Featured – Page 126 – Dielli

NATA E KADRIT NË KOMUNITETIN SHQIPTAR MYSLIMAN NË LONDËR

May 8, 2021 by dgreca

Imam Blerim Ciroka, Imami i Xhamisë Shqiptare në Londër, në një rrëfim ekskluziv dhënë gazetarit Sokol Paja për gazetën “Dielli”, Organ i Federatës Panshqiptare të Amerikës Vatra, shpjegon rëndësinë e Natës së Kadrit në besimin Islam, organizimin fetar dhe atdhetar të shqiptarëve në Londër, muajin e Ramazanit në komunitetin shqiptar në Londër, aktet e bamirësisë së bashkësisë shqiptare myslimane ndaj shqiptarëve në nevojë dhe funksionimin e riteve e ceremonive fetare në kushtet e pandemisë globale.

RËNDËSIA E NATËS SË KADRIT NË BESIMIN ISLAM

Nata e Kadrit është nata e lutjeve, është nata kur Zoti dërgon engjujt, të shumtë në numër, aq sa ka guralecë toka, i dërgon në mbi njerëzi, deri në agim ka vetëm paqe, pranojnë e përcjellin lutjet dhe kërkesat e atyre që besojnë e luten. Pranimi i lutjeve, kjo arritje e madhe, është më shumë e lehtë në këtë natë. Nata e Kadrit është ajo natë e bekuar kur 14 shekuj më parë erdhi Engjulli i Madh, Xhebraili, dhe filloj t`i përcjellë Muhamedit a.s. Librin e fundit hyjnor, Librin që e udhëzon njeriun, Librin që i`a mëson njeriut atë që nuk e di, Librin që është dritë për besimtarët, Librin në të cilin nuk ka pikë dyshimë, Librin që flet e dialogon me njeriun vetëm me fakte, Libri që e fton njeriun të logjikojë e meditojë, Librin argumentat e të cilit janë të patjetërsueshëm, Librin e moralit, Librin e familjes, Librin e shoqërisë, Librin që e dallon të mirën nga e keqja. Libri që ua siguron mirësinë edhe në këtë botë por edhe në të Amshueshmen besimtarëve që e ndjekin me kujdes. Kjo natë e bekuar kur miliarda besimtarë anë e kënd botës, edhe ata që ndoshta e praktikojnë më pak besimin, agjërojnë posaçërisht në ditën e kësaj nate, të gjithë sa jemi njëherazi i ngrejmë duart dhe lutemi, kërkojmë nga Zoti ynë. Kjo natë më e mirë se 1000 muaj, më e gjatë në vlerë se krejt jeta e njeriut, kjo natë kuptimin dhe vlerën e së cilës njeriu ndoshta nuk e kupton plotësisht por më shumë e ndjen. Këtë natë besimtarët ngrejnë duart lart e duke thënë: O Zot, ti je falës, na fal neve.., ata falen. Ndoshta kryefjala e kësaj nate është falja dhe paqja por besimtarët kërkojnë edhe begati, edhe shëndet, edhe harmoni, edhe jetëgjatësi me vepra të mira, besimtarët kërkojnë dhe duhet të kërkojnë edhe prosperitet, zhvillim ekonomik dhe unitet kombëtar. Është pikërisht Kurani i cili ka fillu të shpallet në këtë natë që na mëson të kërkojmë edhe të mirat e kësaj bote por edhe të amshueshmes. Vetë kjo natë na mëson se krahas sasisë cilësia mbetet kusht për çdo gjë. Për një natë, sic është kjo e bekuar, njeriu mund të arrijë shumëçka më bekimet e Zotit. Kjo natë na mëson se ne besimtarët duhet të jemi cilësorë para së gjithash.

MUAJI I RAMAZANIT ME BASHKATDHETARËT SHQIPTARË NË LONDËR

Ramazani si gjithnjë vjen i bekuar, qëndron me ne për 30 ditë dhe largohet krejt lehtë dhe këndshëm. Mëshirë, shëndet, durim, tolerancë, mirësitë e pafudme Hyjnore në sipërfaqe të tokës, njerëz më të mirë, njerëz më të durueshëm, njerëz më dorëdhënës, njerëz që janë të përqendruar për t`u përmirësuar, për të përmirësuar vetveten e tyre para se të diskutojnë çështjet e tjera. Ramazani është muaj i devotshmërisë, e devotshmëria është një arritje e madhe për besimtarët. Agjërimi, si edukues dhe skalitës i drejtpërdrejtë i vlerave njerëzore, agjërimi fizikisht dhe agjërimi shpirtëror, të dyja plotësuese kusht të këtij riti themelor të Islamit, përjetohet bukur me bashkatdhetarët tanë këtu në Londër. Ngrënia e mëngjesit të hershëm, ngrënia e darkës kur perëndon dielli, falja e darkës në Xhami, leximi i Librit të Shenjtë, Kuranit, bisedat e ndryshme fetare, rritja e konsiderueshme e pjesëmarrësve në faljen e ditës së premte shëmbëllen pikërisht mrekullinë që ndodh tek besimtarët gjatë këtyre ditëve. Bashkatdhetarët tanë i kanë shtuar akoma më shumë lëmoshat e tyre, bujarinë e tyre përmes darkave shtruar gjatë këtyre netëve. Ka një unitet dhe frymë vëllazërore në mesin e shqiptarëve këtu. Ramazani dhe mirësitë e tij na sjellin më afër trojet tona ku jemi mësuar ta përjetojmë Ramazanin, me iftare e teravi, me lutje për njëri-tjetrin e me biseda fetare të agjërimit, iftaret familjare janë ndër zbukurimet më të bukura ndoshta të këtyre ditëve. Edhe ata që nuk agjërojnë e ndjejnë këtë muaj, përmes agjërimit dhe durimit të agjëruesve. Bashkatdhetarët kanë kontribuar më shumë për të afërmit dhe nevojtarët e tjerë në vendlindjet tona, altruizëm për t’u admiruar.

RELIGJIONI NË KUSHTET E PANDEMISË GLOBALE

Pandemia si një rast i veçantë në historinë njerëzore ka ndikuar goxha në komunimin tonë me besimtarët. Mbyllja e xhamive, qoftë për faljen pesë kohëve, qoftë për faljen e të premteve, jetët e humbura dhe pasiguria që krijoi ajo domosdoshmërisht bëri që të largohemi fizikisht me besimtarët dhe ndjekësit e Xhamisë. Këto kushtëzime të reja sollën edhe imponimin për forma të tjera të komunikimit, kryesisht rrjetet sociale, ligjeratave online, etj. Në Xhaminë tonë janë mbajtur rregullisht ligjëratat më këshilla të faljes së të premtes dhe të gjitha janë përcjelluar në kanalin youtube, komunikimet përmes facebook-ut të Xhamisë ka qenë po ashtu i rregullt. Në rastet e morteve në këtë periudhë pandemie kur vdekjet fatkeqësisht kanë qenë më të shumta në numër se zakonisht, Xhamia ka qenë 24 në shërbimin e bashkëatdhetarëve tanë duke patur parasysh se Xhamia jonë ofron plotësisht shërbimin funerale të xhenazeve. Takimet postmortore në kryerjen e riteve fetare të të ndjerëve me familjarë të tyre, duke i respektuar të gjitha rregullat e paraqitura nga qeveria e vendit, ka qenë e vazhdueshme.

