Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

DASH: Kosova i ka përmbushur kriteret për transparencë fiskale

by

Foto Gazeta DIELLI-Behlul Jashari: Ministri i Financave në qeverinë e Kosovës, Avdullah Hoti, në konferencë shtypi/

DASH: Kosova i ka përmbushur kriteret për transparencë fiskale/

“Departamenti i Shtetit i SHBA-ve, në raportin e vitit 2016, vlerëson se Kosova ka përmbushur kriteret për transparencë fiskale për periudhën 1 janar – 31 dhjetor 2015. Të dhënat që ka përdorur Departamenti i Shtetit janë nga shërbimet diplomatike dhe konsullore, nga shoqëria civile, nga organizatat ndërkombëtare etj”, thekson Ministria kosovare e Financave./

PRISHTINË, 1 Gusht 2016-B.Jashari/ Departamenti i Shtetit i SHBA-ve ka vlerësuar Kosova i ka përmbushur kriteret për transparencë fiskale.

Ministria kosovare e Financave deklaroi sot se vlerëson lartë raportin e Departamentit të Shtetit të SHBA-ve të vitit 2016 lidhur me transparencën fiskale në Kosovë.

“Ky raport përshkruan kërkesat minimale për sigurimin e transparencës fiskale të shteteve, që lidhen në veçanti me përgatitjen dhe publikimin e dokumenteve kyçe të buxhetit në mënyrë të plotë dhe të besueshme dhe të qasshme për publikun, siç është propozim buxheti, buxheti vjetor i miratuar, raporti vjetor i ekzekutimit të buxhetit, raportet e rregullta të shpenzimeve etj”, thekson Ministria.

Po ashtu, vijohet më tej, raporti i borxhit publik i vendit është në dispozicion për qytetarët dhe jep informata të plota dhe të besueshme, transparencën në lidhjen e kontratave publike dhe lëshimin e licencave për shfrytëzimin e resurseve natyrore, ekzistencën dhe funksionalitetin e një autoriteti suprem të auditimit të pavarur dhe bërjen publike të auditimeve të tilla”, shprehet Ministria e Financave.

Si e tillë, vijon deklarata, transparenca fiskale është element kritik për menaxhim efektiv të financave publike dhe ndihmon në rritjen e besueshmërisë së qytetarëve dhe bizneseve karshi shtetit.

“Transparenca fiskale fuqizon llogaridhënien e qeverisë duke ofruar një dritare të mundësive për qytetarë për të parë nga afër mënyrën e mbledhjes dhe shfrytëzimit të buxhetit të shtetit”, thekohet më tej.

Në këtë mënyrë, vijon deklarata, debati publik është më i informuar dhe bazuar në të dhëna të besueshme.

“Departamenti i Shtetit i SHBA-ve, në raportin e vitit 2016, vlerëson se Kosova ka përmbushur kriteret për transparencë fiskale për periudhën 1 janar – 31 dhjetor 2015. Të dhënat që ka përdorur Departamenti i Shtetit janë nga shërbimet diplomatike dhe konsullore, nga shoqëria civile, nga organizatat ndërkombëtare etj”, thekson Ministria kosovare e Financave.

Më tej shton se, ky vlerësim pozitiv reflekton suksesin e plotë të qeverisë së Kosovës në rritjen e transparencës buxhetore dhe llogaridhënien.

“Diskutimi i gjerë i buxhetit me të gjithë akterët e involvuar, pastaj raportimi çdo muaj në qeveri për të hyrat dhe shpenzimet, transparenca në prokurimin publik, zbatimi i një politike strikte të kursimeve dhe reformat e tjera kanë rritur besueshmërinë e qytetarëve dhe bizneseve në Kosovë karshi financave publike”, vlerëson Ministria.

Kjo, vijohet më tej, ka rezultuar me të hyra tatimore dukshëm më të mëdha se në vitin 2014, përmbushje të kritereve të programit të FMN-së, besueshmëri nga partnerët ndërkombëtarë të Kosovës dhe bankat zhvillimore, duke pasur qasje në kredi të buta tek qeveritë e vendeve të BE-së dhe institucionet financiare ndërkombëtare, në nivele të pakrahasueshme më parë.

“Ky sukses, i mundëson Kosovës të ketë qasje në ‘Fondin Inovativ për Transparencë Fiskale’ të Departamentit të Shtetit për 2016, ku mund të sigurohen fonde për të  rritur kapacitetet e qeverisë për ekzekutim të qëndrueshëm, të besueshëm dhe transparent të buxhetit, rritjen e qasjes për qytetarët në shpenzimet publike dhe programet e të hyrave si dhe rritjen e aftësisë së qytetarëve për të avokuar për çështje specifike të cilat lidhen me buxhetin e shtetit”, përfundon Ministria kosovare e Financave.

