Sokol Paja/

New York, 20 prill 2024 – Federata Pan-Shqiptare e Amerikës Vatra promovoi librin “Prefektura e Elbasanit 1925-1939, aspekte politiko-administrative” nga Prof.Rudina Mita (Todri). Në fjalën e mirëseardhjes sekretari i Vatrës Dr. Pashko Camaj përshëndeti në emër të të gjithë vatranëve dhe theksoi faktin se libri i Prof.Rudina Mita hedh dritë në historinë tonë kombëtare dhe politike. Prof. Dr. Roland Gjini në fjalën e tij shprehi mirënjohje e falënderim të veçantë Vatrës për bashkëpunimin dhe solli në vëmendje cilësitë shkencore dhe njerëzore të historianes Rudina Mita si historiane e cila sjell para lexuesit një vepër kërkimore me parametra të larta shkencore. Sipas Prof.Gjinit kjo është vepër e rëndësishme për historinë e Elbasanit dhe historinë politike të shqiptarëve në vitet 20-30-të. Autorja prof.Rudina Mita Todri e emocionuar falenderoi Vatrën për mikpritjen, bashkëpunimin dhe ndihmën ndaj kërkuesve shkencorë që hulumtojnë arkivat e Vatrës duke vënë theksin te rëndësia e evidentimit të fakteve historike dhe ekspozoi punën hulumtuese 8 vjeçare në arkivin e shtetit në përgstitjen e botimit të saj për të bërë interpretimin e duhur historiografik të ngjarjeve të kohës dhe plotësimin e burimeve dokumentare me burime të gazetave të kohës. Prof.Rudina Mita ekspozoi përmbajtjen e librit duke u ndalur te gjarjet e pas revolucionit të qershorit, gjyqet politike, atentatet, periudha e Mbretit Zog, reformimi e ndërtimi i shtetit ligjor, vlerat e Elbasanit në spektin arsimor, politik, ekonomik dhe personazhe si Aqif Pasha e Shefqet Verlaci, Lef Nosi etj. Akademik Beqir Meta në fjalën përshëndetëse të lexuar nga editori i Diellit, theksoi se monografia e Prof. As. Dr. Rudina Mitës është një vepër shkencore serioze dhe me vlera të gjithanëshme shkencore e njohëse për Prefekturën e Elbasanit gjatë njërës prej periudhave më të rëndësishme të historisë së saj, periudhës zogiste, kur shteti shqiptar njohu për herë të parë një proces konsolidimi, zhvillimi dhe reformimi të gjithanshëm. Në këtë kuadër edhe Elbasani, për të cilin autorja argumenton shkencërisht se pati një pozitë nga më të rëndësishmet midis prefekturave të tjera, njohu një zhvillim mbresëlënës të jetës politike e shoqërore. Z.Bashkim Shehu pyeti për enciklopedinë elbasanase për figura të shquara politike dhe Prof. Roland Gjini shpjegoi në detaje botimet dhe konferencat që janë bërë për Elbasanin dhe figura të shquara kombëtare të trevës së Elbasanit. Faton Zogejani vlerësoi punimin dhe kërkoi që dokumentet historike të botohen për të njohur historinë e kombit ndërsa editorja e anglishtes Rafaela Prifti pyeti rreth monografisë së Elbasanit ku autorja Prof.Mita sqaroi se dokumentet janë zyrtare shtetërore arkivore.

Promovimi vazhdoi me biseda miqësore rreth Vatrës, Diellit e shqiptarëve të Amerikës.

Sokol Paja/

New York, 11 prill 2024 – Gjeneral Piro Ahmetaj dhe historianja Prof.Elena Kocaqi vizituan Federatën Pan-Shqiptare të Amerikës Vatra. Ata u pritën nga delegacioni zyrtar i Vatrës, kryetari z.Elmi Berisha, sekretari Dr. Pashko Camaj, kryetari i degës së Vatrës në Queens Dr.Skender Murtezani vatranë të tjerë, personalitete e aktivistë të komunitetit shqiptaro-amerikanë në New Yorke më gjërë. Kryetari i Vatrës z.Elmi Berisha në fjalën e mirëseardhjes shprehu respekt dhe vlerësim të lartë për Gjeneral Piro Ahmetajn jo vetëm si ekspert i lartë i sigurisë kombëtare, NATO-s e mbi të gjitha kontributin e tij të gjatë në ushtrinë shqiptare e lidhjen e veçantë me Kosovën, Ushtrinë Çlirimtare të Kosovës e presidentin historik Dr. Ibrahim Rugova.

