Ekonomi – Page 187 – Dielli

Në Parlamentin Evropian, projekti i autostradës Durrës-Prishtinë-Medvegjë–Nish drejt Evropës

February 3, 2017 by dgreca

Dje në Parlamentin Evropian në Bruksel u prezantua projekti i autostradës Durrës-Prishtinë-Medvegjë–Nish drejt Evropës/

Shkruan Asllan Dibrani/

Dje në parlamentin evropian në Bruksel u prezantua projekti i autostradës Durrës – Prishtinë – Medvegjë – Nish. AFEDS(Forumi Shqiptar për zhvillimin ekonomik në Serbi ) Forumin për bashkëpunim ndërkufitar (FBN) me përkrahjen e shumë institucioneve tash e disa muaj janë duke lobuar në nivele kombëtare dhe ndërkombëtare që ky projekt të kaloj nëpër Medvegjë. Rëndësia e këtij projekti është shumë e madhe për Luginën e Preshevës. Pamje e delegacionit të Forumi Shqiptar për zhvillimin ekonomik në Serbi i udhëhequr nga Muharrem Salihu, të pritur në Parlamentin e Evropës nga z.Knut W. Fleckenstein kryetar i komitetit për bashkëpunim mes Kosovës ,Serbisë,Shqipërisë,Bosnje e Hercegovinë dhe Mali i Zi./

Ka kohë në të gjitha instancat politike ,shoqërore, organizata qeveritare dhe jo qeveritare po diskutohet për ndërtimin e autostradës Durrës – Prishtinë – Nish, që do të lidhë tri shtetet dhe do të ndikojë në nxitjen e zhvillimit dhe bashkëpunimit ekonomik mes tyre.Në projektin fillestar, parashikohet që autostrada të kalojë nëpër Merdarë nga e cila është një gabim strategjik në sferën politike dhe ekonomike. Ndërkohë, “Forumi Shqiptar për Zhvillim Ekonomik në Serbi (AFEDS)i themeluar nga kompania “MedVita Development”, me seli në “Banjën e Sjarinës”, KK Medvegjë ka prezantuar një draft projekt të ri, ku kërkohet që autostrada të kalojë nga Medvegja dhe jo nga Merdara e cila nuk ka interes as Kosova as Serbia , por edhe kostoja është më e vogël dhe është fitimprurëse për rajonin e tri komunave të atjeshme dhe etniteteve që jetojnë shqiptarë dhe serb ,por edhe për Gollakun si rajon me i pa zhvilluar. Ky draft para disa ditësh fitoj përkrahjen e eurodeputetit dhe koordinatorit për politikë të jashtme, Z. Knut W. Fleckenstein, si dhe kryetar i komitetit për bashkëpunim mes Kosovës ,Serbisë,Shqipërisë,Bosnje e Hercegovinë dhe Mali i Zi.Projekt i dorëzuar dje në Parlamentin e Evropës nga këshilli i Forumit Shqiptar i udhëhequr me zotin Muharrem Salihun /

Kësaj i parapriu edhe takimi me kryetarin e Aleancës Kosovare të Bizneseve z Agim Shahini në kabinetin e tij me bashkëpunëtorët e Forumit Shqiptar për zhvillim ekonomik në Serbi(AFEDS)ku fokus kryesorë kishim projektin e autostradës Nish-Prishtinë i cili do të mundë të sjellë shumë përfitime ekonomike si për Kosovën, por edhe për Shqipërinë dhe Serbinë. U trokit edhe neper disa dyer ndërkombëtare dhe evropiane,qe ky projekti nga Leskoci për në Medvegjë dhe drejt Prishtinës. Për këtë projekt edhe qeveria e Serbisë ka dhënë sinjal pozitiv ne vitin e kaluar në instancat ndërkombëtare për zhvillimin ekonomik të këtij rajoni e pikërisht edhe për Autostradën ne këtë relacion . Për këtë projekt është prononcuar edhe kryeministri Isa Mustafa, nga e cila e priti delegacionin e këtij forumi të biznesmenëve nga komunat Preshevë, Medvegjë dhe Bujanoc i udhëhequr nga z.Muharrem Salih një biznesmen i dëshmuar ne Itali…

