Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

16 vjetori i pavarësisë, Konsullata e Përgjithshme e Kosovës organizoi pritje festive me shqiptarët në New York

by

Sokol Paja/

New York, 15 Shkurt 2024- Për nder të 16 vjetorit të Pavarësisë së Republikës së Kosovës, Konsullata e Përgjithshme në New York organizoi një pritje festive madhështore me Shqiptarët e Amerikës në New York. Veprimtarë të çështjes kombëtare, diplomatë, aktivistë, artistë, media shqiptare, organiza, shoqata, patriotë të shquar, veprimtarë të dalluar, biznesmenë, profesorë e personalitete të larta shqiptare që jetojnë e veprojnë në Amerikë festuan së bashku ditën e shenjtë të pavarësisë së Kosovës. Nën moton “Kosovë, ne do të dalim Zot” në fjalën e mirëseardhjes, Ambasador Dr. Blerim Reka tha ndër të tjera se “përkulemi para bijëve e bijave tona që dhanë jetën për lirinë e Kosovës. Lavdi për dëshmorët e heronjtë e luftës së UÇK-së, mirënjohje për Shtetet e Bashkuara të Amerikës dhe NATO”. Në fjalën e tij Ambasador Reka përmendi bashkëpunimin, sfidat dhe sukseset e Republikës së Kosovës, partneritetin e ngushtë me SHBA, rolin e Serbisë si instrument i Rusisë dhe politikave destabilizuese në Ballkan, sulmin terrorist shtetëror serb në Kosovë ku u vra heroi Afrim Bunjaku e përpjekjet e vazhdueshme të Serbisë në dëm të Kosovës.

Ambasador Robert A. Wood, zëvëndës përfaqësues i Misionit të Shteteve të Bashkuara të Amerikës në Kombet e Bashkuara në fjalën e tij vlerësoi arritjet e shtetit të Kosovës, perspektivën auroatlantike të saj dhe e falënderoi Kosovën për bashkëpunimin e ngushtë me Amerikën, partneritetin, miqësinë dhe gatishmërinë për të qëndruar krah Amerikës. “Faleminderit për gjithçka që keni bërë për ne” tha diplomati i lartë si për të treguar se Kosova ka punuar ngushtë me SHBA në sfidat me të cilat ballafaqohet çdo ditë. Mbrëmja festive nën prezantimin e këngëtarit Ergin Oda, vazhdoi për disa orë bashkë me Mariza Ikonomin duke ndezur një atmosferë patriotike e kulturore mbresëlënëse.

Rroftë në shekuj të shekujve Kosova e lirë dhe e pavarur.

VATRA, EKSPOZITË ME RASTIN E 16 VJETORIT TË PAVARËSISË SË KOSOVËS

by

Sokol Paja/

New York, 13 Shkurt 2024- Federata Pan-Shqiptare e Amerikës Vatra me rastin e 16 vjetorit të shpalljes së pavarësisë së Republikës së Kosovës, në Selinë Qendrore organizoi një ekspozitë të Prof.as.dr Salih Krasniqit që trajton krimet serbe në Kosovë në fushën e mjekësisë. Përveç ekspozitës, në librin dhuruar Vatrës shfaqen në detaje vrasjet makabre të stafit mjekësor, fëmijëve e pacientëve prej forcave serbe në Kosovë. Një ekspozitë dhe libër që trondit opinionin publik mbi makabritetin e pashembullt të gjenocidit të forcave serbe mbi popullsinë shqiptare në Kosovë. Miqtë u pritën në Vatër nga editori i Diellit i cili ekspozoi rëndësinë dhe kontributin e jashtëzakonshëm të Federatës Vatra e gazetës Dielli për çështjen kombëtare dhe Kosovën në veçanti. “Në çdo protestë, tubim, demostratë, organizim, nismë, fushatë për lirinë e Kosovës dhe ndërkombëtarizimin e çështjes së Kosovës, Vatra e Dielli kanë qenë prijës të padiskutueshëm” u tha të pranishmëve editori i Diellit.