Për Prof.Elena Kocaqin, kryetari i Vatrës z.Berisha shprehu respekt e vlerësim të lartë për kontributin e saj si historiane e kërkuese shkencore në lartësimin e historisë kombëtare e figurave të shquara të kombit shqiptar. Gjeneral Piro Ahmetaj në fjalën e tij ekspozoi rëndësinë e anëtarësimit të Shqipërisë në NATO, eksperiencën e tij të qenësishme për 25 vite si koordinator i NATO-s për zyrën në Shqipëri, peshën dhe rolin e rëndësishëm të Shqipërisë në integrimin e Kosovës në NATO, aspekte gjeopolitike të shteteve të Ballkanit, rrugëtimin historik të shtetit shqiptar deri në anëtarësimin e plotë në NATO dhe sfidat me të cilat përballet sot Kosova në integrimin në NATO. Në fjalën e tij emocionuese Gjeneral Piro Ahmetaj falenderoi Shtetet e Bashkuara të Amerikës për gjithçka që kanë bërë për kombin shqiptar.

Prof.Elena Kocaqi në fjalën e saj theksoi rolin që kishte Vatra në histori ku shpëtoi copëtimin e Shqipërisë, fuqinë lobuese të komunitetit shqiptar në Amerikë, kërkoi bashkëpunimin e të gjitha shoqatave shqiptare për të forcuar faktorin shqiptar në Amerikë e trojet etnike. Ajo kërkoi që shqiptarët e Amerikës të ndihmojnë dhe të fokusohen te shqiptarët e Malit të Zi, Kosovës, Maqedonisë e Çamërisë për të lobuar për interesat e shqiptarëve në Ballkan. Shqiptarët e Amerikës theksoi prof.Kocaqi duhet të krijojnë një lob të fuqishëm me biznesmenë e intelektualë për të qenë imponues mbi politikën shqiptare dhe të negociojë me faktorin politik amerikan për interesat e shqiptarëve në Ballkan.

Dr. Pashko Camaj në fjalën e tij vuri theksin te platforma e Vatrës për bashkimin dhe integrimin e shqiptarëve kurse Dr. Skënder Murtezani diskutoi çështje të sigurisë në Ballkan, punën e institucioneve kombëtare që të duan më shumë shqiptarinë, bashkimin e shqiptarëve e bashkëpunimin mes shtetit të Kosovës e Shqipërisë për tu fuqizuar si shqiptarë në Ballkan.

Dr. Murtezani ekspozoi punën e Vatrës Queens në riatdhesimin e eshtrave të Mid’hat Frashërit në Shqipëri, punën për kthimin e eshtrave të Fan Nolit në Shqipëri dhe pllakatën e nderimit të Atë Gjergj Fishtës. Takimi vazhdoi gjatë me biseda të ngrohta e vëllazërore në interes të komunitetit shqiptar në Shtetet e Bashkuara të Amerikës dhe shqiptarëve në trojet etnike.

Ambasadori i Republikës së Shqipërisë, Z. Ervin Bushati erdhi për një takim me Kryetarin e Federatës Pan-Shqiptare të Amerikës Vatra, Elmi Berisha dhe drejtuesë të saj në shtëpinë e Vatrës sot pasdite.

Takimi nënvizoi idenë e koordinimit në nivele institucionale për forcimin e marrëdhënieve shqiptaro- amerikane. Midis të tjerave, bashkërendimi i diaporës, ku Vatra si Federatë mbarëshqiptare ka vend të veçantë, mund të çojë në realizimin e festimit të ditës së pavarësisë në Shtëpinë e Bardhë, siç është arritur nga komunitete të tjera.