Lobimi dhe takime te tilla, patën edhe me organizmat e menaxhmentë politik me Shaip Kamberi, nënkryetari i Preshevës, Xhelal Memeti, kryetari i Forumit për Zhvillim Ekonomik, Muharrem Salihu, koordinatori për Politikë të Jashtme, Aziz Aziri, si dhe Muharrem Zejnullahu, është biseduar për fuqizimin e koordinimit në funksion të zhvillimit ekonomik, infrastrukturor, social dhe kulturor të tri komunave.Perkrahje te tilla kane arritur edhe nga partite politike ne Shqiperi ,Kosve dhe Serbi por edhe nga Lobi Euro-Atlantik Shqiptar në Evrope e udhëhequr nga Skënderbeg Klaiqi po edhe Asllan Dibrani përfaqësues i mediave të këtij Lobi.

Ne duhet ti përshëndesim aktivitetet e tilla që përkojnë fillimisht me interesin politik dhe kombëtar me pretekst te veçanet zhvillimit ekonomike dhe avancimin e proceseve dhe zhvillimin te kësaj treve te pa zhvilluar si ne Serbi po ashtu edhe në Kosovë,rezulton se primarja ishte Autostrada Durrës – Prishtinë – Medvegjë – Nish ,drejtë Evropës.

„Forumit Shqiptar për Zhvillim Ekonomik në Serbi në nismën e ndërmarrë, për realizimin e autostradës Durrës – Prishtinë – Medvegjë – Leskoc – Nish po i bashkohen njëzëri edhe organizata të ndryshme shqiptare kudo në botë, personalitete nga fusha të ndryshme, individë dhe qytetarë nga trojet shqiptare dhe diaspora. Mendime të tilla dhe aktivitete janë duke u bërë edhe nga qytetin e Leskovcit dhe qeveritë lokale të kësaj treve për këtë Autostradë për ta ruajtur dhe bilancin e popullatës për mos shpërngulje nga këto zona qofte shqiptar apo serb.

Ne saje te këtyre aktiviteteve të njëpasnjëshme u arrit qe ky projekt të shtrohet edhe në Parlamentin e Evropës, nga e cila ky projekt, po e përmirëson gabimin e Lidersrshipit kosovar qe e kishin fut gabimisht këtë Projekt te në drejtim te Merdares, duke i lënë vëllezërit tanë në këto tri komuna pa rrugë.

Ky shkrim le të mbetet si mesazh dhe thirrje individëve, organizatave,qeverive,organizatave qeveritare dhe jo qeveritare dhe institucioneve të ndryshme në Shqiperi ,Kosovë dhe Serbi që veprojnë në vende të ndryshme të botës, për shumë mbështetje,inkurajim , ndihmë dhe bashkërendim të aksioneve tona, për realizimin e projektit të autostradës Durrës – Prishtinë – Medgjevë – Leskoc – Nish.Ky mesazh le te jete po ashtu si thirrje edhe Parlamentit të tri shteteve Shqipërisë ,Serbisë dhe te Kosovës, qe sa me pare ta aprovojnë këtë projekt në interesin e të tri shteteve dhe te rajonit ballkanik. Thirje e vecant i bejme edhe Parlamentit Evropian qe ky kërkesë të aprovohet sa më parë, që po ashtu do të jetë edhe një nder pikat me strategjike, për ta stabilizuar edhe gjendjen politike në rajon. Për në fund ta ndihmojmë AEFDS, që po organizon edhe një peticion Online për përkrahjen e projektit të autostradës Durrës – Prishtinë – Medgjevë – Leskoc – Nish .Delegacioni i ynë i kryesuar nga zoti Muharrem Salihu, edhe sot po zhvillon takime te ngjeshura ne Parlamentin Evropian nga e cil ane ditet ne vijim do tu njoftojmë për këtë projekt. Projekti është në harmoni edhe me planet e Bashkimit Evropian për zhvillimin e Ballkanit perëndimor…

