Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

PRESIDENTI AMERIKAN CLINTON NË KOSOVË PËR FESTËN E LIRISË

by

Presidenti Amerikan Bill Clinton në festën e 20 vjetorit të lirisë së Kosovës, do të mbajë fjalim në Tubimin Qendror për Shënimin e 20 vjetorit të hyrjes së trupave të NATO-së në Kosovë, i cili do mbahet ditën e mërkurë, 12 Qershor 2019, në Prishtinë në Sheshin “Skëndërbeu” në orën 11:00/*

-“Tani, bindja jonë e fortë për gjithçka që po ndodh në Kosovë, është e vetmja shpresë e popullit të Kosovës”, theksone Presidenti i SHBA-ve, Bill Clinton,  derisa nga Shtëpia e Bardhë  i drejtohej kombit amerikan, duke folur për zhvillimet tragjike në Kosovë dhe ndërhyrjen shpëtimtare të  NATO-s të saponisur në 24 Mars 1999/

-Më pak se një vit para ndërhyrjes së NATO-s në Kosovë, në 29 Maj 1998 Presidenti historik i Kosovës, Ibrahim Rugova në Uashington ishte takuar me Presidentin Amerikan Bill Clinton/

-Në 5 Mars 1999, një takim i Presidentit Rugova me të Dërguarin e Posaçëm për Kosovën të Presidentit Clinton, Senatorin Amerikan Robert Doll, ishte edhe një paralajmërim lirie/

Gazeta DIELLI nga korrespondenti në Kosovë Behlul Jashari

PRISHTINË, 10 Qershor 2019/ Kosova feston jubileun e 20 vjetorit të lirisë, përgjithmonë mirënjohëse dhe falënderuese për Shtetet e Bashkuara të Amerikës dhe gjithë botën demokratike. Edhe ish-Presidenti i Shteteve të Bashkuara të Amerikës, Bill Clinton, do t’i bashkëngjitet popullit të Kosovës në shënimin e 20 viteve të lirisë, dhe do të mbajë fjalim në Tubimin Qendror për Shënimin e 20 vjetorit të hyrjes së trupave të NATO-së në Kosovë.

“Në 12 Qershor 2019 Kosova shënon 20 vjetorin e hyrjes së trupave të NATO-s. Ne jemi duke shënuar këtë përvjetor historik të Kosovës bashkë me miqtë dhe aleatët tonë me të cilët ndajmë vlerat e paqes, lirisë dhe demokracisë. Njëkohësisht, ne po nderojmë të kaluarën tonë dhe vizionin tonë për paqe të qëndrueshme”, deklaroi sot Këshilli Organizativ.

Tubimi Qendror për Shënimin e 20 vjetorit të hyrjes së trupave të NATO-së në Kosovë mbahet ditën e mërkurë, 12 Qershor 2019, në Prishtinë në Sheshin “Skëndërbeu” në orën 11:00.

 “Ftojmë të gjithë qytetarët e Kosovës të marrin pjesë në tubimin qendror, dhe të shfrytëzojnë këtë mundësi për të falënderuar Presidentin Clinton për lidershipin e tij në ndërtimin e paqes në Kosovë dhe përkrahjen e tij të vazhdueshme për paqe dhe stabilitet në tërë rajonin”,  thekson njoftimi i dërguar sot nga Këshilli Organizativ për Shënimin e 20 vjetorit të hyrjes së trupave të NATO-së në Kosovë.

 Ky Këshill dje njoftonte se ish-Sekretarja e Shtetit të Shteteve të Bashkuara të Amerikës, Madeleine Albright, do t’i bashkëngjitet popullit të Kosovës në Ceremoninë Shtetërore për Shënimin e 20 vjetorit të hyrjes së trupave të NATO-së në Kosovë.

 Në këtë pranverë të 2019-tës u bënë 20 vjet nga 24 Marsi 1999 – Dita kur ndërhyrja shpëtimtare e NATO-s, forcës më të madhe planetare, kundër terrorit e gjenocidit, i hapi shteg lirisë së Kosovës.