Ambasadori Bushati e vuri theksin për këtë te kontaktet me ligjbërësit amerikanë nga çdo shoqatë apo anëtar i komunitetit, si pjesë e “presionit pozitiv” prej nga vjen rrjedhimisht hapesirë dhe prezencë më e madhe e bashkësisë shqiptare.

Duke e vlerësuar paraqitjen e idesë së Ambasadorit Bushati tek drejtuesit e Vatrës, kryetari Berisha tha se nisma ka filluar me komunikimet me Shtëpinë e Bardhë nga fundi i vitit të kaluar.

“Pas nënshkrimit të Memorandumit me Parlamentin e Kosovës, Vatra e konsideron si një hap të rëndësishëm një marrëveshje me Parlamentin e Shqipërisë duke vazhduar të jetë pararojë e diaporës shqiptare për çështjen kombëtare,” tha kryetari Elmi Berisha.

Përsa i takon misionit të shenjtë të ruajtjes së gjuhës dhe trashëgimisë kulturore, Sekretari i Vatrës, Dr. Pashko Camaj shtroi nevojën e koordinimit të teksteve shkollore dhe konkretisht Abetareve për fëmijët e diaporës, dhe shkollimin e strukturuar në Amerikë.

Biseda kishte shkëmbime të mendimeve dhe ideve që i shërbejnë komunitetit dhe interesave kombëtare. Vizita e parë e Ambasadorit Bushati në Vatër, i cili është emëruar ketë vit në këtë post në Uashington, kishte edhe një komponent personal. Duke i uruar mirëseardhjen, Kryetari Berisha tha se “Ambasadori ka ardhur në Vatrën e tij,” sepse stërgjyshi i tij nga ana e mamasë ka qenë Vatran i përkushtuar.

Ambasadori i Shqipërisë Ervin Bushati shoqërohej nga Sekretari i Parë i Misionit të Shqipërisë pranë OKB-së, z. Arbi Kapisyzi.

Në pritjen zyrtare me Ambasadorin Bushati ishin të pranishëm, Dr. Pashko R. Camaj Sekretar i Vatrës, Ilir Cubi, anëtar i Kryesisë dhe ndihmës Arkëtar, Paulin Mrnacaj, anëtar i Kryesisë, Anton Raja, anëtar i Këshillit, Gëzim Nika “Mjeshtëri Madh”, Kujtim Funiqi, Dritan Haxhia, Këshillitar për Media, Rafaela Prifti, editore për anglishten e gazetës Dielli.

New York, 9 Prill 2024 – Shaqir Totaj, kryetari i Komunës së Prizrenit i shoqëruar nga z.Islam Ukaj vizituan Federatën Pan-Shqiptare të Amerikës Vatra. Ata u pritën në Selinë Qëndrore nga kryetari i Vatrës z.Elmi Berisha, arkëtari z.Besim Malota, anëtari i kryesisë së Vatrës z.Paulin Mrnaçaj, anëtari i Këshillit z.Dritan Haxhia, gazetari z.Halil Mula dhe ish-deputeti i Kuvendit të Kosovës z.Halil Ahmeti. Në fjalën e mirëseardhjes kryetari Berisha shpalosi vizionin dhe punën e Vatrës në dobi të çështjes kombëtare e komunitetit shqiptar në Shtetet e Bashkuara të Amerikës, punën lobuese në Senat dhe Kongres, promovimin e interesit kombëtar në mjedisin politik amerikan dhe përpjekjet për transformimin e realiteteve e mundësive në favor të angazhimeve të Federatës Vatra. Nga e tij kryetari i Prizrenit z.Totaj shprehu mirënjohjen për punën dhe rolin historik të Vatrës për kombin e veçanërisht për shtetin e Kosovës. Z.Berisha e garantoi kryekomunarin Totaj se Vatra do të vazhdojë të luajë fuqishëm rolin e saj historik ku Kosova ka peshën specifike të veprimtarisë atdhetare, diplomatike e komunitare të Federatës Vatra.