Romë-Ftohen investitorët italianë në Kosovë

January 31, 2017 by dgreca

-Kryeparlamentari i Kosovës, Kadri Veseli: Jemi thellësisht të përkushtuar që ekonomia jonë të zhvillohet në marrëdhënie të ngushtë me ekonomitë e vendeve demokratike perëndimore/ROMË, 31 Janar 2017-Gazeta DIELLI/ Kryeparlamentari Kadri Veseli ka ftuar investitorët italianë në Kosovë që të eksplorojnë mundësitë e saj të shumta ekonomike, i bindur se do të gjejnë argumente të bollshme për ta sjellë kapitalin e tyre në ekonominë kosovare. Ai ka thënë se, me këtë rast, përfitimi do të ishte i trefishtë: do të përfitonin investuesit, qytetarët kosovarë dhe perspektiva evropiane në rajon.Veseli këtë thirrje e ka bërë në “Forumin Ekonomik për Kosovën”, i cili po zhvillon punimet në Romë të Italisë, ku të pranishëm ishin edhe Kryeministri Isa Mustafa dhe Ministrja e Tregtisë dhe Industrisë, Hykmete Bajrami.Duke e vlerësuar organizimin e këtij Forumi si një lajm të mirë për ekonominë e Kosovës, Veseli ka thënë se Italia është një nga shembujt më të mirë që tregon se zhvillimi vjen vetëm përmes ekonomisë së tregut të lirë, në bashkëveprim me një shtet të fuqishëm që mbështetet mbi parimet e sundimit të ligjit.Në fjalën e tij para pjesëmarrësve, Kryeparlamentari Veseli ka pohuar se Kosova qëndron fuqishëm mbi vizionin se zhvillimi ekonomik dhe forcimi i vazhdueshëm i demokracisë nuk mund të ndahen nga njëri-tjetri. “Ne kemi qenë, jemi dhe do të mbesim përgjithmonë një vend evropian, shtet demokratik, shoqëri sekulare dhe ekonomi e tregut të lirë. Mbi bazën e këtij vizioni, ne jemi thellësisht të përkushtuar që ekonomia jonë të zhvillohet në marrëdhënie të ngushtë me ekonomitë e vendeve demokratike perëndimore”, është shprehur ai.Por, që gjërat të ecin mbarë, Veseli ka vlerësuar se duhet parë gjendjen ekzistuese të tyre. Ai ka theksuar se të dhënat e bashkëpunimit ekonomik, të investimeve italiane, ose edhe atyre me kapital të përbashkët, të regjistruara në Kosovë, janë pakrahasueshëm të vogla në raport me synimin e Kosovës. “Shenjat e kohëve të fundit janë inkurajuese, por jemi ende në luftë me imazhin dekurajues që është krijuar tek investitorët për vendin tonë për vite të tëra. Mirëpo, reformat tona dhe evidentimi i tyre ne raportin e Bankës Botërore për Doing Business, arritjet e konsiderueshme në luftën kundër krimit e korrupsionit, reforma rrënjësore dhe e suksesshme në fushën fiskale, kanë pasur efekt pozitiv dhe do të kenë në të ardhmen”, ka thënë ai.Veseli ka rikujtuar se në 7 vjetët e fundit Kosova ka pasur një rritje të GDP-së mesatarisht prej 5%, ndërsa ka konsideruar se trendët ekonomikë pozitivë në Kosovë janë indikatorë i reformave të ndërmarra nga institucionet e Kosovës.