XHAMIA SHQIPTARE E LONDRËS, ORGANIZIMET DHE PROJEKTET E BAMIRËSISË

Xhamia ka qenë dhe është vazhdimisht aktive në organizimet e projekteve të bamirësisë. Më konkretisht, sipas nevojës janë ndihmuar familjet që kanë humbur të afërmit e tyre, janë krijuar fonde për të ndihmuar bonjakët në trojet tona, Shqipëri, Kosovë e më gjërë, janë ndihmuar vazhdimisht ndërtimi i shtëpive për shtresat në nevojë, janë mbështetur vazhdimisht individë me problem shëndetsorë të cilat nuk kanë mundur t`i përballojnë shpenzimet e mjekimit të tyre. Xhamia ka qenë dhe është gjithmonë e hapur për të ndihmuar rastet e vështira dhe për të bashkëpunuar me donatorët e ndryshëm.

NJË MESAZH PËRSHËNDETJEJE PËR DIASPORËN SHQIPTARE NË USA, DIELLIN DHE VATRËN

Është kënaqësi të të jepet mundësia të komunikosh me të mirënjohurit Diellin dhe Vatrën, më shqiptarët e Amerikës, sidomos përmes gazetës tuaj. Dielli dhe Vatra janë dhe mbeten ndër më të vjetrat qendra mediatike dhe organizative shqiptare nëpër mërgatën shqiptare, janë dhe mbeten paraprirëse shembuj për të gjithë emigrantët shqiptarë nëpër botë. Historikisht i kanë shërbyer shqiptarisë dhe vazhdojnë t`i shërbejnë me mish e me shpirt. Mesazhi im fillon me një lutje dhe një homazh për të gjithë atë idealist të Vatrës dhe të Diellit dhe krejt shqiptarisë, që kanë kaluar në amshim, që e kanë mbajtur të ndezur dhe ruajtur ndjenjën dhe aspiratat kombëtare për shërbim ndaj atdheut. Shprehi mirënjohje për të gjithë ata bashkëkohës të tjerë që e ruajnë me çdo kusht letërnjoftimin tonë kombëtare pavarësisht se jetojmë dhe punojmë në vende të huaja, siç janë kryesisht ruajtja e gjuhës sonë shqipe, ruajta e lidhjeve me vendindlindjet tona, ruajta e lidhjeve me të afërmit tonë që jetojnë në mëmëdhe, ruajtja e lidhjeve me bashkatdhetarët tonë në vendet përkatëse ku ne jetojmë. Përcjellja e identitetit tonë kombatër me shumë dashuri tek brezi i ri e bën kombin akoma më të fuqishëm, akoma më me dinjitet.

DIELLI DHE VATRA SHEMBUJ ATDHEDASHURIE PËR SHQIPTARËT ANËKËND GLOBIT

Dua të them se VATRA dhe shqiptarët e Amerikës, më shërbimet që i kanë ofruar atdheut dhe kombit mbeten shembuj për të gjithë mërgimtarët anëkënd globit. Kur shikon dhe lexon për historitë e Vatrës, kur lexon për personalitet dhe familjet e famshme që i kanë shërbyer Vatrës dhe përmes saj i kanë shërbyer kombit nuk ka se si të mos mbushesh me kanaqësi. Shembulli juaj na inspiron të gjithëve. Lutem në këto ditë të bekuar që kombi ynë të ketë prosperitet, të gjejë qetësinë dhe rehatinë e munguar. Uniteti ynë kombëtar është një xhevahir i madh i qënies tonë, është shumë i çmuar dhe duhet të ruhet pa asnjë kompromis nga të gjithë ne. Ju uroj të gjithë ndjekësve të gazetës tuaj të cilët po agjërojnë në këto ditë, agjërim të lehtë e të pranuar. Duke ditur se pak ditë na ndajnë nga festa e madhe e Bajramit të Fitrit, dua ta mbyllë me dy kolos, patriotë të thekur dhe besimtarë të përkushtuar ndaj Zotit krijues, të famshmin At Gjergj Fishta, kur thotë vërtetë ne kemi Bajram e Pashkë por Shqiptarinë e kemi bashkë, dhe tjetër kolosi ynë Hafiz Ali Korça: “Si ay ta duam iman’ e vatanë, për udhë rrefenjës mjaft kemi Kur’anë. Po mbajtmë Kur’anë, mbajtmë lumtërinë, Me të munt ta mbajme din’ e kombësinë.

GJERGJ KASTRIOTI-SKENDERBEU IDENTITI HISTORIK SHQIPTAR

May 7, 2021 by dgreca

Shkruan: Prof. asoc. Bedri Muhadri – INSTITUTI I HISTORISË “ALI HADRI” PRISHTINË/

Viti 1405 datë 6 maj shënon ditëlindjen e Gjergj Kastriotit-Skënderbeut, kryevlerës së historisë sonë shqiptare. Në nderim të veprës së Skënderbeut ne sot me respektin tonë evukojmë Skënderbeun, personalitet Ky që është emblemë e identitetit historik shqiptar.

Viti 1443 shënon kthesën e madhe historike për shqiptarët, vit i kthimit të Skënderbeut në trojet Arbërore. Ky kthim historik ndodhi në Betejën e Nishin, me 3 nëntor 1443, ku u ndeshën ushtritë e Sulltan Muratit II dhe ato hungarezë të udhëhequra nga Janosh Huniadi. Dhe Skënderbeu që sipas shkruesit më të mirë të Historisë shqiptare Marin Baleti, Skënderbeu i përgatitur që me kohë më 300 kalorësit e tij, shfrytëzoi rasti dhe iku nga kapmi osman për të marrë rrugëtimin e tij për në trojet e të parëve të tij,. Në rrugëtimin e kthimit nga Qyteti i Nishit, Skënderbeu kaloni në qytetin e Prizrenit, dhe qëndroi për një kohë për të riorganizuar mbrojtjen e vendit. Nga tregimet folklorike të kësaj kohe të mbledhura nga Qamil Haxhihasani thuhet: “Skënderbeu kishte mbledhur gurë në lumin e Drinit të Bardhë dhe kishte meremetuar kalanë e Prizrenit. Prej qytetit të Prizrenit Skënderbeu u drejtua për në Tetove dhe Dibër.

Më 1443 kur ai u vu në krye të kryengritjes së përgjithshme çlirimtare të popullit shqiptar, osmanët pasi kishin pushtuar Gadishullin Ballkanik, po i turreshin Hungarisë për të hapur rrugën drejt Evropës Qendrore dhe Shqipërisë për të kaluar në Gadishullin Italik. Skënderbeu arriti t’i bindte krerët feudalë, të demoralizuar nga dështimet e mëparshme që t’i linin mënjanë mosmarrëveshjet midis tyre dhe të bashkoheshin në një front të vetëm luftarak kundër armikut të huaj. Ai formoi më 2 mars 1444, Besëlidhjen Shqiptare të Lezhës. Në kuvend morën pjesë bujarët më të shquar shqiptarë. Gjergj Arianiti, Andre Sopia, Nikollë e Pal Dukagjini, Gjergj Stres Balsha, Pjetër Spani, etj. Ajo që tërheq vëmendjen më tepër është se, në Kuvend u vendos që bashkimi i forcave shqiptare të kryhej, duke formuar një lidhje midis sundimtarëve shqiptarë. Ajo do të kishte karakterin e një konfederate apo të një aleance politike shqiptare. Kryetar i saj u zgjodh promotor i Kuvendit të Lezhës, Gjergj Kastrioti – Skënderbeu. Një tjetër vendim shumë i rëndësishëm, që u mor në kuvend, ishte formimi i një ushtrie të përbashkët, që do të ishte në gatishmëri për të marrë pjesë në luftë e në rast nevoje do të ndihmonte sundimtarët shqiptarë për mbrojtjen e zotërimeve të tyre. Kapiten i përgjithshëm (Capitaneus generalis) i ushtrisë u zgjodh Gjergj Kastrioti – Skënderbeu. Për të përballuar shpenzimet e nevojave ushtarake dhe të luftës u vendos të krijohej një arkë e përbashkët. Fondet e saj do të formoheshin, ndër të tjera, nga kontributi në të holla që do të jepnin sundimtarët arbëror sipas kuotës që u caktua për secilin.