Prof.as.dr.Salih Krasniqi shprehu mirënjohjen për Vatrën si kështjellë shqiptarie në Amerikë dhe filantropin Ramiz Tafilaj e Safet Martinaj që ndihmuan në botim e librit, gjithashtu dhe Mehmet Mjekun si ndihmës dhe mbështetës i veprimtarisë së tij publicistike. Para të pranishmëve mbajti fjalë edhe autori Bajram Mehmeti i cili ekspozoi krimet e shërbimit sekret ushtarak serb. Bashkim Shehu veprimtar i komunitetit shqiptar në mërgatën e Amerikës u tha të pranishmëve se pavarësia e Kosova është ngjarje e shënuar që lumturon çdo shqiptar kudo ndodhet. Ai i falenderoi bashkëatdhetarët nga Kosova për punën e rëndësishme publicistike dhe aktivitetet në shërbim të zbardhjes së krimeve serbe në Kosovë.

Takimi u ndoq nga gazetari Zenel Hajrizi i RTK i cili vlerësoi Vatrën e Diellin si lider të shqiptarizmës në Shtetet e Bashkuara të Amerikës. Të pranishmit dhuruan libra për Vatrën dhe shkëmbyen urimet më të përzemërta për Pavarësinë e Kosovës: Rroftë përjetë e mot Kosova e lirë, e pavarur, sovrane, demokratike dhe europiane.

VATRA DHUROI ABETARE E LIBRA SHQIP PËR SHKOLLAT SHQIPE NË NEW YORK

by

Sokol Paja/

New York, 3 Shkurt 2024 – Federata Pan-Shqiptare e Amerikës Vatra dhuroi abetare, libra shqip dhe kopje të gazetës Dielli për nxënësit e shkollës shqipe “Alba Life” dhe “Children of the Eagle” në Bronx, New York. Delegacioni i Vatrës i kryesuar nga sekretari i Vatrës Dr.Pashko Camaj, anëtarët e kryesisë Bashkim Musabelliu e Ilir Cubi, anëtari i Këshillit të Vatrës gjeneral Asllan Bushati dhe Editori i Diellit. Vatranët shprehën falenderim, vlerësim e mirënjohje për punën e shkëlqyer të shkollave shqipe “Alba Life” dhe “Children of the Eagle” për ruajtjen e gjuhës shqipe, historisë, traditës, kulturës kombëtare dhe identitetit kombëtar shqiptar në mërgatën e Shteteve të Bashkuara të Amerikës. Themeluesi i shkollës shqipe “Alba Life” z.Qemal Zylo falenderoi Vatrën e gazetën Dielli për mbështetjen dhe ekspozoi përpjekjet e shkollës shqipe prej 15 vitesh me mësues e prindër në zhvillimin e arsimit shqip. Delegacioni i Vatrës theksoi se puna e shkëlqyer e mësuesve dhe shkollave shqipe do të ruajë të pastër trashëgiminë kulturore shqiptare në brezat që do vijnë. “Nga këto klasa të mësimit shqip po rriten drejtuesit e ardhshëm të Amerikës, Vatrës e Diellit” tha z.Camaj, ndërsa z.Cubi këmbënguli në idenë se fëmijët shqiptarë të kenë modele referimi si George Uashington e Gjergj Kastrioti për tu ndjerë krenarë për origjinën e tyre dhe rrënjët e të parëve.

Themeluesja e shkollës shqipe “Children of the Eagle” znj.Drita Gjongecaj shprehu vlerësim të lartë për Vatrën dhe mirënjohjen për mbështetjen zhvillimit të mësimit shqip në Selinë Qendrore të Vatrës për vite me radhë. Editori i Diellit u shpreh se shkollat shqipe

“Alba Life” dhe “Children of the Eagle” janë ndër shkollat më dinjitoze në mërgatën e Amerikës duke dhënë kontribut të jashtëzakonshëm për shqiptarinë. Z.Musabelliu dhe z.Bushati i cilësuan mësuesit e shkollave shqipe misionarë të shenjtë të kombit tonë. Federata Pan-Shqiptare e Amerikës Vatra e mbështet arsimin shqip e shkollat shqipe që prej vitit 1912 ku vetëm në vitet 1918-1940 Vatra dërgoi më shumë se 120 mijë libra në Shqipëri të shtypura në Shtypshkronjën e Diellit.