“Qeveria e Kosovës ka iniciuar një sërë reformash, të cilat kanë për qëllim përmirësimin e ambientit të biznesit, forcimin e sektorit privat, si dhe rritjen e qëndrueshme ekonomike”, ka thënë ai.Kryeparlamentari kosovar, po ashtu, ka përmendur rritjen e vazhdueshme të investimeve kapitale që nga shpallja e pavarësisë dhe ka vlerësuar se rritja e investimeve publike është bërë e mundur nga një menaxhim më i mirë i buxhetit, performancë më e mirë e autoriteteve doganore dhe administratës tatimore, si dhe nga një plan ekonomik më i përshtatshëm për nevojat e sektorit privat.Të gjitha këto përpjekje për të përmirësuar ambientin e të bërit biznes, sipas Veselit, janë reflektuar në përmirësimin e rangimit të Kosovës në Raportin e Bankës Botërore e të Bërit Biznes. Por, ka tërhequr vërejtjen Veseli, nuk janë vetëm reformat në përmirësim të ambientit biznesor si arsye për të investuar në Kosovë.“Marrëveshja e Stabilizim Asociimit me Bashkimin Evropian dhe CEFTA janë ndër arsyet kryesore që u mundësojnë investitorëve potencialë ta shohin Kosovën, jo vetëm si një treg prej 2 milionë konsumatorëve, por si një treg prej nga mund të eksportohet pa doganë në një treg prej 32 milionë konsumatorëve në vendet e CEFTA-s dhe afro 600 milionë konsumatorëve në Bashkimin Evropian, duke mos përfshirë masat preferenciale tregtare me SHBA, Japoni dhe Norvegji”.“Gjithashtu, Kosova ofron një sistem më efikas të taksave, duke pasur parasysh vlerësimin e zyrtarëve të Fondit Monetar Ndërkombëtar, si sistemin më të mirë në botë pas Zelandës së Re, pasi që është shumë i thjeshtë dhe i lehtë për bizneset”, ka thënë ai.Kryeparlamentari Veseli, ka shtuar më tutje se, përveç sistemit efikas të taksave, Kosova ofron tatimet më të ulëta në Evropë, duke u ofruar investitorëve të huaj vetëm 10% në profit të korporatave, vetëm 5% kontribut të detyruar të pensioneve dhe 0% tatim në dividendë. Ai ka thënë se janë edhe me shumë përfitime të tjera që ofron Kosova, siç është mbrojtja e investitorëve të huaj, ku garantohet i gjithë investimi i tyre përmes ligjit për investimet e huaja.Por, me gjithë përparimet, Veseli ka pohuar të jetë i vetëdijshëm që Kosova ende ka sfida ekonomike dhe, ndonëse në përmirësim e sipër për çdo vit, deficiti tregtar ende është i lartë për Kosovën.Në vazhdim të fjalës së tij, para pjesëmarrësve të “Forumit Ekonomik për Kosovën”, në Romë, Veseli ka premtuar se do të vazhdohet thellimi i reformave ekonomike në Kosovë.“Zonat e lira ekonomike, shpenzimet më të ulëta operative në Evropë, tatimet ndër më të ulëta në Evropë, qasje e lirë në tregun e Bashkimit Evropian, Evropës Juglindore, Turqisë, Amerikës, Japonisë dhe Norvegjisë, sigurimi i investimeve të huaja, përmirësimi i infrastrukturës, si dhe reformat e vazhdueshme në përmirësim të klimës investive – janë vetëm disa nga arsyet pse Kosova duhet të konsiderohet si vend i përshtatshëm për realizimin e investimit tuaj”, ka deklaruar ai.Kryeparlamentari Veseli, duke ftuar investitorët italianë në Kosovë, ka rikujtuar se Kosova është shumë afër Italisë dhe kjo është një përparësi që nuk e kanë shumë vende në zhvillim që synojnë të tërheqin kompanitë perëndimore./b.j/