Skënderbeu si kryekomandant i Lidhjes Shqiptare, ia arriti që për një kohë të shkurtër të krijojë një ushtri të rregullt.

Realiteti historik u bë gur më i mirë i provës për këtë bashkim që nuk ishte një lidhje e thjeshtë e sunduesve të vendit, por kishte baza të thella. Sikurse na njofton Marin Barleti, bashkëkohës i Skënderbeut dhe shkruesi i veprës monumentale “Hisotira e jetes dhe veprës së Skënderbeut Princit Epirot” (“Historiae de viva et rebus gestis Scanderbegi…epirota principis”), Skënderbeu sapo shpalosi në kalanë e Krujës flamurin e kuq me shkabën e zezë dykrenore. Kryeheroi i historisë sonë shkoi prej një vendi në vend tjetër për ta ftuar popullatën në luftën çlirimtare kundër sundimit të huaj. Skënderbeu si kryekomandant i Lidhjes Shqiptare, ia arriti që për një kohë të shkurtër të krijojë një ushtri të rregullt, por edhe ta mobilizojë popullin për luftë.

Lufta çlirimtare e popullit shqiptar nën udhëheqjen e Gjergj Kastriotit – Skënderbeut shënon faqe të ndritshme në historinë mesjetare shqiptare. Ajo ishte luftë e përgjithshme e vendit e cila nuk linte pa përfshirë as gratë, as fëmijët, e jo vetëm si viktima, por në radhë të parë si bashkëluftëtarë. Ajo kishte bashkuar mbarë popullin e vet (katolik, ortodoks, mysliman, aristokrat, fshatarë e feudal) në luftë për liri dhe mbrojtje të vendit. Lufta çlirimtare shqiptare në kohën e Skënderbeut me sukses u bëri ballë mese njëzet ekspeditave osmane të ndërmarra sistematikisht kundër vendit, dhe duke u shkaktuar humbje të mëdha atyre. Rezistenca shqiptare e kohës së Skënderbeut, me turp të madh i detyroj para mureve të Krujës që të largohen dy sulltanët e mëdhenj të Perandorisë Osmane: Sulltan Muratin II me 1450 dhe Sulltan Mehmetin II me 1466-1467.

Fitoret e njëpasnjëshme të Rezistencës Shqiptare provuan se Skënderbeu ishte një strateg i shkëlqyeshëm me aftësi të rralla për tu gjetur kurdoherë sipas rastit. Ai diti të siguronte fitoren duke u tërhequr si në Tervioll me 1444, ose duke sulmuar si në Albulenë me 1457 duke luftuar kundër kalorësve të lehtë turq, ose kalorësisë së rëndë italiane me 1462, duke i hapur beteja ushtrisë armike në fushë si në Oranik e Polog me 1462, ose në shtigjet malore si në grykën e Vajkalit me 1465. Nga vargu i gjatë i fitoreve duhet veçuar, sidomos atë në Ujëbardhë (1457), të cilën e kishte vlerësuar lartë John Neëport, kalorës anglez, pjesëmarrës vullnetar i betejës. Gjatë qëndrimit të tij në Romë (1458), ai kishte deklaruar: “Po të bjerë kështjella arbërore, pushtimi i Evropës nga osmanët është i sigurt, pasi nuk ka fuqi tjetër që ta bëjë këtë rezistencë”.

Pas fitores madhështore që u arritën nën muret e Krujës, me 1450, Skënderbeu filloi të mos i përfillte ku e donte interesi i luftës, autonomin e feudalëve separatist. Ai, filloi të merrte masa të rrepta kundër feudalëve të lëkundshëm, të hiqte nga postet që zinin oficerët e pa aftë dhe t’i zëvendësonte me oficer të rijnë, të aftë dhe besnik. Për më tepër ai filloi t’i zhveshtë nga koha në kohë bujarët e dyshimtë dhe nga zotërimet feudale të cilat ua shpërndau ushtarëve të dalluar. Lufta e suksesshme nën udhëheqjen e Skënderbeut ndikoi pozitivisht për integrimin në një shtet të përbashkët të fisnikëve shqiptarë.

Kryetari i Shtetit, Gjergj Kastrioti-Skënderbeu, qëndronte në krye të piramidës shtetërore me të drejtat e një monarku feudal.

Heroi shqiptar përdori mjete të ndryshme për afrimin e bashkimin sa më të ngushtë e të qëndrueshëm të feudalëve të fuqishëm shqiptarë e rrjedhimisht të të gjithë vendit. Kësisoj vetë Skënderbeu u martua me Donikën, vajzën e Gjergj Arianitit i cili ishte ndër princërit me të fuqishëm arbëror.

Shteti shqiptar i kohës së Skënderbeut formohet në vitet 1450, në kohën kur Perandoria Osmane pas pushtimit të Kostandinopojës me 1453) gjendej para aktit të vendosjes së superioritetit aziatik mbi atë evropian, pikërisht në kohën kur shtetet e krishterë të Ballkanit binin me radhë nën sundimin e Perandorisë osmane, prandaj ekzistenca e saj në atë kohë përveç rëndësisë historike që për një çerek shekulli populli shqiptar i bashkuar politikisht e ushtarakisht në shkallë kombëtare frymoi lirinë shpirtërore në betejat e përgjakshme. Ajo e kishte edhe rëndësinë ndërkombëtare sepse 25-vjet do ta mbajë të ngujuar Perandorinë Osmane përpara rezistencës shqiptare, rëndësinë e së cilës do ta ndjejë shumë qytetërimi evropian.

Skënderbeu ishte arkitekti dhe qeveritari i shtetit (dominus Albania) shqiptar mesjetar. Titulli zyrtar i tij ishte Zot i Arbërisë (Dominus Albaniae). Në vitin 1464 Skënderbeu ishte paraparë të kurorëzohej mbret prej Papa Piut II, një e drejtë ekskluzive kjo nga ana e Selisë së Shenjtë. Ceremonia për marrjen e skeptrit mbretëror nga Skënderbeu ishte parashikuar të organizohej me rastin e ardhjes në Shqipëri të vetë Papa Piut II në krye të një ushtrie evropiane, si kryekomandant i së cilës do të ishte Skënderbeu. Por, vdekja e Papa Piut II me 14 gusht 1464 në Ancona të Iltalisë, u pamundësua që Skënderbeu të mos merr titullin Mbret. Në ndërkohë rrjedha e ngjarjeve e stërmbushur me luftëra të suksesshëm të Perandorisë Osmane e shtynë në pafundësi interesimin e Vatikanit për ta kurorëzuar Skënderbeun Mbret, qëndrim ky aspak i drejt karshi sukseseve të vazhdueshme të Skënderbeut në luftë kundër Osmanëve.

Forma e sistemit politik ishte monarki feudale. Organi më i lartë i pushtetit shtetëror ishte monarku – Skënderbeu. Pushteti Skënderbeut si kryezot ishte i gjerë, ai shpallte luftë bënte paq, lidhje marrëveshje me shtetet tjera. Skënderbeu kishte një aparat të veçantë të përbërë nga kancelarët dhe nga ambasadorët apo të ngarkuarit (oratorët) kancelar të cilët përpilonin në gjuhë të huaj shkresa të ndryshme, si traktate që u nënshkruan me vendet e tjera. Ambasadorët dhe oratorët e Skënderbeut ishin klerikë e laikë të kulturuar, që njihnin me themel gjuhët e huaja, si latinisht, osmanisht, sllavishten, greqisht, etj. Sipas praktikës mesjetare pushteti i Skënderbeut ishte i trashëgueshëm.