Në terrin e natës dhe të okupimit të egër, drita e shpërthimeve nga goditjet e aviacionit të NATO-s nga qielli mbi caqet e forcave kriminale serbe shihej si një shpresë e besim për të ardhmen e ëndërrave për lirinë e paqen derisa në Kosovë kishte marrë përmasa gjenocidi terrori i spastrimit etnik kundër shqiptarëve.

“Tani, bindja jonë e fortë për gjithçka që po ndodh në Kosovë, është e vetmja shpresë e popullit të Kosovës”, theksone në atë ditë e orë historike, Presidenti i SHBA-ve, Bill Clinton,  derisa nga Shtëpia e Bardhë  i drejtohej kombit amerikan, duke folur për zhvillimet tragjike në Kosovë dhe ndërhyrjen shpëtimtare të  NATO-s.

Raportimet që bëja në ato rrethana lufte dëshmonin se forcat serbe vazhdonin fushatën për dëbimin e të gjithë shqiptarëve nga Kosova. U dëbuan afër një milion shqiptarë, shumica në Shqipëri. Më shumë se 12 mijë arrinte numri i shqiptarëve të vrarë e masakruar, edhe të groposur në varreza masive, në mëse 5 mijë arrinte numri i të zhdukurve, qytetet dhe fshatrat shqiptare digjeshin e plaçkiteshin nga forcat ushtareke, policore e paramilitare serbe të Milosheviçit, kasapit të Ballkanit, që pas vitesh përfundoi në Tribunalin Ndërkombëtar për Krime Lufte në Hagë.

Ende pa kaluar tre muaj nga fillimi, bombardimet përfunduan në 10 Qershor 1999, pasi një ditë më parë ishte arritur  Marrëveshja e Kumanovës mes NATO-s dhe Beogradit për tërheqjen e të gjitha forcave serbe nga Kosova dhe hyrjen e trupave ndërkombëtare të Alancës Veriatlantike në Kosovë.
Dita e Lirisë dhe Paqes, e hyrjes së forcave të NATO-s në Kosovë, erdhi në 12 Qershor 1999. Në mëngjesin e asaj dite të lume, në orën 05 e 17 minuta, tanket e para të NATO-s hynë në Kosovë duke kaluar kufirin me Maqedoninë në Bllacë – Han të Elezit, drejt Prishtinës, e të nesërmen nga Shqipëria, duke kaluar kufirin në Morin-Vërmicë, drejt Prizrenit…

Edhe në atë ditë e orë  historike një lajm tjetër të madh se në Kosovë po ndodhte liria e raportoja drejt Tiranës – në Agjencinë Telegrafike Shqiptare dhe Radio Televizionin Shqiptar nga kolona e tankeve të para të NATO-s  që kalonte kufirin jugor në Han të Elezit drejt Grykës së Kaçanikut…

Më pak se një vit para ndërhyrjes së NATO-s në Kosovë, në 29 Maj 1998 Presidenti historik i Kosovës, Ibrahim Rugova në Uashington ishte takuar me Presidentin Amerikan Bill Clinton. Pas takimit Rugova deklaronte: “Ne ritheksuam se zgjidhja më e mirë për Kosovën do të ishte shteti i pavarur”. Ndërsa, Clinton kishte theksuar se Kosova është një nga shqetësimet amerikane dhe se SHBA-të do të intensifikojnë angazhimin për zgjidhjen e çështjes së Kosovës në kuadër të Grupit të Kontaktit dhe të NATO-s.

Në 5 Mars 1999, një takim i Presidentit historik të Kosovës Ibrahim Rugova me të Dërguarin e Posaçëm për Kosovën të Presidentit të SHBA Bill Clinton, Senatorin Amerikan Robert Doll, ishte edhe një paralajmërim lirie. Takimi shumë i rëndësishëm u mbajt në Shkup, pasi regjimi kriminal okupator serb e kishte pamundësuar në Prishtinë.

