Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KOSOVA, ZONË TË VEÇANTË EKONOMIKE AMERIKANE

by

-Në Kosovë themelohet Zona e Veçantë Ekonomike Amerikane, Qeveria merr vendimin/

1 qeveria Harad

-Kryeministri i Kosovës, Ramush Haradinaj: Themelimi i Zonës së Veçantë Ekonomike Amerikane përkon me 4 Korrikun, Ditën e Pavarësisë së Shteteve të Bashkuara të Amerikës dhe dëshmon përkushtimin e Kosovës për të thelluar partneritetin strategjik me SHBA-të/

Gazeta DIELLI nga korrespondenti në Kosovë Behlul Jashari/

PRISHTINË, 26 Qershor 2018/ Qeveria e Kosovës në mbledhjen e sotme mori vendimin për themelimin e Zonës së Veçantë Ekonomike Amerikane.  Ky vendim është mbështetur në propozimin e grupit punues të themeluar nga qeveria për të shqyrtuar mundësit dhe procedurat e themelimit të kësaj zone.

“Themelimi i Zonës së Veçantë Ekonomike Amerikane përkon me 4 Korrikun, Ditën e Pavarësisë së Shteteve të Bashkuara të Amerikës dhe dëshmon përkushtimin e Kosovës për të thelluar partneritetin strategjik me SHBA-të”,  tha kryeministri i Kosovës, Ramush Haradinaj.

Në mbledhjen e qeverisë u theksua se, themelimi i  Zones së Veçantë Ekonomike do të ketë një rëndësi të madhe për ofrimin e kushteve të nevojshme për investimin e kompanive të ndryshme nga Shtetet e Bashkuara të Amerikës, e gjithashtu do të mundësojë zhvillimin ekonomik të Kosovës dhe rritjen e punësimit.

Zyra e Kryeministrit do të koordinojë gjithë procesin e themelimit të Zonës së Veçantë Ekonomike Amerikane, sipas propozimit të grupit punues, në bashkëpunim me institucionet tjera kompetente.

Përzgjedhja e lokacionit në komunën e Gjakovës është bazuar në faktin se ky lokacion plotëson kushtet e hapësirës, mbi 500 hektarë, si dhe përparësitë tjera, si kyçja direkt në magjistralen Gjakovë-Prishtinë, qasje e lehtë në Autostradën e Dukagjinit, afërsia me aeroportin e Gjakovës, por edhe të Prishtinës.

Me qëllim të realizimit të projektit, pas miratimit të vendimit nga qeveria e Kosovës, do të përgatitet memorandumi i bashkëpunimit me palën amerikane, hartimi i studimit të fizibilitetit për procesin dhe përzgjedhja e një operatori ekonomik për realizimin e të gjitha aktiviteteve të nevojshme për themelimin e Zonës së Veçantë Ekonomike.

Që në nisje të mbledhjes së sotme të Qeverisë së Kosovës, Kryeministri i Kosovës Ramush Haradinaj ka informuar Kabinetin Qeveritar për punën intensive në finalizimin e Ligjit për pagat, ligj ky që është në fazën e tij finale të përpilimit dhe javën e ardhshme do të jetë pikë diskutimi në Qeveri. Po ashtu, Kryeministri Haradinaj ka theksuar qëndrimin e tij se në ligjin e ri do të ketë rritje pagash për Policinë e Kosovës, punëtorët shëndetësorë dhe kategori të tjera të rëndësishme. Miratimin e Qeverisë e kanë marr edhe tre Koncept dokumente:
-Koncept dokumenti për shëndetin riprodhues dhe fertilizimin e asistuar mjekësor adreson nevojën e rregullimit të kësaj fushe në sistemin shëndetësor të Kosovës me qëllim të ruajtjes dhe përmirësimit të shëndetit, përmirësimin e kualitetit të jetës. Koncept dokumenti propozon ndryshimin dhe plotësimin e Ligjit për shëndetin riprodhues me qëllim të eliminimit të problemeve aktuale në këtë fushë.
-Koncept dokumenti për rregullimin e shpronësimit të pronës së paluajtshme i cili adreson sfidat në implementimin e dispozitave të tanishme ligjore të përcaktuara në Ligjin për shpronësimet e pronës së paluajtshme. Bazuar në rekomandimet nga Avokati i Popullit, Komisioni për Bujqësi, Pylltari, Mjedis e Planifikim Hapësinorë në Kuvendin e Republikës së Kosovës ka diskutuar edhe me akterët tjerë dhe ka rekomanduar plotësimin dhe ndryshimin e Ligjit.
-Koncept dokumenti për rregullimin e fushës së marrëdhënies së punës i cili ka për synim avancimin  e kushteve të punës për punëtorët, realizimin e të drejtës së lehonisë, luftimin e punësimit informal, garantimin e standardeve minimale për sigurinë dhe shëndetin në punë në pajtim me standardet ndërkombëtare.
Kabineti qeveritar ka miratuar nismën për lidhjen e Marrëveshjes bilaterale për transportin rrugor ndërkombëtar të udhëtarëve dhe mallrave ndërmjet Republikës së Kosovës dhe Republikës së Malit të Zi. Ministria e Infrastrukturës në Qeverinë e Republikës së Kosovës do të zhvillojë negociatat me palën malazeze për finalizimin e kësaj marrëveshje të dobishme për të dyja vendet.
Me miratim të një vendimi të veçantë, Qeveria ka ndarë mjetet për mbulimin e shpenzimeve për trajtimin shëndetësor jashtë vendit të ish-kryeministrit të Qeverisë së Kosovës në ekzil, Bujar Bukoshi.