Grupi i Bankës Botërore viziton Agjencinë Kosovare të Privatizimit

by

-Kryesuesi i Bordit të Drejtorëve, Petrit Gashi priti  një delegacion nga International Finance Corporation (IFC), ekipin e profesionistëve nga Washington DC/

PRISHTINË, 29 Korrik 2016 – Gazeta DIELLI-B.Jashari/ Kryesuesi i Bordit të Drejtorëve i Agjencisë Kosovare të Privatizimit, Petrit Gashi priti sot një delegacion nga International Finance Corporation (IFC), ekipin e profesionistëve nga Washington DC kryesuar nga Thomas Lubeck  dhe George Konda.

Delegacioni nga International Finance Corporation (IFC) shprehën interesim për një varg çështjesh nga fushëveprimi i Agjencisë Kosovare të Privatizimit, për të cilat u informuan nga Kryesuesi i Bordit, Gashi dhe nga Zëvendësdrejtorët Menaxhues të Agjencisë, Valbona Dibra dhe Avni Jashari.

Delegacioni nga Banka Botërore (World Bank Group) i njoftuan përfaqësuesit e Agjencisë se kanë filluar të përgatisin strategjinë për Kosovën për periudhën 2017 – 2022 dhe theksuan se do të punojë afër me të gjitha palët relevante në përpilimin e kësaj strategjie. Përfaqësuesit e IFC-së thanë se do ta kenë në fokus sektorin privat që është shumë i rëndësishëm për zhvillimin ekonomik të Kosovës dhe shtuan se procesi i privatizimit në Kosovë është mundësi e mirë për IFC  për përkrahje dhe bashkëpunim.

Takimi ishte i natyrës konsultative me qëllim të identifikimit të fushave dhe prioriteteve për periudhën e ardhshme, bën të ditur njoftimi dërguar nga Agjencia  Kosovare  e  Privatizimit -Zyra për Marrëdhënie me Publik dhe Media.

 

Kosovë-Trepça, në proces të riorganizimit

by

-Delegacioni i Komisionit Parlamentar për Zhvillim Ekonomik viziton Agjencinë Kosovare të Privatizimit, ku gjatë një takimi u diskutua për procesin e riorganizimit të Ndërmarrjes Trepça dhe studimin e fizibilitetit për këtë, që është në proces e sipër, si dhe për çështje tjera/

PRISHTINË-B.Jashari/Anëtarët e Komisionit për Zhvillim Ekonomik, Infrastrukturë, Tregti dhe Industri të Kuvendit të Kosovës vizituan sot Agjencinë Kosovare të Privatizimit, ku gjatë një takimi u diskutua për procesin e riorganizimit të Ndërmarrjes Trepça dhe studimin e fizibilitetit për këtë, që është në proces e sipër, si dhe për çështje tjera.

Kryesuesi i Bordit të Drejtorëve i Agjencisë Kosovare të Privatizimit, Petrit Gashi, priti delegacionin nga Komisioni për Zhvillim Ekonomik, Infrastrukturë, Tregti dhe Industri të Kuvendit të Republikës së Kosovës, të kryesuar nga Muhamet Mustafa, kryetar i këtij Komisioni.Kryetari i Komisionit Parlamentar, Muhamet Mustafa si dhe anëtarët e Komisionit, Besim Beqaj dhe Raif Qela, shprehën interesim për një varg çështjesh, për të cilat u informuan nga Kryesuesi i Bordit, Petrit Gashi dhe anëtarët e tjerë të Bordit, Bajram Zejnullahu, Haxhi Arifi, Ismail Januzi, Ranko Djokiç, si dhe nga Zëvendësdrejtorët Menaxhues të Agjencisë, Valbona Dibra dhe Avni Jashari.

Në takim u diskutuan çështje që vazhdojnë të jenë sfiduese për Agjencinë e Privatizimit. Kryesuesi i Bordit të Drejtorëve, Petrit Gashi i informoi anëtarët e komisionit për zhvillimet dhe aktivitetet dhe çështjet të cilat ndërlidhen me rritjen e efikasitetet të punës së Agjencisë.

U diskutua edhe lidhur me progresin e shpërndarjes së 20% për punëtorët e ndërmarrjeve shoqërore të privatizuara, pagesën e kërkesave të kreditorëve të ndërmarrjeve shoqërore. U theksua se, vetëm brenda 5 muajsh janë aprovuar shpërndarjet e pagesave për kreditorët e 93 ndërmarrjeve shoqërore me totalin e pagesave prej 13.5 milionë euro.

Po ashtu, u diskutua për procesin e lirimit të pronave të uzurpuara në të gjithë territorin e Republikës së Kosovës, për ndryshimin e ligjit të Agjencisë Kosovare të Privatizimit dhe përmirësimin e legjislacionit dhe procedurave, si dhe për mundësinë e përshpejtimit në trajtimin e lëndëve të ndërlidhura për Agjencinë nga Dhoma e Posaçme e Gjykatës Supreme.