Ishte koha kur konferenca ndërkombëtare për Kosovën – Konferenca e Rambujesë, e nisur në 6 Shkurt 1999,  u ndërpre në 23 Shkurt pa rezultate përfundimtare, ndërsa vazhdimi i saj u thirr për datën 15 Mars në Paris.

Presidenti historik, Dr. Ibrahim Rugova,  në Prishtinë i kthyer nga Rambujeja e para nisjes përsëri për atje drejt Parasit në një konferencë shtypi në 5 Mars paralajmëronte nënshkrimin  para 15 Marsit 1999 të Marrëveshjes së Rambujesë, për të cilën një ditë më vonë dha miratimin edhe Kuvendi Republikës së Kosovës së Deklaratës së 2 Korrikut e Kushtetutës së 7 Shtatorit 1990. Në konferencën për shtyp ku ishte edhe korrespondenti tash i Gazetës DIELLI, Presidenti Rugova paralajmëronte edhe vendosjen e NATO-s në Kosovë…

Presidenti Amerikan Bill Clinton, në 1 Nëntor 2009, në fjalën e tij në Kuvendin e Kosovës, por edhe në sheshin me emrin e shtatoren e tij në Prishtinë, ka përkujtuar Presidentin e Kosovës, Ibrahim Rugova dhe një gurë kristali të cilin ai ia kishte dhuruar. 
“Ai gurë kristal të cilin ma dha Rugova i është dhuruar një universiteti, por për një kohë ai ishte i njohur edhe në SHBA me emrin ‘Guri i Rugovës’”, ka thënë Presidenti amerikan Clinton. 
Ai ka treguar se është rritur në një vend që ka gjeologji të ngjashme me Kosovën, në Arkanzas. “Atëherë, ai (Rugova), më tha se duhet të na ndihmosh”,  ka përkujtuar ish-Presidenti i SHBA-ve Bill Clinton.

 Presidenti amerikan Clinton me rastin e shuarjes në 21 Janar 2006 të Presidentit kosovar Rugova shprehej: “Kam pasur nder ta mbështes luftën e tij për paqe dhe liri”…

*Me shume fotografi gjeni ne Facebook-Gazeta Dielli

Manhattani kuq e zi për Çamërinë Martire

by

Nga Keze Kozeta Zylo/

Manhattani çdo vit vishet kuq e zi nga shqiptarët e Diasporës të organizuar nga “Rrënjët Shqiptare” me president z.Marko Kepi si dhe stafin e tij si Nik Beqaj zv/president, Besmir Buranaj Hoxha etj. 

Manhattani një herë në vit mirëpret gjithë shqiptarët për të vërshuar në rrugën kryesore “Amerika”, 6 Avenue, për Paradën Internacionale që organizohet për emigrantët e të gjitha kombësive.

Mijëra shqiptarë me simbolet kombëtare, flamujt kuq e zi, me veshjet tradicionale dhe elegante të grave dhe burrave morën pjesë në një manifestim madhështor në Manhattan.  Çdo Paradë shqiptare i është kushtuar një kauze të rëndësishme kombëtare, sivjet i kushtohej Çamërisë martire, genocidit grek me në krye gjeneralin famëkeq Napoleon Zerva të cilët dëbuan me dhunë, vranë, masakruan, përdhunuan qindra gra, vajza dhe fëmijë nga tokat shqiptare çame.  Sot Çamëria ndodhet nën Greqinë dhe është mohuar me dhunë historia martire çame. 

Marshalli i Paradës ishte gazetari i shquar Marin Mema I cili ka dhënë nje kontribut tejet të vyer për historinë kombëtare.  Presidenti i ogranizatës “Rrënjët Shqiptare” z.Marko Kepi e prezantoi me plot respekt dhe dashuri dhe midis të tjerash tha se gazetari Mema është non grata në Greqi dhe Serbi, ngase emisionet e tij dokumentare zbulojnë të vërtetën e hidhur historike rreth historisë së shqiptarëve në Çamëri dhe Kosovë. 