Kosovë-Itali, në Romë Forum i Bashkëpunimit Ekonomik

January 30, 2017 by dgreca

PRISHTINË, 30 Janar 2017/ Në Romë zhvillohet nesër Forumi i Bashkëpunimit Ekonomik ndërmjet Kosovës dhe Italisë, ku kryeministri Isa Mustafa udhëheqë delegacionin qeveritar e do të jetë i pranishëm edhe kryetari i Kuvendit, Kadri Veseli.

Pritet të marrin pjesë një numër i konsiderueshëm i përfaqësuesve të bizneseve italiane dhe kosovare, të cilët kanë interesim për investime dhe bashkëpunim ekonomik në fusha të ndryshme.
Forumi do të përqendrohet tek sektorët që lidhen me teknologjinë agroindustriale, teknologjinë e industrisë së ushqimit, teknologjinë e industrisë së qumështit, teknologjinë e përpunimit të drurit, tekstilit, veshmbathjeve dhe lëkurës, investimet në energji, ndërtimtari, infrastrukturë si dhe në teknologjinë informative dhe paraqet një mundësi shumë të mirë për tërheqjen e investimeve italiane në Kosovë.
Në këtë Forum, do të jenë të pranishme biznese italiane mbështetëse dhe agjentë të shumtë që përfaqësojnë industri shitëse dhe blerëse, si dhe kompani financiare që mbështesin kreditimin e eksportit të këtyre pajisjeve me kushte të volitshme./b.j/

Kosova, mbështetje nga Banka Botërore

January 27, 2017 by dgreca

-Ministria e Financave e Qeverisë së Kosovës dhe Banka Botërore nënshkruan Marrëveshjen për Sigurimin e Ujit dhe Mbrojtjen e Kanalit. Vlera e përgjithshme e kësaj Marrëveshje është 22 milionë Euro/

PRISHTINË, 27 Janar 2017-Gazeta DIELLI-B.Jashari/ Ministri i Financave Avdullah Hoti dhe drejtori i Bankës Botërore për Kosovë Marco Mantovanelli nënshkruan sot Marrëveshjen për Hua me Bankën Botërore për financimin e Projektit Sigurimi i Ujit dhe Mbrojtja e Kanalit.

Ministri Avdullah Hoti duke e vlerësuar lartë bashkëpunimin e vazhdueshëm me Bankën Botërore theksoi se edhe kjo marrëveshje si shumë bashkëpunime të tjera me Bankën Botërore shërbejnë për përmirësimin e mirëqenies së qytetarëve të Republikës së Kosovës.Sipas ministrit Avdullah Hoti vlera e përgjithshme e kësaj Marrëveshje është 22 milionë Euro me një normë efektive të interesit 1.40%, grejs periudhë 5 vite dhe 20 vite kthim efektiv të kredisë. Projekti në fjalë ndahet në dy pjesë, përkatësisht, në përmirësimin e kanalit kryesor të ujit dhe ndërtimin e një rezervari. “Për përmirësimin e kanalit do të nën-huazohen tek Ibër Lepenci 15 milionë euro kurse pjesa e mbetur e kredisë në vlerë 7 milionë euro do të mbetet me Qeverinë e Kosovës për financimin e ndërtimit të rezervuarit. Përveç përmirësimeve infrastrukturore të kanalit që do të ndodhin duke filluar nga Ujmani deri në Obiliq, do të adaptohet/aplikohet edhe një sistem i avancuar elektronik i cili do t’i mundësoj Ibër-Lepencit të mbikëqyr kanalin, të mbledh dhe analizoj të dhënat nga tereni në kohë reale”, shtoi ministri Hoti.Ai gjithashtu bëri të ditur se, pjesa e dytë e projektit ka të bëjë me ndërtimin e një rezervuari të ujit në Mihaliq dhe lidhjen e tij me kanalin e ujit. Ky rezervuar do të shërbej për situata emergjente të cilat mund të ndodhin në të ardhmen. Ndërsa, drejtori i Bankës Botërore për Kosovë Marco Mantovanelli tha se, “uji është në qendër të zhvillimit ekonomik dhe social, ai është vital për ruajtjen e shëndetit, kultivimin e ushqimit, prodhimin e energjisë, menaxhimin e ambientit përfshirë edhe ndikimet e vërshimeve ose thatësirave, dhe për krijimin e vendeve të punës”.“Aktualisht, Kosova qendrore, rajoni me popullsinë më të dendur në vend i cili paraqet potencialin më të madh zhvillimor të Kosovës për shkak të përqendrimit të aktiviteteve minerare, bujqësore dhe industriale, është duke u sfiduar nga resurset e kufizuara ujore. Banka Botërore ka kënaqësinë të mbështesë Kosovën që ajo të bëj furnizimin e ujit më të pastër dhe më të qëndrueshëm”, shtoi ai.