Oda Amerikane dhe Konsullata e Kosovës në Nju Jork, aktivitete të përbashkëta

by

-Oda Amerikane dhe Konzullata e Kosovës në Nju Jork dakordohen për aktivitete të përbashkëta promovuese/1 Oda

-Promovim mundësive për investime në Kosovë dhe rritjes së bashkëpunimit ekonomik ndërmjet Kosovës dhe Shteteve të Bashkuara të Amerikës/

 PRISHTINË, 20 Qershor 2018-Gazeta DIELLI/ Oda Ekonomike Amerikane në Kosovë ishte nikoqire e konsullës së përgjithshme të Republikës së Kosovës në Nju Jork të Shteteve të Bashkuara të Amerikës, Teuta Sahatqija, me të cilën u bisedua për koordinimin e përpjekjeve ndërinstitucionale me qëllim të promovimit të mundësive për investime në Kosovë dhe rritjes së bashkëpunimit ekonomik ndërmjet Kosovës dhe Shteteve të Bashkuara të Amerikës.

Ambasadorja Sahatqija tha se pas realizimit të suksesshëm të aktivitetit të përbashkët për promovimin e verërave të Kosovës në dhjetor të vitit të kaluar në Nju Jork, ku mori pjesë edhe Ambasadorja e SHBA-ve në Kombet e Bashkuara, Nickey Haley, duhet të vazhdohet me aktivitete të tjera, të cilat kanë për synim sigurimin e partneriteteve për bizneset kosovare në SHBA. Ajo foli në veçanti për mundësitë e shumta që ekzistojnë për kompanitë kosovare nga fusha e teknologjisë së informacionit, në aspekt të kontraktimit të proceseve afariste.

Drejtori Ekzekutiv i Odës Ekonomike Amerikane në Kosovë, Arian Zeka, tha se përpjekjet institucionale për tërheqjen e investimeve amerikane në Kosovë, duhet të jenë të bashkërenduara dhe më të targetuara për biznese specifike amerikane, të cilat kanë mundësi për zgjerim të biznesit në Kosovë. Ai ofroi përkrahje Konzullatës së Përgjithshme të Kosovës në Nju Jork për koordinimin e aktiviteteve promovuese të cilat do të mbaheshin përgjatë vitit në Nju Jork e të cilat do të kishin në fokus audienca më të targetuara të bizneseve dhe palëve të tjera të interesit, përfshirë këtu edhe autoritetet shtetërore amerikane, si dhe institucionet financiare amerikane e ndërkombëtare.

Bashkëbiseduesit u dakorduan për përpilimin e një plani të detajuar të punës për të gjitha aktivitetet e mundshme, në të cilin do të përfshiheshin edhe organizata të tjera që mbështesin aktivitetet e inovacionit dhe ndërmarrësisë si Qendra e Inovacionit e Kosovës./b.j/

Kosovë-AKP fiton kontestin gjyqësor 10 milionësh

by

-Agjencia Kosovare e Privatizimit fiton procesin gjyqësor ballë kompanisë ESBI nga Irlanda/1 AKP

PRISHTINË, 19 Qershor 2018-Gazeta DIELLI-Behlul Jashari/ Agjencia Kosovare e Privatizimit bëri të ditur sot se e ka fituar në të dy shkallët procesin gjyqësor që është zhvilluar në Dhomën e Posaçme të Gjykatës Supreme të Kosovës me kompaninë ESBI nga Republika e Irlandës.
Kolegji i Ankesave i Dhomës së Posaçme të Gjykatës Supreme të Kosovës ka lëshuar Aktgjykimin, me të cilën ka refuzuar ankesën e paditësit ESBI Consultants Limited nga Republika e Irlandës, me çka ka vërtetuar Aktgjykimin e lëshuar nga Kolegji i Specializuar i po kësaj Gjykate që e ka refuzuar si të pabazuar padinë e ESBI-së.

ESBI Consultants Limited, kompani e regjistruar në Irlandë, ishte e angazhuar në menaxhimin e Korporatës Energjetike të Kosovës në vitet 2004-2006 përmes një kontrate të lidhur me ish-Agjencinë Kosovare të Mirëbesimit, që tash është Agjenci Kosovare e Privatizimit.

Në 26 qershor 2008 ESBI kishte ushtruar padi ndaj ish-Agjencisë Kosovare të Mirëbesimit për, siç thuhej në padi, mospërmbushje të detyrimeve ndaj saj për angazhimin në Korporatën Energjetike të Kosovës.