Gazetari Marin Mema u mirëprit me entuziazëm, oratoria e tij dhe mesazhi ishte i qartë të qëndrojmë të bashkuar, të luftojmë për tokat tona, të njihet historia e mohuar si historia çame për të cilën dhe jemi mbledhur sot këtu në zemër të Amerikës në Manhattan…

Me duartrokijte u mirëpritën në skenë z.Sali Bollati që ishte njëkohësisht dhe marshall nderi si dhe i lindur dhe rritur në Çamëri.  Z.Bollati është një avokat i denjë i çështjes çame dhe tërë jetën e tij ka luftuar që kurrë historia të mos I harrojë krimet çnjerëzore qëu ushtruan në familjen e tij si dhe në gjithë Camërinë. Sali Bollati që 7 vjeç pa me sytë e tij krimet çnjerëzore, masakrat brutale duke dëbuar me dhunë mijëra çamë, banorë të Çamërisë, nga shtëpitë e tyre ku kishin jetuar me shekuj dhe i nxorrën jashtë kufirit mbasi u kishin rrëmbyer tokat dhe pasuritë.  Të vrarët të gjakosurit, ishin fëmijë dhe pleq.  

Oratorët kryesorë ishin si ish kongresisti amerikan, Arbëreshi Joe Di Guardi, burri që tronditi Hitlerin e Ballkanit Sllobodan Milloshevicin, Miss Nju Jorku Florinda Kajtazi, znj.Nazo Veliu me origjinë çame dhe sekretare e organizatës Pan Shqiptare “Vatra”, Ilir Ademi Kryetar I Organizates “Çamëria” Amerikë etj… 

U falënderuan donatorët për organizimin e Paradës, por ajo që do të më ngelet në mendje ishte donacioni i prof.Sami Repishtit, shqiptari që u persekutua në diktature dhe arriti të jetë në Amerike elita intelektuale, donacioni i Tij nuk ishte mijëra dollarë ishte vetem 20 dollar, por mesazhi i Tij ishte për çështjen kombëtare, atë 20 dollar Rrënjët Shqiptare do ta ruajnë përgjithmonë në arshivën e tyre.  Biznesmeni dhe burri patriot Bruno Selimaj u falënderua si donator, ai nuk mbajti fjalim me fjalë të mëdha, por i foli shpirti dhe zemra duke thënë se: Unë nuk flas me fjalë të bukura, nuk jam orator, por aman Atdheun e dua shumë…

Presidenti Marko Kepi falënderoi z.Sevdai Kastrati për gazetën “Zëri i Çamërisë” si dhe shpërndau tek shqiptarët Hartën Etnike të Kombit, sensibilizim për gjithë Shqiptarët anë e mbanë botës se: Bashkimi i Kombit do të realizohet së shpejti…

Programin e aktiviteteve e drejtoi artisti i shquar Frederik Ndoci.  Në këtë paradë disa grupe valltarësh të veshur me kostumet tradicionale kërcyen valle çame dhe nga trevat shqiptare të cilët ishin përgatitur nga Angjelina Nika.  Valentina Veizaj që po rritet në paradë këndoi këngë shqiptare dhe u mirëprit me duartrokitje. Grupi cheerleader kuq e zi ishte pergatitur nga znj.Aferdita Delaj.

Në këtë paradë morën pjesë disa organizata shqiptaro-amerikane si organizata më e vjetër shqiptare Vatra me kryetar te saj z.Dritan Mishto.  Në makinën e tyre sivjet ishin nxënësit e Shkollës Shqipe “Alba Life”, të cilët për më shumë se një muaj rresht u pëgatitën me projekte për Çamërinë, ndërkohë u bë mësim i hapur rreth historisë së Çamërisë, në të cilën nderoi me pjesëmarrjen e tij gazetari i shquar, marshall i Paradës Marin Mema.