Shteti shqiptar, i bashkuar nën drejtimin e Skënderbeut, kishte simbolet e veta, që mbështeteshin në traditën e vendase dhe shprehnin sovranitetin e tij. Simboli më përfaqësuese për shtetin shqiptar të Skënderbeut është Flamuri me shqiponjën dykrenore me krahë të ulur dhe yllin me gjashtë ose tetë cepa. Syshqiponja e zezë dykrenore, siç e ka treguar M. Barleti, ka qenë e vendosur në qendër të flamurit të Skënderbeut që fushën e kishte të kuqe. Skënderbeu krenohej me historinë e lavdishme të paraardhësve. Skënderbeu përdori edhe simbolet shtetërore të Pirros së Epirit (Shqiponjën dhe përkrenarën e zbukuruar me një kohë dhie), të Aleksandërit të Madh të Maqedonisë (shenjën e Diellit), si dhe simbole pellazgjike. Vula e madhe e Skënderbeut kishte karakter shtetëror. Përmbajtja e saj në mes të tjerash ka shënuar inicialet ose siglat e fjalëve “D (Dominus dhe AL albaniae) apo Zot i Arbërisë.

Cilat territore përfshinte shteti: Skënderbeut?

Kufijt e mundshëm të Shtetit Mesjetar të Skënderbeut, në kulmin e lulëzimit të vet, shtriheshin në Perëndim, me brigjet shqiptare të Adriatikut, që nga Velipoja deri në Seman, me përjashtim të qyteteve të Lezhës dhe të Durrësit, në Lindja ato arrinin përtej Drinit të Zi, deri në malet e Korabit, të Kërçinit e të Strogovës, së bashku me grykën e Radikës, në Veri ato kufizoheshin me zotërimet e Dukagjinëve, deri të Mati, e në jug deri në afërsi të qytetit të Beratit. Kryeqytet i shtetit të bashkuar u bë Kruja.

Lufta e popullit shqiptar në gjysmën e dytë të shekullit XV bëri që shteti shqiptar i Skënderbeut të ketë marrëdhënie politike me shumë shtete evropiane. Marrëdhëniet politike të shtetit shqiptar të Skënderbeut me kompleksivitetin e tyre shënojnë ngjarjet nga më të rëndësishmet të periudhës 25-vjeçare të shtetit të lirë e të pavarur shqiptar. Në tërësi marrëdhëniet politike ndërkombëtare të Evropës Mesjetare ishin të drejtuara kundër ndërhyrjes osmane në Evropë, në kornizat e së cilës politika shqiptare e udhëhequr nga Kryeheroi Skënderbeu, jo vetëm që ishte përbërësja kryesore e saj, pro do të jetë ajo e cila më së shumti efektivisht veproi kundër invazionit osman. Mirëpo, Evropa mesjetare e përçarë, e veçmas në Gadishullin Italik, mbizotëronte anarkia feudale, bëheshin lufta të mëdha dinastike, mbretëronte injoranca dhe abuzimet, të gjitha këto bënë që të mos vijnë në shprehje aq sa kërkohej përkrahja e luftës shqiptare kundër invazionit osman. Madje, ndonjë shtet si Republika e Venedikut, bëri çmos për ta minuar luftën e denjë të popullit arbëror dhe dobësimin e shtetit të Skënderbeut. Shtetet feudale të Evropës, në përgjithësi, përpiqeshin të përfitonin nga sakrificat e panumërta të shtetit shqiptar me qëllim të mbajtjes së rrezikut osman sa më larg vendit të vet. Përçarja e shteteve mesjetare e lehtësoi përparimin e shpejtë të osmanëve në Ballkan dhe pengoi krijimin e një koalicioni që t’i priste rrugën agresionit osman me forcat e përbashkëta. Në këto rrethana, kryeheroi i historisë sonë ishte i detyruar të mbështetej krejtësisht në forcat e brendshme të vendit.

Megjithatë, gjatë periudhës 25-vjeçare të ekzistencës së shtetit të pavarur shqiptar, kryetrimi ynë luftoi për të siguruar ndihmën e nevojshme dhe bashkëpunimin ndërkombëtar kundër Perandorisë Osmane. Për këtë qëllim ai hyri në marrëdhënie diplomatike me disa shtete të fuqishme të Evropës së atëhershme. Marrëdhënie të shpeshta shteti i Skënderbeut pati sidomos me shtetet italiane si; Republikën e Venedikut, Napolin, Milanon, Papatin, pastaj me Hungarinë, Republikën e Raguzës, dukatin e Burgonjës, etj. Në ndonjë rast, për problemet e luftës, Skënderbeu ka zhvilluar bisedime edhe me vetë Perandorinë Osmane. Në tërësi politike e jashtme që ndoqi Heroi i ynë i’u nënshtrua plotësisht, me konsekuencën më të lartë, qoftë edhe duke marrë sakrifica të ndjeshme mbi vete, interesave të luftës çlirimtare kundër pushtuesve të huaj.

Skënderbeu si burrështetas dhe luftëtar ka marrë vlerësime të shumta që e lartësojnë veprimtarin e tij. Papa Kalisti III shkruante: “Ska njeri në botë që të mos e dijë trimërinë që keni bërë dhe mos të ju lëvdojë gjerë në qiell si një mbrojtës të vërtet dhe krye luftëtarë bujarë të krishterimit”. Napoleon Bonaparta gjenerali i shquar francezi i shek XIX thoshte: “Skënderbeu ishte njëri ndër katër gjeneralët më të mëdhenj të të gjitha kohërave”. Iluministi i shquar francez Volteri duke komentuar rëndësinë e fushatave të Skënderbeut për Evropën, ai shkruan: “Kjo është mjaft që historia evropiane ti jep Skënderbeut një vend të nderuar midis mbrojtësve më të mëdhenj të saj, kundër barbarisë aziatike, si ai, mund të kishte bërë më shumë po ta kishin ndihmuar fuqitë Evropiane si duhet”.

Dhoma e Përfaqësuesve e Kongresit Amerikan në vitin 2005, me rastin e 600 vjetorit të Lindjes së Skënderbeut kishte nxjerr Rezolutë: “e cila lavdëron shqiptarët kudo për nderim që i bëjnë prijësit të tyre trim, heroit dhe birit të tyre, Gjergj Kastriotit Skënderbeut dhe kërkon nga qeveria Amerikane që të punojnë me partnerët e vet evropianë për shpejtimin e integrimit të Shqipërisë dhe të një Kosove të lirë në Bashkimin Evropian, në njohje të kontributit dhe sakrificës që dha Gjergj Kastrioti Skënderbeu dhe populli shqiptar në shpëtimin e Evropës Perëndimore nga dominim ottoman’.

Një ndër studiuesit e shkëlqyeshëm të tij është historiani i madh italian Zef Valentini i cili shkruan: “Kush mund të mendojë se do të ishte jo vetëm mëkat, por çështje e pamundshme për të zvogëluar personalitetin e shkëlqyeshëm të Skënderbeut në nivel të një heroi vendas mendjeshkurtër. Skënderbeu e ka gjithë Evropa, e ka bota të vetin, e nëpër të e vetëm nëpër shpirt të tij ia njeh vlerën e meritat e hershme edhe të Shqipërisë”. Studiuesi me i shquar shqiptar për Skënderbeun, Kristo Frasheri personalitetin e Skënderbeut e quan Krye vlerë e historisë sonë kombëtare.

Që këtej për merita ndaj jetës dhe veprës, në shumë qendra të Evropës gjatë shekujve të mëvonshëm u ngritën shumë përmendore e sheshe kushtuar Kreshnikut shqiptar, u shkrua një numër shumë i madh i veprave për kryetrimin tonë. Ngritja e përmendoreve të Skënderbeut në qendra të Evropës, u tregon miqve tanë për qenien tonë si komb dhe fisnikërinë e vlerave tona evropiane.