Kosova do të ketë edhe Ministri të Inovacionit

January 26, 2017 by dgreca

-Oda Amerikane në Kosovë: Inovacioni, ndër faktorët kryesorë të zhvillimit ekonomik/

1 M Inovacioni

-Kosova në një të ardhme afatmesme duhet të ketë edhe Ministrinë e Inovacionit/

2 Inovacioni

PRISHTINË, 26 Janar 2017-Gazeta DIELLI/ Në tryezën e organizuar sot nga Oda Ekonomike Amerikane në Kosovë me temë “Inovacioni dhe Zhvillimi Ekonomik” u diskutua rreth inovacionit dhe ndikimeve të tij në zhvillimin e bizneseve dhe zhvillimin ekonomik të vendit.Në tryezë, ku u prezantua edhe anketa me biznese për inovacionin, ministri kosovar i Zhvillimit Ekonomik, Blerand Stavileci, ka vlerësuar se inovacioni është faktori kryesor i ndryshimeve të ritmit të zhvillimit ekonomik në vend, prandaj të gjitha institucionet duhet të orientohen drejt mobilizimit të kapitalit njerëzor në këtë fushë.
Ai tha se Ministria e Zhvillimit Ekonomik ka përfshirë në axhendë krijimin e një fondi me anë të së cilit do të financohen bizneset e reja dhe ato ekzistuese si dhe bizneset e orientuara në eksport, duke shtuar se Kosova në një të ardhme afatmesme duhet të ketë edhe Ministrinë e Inovacionit.Më tej Stavileci ka prezantuar faktorët e brendshëm që ndikojnë në zhvillimin e teknologjinë informative në Kosovë (TIK), si fushën kryesore në kuadër të inovacionit, respektivisht si promotor i zhvillimit ekonomik.“Pesë faktorët të cilët mund të zhvillojnë TIK-un në Kosovë: E para është se 34 për qind e qytetarëve të Kosovës janë nën moshën 18 vjeçare; pika dytë është adoptueshmëria në teknologji të informacionit; e treta është njohja e gjuhëve të huaj si të domosdoshme ( gjuha angleze dhe gjuha gjermane); pika e katërt është shmangia e shkollimit konvencional dhe orientimi drejt aftësimit të shpejtë profesional që bazohet në kreativitet, dije dhe guxim dhe pika e pestë, por jo më pak e veçantë që shkakton barriera tek ne është liberalizimi i vizave”, ka thënë Stavileci.Nga Oda Amerikane, Era Jashari, zyrtare për marëdhënie me qeverinë tha se inovacioni mbi të gjitha përfshin procese të reja, sisteme të reja të biznesit e metoda të reja të menaxhimit, të cilat kanë një ndikim të rëndësishëm në rritje të produktivitet e rrjedhimisht në zhvillim ekonomik.

Ndërsa Vanesa Gashi nga zyra për komunikime prezantoi të gjeturat e anketës mbi inovacionin, të kryer me anëtarët e Odës Amerikane, ku mes tjerash u vlerësua se ofrimi i lehtësirave dhe diskutimi më i madh politik në promovimin e inovacionit përmes stimujve monetar dhe jomonetar si dhe qasja në kredi për bizneset e reja janë të domosdoshme për të nxitur investimet në inovacion.Arben Ymeraga nga kompania anëtare e Odës Amerikane, Melita & Partners tha se mbështetja institucionale dhe promovimi i inovacionit janë të rëndësishme për rritjen e biznesit, duke theksuar se angazhimi i qeverisë është i domosdoshëm në këtë aspekt.Drenusha Shala themeluese e kompanisë Baruti diskutoi rreth rëndësisë së zhvillimit të inovacionit në Kosovë dhe përvojës së saj si ndërmarrëse. Ajo theksoi se edhepse në Kosovë ka vende të lira të punës, mungesa e njerëzve të kualifikuar profesionalisht paraqet problem kyç në punësim.Ndërsa, Rron Cena njëri ndër themeluesit e kompanisë Formon vlerësoi se baza themelore e zhvillimit të inovacionit në vend është edukimi dhe aftësimi profesional, në mënyrë që këto aftësi të përmbushin kërkesat e tregut./b.j/