Gjithashtu në këtë paradë morën pjesë shoqatat shqiptaro amerikane si: “Skenderbej”, “Ana e Malit”, “Plavë e Gucia”, “Kraja”, “Dibra”, “Albanian Youth Center”, “Bijtë e Shqipes”, “Albanian Excellence” etj, personalitete të larta, grupe shqiptarësh, familje të ndryshme të cilët me plot entuziazëm përcollën oratorët me fjalimet e tyre si dhe parakaluan përgjatë bulevardit “Amerika” me plot krenari dhe dashuri për Kombin.

Manhattani u ndez kuq e zi, flakë për Çamërinë Martire nga Rrënjet Shqiptare dhe gjithë shqiptarët e Diasporës.

Së shpejti TV “Alba Life” do të transmetojë aktivitetin në kanalet televizive. 

Autorja është shkrimtare, publiciste, gazetare për TV “Alba Life”, mësuese dhe themeluese e Shkollave Shqipe në New York

8 Qershor, 2019

Manhattan, New York

MYSAFIRË NGA TETOVA VIZITUAN VATRËN

by

– Prof. Dr. Luljeta ISAKU e Universitetit të Tetovës i dhuroi Bibliotekës së Vatrës kolanën prej 12 librash të shkrimtarit të njohur tetovar Murat Isaku./

Dy intelektualë të njohur nga Tetova, Prof.Dr. Luljeta Isaku, ligjëruse shumëvjeçare në Universitetin e Tetovës së bashku me Prof. Dr. Qerim Kamberi, vizituan Vatrën në mbrëmjen e së Mërkurës, 5 Qershor 2019. Ata u pritën nga sekretarja e Vatrës Nazo Veliu, anëtari i kryesisë së Vatrës , njëkohësisht kryetar i degës së Vatrës në Queens, Dr. Skënder Murtezani me bashkëshorten Linda. Në takim ishet dhe anëtari i kryesisë së degës së Vatrës së Queensit Veiz Belliu. Sekretarja e Vatrës u uroi mirëseardhjen në Vatër mysafirëve dhe u prezantoi veprimtaritë e Federatës Pan Shqiptare të Amerikës VATRA.

Dr. Skënder Murtezani informoi rreth veprimtaritë të degës së Vatrës së Queensit, lidhjet me komunitetit, bashkëpunimin e ngushtë me studentët shqiptarë që studiojnë në universitetet amerikane dhe përfshirjen e tyre në veprimtaritë të karkaterit kombëtar dhe kulturor të degës së Vatrës.

Editori i Diellit, Dalip Greca, përcolli një historik të shkurtër të Vatrës dhe informoi për festimet e 110 vjetorit të Gazetës DIELLI.

Prof. Dr. Luljeta Isaku dhe Prof. Dr. Qerim Kamberi falenderuan për mikpritjen në Vatër.

-E kam passë ëndërr një vizitë në Vatër, tha zonja Isaku. Jam e dashuruar me veprën dhe figurën kombëtare të Fan S. Nolit, prandaj mezi e prita këtë takim. Shkuam edhe në Boston, ku bëmë homazhe tek varri i Imzot Nolit, tha ajo.

Më pas profesorja e Letërsisë,  u interesua se përse eshtrat e Nolit nuk i dërgohen për tu prehur në Shqipëri, atje ku po prehet miku i tij, bashkëthemelusi i Vatrës Faik Konica.

Dr. Skënder Murtezani shfaqi pikpamjen e tij dhe degës që drejton, duke shpresuar se një ditë Noli do të shkoi në Shqipërinë, që e deshi fort dhe i kushtoi jetën e tij.

Prof. Dr. Luljeta Isaku vizitoi bibliotekën e Vatrës dhe i dhuroi editorit kolanën e veprës së plotë të babait të saj, shkrimtarit të njohur, Murat Isaku.