Këto vepra janë një mrekulli që provon ekzistimin tonë etnik dhe përjetëson shqiptarizmin, të cilin as vargu më dërmues i ekstremeve historike nuk arriti ta mposht, meqë ne, si një ndër popujt më të lashtë të Evropës, ndiejmë në vete hove të gjalla vitaliteti që befasojnë edhe armiqtë tanë më të ashpër. Sot emri i Skënderbeut nuk duhet të konsiderohet vetëm ngadhënjyes i betejave të mëdha, apo vetë luftëtarë i shquar që luftoi pandërprerë për lirinë e vendit, por, duhet të ngjallë në shpirt lakminë për një Shqipëri dhe Kosovë Euroatlantike, dhe për vetë administrim dhe qeverisje ekzekutive dhe politike te pavarur në hapësirat shqiptare në Maqedoni dhe Serbi, e Mal të Zi. Këta shkrim si prolog për shënimin e 550-vjetorit të vdekjes së Skënderbeut po e përmbyllim me konstatim se Figura më madhështore shqiptare dhe e Evropës në vitet 1444-1468, ishte Gjergj Kastrioti-Skënderbeu. Ai ishte gjeni i artit ushtarak, ai ishte largpamës i madh në çështjet politike, ai ishte organizator dhe aleat i shkëlqyeshëm, ai ishte dhe mbeti ylli më i ndriçues në popullin e vet dhe në historinë njëzet e pesë vjeçare të Evropës she shekullit XV.

Duhet thënë se bota shqiptare ka ditur ta çmoj këtë personalitet, me faktin se portreti i Gjergj Kastriotit – Skënderbeut është simbol nacional që personifikon unifikimin e etnisë shqiptare, por, duke u nisur nga përvoja e aspekteve që dalin nga Epoka e lavdishme e heroit tonë kombëtar, shtrohet domosdoshëm uniteti strategjik kombëtar. Arbëreshët e Italisë në një këngë të vetën thonë që: “Skënderbeu gëzohet dhe zbret nga qielli kur janë bashkë gjithë arbëreshët”, pra gjithë shqiptarët, E ne besojmë dhe shpresojmë se një ditë ai i madhi Skënderbeu dhe shqiptarët të jenë të bashkuar pra të gëzuar.

Përkujtohet Akademik Fehmi Agani, i vrarë para 22 vjetëve

May 6, 2021 by dgreca

-Në Kosovë përkujtohet Akademik Fehmi Agani, i vrarë nga forcat serbe 22 vjet më parë/

-Presidenti historik i Kosovës, Dr. Ibrahim Rugova, me një dekret të veçantë ka dekoruar bashkëpunëtorin më të afërt Akademik Fehmi Aganin me Urdhrin Hero i Kosovës, për Vepra Trimërie për Lirinë dhe Pavarësinë e Kosovës/

-Serbia – agresioni dhe agresori nuk duhet shpërblyer, theksonte para 27 viteve Akademik Fehmi Agani në deklaratën në gazetën e rezistencës, të lëvizjes e luftës për liri e pavarësi, “Bujku” në 26 Shtator 1994, ku është botuar edhe intervista e parë ekskluzive, që kam zhvilluar për Agjencinë Shtetërore-Zyrtare të Lajmeve të Shqipërisë me Presidentin historik të Kosovës Dr. Ibrahim Rugova, me titull “Politikë globale që sa më parë të bjerë muri mes shqiptarëve”/

-Sot, Presidentja e Kosovës Vjosa Osmani dhe Kryeministri Albin Kurti, së bashku, bënë homazhe te varri i Heroit Fehmi Agani, në lagjen Arbëria në Prishtinë. Edhe kryetari i Lidhjes Demokratike të Kosovës, Lumir Abdixhiku me bashkëpunëtorë ka bërë homazhe/

-Pikërisht para 22 viteve në 6 Maj 1999 kam raporuar edhe këtë lajm: Shqiptarët në Prishtinë – mburojë e gjallë/

Gazeta DIELLI nga korrespondenti në Kosovë Behlul Jashari

PRISHTINË, 6 Maj 2021/ Në Kosovë sot nderohet e përkujtohet Akademik Fehmi Agani, i vrarë 22 vjet më parë, në 6 Maj 1999, nga forcat serbe derisa po udhëtonte drejt Maqedonisë mes shqiptarëve të dëbuar nga vatrat e veta.

Presidenti historik i Kosovës, Dr. Ibrahim Rugova, me një dekret të veçantë ka dekoruar bashkëpunëtorin më të afërt Akademik Fehmi Aganin me Urdhrin Hero i Kosovës, për Vepra Trimërie për Lirinë dhe Pavarësinë e Kosovës.

Duke e shpallur këtë vendim në 6 Maj 2004, Presidenti Rugova theksonte se, “së bashku me Profesor Aganin i vendosëm themelet e shtetit të pavarur të Kosovës dhe funksionimin e tij”.

Serbia – agresioni dhe agresori nuk duhet shpërblyer, theksonte para 27 viteve akademik Fehmi Agani në deklaratën botuar në gazetën e rezistencës, të lëvizjes e luftës për liri e pavarësi, “Bujku”, në 26 Shtator 1994, ku është botuar edhe intervista e parë ekskluzive, që kam zhvilluar për Agjencinë Shtetërore-zyrtare të lajmeve të Shqipërisë me Presidentin historik të Kosovës Dr. Ibrahim Rugova, me titull “Politikë globale që sa më parë të bjerë muri mes shqiptarëve”.

“Agresori nuk duhet shpërblyer” është titulli në faqen e parë të gazetës, ku shkruaja se,

i pyetur lidhur me qëndrimin rreth vendimit të Këshillit të Sugurimit për zbutjen e sanksioneve ndaj Serbisë e Malit të Zi, nënkryetari i LDK-së dr. Fehmi Agani deklaronte:

Edhe pse përkrahim të gjitha përpjekjet për arritjen sa më të shpejtë të një marrëveshje për Bosnjën në bazë të propozimit të Grupit të Kontaktit, megjithatë lajmi për zbutjen e sanksioneve ndaj Serbisë, edhe pse është fjala për një zbutje të përkohshme e të kufizuar, në Kosovë nuk është për t’iu gëzuar.

Pikërisht, në kohën kur Serbia po pret zbutjen e sanksioneve ndaj saj, në Kosovë me brutalitet po zbaton sanksionet që ajo u imponoi Kosovës dhe shqiptarëve.

Megjithatë, shpresojmë se, siç është deklaruar shpesh nga instanca të ndryshme ndërkombëtare, sanksionet kryesore ekonomiko-financiare dhe bojkotimi ndërkombëtar i Serbisë nuk do të mund të suspendohen pa zgjidhjen e problemit të mdh të Kosovës, si dhe problemit të Krainës dhe problemeve tjera të ish-Jugosllavisë. Përndryshe, do të ishte kjo një shpërblim i agresionit dhe i agresorit, përfundonte dr. Fahmi Agani.

Sot, Presidentja e Kosovës Vjosa Osmani dhe Kryeministri Albin Kurti, së bashku, bënë homazhe te varri i Heroit Fehmi Agani, në lagjen Arbëria në Prishtinë.

Edhe kryetari i Lidhjes Demokratike të Kosovës, Lumir Abdixhiku me bashkëpunëtorë ka bërë homazhe te varri i Akademik Fehmi Aganit, në 22 vjetorin e vrasjes së tij.

