Featured – Page 35 – Dielli

Mirënjohje përjetë Senatorit Bob Dole

February 3, 2023 by s p

Shqiptaro-Amerikanët nderuan Senatorin Bob Dole mikun e madh të kombit shqiptar, në 1 vjetorin e largimit në amshim. Mirënjohës për përkushtimin e tij të pandërprerë dhe punën e palodhur për popullin shqiptar, posaçërisht për Kosovën përgjatë tridhjetë viteve të shërbimit të tij si lider i Senatit, burrë shteti dhe hero amerikan. Nderimi prej personaliteteve të shquara Shqiptaro-Amerikane u zhvillua, në Arlington pranë vendit ku pushon përjetësisht. Në respekt, vlerësim, mirënjohje e përkujtim të Senatorit Bob Dole, miku dhe bashkëpuntori i tij i ngushtë Jim Xhema i shoqëruar nga veprimtarë aktivë dhe historikë të komunitetit Shqiptaro-Amerikan bënë homazhe tek varri i tij në varrezat kombëtare. Ky 2 shkurt shënon një vjetorin e lamtumirës së përjetshme të Senatorit Bob Dole. Ai pushon në Varrezat Kombëtare në Arlington, vendin e përmotshëm të heronjve amerikanë. Senatori Dole, si kryesues i Senatit së bashku me 7 Senatorë në vitin 1990 vizitoi Kosovën ku u prit nga Presidenti Rugova dhe liderë të shqiptarëve ku dha zotimin para përfaqësuesve të pushtetit serb se ndryshimi po vjen. Nga kjo vizitë në Kosovë filloi bashkudhëtimi i Amerikës dhe Kosovës që kulmoi me çlirimin dhe pavarësimin e Kosovës prej okupatorit serb. Respekt e lavdi Senatorit Bob Dole. Mirënjohje të përjetshme Shteteve të Bashkuara të Amerikës.

VATRA DHE SHOQATA E SHKRIMTARËVE SHQIPTARO-AMERIKANË PROMOVUAN 4 VEPRA TË PROF. BESIM MUHADRIT

January 30, 2023 by s p

Sokol Paja/

New York, 29 Janar 2023- Federata Pan-Shqiptare e Amerikës VATRA në bashkëpunim me Shoqatën e Shkrimtarëve Shqiptaro-Amerikanë promovuan në Selinë Qëndrore të Vatrës katër vepra shkencore dhe publicistike të Prof. Asoc. Dr. Besim Muhadrit, profesor në Universitetin “Fehmi Agani” në Gjakovë dhe anëtar i Shoqatës së Shkrimtarëve Shqiptaro-Amerikanë.

Me pjesëmarrjen masive të vatranëve, shkrimtarëve, studiuesve, veprimtarëve të çështjes kombëtare, kryetarëve e përfaqësuesve të shoqatave kryesore shqiptare në New York e më gjërë, veprat:

1. “Shtjefën Gjeçovi dhe Kanuni i Lekë Dukagjinit”;

2. “Profesor Rexhep Krasniqi-Një jetë në shërbim të Shqipërisë etnike”;