Shkrimtari Murat Isaku, u lindi në Gajre të Tetovës më 1928 dhe ndërroi jetë në moshën 77 vjeçare në Tetovë në vitin 2005. Sipas jetshkrimit, ai Mësoi në Tetovë, Elbasan, Prishtinë, Prizren etj

 Punoi si profesor i gjuhës shqipe në gimnazin e Tetovës dhe më tej u emërua zv. drejtor i kësajë shkolle. Një pjesë e veprimtarisë së tij përfshinë punë disavjeçare si redaktor i TV Shkupit për emisionet e gjuhës shqipe, ku dhe doli në pension.

Shkrimtari i njohur Murat Isaku shkroi për dashurinë dhe për qëndresën; ai përcolli mesazhe jetësore, dhe kishte moto të krijimtarisë: Letërsia ruan dhe i shërben identitetit kombëtar, kulturor e gjuhësor. Në veprën e tij, që tash e kemi të plotë në bibliotekën e Vatrës, trajtohet tema e qëndresës, e burgut, ku të burgosurit politikë shqiptarë dënoheshin pa faj me akuza të fabrikuara, tema e dashurisë etj. Një vend të rëndësishëm në kolanën e veprës së tij i kushtohet  tokës, vendlindjes dhe familjes..

Siç kanë shkruar studiuesit, Murat Isaku “krijoi një kështjellë monumentale artistike, të ëndërrt e flatërore, duke përdorur shajni e makthe, hije e delire, dhembje dhe zhgënjime, tragjikë e groteskë. Murat Isaku krijoi një vepër të thellë e shumëdimensionale.”

Ai u vlerësua për talentin dhe shpirtin e veçantë poetik. Njihet si romancier me stil të veçantë dhe është kurdoherë poet edhe kur shkruan romae. Pra lëvroi prozë poetike. Shkrimtari Murat Isaku, nuk e braktisi asnjëherë poezinë.

Prof. Dr. Luljeta Isaku, bëri këtë shënim shoqërues në librat që dhuroi: VATRËS, në shenjë të mirënjohjes për kontributin e çmuar që i ka dhënë Lëvizjes Kombëtare Shqiptare si dhe për zhvillimin e mendimit politik shqiptar.

Ia dhuroj Bibliotekës së Federatës Pan Shqiptare të Amerikës VATRA kompletin e veprave të babait tim, shkrimtarit Murat Isaku.

Kolana e veprës së shkrimtarit Murat Isaku, që iu dhurua bibliotekës së Vatrës përbëhet nga:

1- Vepra e Parë: POEZI-2- PLAGËT-Roman 3- RRENGU-Roman 4-Rreckajt-Roman 5-ETJE-Roman 6-DAMKAT-Roman 7-FATPRERËT-Roman 8-BANESA NË KATIN E TRETË-Roman 9-SHTJELLA-Roman 10-SHESHTINA-Roman 11-GËRSHETAT-Roman 12- DOLLA E FUNDIT- Ku përmblidhet një studim rreth veprës së shkrimtarit Murat Isaku, shkruar nga Prof. Dr. Xhevat Gega, ndërsa 140 faqe e tjera të këtij libri janë me poezi, që përfshihen në ciklin “Njeriu pa biografi”. Vepra e plotë është përgatitë për botim nga Ali Aliu dhe Xhevat Gega.

PS: Per me shume foto shkoni ne Facebook

(D G- Gazeta DIELLI)

GAZETARI MARIN MEMA NE VATER

by

Sot gazetari që ka vënë në lëvizje atdhetarizmin e diasporës shqiptare të Amerikës, Marin Mema i Top Channal, isht në Vatër. Ai shoqërohej nga Presidenti i Albanian Roots”Rrënjët Shqiptare” Marko Kepi. Për një javë nëpër treshteshin po organizohet Java Shqiptare, që ka si promotor Rrënjët Shqiptare. Gazeta Dielli ka ndjekur hap pas hapi Javën shqiptare me anë të editores të sec anglisht Rafaela Prifti dhe ëshët pasqyruar në Dielli online(ëëë.gazetadielli.com) dhe në Facebook(Gazeta Dielli).

