lind në Korrik 1940 në Sllovë, Peshkopi, dhe ndërroi jetë me 6 Maj 2016.

Ai la në pikellim të thellë gruan Zenepe Sina – Ndreu, dy djemtë Adriatikun dhe Emilianon, si dhe tre mbesat dhe një nip.

Njoftojmë komunitetin se shërbimet Funerale do të kryhen sot, e Shtunë 7 Maj 2016, duke filluar nga ora 4 p.m(mbas dite) deri në ora 9 pm (mbas dite) në Shtepine Mortore te Xhamise “Albanian Islamic Cultural Center”, e cila ndodhet në lokacionin: 188 Canal Street, Staten Island, NY 10301.

Ndërsa, varrimi do të kryehet të Dielën me 8 Maj 2016, rreth ores 12:00 te mesdrekes  në varrezat Laurel Grove Memorial Park në Totowa, që ndodhen në lokacionin :  295 Totowa Rd, Totowa, NJ 07512.

Nisja per nga Xhamia ne Staten Island bëhet në orën 10:00 paradite,.

Federata Panshqiptare e Amerikës”VATRA” dhe Gazeta Dielli i përcjellin ngushëllimet më të thella bashkshortes Zenepe, djemëve Adriatik dhe Emiliano, të afërmëve dhe miqëve, vatranit te vjeter anetarit te Bordit Jonuz Ndreu.

Xhevati ishte një vatran i përkushtuar dhe eshte nipi i Jonuz Ndreut