AGANI-16 SHKURT 1996: NË GJYKATËN E HAGËS, DOSJET E KRIMEVE SERBE MBI SHQIPTARËT

Në një nga konferencat për shtyp në Prishtinë, në 16 Shkurt 1996, ku ishte edhe korrespondenti në Kosovë tash i Gazetës DIELLI, duke u përgjegjur në një pyetje rreth asaj se çka është ndërmarrë në Kosovë për dërgimin në Gjyqin e Hagës të të dhënave për autorët e krimeve mbi
shqiptarët në Kosovë, dr. Fahmi Agani, nënkryetar i LDK-së, tha se Këshilli për Mbrojtjen e të Drejtave e Lirive të Njeriut dhe Qeveria e Kosovës i kanë
drejtuar këtij gjyqi dosjet e krimeve serbe mbi shqiptarët. “Shpresoj se ky
gjyq do të punojë drejt dhe do të vijë në radhë edhe dosja e Kosovës”, tha
Agani.6 MAJ 2004:AKADEMI PËRKUJTIMORE NË KUJTIM TË 5 VJETORIT TË VRASJES SË AKADEMIK PROF. DR. FEHMI AGANI

FJALIMI I PRESIDENTIT RUGOVA

6 maj 2004,

Prishtinë, KOSOVË

E nderuara Familje Agani,

E nderuara Zonja Agani,

I nderuari Kryetar Daci,

Të nderuar akademikë,

Të nderuar deputetë, ministra e kryetarë të komunave,

Të nderuar pjesëmarrës,

Zonja dhe Zotërinj,Jemi tubuar sot këtu, në Teatrin Kombëtar të Kosovës, në këtë Akademi Përkujtimore në kujtim të 5 – vjetorit të vrasjes së Akademik Prof. Dr. Fehmi Agani, Nënkryetarit shumëvjeçar të LDK-së dhe deputetit të Kuvendit të Republikës së Kosovës.

Gjendemi sot së bashku në kujtim të përjetshëm të Profesorit tonë të madh, të Profesorit tim dhe të mikut tim të çmueshëm e bashkëpunëtorit, bashkëmendimtarit dhe bashkëvepruesit tim e tonë shumëvjeçar, Profesor Aganit. Ju lutem t’i them disa fjalë në këtë përvjetor përkujtimi.

Zonja dhe Zotërinj,

Profesori ynë Agani, me këtë titull që u bë emër i Tij për të gjithë ne në jetën tonë publike e private, gjithë jetën dhe veprën ia kushtoi vendit tonë Kosovës dhe popullit shqiptar. Për decenie të tëra Profesor Agani ishte i njohur për veprën e Tij arsimore universitare, shkencore e filozofike. Ishte i dashur dhe i çmuar nga të gjithë.

Me themelimin e LDK-së, që ishte njëri ndër themeluesit e saj, Ai dhe të gjithë ne hyri në jetën aktive politike e shtetërore për të mbrojtur vlerat dhe ekzistencën e kombit të Kosovës dhe të popullit shqiptar. Ai mori pjesë aktive në aktet madhore të vendit tonë siç janë: Deklarata e Pavarësisë, Kushtetuta e Republikës së Kosovës, Referendumi për Pavarësi dhe në ndërtimin e institucioneve të Kosovës në bazë të zgjedhjeve presidenciale e parlamentare të Republikës së Kosovës të vitit 1992. Së bashku me Profesor Aganin i vendosëm themelet e shtetit të pavarur të Kosovës dhe funksionimin e tij, që sot në botë njihet si “shtet i shqiptarëve të Kosovës” apo si “shtet paralel”, si kontribut yni në historinë e lëvizjeve të botës për pavarësi.

Zonja dhe Zotërinj,

Profesor Agani për një decenie të tërë ishte njeriu më aktiv në lëvizjen tonë për liri, pavarësi e demokraci. Ai ishte gjithmonë në vijën e parë të veprimit në planin publicistik, diplomatik dhe të veprimit në terren. Ishte ndër profesorët e rrallë që kishte pranuar të punonte me studentët e tij dhe me të gjithë njerëzit për të mirën e vendit të vet. Ishte i palodhshëm dhe gjithmonë i gatshëm për të gjetur zgjidhje për çdo problem të veprimit shtetëror e politik si dhe për çdo çështje të veprimit të përditshëm duke ndërtuar dhe mbrojtur lirinë dhe pavarësinë, objektivin tonë madhor. Me këto cilësi Profesor Agani jepte kontribut të madh në formimin e kulturës politike, shtetërore e njerëzore të vendit tonë.

Zonja dhe Zotërinj,

Cilësi tjetër e madhe e Profesor Aganit ishte modestia e Tij njerëzore e morale dhe modestia e Tij e veprimit. Me këtë cilësi që e kanë vetëm njerëzit e mëdhenj, fitonte përkrahjen e miqve tanë dhe respektin për të si burrështeti dhe për Kosovën. Po ashtu me modestinë e Tij në veprimin politik fitonte përkrahjen e qytetarëve dhe të njerëzve për veprim të përbashkët.

Zonja dhe Zotërinj,

Ne edhe sot pas pesë vjetësh në liri, kemi dhembje për Profesor Aganin që nuk është më në mesin tonë që ra nga dora e armikut, por krenarinë e kemi më të madhe, sepse e kemi veprën dhe jetën e Tij të ndritur.

Në këtë përvjetor mund të themi se për ne është një përkujtim krenar i madh për Profesorin tonë të madh, që përmban dhembjen për humbjen e Tij fizike dhe është krenari e madhe për veprën e Tij që është fitorja e Tij. Për këtë jetojnë njerëzit. Për këtë jetoi dhe veproi Profesori ynë i madh. Profesor Agani me veprën e Tij është i pranishëm në jetën e të gjithë neve. Në familjen time është i pranishëm dhe në momente të mira e të vështira gjejmë mbështetje në jetën dhe veprën e Tij, si mik i shtëpisë. Këtë na e dhurojnë njerëzit e mëdhenj.

Zonja dhe Zotërinj,

Këto ditë isha për vizitë në SHBA. Mund t’Ju them se, si gjithmonë ishte një pritje madhështore nga miqtë tanë amerikanë dhe komuniteti shqiptar. Ishte i fortë kujtimi i mirë për Profesor Aganin. Mund t’Ju them se tash pesë vite të lirisë së vendit tonë, në SHBA po forcohet mendimi për njohjen formale të pavarësisë së Kosovës sa më shpejt. Pra, një Kosovë e pavarur, demokratike e integruar në BE, në NATO dhe në miqësi permanente me SHBA. Ky ishte testamenti i Profesor Aganit, testamenti ynë, që jam i bindur me përkrahjen e miqve tanë do ta arrijmë së shpejti.

Zonja dhe Zotërinj,

Ky është një lajm i mirë në këtë përvjetor të përkujtimit të Profesorit tonë të dashur, Profesor Aganit dhe lajm i mirë për të gjithë ne.

Zoti e bekoftë Profesor Aganin.

Zoti e bekoftë Familjen Agani.

Zoti e bekoftë Kosovën tonë të shtrenjtë.

Ju falemnderit.