Federata Pan-Shqiptare e Amerikës Vatra, nëpërmjet gazetës Dielli sot është kthyer në promotoren më të fuqishme të shkollave shqipe në diasporën e Amerikës e Europës. Me fillimin e vitit të ri mësimor, Federata Vatra synon të pajisë shkollat shqipe të Amerikës me Abetare.

Zoti i bekoftë dhe i shpërbleftë përpjekjet e shenjta të çdo shqiptari për gjuhë, komb e atdhe.

Ramush Haradinaj, heroi i lirisë së Kosovës takoi shqiptarët e Amerikës te Vatra

by

Sokol Paja/

New York, 1 Shkurt 2024 – Ramush Haradinaj, dy herë Kryeministër i Republikës së Kosovës, kryetar i Aleancës për Ardhmërinë e Kosovës dhe Deputet i Kuvendit të Kosovës, Ish-Komandanti i Zonës Operative të UÇK-së në Dukagjin, zhvilloi një vizitë të ngrohtë e vëllazërore në Federatën Panshqiptare të Amerikës VATRA.

Në takimin me shqiptarët e Amerikës ai foli hapur për sfidat shumëplanëshe me të cilat përballet shteti i Kosovës. Në takimin e përzemërt e vëllazëror në Vatër të hapur nga Sekretari i Vatrës Dr.Pashko Camaj, kryetari i Vatrës z. Elmi Berisha në fjalën e mirëseardhjes deklaroi se z.Haradinaj është personalitet i madh i kombit shqiptar, figurë e ndritur e kombit që me trimërinë e vet na zbardhi faqen historike të shtetit e kombit. Z.Haradinaj mbrojti pastërtinë e UÇK-së, luftës për çlirimin e Kosovës dhe kontribuoi për shtet-ndërtim në Kosovë. “Qeverisja e shkëlqyer juaja ka bërë krenar çdo shqiptaro-amerikan. Kosova duhet të jetë në NATO-s dhe BE” tha z Berisha dhe kujtoi kërkesën e Vatrës për politikën e institucionet në Kosovë që të krijojnë një trupë uniteti politik e kombëtar në Kosovë siç e themeloi presidenti historik Doktor Ibrahim Rugova. Z.Berisha theksoi se qasja e Vatrës në ndihmë të shtetit të Kosovës ka ndryshuar në raport me ngjarjet e sigurisë në Kosovë. Heroi i lirisë së Kosovës z.Ramush Haradinaj i ardhur në Shtetet e Bashkuara të Amerikës për lutjet e mëngjesit i shoqëruar në Vatër nga prof.Besnik Tahiri, z.Harry Bajraktari, z.Rrustem Gecaj e personalitete të diasporës diskutoi rreth sulmit rus në Ukrainë, sulmin e Hamasit mbi Izrael, vrasje e tre ushtarëve amerikanë në Lindjen e Mesme dhe sulmin terrorist shtetëror serb në Kosovë. Në fjalën e tij z.Haradinaj diskutoi rreth rritjes së kapaciteteve të ushtrisë së Kosovës me standardet të NATO e Amerikës dhe zhvillimin e shoqërisë në Kosovën demokratike e europiane. “Anëtarësimi i Kosovës në NATO është interes jetësor kombëtar. Serbia po blen armë prej armiqve të Amerikës. Duhet me qenë aktiv dhe me qenë të fokusuar në Uashington për të punuar për interesat nacionale. Anëtarësimi në NATO sjell siguri të përjetshme. Në Departamentit Shtetit, Kongres e Senat, Këshill të Sigurimit kam zhvilluar takime shumë të rëndësishme për çështje të sigurisë kombëtare për Kosovën” tha ndër të tjera heroi i lirisë së Kosovës z.Ramush Haradinaj. Kjo ishte vizita e tretë zyrtare e z.Haradinaj në Vatër e cila u prit me interes të jashtëzakonshëm nga vatranët e shqiptaro-amerikanët. Përfaqësues të organizatave shqiptare në New York, New Jersey e më gjërë, shkrimtarë, aktivistë, artistët, mësues, veprimtarë e gazetarë e kthyen Selinë e Vatrës në një shtëpi mbarëshqiptare që rrezaton patriotizëm dhe dashuri të pakufishme për heronjtë e kombit si z.Haradinaj e çlirimtarët e luftëtarët e lirisë së Kosovës e kombit shqiptar.