Vlera e kontestit ka qenë 4,945,128.83 euro, ndërsa duke llogaritur pretendimet e ankuesit në interes (kamatë) nga viti 2006 e deri më tani, në vlerë totale i bie afër 10 milionë euro.Përgjatë një procesi të gjatë gjyqësor, Agjencia Kosovare e Privatizimit në të dy shkallët e Dhomës së Posaçme e ka fituar kontestin gjyqësor duke e kursyer kështu Buxhetin e Kosovës për rreth 10 milionë euro nga dënimet potenciale.Ky është edhe një rast i fituar i Agjencisë Kosovare të Privatizimit në betejat ligjore në mbrojtje të interesave të ndërmarrjeve të Kosovës.

 

PRISHTINË-SHKUP, LIDHJE ME AUTOSTRADË

by

-Kosovë-Autostrada drejt Maqedonisë, përurohet segmenti i tretë/

1 autostrade amb amerik1 autostrada kjo1 autostrade Thaci2 Ramushi autostrade

-Përfundimi i ndërtimit të autostradës në pjesën kosovare pritet para fundit të këtij viti, madje të përurohet për Ditëfestën e Flamurit e të Pavarësisë Shqiptare – 28 Nëntorit/

 PRISHTINË, 14 Qershor 2018-Gazeta-DIELLI-Behlul JASHARI/ Sapo u përurua sot segmenti i 3-të i autostradës nga Prishtina në Han te Elezit, kufiri me Maqedoninë, drejt Shkupit, në pjesën Bibaj-Doganaj, me një ceremoni të zhvilluar në mesditë, me pjesëmarrje të drejtuesëve institucionalë e politikë të Kosovës.

Mes pjesëmarrësve ishte kryetari i Kuvendit të Kosovës, Kadri Veseli, kryeministri Ramush Haradinaj, ambasadori i Shteteve të Bashkuara të Amerikës në Prishtinë, Greg Delawie, si dhe kryetarë komunash nga kalon autostrada.Në fjalët e rastit u paralajmërua përfundimi i ndërtimit të autostradës në pjesën kosovare para fundit të këtij viti, madje të përurohet për Ditëfestën e Flamurit e të Pavarësisë Shqiptare – 28 Nëntorit.Në Kosovë, në 3 korrik 2014 është organizuar ceremonia e përurimit të nisjes së punimeve për ndërtimin e autostradës rreth 60 kilometërshe drejt Maqedonisë, e cila kalon nëpër Ferizaj, Kaçanik e lokalitete tjera. Autostrada është emërtuar me emrin e intelektualit dhe veprimtarit shqiptar nga Tetova Arbën Xhaferi.Në 25 tetor 2015, në një ceremoni përurimi të hapjes së nyjës lidhëse Kosova ka lidhë autostradën e përfunduar drejt Shqipërisë me atë në ndërtim drejt Maqedonisë, dy projekteve më të mëdha të infrastrukturës kosovare të rëndësishme edhe për gjithë rajonin.

Reagim antiqeveri-Qeveria kosovare, e papërgjegjshme ndaj parasë publike

by

1 Euro qevDje Qeveria e Republikës së Kosovës procedoi me implementimin e rritjes së pagave, kryesisht për stafin politik, pas vendimit të Gjykatës Kushtetuese, e cila vendimin e qeverisë nuk e konsideronte jokushtetues. Edhe kësaj radhe, ky veprim i qeverisë ka shqetësuar opinionin publik dhe ka dëshmuar për një qasje arrogante që ka kjo qeveri në të gjitha drejtimet.

Lëvizja për Bashkim konsideron se qeveria, para se të vendoste për zbatimin e këtij vendimi, do të duhej të reflektonte lidhur me reagimin e opinionit publik për këtë çështje. Ajo, së paku, nuk do të duhej të ndërmerrte këtë hap para se ta draftonte Ligjin për Qeverinë në të cilin do të kufizohej numri i ministrave, këshilltarëve e sidomos zëvendësministrave. Mos të harrojmë se kjo qeveri, në mënyrën më të papërgjegjshme, ka shtuar në rreth 80 numrin e zëvendësministrave, të cilët përveç barrës financiare janë edhe pengesë në efikasitetin e punës së ministrive. Gjithashtu, do të duhej të pritej edhe miratimi i Ligjit për Pagat që është në procedurë, i cili do të vendoste bazat edhe për pagat e stafit politik.

Për Lëvizjen për Bashkim është e papranueshme se si qeveria Haradinaj vendosi t’i rrisë pagat mbi nivelin e pagave të rajonit dhe në shpërputhje të plotë me situatën socio-ekonomike të vendit. Kjo qeveri po vazhdon të tregohet tërësisht e papërgjegjshme ndaj parasë publike dhe njëkohësisht po vazhdon të shpërblejë militantët partiak me poste zëvendësministrash, duke abuzuar kështu me buxhetin e shtetit. Fatkeqësisht, puna e deritashme e kësaj qeverie nuk na jep shpresë dhe arsye për të besuar se këto paga dhe këto shpërblime do të përkthehen në rezultate. Përkundrazi, sa më shumë të stimulohet keqqeverisja aq më të rënda do të jenë pasojat për vendin.

Lëvizja për Bashkim

Prishtinë, 13.6.2018