Dr. Ibrahim Rugova

President i Kosovës
PIKËRISHT PARA 22 VITEVE – NË 6 MAJ 1999 PËR AGJENCINË SHTETËRORE-ZYRTARE TË LAJMEVE TË SHQIPËRISË KAM RAPORUAR EDHE KËTË LAJM:

https://groups.google.com/forum/#!msg/bit.listserv.albanian/mK-Kh_Wxs58/vqhG95O-gfIJ

Shqiptaret ne Prishtine – mburoje e gjalle

KUFIRI JUGOR I KOSOVES, 6 maj- Korresp. i ATSH-se, Behlul
Jashari, njofton: Shume banore te Prishtines po mbahen peng dhe
po perdoren nga serbet si mburoje e gjalle. Ata jane detyruar te
qendrojne ne shtepite dhe banesat prane vendeve ku jane fshehur
arme dhe mjete te mekanizuara ushtarake si dhe neper objekte qe
mund te bombardohen nga NATO-ja, bejne te ditur burime te ATSH-se
ne Kosove.
Shume familje jane detyruar te qendrojne per disa dite me
radhe prane postes se re te Prishtines, ne lagjen Dardania, thone
deshmitare okulare qe kaluan dje kufirin Kosove-Maqedoni.
Shumica e te ardhurve jane femije dhe gra, ndersa burrat
jane marre nga forcat serbe. Gra nga rajoni i Llapit tregojne per
me se 200 te rinj e burra shqiptare qe i kane ndare nga familjet
dhe i kane marre ne rrugen midis Obiliqit dhe Prishtines. Te
deportuar nga fshati Hade i Obiliqit, tregojne per ekzekutimin e
13 shqiptareve. Mijrat e te debuarve gjate 24 oreve te fundit
jane krejtesisht nga rajonet e Llapit, Prishtines, fshatrat e
Ferizajt dhe te Lipjanit.
/pas/

OLSIAN NORECI- STUDENTI SHQIPTAR NË LETËRKËMBIM ME PRESIDENTIN AMERIKAN JOE BIDEN

May 6, 2021 by dgreca

NJË SHQIPTAR NË LETËRKËMBIM ME PRESIDENTIN AMERIKAN JOE BIDEN/

Olsian Noreci, studenti shqiptar në “Criminal Justice” pranë “Mercy College” në New York, rrëfen ekskluzivisht për gazetën Dielli, Organ i Federatës Panshqiptare të Amerikës Vatra, New York, letërkëmbimin me Presidentin e Shteteve të Bashkuara të Amerikës Joe Biden. Një letër mirënjohjeje të veçantë, falenderimi të përzëmërt, urimi të sinqertë dhe kërkesë për të ndihmuar Shqipërinë me vaksina në luftën ndaj pandmeisë globale dhe reformën në drejtësi. Në intervistën për “Dielli”-n e Vatrës dhënë gazetarit Sokol Paja, studenti shqiptar që impresionoi Presidentin Biden ndalet gjatë te roli dhe ndihma e SHBA në Shqipëri, te problemet që ka Shqipëria, rolin e diasporës në interesin kombëtar dhe thirrja për rininë që të kontribuojë për ndryshimin e Shqipërisë.

LETËR MIRËNJOHJE DHE SHPRESE PRESIDENTIT AMERIKAN JOE BIDEN

Arsyeja se përse i kam shkruar Presidentit të Shteteve të Bashkuara të Amerikës Joe Biden ka qënë një dëshirë për ti shprehur falenderim e mirënjohje nga ana ime, kam qenë i impresionuar nga ana njerëzore për çfarë kam parë edhe kam lexuar për atë njeri të madh. Në radhë të parë në kohën kur Joe Biden ka qënë Senator në vitin 1993, kur Serbia vazhdonte bënte Genocid në Ballkan edhe kryesisht në Bosnje, ai ka qënë nga të vetmit Senatorë që ka folur në Kongresin Amerikanë kundër genocidit serb në Bosnje. Në vitin 1999 përsëri Joe Biden, ka qënë një nga nismëtarët të firmosjes së peticionit për të detyruar Presidentin Klinton të vepronin menjëherë edhe të ndërhynin me ushtrinë e NATO-s kundër ushtrisë Serbe në Kosovë, edhe largimin e saj nga trojet e Kosovës. Përsëri Djali i Joe Biden, Bue Biden që ka shërbyer në Kosovë si ushtarë i ushtrisë Amerikane. Duke parë një personalitet si Joe Biden 37 vite Senator, 8 vite zëvëndës President edhe tani President i SHBA, duke patur kaq shumë vështirësi, qoftë edhe ato familjare, ishte më e pakta që ti dërgoja mirënjohjen time për çfarë ka bërë për kombin tonë dhe ti ofroja mbështetje me çdo kusht. Duke parë të gjitha këto cilësi te Presidenti, mendova se Presidenti Biden do e mirëpriste letrën e dërguar nga ana ime edhe do t’më vlerësonte, siç edhe ndodhi. Kam shumë shpresë për një marrëdhënie afatgjatë edhe si një Aleate strategjikë për Shqipëtarët edhe Shqipërinë, SHBA të jenë të përhershëm me mbështetje dhe ndikim në vendin tonë. Letrën presidentit ia dërgova me shpresën e vetme se vetëm Administrata e një supërfuqie dhe vendi mik dhe aleat si SHBA mund ta ndihmojnë dhe ndryshojnë Shqipërinë.

NJË LUTJE PRESIDENTIT AMERIKAN BIDEN

Në dy letrat që i kam dërguar presidentit të SHBA Joe Biden përmbajnë edhe shqetësimet më madhore që vuan Shqipëria sot. Vaksinimi i popullsisë në betejën globale ndaj Covid dhe reforma në Drejtësi në Shqipëri. Përveç të tjerave, këto janë dy problem madhore që ka Shqipëria jonë sot. Përbindëshi global Covid dhe përbindëshi i drejtësisë së kalbur e të kapur janë vrastare për një vend të pafuqishëm e të varfër si Shqipëria. Mbarimi me sukses i reformës në Drejtësi si një shpresë për vendin, çlirimi i qytetarëve nga prangat e një drejtësie të kapur e të kalbur dhe qasja e të gjithë qytetarëve të Shqipërisë në procesin e vaksinimit ishin shqetësim i madh për mua. Duke ju lutur Presidentit Joe Biden, për një sasi vaksinash Covid-19 për ata njërëz të pa mundur të vëndit tone, shpresoj se arrita të prek zemrën e një miku të veçantë të kombit tonë. Në çdo vështirësi Shqipërisë i kanë ardhur ndihmat nga miqtë e mëdhenj të saj. Ne besojmë te Amerika. Nëse s’do ishte Amerika s’do kishte shtet dhe mbase as komb shqiptar. Amerikës i detyrohemi për gjithçka.

VIZITA NË MUZETË DHE VARREZAT E ISH – PRESIDENTËVE TË AMERIKËS

Duke pasur dëshirën për ta njohur historinë edhe duke lexuar një pjesë të madhe të historisë së saj edhe burrat e shtetit që e kanë dashur këtë vënd me zemër, kam zhvilluar shumë vizita tek shtëpitë, varret dhe muzetë kushtuar ish presidentëve të Shteteve të Bashkuara të Amerikës. SHBA ka një histori mbreslënëse. Kam qënë shum kurioz të dija se si Presidentët e SHBA kanë jetuar, ku kanë jetuar edhe si kanë jetuar, këta burra shteti që nuk ja kishin me hile vëndit të tyre. Kam bërë disa udhëtime nëpër varret edhe shtëpitë e tyre, si të Theodore Roosevelt, Frankline Roosevelt, njeriut që shpëtoi Shqipërinë në 1919, edhe do ti jemi mirënjohës me shpirt, Woodrow Wilson, i madhi JFK, që kam mësuar një thënie shumë të përdorur nga ana ime, që mos pyesni se çfarë bën vëndi juaj për ju, por çfarë bëni ju për vëndin tuaj. Kjo thënie vlen edhe për Shqiptarët në të gjithë botën. Edhe ju bëj një pyetje se çfarë ne të gjithë bëjmë për vëndin tonë. Kam dëshirën që të vazhdoj edhe të eksploroj më shumë për Presidentët e këtij vëndi të bekuar nga Zoti.

DIASPORA SHQIPTARE TË JETË E UNIFIKUAR PËR INTERESIN KOMBËTAR

Diaspora shqiptare në mergatën shqiptare nëpër botë duhet me patjetër që të jetë e unifikuar dhe të luftojë fort për interesin kombëtar. Për çdo shtet diaspora ka një rol specific, edhe shqiptarët që nuk jetojnë më në Shqipëri nuk duhet të harrojnë rrënjët, historinë dhe të kontribuojnë sa herë që shteti dhe kombi kanë nevojë për shqiptarët e mërguar. Do të kisha shumë dëshirë të shihja bashkëpunim shtetëror me diasporën dhe të përfshihej sa më shumë në proceset shtetformuese edhe në ndryshimet demokratike. Është e papranueshme që diapsora shqiptare ende s’ka të drejtën e votës në shtetin e tyre. Ky është një dëm i jashtëzakonshëm dhe një mohim i të drejtës së shprehjes së vullnetit. Diaspora shqiptare duhet të jetë e organizuar, kompetitive, inspiruese, kontribuese dhe duhet të bashkohet me ide dhe organizime e qëllime të qarta për vëndin tonë edhe për komunitetin tonë.