 Për ta pritur gazetarin që është identifikuar me emisionin”Gjurmë Shqiptare” duke përcjellë të vërteta të harruara, të hidhura për fqinjët tanë , por dhe për qeveritarët e politikanët tanë, që tregohen zëmekur përballë të vërtetave të hidhur të viseve të tretura shqiptare,- kishin ardhë në Vatër; sekretarja Nazo Veliu, anëtarët e kryesisë Marjan Cubi dhe Dr. Skënder Murtezani, anëtarët e Këshillit: Idriz Lamaj, Ramiz Mujaj, Mark Mrnacaj, Anton Raja, Pashko Camaj, editorët e Diellit Ela Prifti dhe Dalip Greca,por ai që ra më shumë në sy ishte i menaxheri i veprimtarive kulturore dhe artistike në Vatër, Frederik Ndoci, i veshur me kostumin karakteristik cam, me fustanellën që u kujton shqiptarëve mbërritjen e Faik Konicës në Amerikë në tetor 1909. Të gjithë kanë nxituar që të kenë një fotografi me Frederikun e veshur hijshëm me kostumin e sjellë nga Edlira Sulaj.

Gazetari Mema është pritur me shumë interes nga vatarnët dhe secili prej tyre e ka përgëzuar për emisionet e bukura historike nëpër trojet kombëtare. Idriz Lamaj, Nazo Veliu, Pashko Camaj, Skënder Murtezani, Mark mrnacaj,  dhe secili prej të pranishmëve i përmend dokumentarin që ka i ka pëlqyer më shumë.

Gazetari Mema ka biseduar lirish me vatranët dhe u është përgjigjur pyetjeve të tyre. Më pas rreth tryezës së Vatrës është biseduar për diasporën dhe për Vatrën, vecanërisht për 50 vjetorin e paradës së shqiptarëve të Amerikës dhe arbëreshëve të Italisë nën drejtimine  Vatrës, në nëntor 1969.

Gazetari Marin Mema ka intervistuar editorin e Diellit për 50 vjetorin e Paradës së parë të përbashkët të arbëreshëve dhe vatranëve nën drejtimin e Vatrës, organizuar me 28 Nëntor 1969, me rastin e 60 vjetorit të gazetës DIELLI.(per me shume fotografi shihni ne Facebook)

MBREMJA PER ÇAMERINE NE KOLEGJIN SAINT FRANCIS – MESAZHI PER DIASPOREN

by

Nga RAFAELA PRIFTI/

“Bashkimi i diasporës shqiptare është formula e suksesit për të ardhmen tonë.” Marin Mema/

5 Qershor – Mbrëmja për Çamërinë në Kolegjin Saint Francis në Bruklin e organizuar nga disa studentë veprimtarë nga Rrënjët Shqiptare u përcoll nga pjesëtarë të shoqatave e aktivistë të komunitetit, që përkujtuan ngjarjet e paratreçerek shekulli dhe rëndësinë e tyre për historinë tonë sot.