3. “Esencat e mendimit letrar” dhe

4. Studies on Albanian Literature and Ethnology, u priten me respekt, vlerësim, sukses dhe interes të madh nga publiku shqiptaro-amerikan. Nën prezantimin e Mëhill Velaj, kryetar i Shoqatës së Shkrimtarëve Shqiptaro-Amerikanë, fjalën përshëndetëse në emër të Vatrës e mbajti Dr.Pashko Camaj i cili theksoi rëndësinë historike dhe shkencore të botimeve që u promovuan në Vatër. Shpend Gjocaj lexoi një pjesë nga libri i Besim Muhadrit dhe falënderoi profesorin për punën e shkëlqyer dhe përpjekjet për lirinë e Kosovës. Në fillim të ceremonisë të pranishmit kujtuan me një duartrokitje ditëlindjen e 87-të të gjeniut të letrave shqipe Ismail Kadare. Ambasador Frymëzim Isufaj i ardhur ekskluzivisht nga Uashingtoni për promovimin ndër të tjera tha se veprat që promovohen sot, janë një punë e zellshme, një trashëgimi e madhe dhe e rëndësishme për letërsinë, historinë dhe shqiptarët e diasporës. Adnan Mehmeti Presidenti i Shoqatës së Shkrimtarëve Shqiptaro-Amerikanë foli rreth vlerës së studimeve të Prof.Besim Muhadrit dhe botimet rreth Albumit të Nolit, Mëhill Velajt e Namik Selmanit. Dr. Bexhet Asani në kumtesën e tij u ndal te rëndësia e Kanunit të Lek Dukagjinit. Studiuesi Dr. Paulin Marku në fjalën përshëndetëse të lexuar nga Editori i Diellit u shpreh se Prof. Besim Muhadri është nje nder kërkuesit që ka bere një pune cilësore, kërkimore shkencore dhe parashtron një bibliografi te gjere për te trajtuar një periudhe te rëndësishme historike të përdorimit të kanunit të leke Dukagjinit. Pra, Muhadri bën nje analize të veprës “Kanuni i Leke Dukagjinit” për të bere të njohur në mënyrë të përmbledhur vlerat dhe risitë e këtij studimi. Kumtesa e Idriz Lamajt lexuar nga Editori i Diellit fokusohet te puna e jashtëzakonshme e Dr.Rexhep Krasniqit dhe Komitetit “Shqipëria e Lirë” në ndërkombëtarizimin e çështjes së Kosovës. Studiuesja Valdete Dida Cenalia kumtoi rreth rolit të Rexhep Krasniqit për Shqipërinë natyrale. Kritiku letrar Pal Ndrecaj diskutoi rreth rëndësisë së krijimtarisë letrare dhe studimore të të katër librave të Prof. Besim Muhadrit. Studiuesja Arjeta Ferlushkaj i bëri një analizë cilësore dhe sasiore krijimtarisë së plotë të Prof. Muhadrit dhe u ndal te shikimi i Kanunit në disa perspektiva studimore. Shkrimtari Tom Paloka recitoi 2 poezi kushtuar Rexhep Krasniqit dhe Shtjefën Gjeçovit. Në fund të promovimit, piktori skenograf z.Astrit Tota i dhuroi një pikturë Prof.Besim Muhadrit në shenjëvlerësimi mbi krijimtarinë e tij në fushën e albanologjisë dhe historisë kombëtare.

Në fjalën përmbyllëse Prof. Besim Muhadri falenderoi organizatorët, referuesit, pjesëmarrësit dhe

shpjegoi në detaje peripecitë e punën voluminoze në përgatitjen e katër botimeve që u promovuan në Vatër. Ai falenderoi në mënyrë të veçantë studiuesin Idriz Lamaj dhe Ambasador Frymëzim Isufaj. Promovimi u mbyll me dhurimin e librave me nënshkrimin e autorit dhe një koktejl të përgatitur nga patrioti fisnik Toni Musaj. Vatra e Dielli shprehin mirënjohje dhe falenderim për gazetarët Adem Belliu, Halil Mula dhe Beqir Sina që ndjekin me profesionalizëm të lartë aktivitetet e komunitetit shqiptar në Shtetet e Bashkuara të Amerikës.