Elton Shametaj kryetari i American Albanian Law Enforcement Association (AALEA) i dhuroi një uniformë z.Haradinaj ndërsa për të gjithë të pranishmit patrioti Toni Musaj shtroi një koktejl.

VATRA PROMOVOI VEPRËN E SHKRIMTARES SABIJE DERVISHI VESELI

by

Sokol Paja/

New York, 27 janar 2024 – Federata Pan-Shqiptare e Amerikës “Vatra” promovoi veprën e shkrimtares Sabije Dervishi Veseli. Përfaqësues të organizatave shqiptare në New York, New Jersey e më gjërë, shkrimtarë, aktivistë, profesorë, artistë, mësues, veprimtarë e gazetarë e kthyen Selinë e Vatrës në një auditorium akademik kushtuar letërsisë moderne. Ekspertë të letërsisë shqipe, gjuhësisë, letërsisë moderne e përkthimit nxorën në pah cilësitë e krijimtarisë letrare dhe artistike të shkrimtares Veseli.

Editori i Diellit e cilësoi veprën e shkrimtares Sabije Dervishi Veseli një kontribut të madh për prozën moderne shqipe dhe letërsinë shqipe në diasporën e Amerikës. Sekretari i Vatrës Dr.Pashko Camaj përshëndeti në emër të Vatrës e vatranëve duke përgëzuar shkrimtaren Sabije Dervishi Veseli për krijimtarinë letrare e familjen Veseli për mbështetjen ndaj Vatrës e aktiviteteve patriotike në mërgatën shqiptare të Shteteve të Bashkuara të Amerikës.

Nën prezantimin elokuent të kryetarit të shoqatës së Shkrimtarëve Shqiptaro-Amerikanë z.Mhill Velaj, i cili lexoi kumtesën e gazetarit nga Shqipëria Arjan Zoto që renditi vlerat specifike të prozës moderne të shkrimtares Sabije Dervishi Veseli, promovimi u prit në mënyrë të shkëlqyer nga komuniteti.

Studiuesi Bexhet Asani theksoi se shkrimtarja Sabije Veseli kultivon një zhanër të romanit “sui generis”, e që ky lloj i romanit është pëlqyer shumë nga lexuesi amerikan. Mund të them pa drojë se asnjë nga shkrimtarët e lartpërmendur nuk ka arritur të pushtojë tregun dhe panairet amerikane të librit si romancierja Sabije Veseli. Presidenti i shoqatës së Shkrimtarëve Shqiptaro-Amerikanë Adnan Mehmeti në fjalën e tij u ndal te talenti i shkrimtares Sabije Dervishi Veseli dhe hyrja e saj e fuqishme në industrinë e botimeve në gjuhë të huaj.

Aktivistja Moza Dajçi në fjalën e saj kërkoi një minutë heshtje për gratë shqiptare të vrara dhe cilësoi se Sabije Veseli të shkruarin e ndjen si pjesë të jetës së saj, e ka frymëzim shpirtëror që e posedon dhe ja ka dhuruar Zoti. Shkrimtarja Bora Balaj përshëndeti promovimin ndërsa këngëtarja Sebahat Berjaolli foli rreth aktivitetit të Sabije Veselit në shoqatën “Marigona” dhe këndoi për të pranishmit këngë kushtuar atdheut.

Harun Pollozhani, Imami i Riverdale e cilësoi promovimin si një të madhe për librin shqip. Ai referoi një shembull nga media amerikane e viteve 1900 duke e cilësuar alfabetin shqip si nëna e alfabetit latin e grek. Shkrimtarja Sabije Dervishi Veseli në fjalën e saj falënderoi Vatrën për promovimin, shpalosi ëndrrat e fëmijërisë, krijimtarinë e saj dhe sfidat e botimit në të ardhmen. Doktor Nashir Kica përgëzoi mbesën për arritjet në letërsinë moderne shqipe. Për të gjithë të pranishmit familja Veseli shtroi një koktej në përfundim të promovimit.

TV Kultura Shqiptare ndoqi nga afër takimin dinjitoz në Vatër, në shtëpinë e shqiptarëve të Amerikës.