REFORMA NË DREJTËSI DHE SHQIPËRIA TJETËR

Shqipëria e së ardhmes kalon nga themelet e forta të drejtësisë. Një shtet pa drejtësi është si një ndërtesë pa kolona. Tranzicioni i stërzgjatur 30-vjeçar është edhe si pasojë e një drejtësie makabre në Shqipëri. Reforma në Drejtësi duhet të ecë përpara me çdo kusht. Politikanët duhet urgjentisht të heqin dorë nga drejtësia. Aksesi në drejtësi e segmenteve të caktuara të politikës ka mbajtur peng vendin dhe reformat jetike në Shqipëri. Reforma në drejtësi duhet të ketë progres dhe të mos çalojë apo të zvarritet. Edhe pse ka ndërhyrje të fuqishme nga pushteti politik, përsëri jam shpresë plotë te partnerët tanë Amerikanë se reforma në drejtësi do të ketë prioritet dhe sukses të madh. Dua të falenderoj Ambasadoren e Shteteve të Bashkuara, Zonjën Yuri Kim, për këmbënguljen për ta çuar përpara Reformën në Drejtësi në Shqipëri dhe për të përmbyllur me sukses një ndër reformat më jetike në 30 vite tranzicion demokratik.

VUAJTJET E SHQIPËRISË: DREJTËSIA DHE SHËNDETËSIA

Problemi kryesorë sot në Shqipëri është drejtësia dhe shëndetësia. Në një vënd që nuk ka drejtësi gjithçka mund të ndodhë. Kur s’ka drejtësi ka korrupsion në nivele ekstreme, s’ka përgjegjësi në asnjë institucion, administrata shtetërore e pa përgjegjshme sepse nuk ka ndëshkime kundrejtë shkelësve të papërgjegjshëm. Unë do të thoja që nëse politika shqiptare nuk e ka dëshirën e mirë për të bërë ligje që i shërbejnë drejtësisë, do të ishte shumë e vështirë reforma të kalojë në një stad tjetër. Me angazhimin dhe përqëndrimin e SHBA për reformën në drejtësi në Shqipëri gjërat po marrin rrugë të pakthyeshme. Drejtësia e re duhet të fillojë nga politikanët që dominojnë skenën politike tash 30 vjet, drejtësia e re do shembuj konkretë dhe nivele të larta të ndëshkueshmërisë për të krijuar besim, vazhdimësi dhe histori suksesi. Pas drejtësisë, duhet një qasje e re shtetërore për shëndetësinë. Mjekë që vetëm ikin, spitale në kushte skandaloze, specialistë që në rrethe mungojnë, trajtime financiare qesharake dhe mbi të gjitha braktisje e qëllimshme e shëndetësisë në Shqipëri. Duhet një reformim i thellë i sistemit të drejtësisë e shëndetësisë që Shqipëria të bëhet vend i sigurtë dhe të ecë përpara.

RINIA DUHET TË NDRYSHOJË SHQIPËRINË

Kam një thirrje të sinqertë dhe të përzemërt për të gjithë rininë shqiptare në të gjithë diasporën kudo që ndodhen. Duhen të vlersojnë që të parët tanë kanë sakrifikuar gjithçka për ta ruajtur me fanatizëm të madh gjuhen shqipe, kanë investuar gjithçka për përparimin e atdheut tonë e ne sot duhet të japim e të kontribuojmë sa mundemi për vëndin tonë. Shqipëria ka nevojë gjithmonë për ne, të mos ia kthejmë kurrë shpinën Shqipërisë. Të mos e harrojmë kurrë prejardhjen e të parëve tanë. Mos harroni që jemi një nga popujt më të vjetër në Europë. Duke respektuar çdo vënd në botë që na i ka ofruar mundësitë dhe na ka mbështetur në çastet tona të vështira historike, duhet që kudo nëpër botë të shpalosim talentet në fushat e ndryshme të jetës, të shkëlqejmë dhe të lartësojmë flamurin tonë kombëtar e shtetin nga vijmë. Rinia në Shqipëri dhe rinia në diapsorë duhet të angazhohet më shumë në proceset demokratike të vëndit e të jetë më shumë pjesëmarrëse në zgjedhje dhe administrim shtetëror.

KUSH ËSHTË OLSIAN NORECI STUDENTI I CRIMINAL JUSTICE, NË MERCY COLLEGE

Olsian Noreci, ka lindur në Divjakë në një familje vëndalie myzeqare e modeste. I rritur me një fëmijëri të shëndosh me bashkëmoshatarët e tij. Në moshën 11-vjeçare del nga Shqipëria me një shoqatë bamirësie për në Hollandë. Duke krijuar një mardhënie të shkëlqyer me miqtë hollandez, edhe pasi përfundon Shkollën e Mesme në ” Miti Zoi Zaka” në Divjakë, me një iniciativë të pa shtershme krijon një kompani import-export. Duke e ushtruar prej disa vitesh këtë aktivitet në Shqipëri, vendosi të largohet për një jetë më të mirë për në SHBA, ku edhe sot jeton, punon e studjon. Duke u ingranuar me jetën e emigracionit edhe duke parë që një edukim i fortë do të ishte shumë mirë, vendosi të studiojë në New York e të ndjekë Criminal Justice, në Mercy College. Duke parë që i pëlqen drejtësia si kolonë themelore e shtetit të së drejtës, ka dëshirë të formohet dhe ta ushtrojë si profesion edhe pse jo edhe për të kontribuar në Shqipëri në të ardhmen.

ATHEU, GJAKU YNË QË NUK FALET

May 5, 2021 by dgreca

–Kryekuvendari Konjufca: Themelet e lirisë dhe shtetit tonë qëndrojnë mbi sakrificën e dëshmorëve/

Sot, me rastin e 5 Majit – Ditës Kombëtare të Dëshmorëve të Atdheut, kryetari i Kuvendit të Republikës së Kosovës, z.Glauk Konjufca, vizitoi disa vatra të rezistencës çlirimtare në Kosovë dhe nderoi dëshmorët e martirët e rënë për lirinë e vendit tonë.

Kështu, ditën e sotme kryekuvendari Konjufca e filloi me nderime në Prekaz, te varri i Komandantit Legjendar të Ushtrisë Çlirimtare të Kosovës Adem Jashari, për të vazhduar më pas në Kompleksin Memorial në Morinë.

Pasi vendosi lule dhe nderoi të rënët, kryetari i Kuvendit vazhdoi për në Gllogjan, për të bërë homazhe në Kompleksin “Dëshmorët e Kombit”.

Nderimin për heronjtë, kryekuvendari Konjufca e përmbylli në Kompleksin Memorial “Zahir Pajaziti” në Orllan, duke vendosur lule pranë shtatores së heroit Zahir Pajaziti.

“Sakrifica sublime e dëshmorëve të kombit qëndron e shenjtë në themelet e lirisë. Pa luftën e tyre për liri, ne nuk do ta kishim shtetin tonë e as pavarësinë. Është obligim institucional t’i nderojmë e t’i kujtojmë të rënët për liri. Ata kanë rënë në të kaluarën por nuk janë pjesë e së shkuarës, por janë shumë aktualë”, theksoi me këtë rast kryekuvendari Konjufca.