 

Fondi Zhvillimor mbështet dy projekte në veri të Kosovës

by

-Katër komunat veriore të Kosovës -Mitrovica e Veriut, Zveçani, Leposaviçi e Zubin Potoku banohen me shumicë nga komuniteti serb/

PRISHTINË, 22 korrik 2016-B.Jashari/Bordi Menaxhues i Fondit Zhvillimor gjatë takimit të sotëm të mbajtur në Prishtinë ka ndarë 700,000 euro për dy projekte në pjesën veriore të Kosovës.Zyra e BE në Kosovë në njoftimin e dërguar thekson se, mbi 400,000 euro janë ndarë për zhvillimin ekonomik lokal në Komunën e Zubin Potokut, përfshirë zhvillimin e ndërmarrjeve të vogla dhe të mesme, mbështetjen në bujqësi dhe vet-punësimin.Bordi ndau gati 300,000 euro për Komunën e Zveçanit për ndërtimin e rrjetit komunal të ujit dhe ujërave të zeza, rrjetit të energjisë elektrike dhe infrastrukturës rrugore për 10 shtëpi banimi të rasteve sociale të financuara nga Ministria e Punës dhe Mirëqenies Sociale, dhe për 20 shtëpi për të zhvendosurit të financuara nga Ministria për Komunitete dhe Kthim.

Bordi u pajtua gjithashtu me planin e sugjeruar të auditimit të veprimtarisë së Fondit që të bëhet nga ana e Auditorit të Përgjithshëm. Kjo do të fillojë në vjeshtë të këtij viti.

Fondi Zhvillimor gjeneron të hyra nga taksat e mbledhura në vendkalimet kufitare Jarinje/Rudnicë dhe Tabavije/Bërnjak (vendkalime veriore Kosovë-Serbi). Të hyrat e mbledhura deri më tani arrijnë në 10 milionë euro dhe përdoren për të mbështetur zhvillimin socio-ekonomik të komunave veriore të Kosovës. Deri më tash, mbi 7 milionë euro janë dhënë nga Fondi Zhvillimor për katër komunat veriore të Kosovës. Funksionimi i Fondit vendoset nga Bordi Menaxhues i përbërë nga Samuel Zhbogar, Kryesues i Bordit në cilësinë e Përfaqësuesit Special të BE-së në Kosovë, Ministri i Financave të Kosovës, Avdullah Hoti në emër të autoriteteve kosovare dhe Danijella Zubac në emër të komunitetit serb.Katër komunat veriore të Kosovës -Mitrovica e Veriut, Zveçani, Leposaviçi e Zubin Potoku banohen me shumicë nga komuniteti serb.

Kapitull i ri i Kosovës me Gjermaninë për bashkëpunimin ekonomik

by

-Ministri i Punëve të Jashtme të Republikës së Kosovës, Enver Hoxhaj, viziton Berlinin/

Berlin, 21 korrik 2016/ Ministri i Punëve të Jashtme të Republikës së Kosovës, Enver Hoxhaj ka nisur një vizitë zyrtare në Gjermani ku në fokus të axhendës së tij janë takimet me homologun e tij gjerman, Walter Steinemier, zyrtarë në Ministrinë e Punëve të Brendshme dhe udhëheqës të tjerë politik dhe ekonomik.

Nga Berlini MPJ kosovare në njoftimin e sapodërgur thekson se, në ditën e parë të vizitës Hoxhaj ka takuar Michael Harms, Drejtor i Komitetit Lindor të Ekonomisë Gjermane për të diskutuar mundësinë e rritjes së investimeve gjermane dhe njëkohësisht thellimin e bashkëpunimit në këtë drejtim.  Hoxhaj ka deklaruar pas takimeve, se po e viziton Berlinin për të shtyrë përpara një kapitull të ri të bashkëpunimit që në fokus ka zhvillimin ekonomik të Kosovës.

“Jam për vizitë në Berlin si një mik i Gjermanisë dhe për të konfirmuar lidhjet e ngushta që ekzistojnë mes dy vendeve. Pas përkrahjes së madhe në çlirimin, rindërtimin dhe shtet ndërtimin e Kosovës nga ana e Gjermanisë, konsideroj se duhet të hyjmë në një fazë të re të marrëdhënieve e që ka si prioritet bashkëpunimin ekonomik. Dhe për këtë do të angazhohem me të gjitha kapacitetet e mija” ka deklaruar Hoxhaj.

Kryediplomati kosovar, ka zhvilluar një takim edhe me Frank Priess, zëvendësdrejtor i Konrad Adenauer Stiftung për Evropë dhe Bashkëpunim Ndërkombëtar, me të cilin ka diskutuar për nevojën e zgjerimit të fushë-veprimtarisë dhe përfshirjes edhe më të madhe të Fondacionit KAS në Kosovë.Hoxhaj, ka thënë se “përvoja dhe ndihma e këtij fondacioni do të ishte shumë e rëndësishme për forcimin e demokracisë, shoqërisë civile dhe të partive politike. Ministri Hoxhaj gjatë ditës ka takuar edhe Prof. Dr. Michael Stürmer, botues, kryeredaktor dhe historian i njohur gjerman dhe përkrahës i çështjes së Kosovës. Në agjendë të vizitës së tij, Hoxhaj do të takohet të premten edhe me ministrin e Jashtëm të Gjermanisë, Walter Steinmeier./b.j/