I ardhur nga Shqipëria për javën kombëtare të komunitetit tonë, gazetari i Top
Channel Marin Mema, i ftuari i nderit, përshëndeti nismën e
presidentit të organizatës Rrënjët Shqiptare, Marko Kepi, i cili për herë të dytë e manaxhon zyrtarisht paradën për komunitetin shqiptar. Me këtë veprimtari kushtuar Çamërisë demonstrohet edhe forca e diasporës kundrejt qëndrimit anti-kombëtar të qeverisë së Tiranës dhe qeveritarëve të shitur. “Koordinimi midis shoqatave dhe grupimeve të komuniteteve shqiptare është kyçi i një diaspore të fuqishme,” tha gazetari Mema. Ndërsa për të përkujtuar masakrat mbi popullsinë çame një fillim i mirë do ishte paraqitja e dokumentacioneve përkatëse tek institucionet e drejtësisë, komentoi ai, ndërkohë që shteti shqiptar nuk ka ngritur asnjë moment a përmendore në Shqipëri kushtuar këtij kapitulli të dhembshëm të historisë sonë. Pyetjet nga salla e theksuan mungesën e ndjeshme të vëmendjes së institucioneve shtetërore ndaj trevave historikisht shqiptare, dhe vlerësuan fokusin e autorit të serialeve dokumentare prestigjioze tek këto tema me vlera atdhetare. Folësi i dytë ishte aktivisti Sali Bollati, autor i librit Çamëria – Krahina më Jugore e Trojeve Etnike Shqiptare (2018), i cili kur ishte shtatë vjeç ka qenë dëshmitar i masakrave ndaj shtatë pjesëtarëve të familjes së tij. Si njohës i artikuluar i çështjes çame, ai argumenton se shovinizmi grek duke vënë në shërbim kishën ortodokse ushtroi terror kundër popullsisë shqiptare të Çamërisë në Shqipëri në periudhën e sundimit komunist. Në periudhën e neokomunizmit që vazhdon edhe sot, vërejti z. Bollati, klasa politike e Shqipërisë i ka dhënë përkrahje të plotë Athinës dhe është vënë në shërbim të politikës anti-shqiptare dhe anti-kombëtare të shovinizmit grek,

Përpara të pranishmve, studentja Melita Çekani nga Gjirokastra, e cila
kryen studimet në Degën Art dhe Arkitekturë në Nju York, dhe anëtare
tek Rrënjët Shqiptare, i dhuroi z. Sali Bollati nje tabllo ku
paraqitej Kulla e Bollatajve. Melita Çekani i tha Diellit se ishte e
prekur nga historitë e dhembshme të popullsisë çame të shpërngulur me
forcë nga tokat e pronat e veta dhe donte t’i dhuronte z. Bollati një pikturë
ku paraqitet kulla e familjes së tij në Paramithi. Ajo kishte punuar
disa muaj për pikturat e ekspozitës të paraqitura në mbrëmjen kushtuar
Çamërisë në Saint Francis College, në ditën e pestë të javës shqiptare.
Në programin artistik të mbrëmjes ishin paralajmëruar Gjilberta Luca në piano dhe violincel, dhe këngëtarë si Lindita Mezini Lole, Ilsi Ademi, por vëmendjen e publikut e tërhoqi Frederik Ndoci, i veshur me kostum popullor të burrave të një ane të Çamërisë, i cili vinte aty nga takimi me gazetarin Marin Mema në selinë e Federatës Vatra në Bronks. (lexo Dielli online)

Me fustanellën karakteristike, me gjunjake e xhamadan, me qeleshe me majucë e opinga me xhufkë të kuqe. anëtari i Këshillit Drejtues të Vatrës, Frederik Ndoci, tregoi për lidhjet midis vendlindjes së tij Shkodrës dhe Çamërisë dhe këndoi këngë të krahinës. Kostumet e disa krahinave tona të punuara me kujdes i ka sjell në Nju Jork Edlira Sula nga Tradita Popullore me përkrahje nga shoqata patriotike Çamëria.

Tri studentë të kolegjit Saint Francis ishin organizatorët e takimit të mbrëmshëm, Kledi Roda, Fatime Dukova, dhe Arkelino Hila, përkatësisht Presidente dhe Zv. President të shoqatës Albanian Roots për Saint Francis College. Arkelino i tha Diellit se ishin të kënaqur që puna e tyre disajavore për mbrëmjen për Çamërinë doli me sukses. Të gjithë organizatorët, aktivistët dhe vullnetarët shprehën entusiazëm për paradën në 8 qershor.