VATRA PROMOVOI “DIKTATI I ADM NË LUFTËN E FTOHTË E PAS SAJ”, BOTIM I GJENERAL ASLLAN BUSHATIT MBI ARMËT BËRTHAMORE DHE SIGURINË KOMBËTARE

January 26, 2023 by s p

Sokol Paja/

New York, 25 Janar 2023- Federata Pan-Shqiptare e Amerikës VATRA promovoi librin e gjeneral Asllan Bushatit “Diktati i ADM në luftën e ftohtë e pas saj”. Në Selinë Qëndrore të Vatrës, me pjesëmarrjen e gjërë të vatranëve, ekspertëve të sigurisë kombëtare, të kimisë ushtarake, profesorëve, specialistëve të fushës, veprimtarëve e aktivistëve të komunitetit shqiptar në Shtetet e Bashkuara të Amerikës, promovimi u kthye në një festë libri duke lënë mbresa të veçanta te të gjithë pjesëmarrësit. Nën prezantimin e Editorit të Diellit, Presidenti i Nderit të Vatrës z.Agim Rexhaj në fjalën e tij vlerësoi kontributin e Gjeneral Bushatit në vitin 97-të në Shqipëri, në fushatat në USA për senatorë e kongresmenë, në ngjarjet e Vatrës e komunitetit shqiptar ku z.Bushati ka marrë pjesë aktivisht. Z.Rexhaj vlerësoi vlerat e z.Bushati si mik i Doktor Berishës e Doktor Rugovës. Në fjalën përshëndetëse të kryetarit të Vatrës z.Elmi Berisha lexuar nga Dr. Pashko Camaj vlerësohet risia në publikimin e z.Bushati. “Si kuadro i lartë ushtarak, si nënshtetas dhe Vatran i vetëdijshem, Asllan Bushati e kupton sesa e rëndësishme është të kemi njohuri të sakta dhe të jemi sycelët në situatat aktuale për vendin dhe mbarë botën” thuhet në mesazhin e z.Berisha. Prof. Muharrem Dëzhgiu në promovim tha se kurorëzohet një punë shumëvjeçare e një përvoje tepër të gjatë në fushën e ushtrisë. Vlerësoi stilin e gjuhën e librit. Bashkim Shehu, ish-zv.Ministër i Mbrojtjes së Republikës së Shqipërisë në vitet 1993-97-të në fjalën e tij deklaroi se Gjeneral Bushati ka qenë një nga ushtaraket më eurodit të Ushtrisë Shqiptare, udhëheqës i shquar i Armës së Kimisë në Ushtrinë Shqiptare, një nga udhëheqësit kryesorë dhe më largpamës në hartimin e strategjive dhe rregulloreve të transformimit mjaft të suksesshëm të Ushtrisë Shqiptare, tha z.Shehu. Gjeneral Major Armand Vinçani në kumtesën e tij të lexuar nga Ornela Beshiri theksohet se në libër zë vend të rëndësishëm identifikimi, analiza, fakte, e konkluzione lidhur me çfarë ndodhi me lëndët e dëmtimit në masë në Ushtrinë serbe pas shpërbërjes së ish-Jugosllavisë. Gjeneral Bushati argumenton dhe sjell në vëmendje të lexuesit faktin që sot ushtria serbe posedon resurse të frikshme militaro-kimike e si shtet demonstron tendencë të dukshme për zhvillimin e tyre duke arritur në nivele operative-strategjike në një përdorim të mundshëm, sidomos ndaj Kosovës dhe Shqipërisë. Studiuesi Dr. Paulin Marku në kumtesën e tij shkencore u ndal te risia e librit në fushën e sigurisë, faktet që sjell si botim, analiza, stili e gjuha, gara dhe fuqia e shteteve në luftën për armët bërthamore. Kolonel Ramazan Beshiri ish-kryeinxhinjer i Laboratorit Kimik të Ushtrisë foli për Armët e dëmtimit në masë dhe pasojat e pa rikuperueshme për njerëzimin. Z.Muhamet Omari foli për politikat agresive të shteteve të fuqishme dhe rreth pasojave katastrofike të armëve të shkatërrimit në masë, dhe bëri një interpretim moral, politik dhe ushtarak të çështjeve të sigurisë. “Ky libër ka informacion të jashtëzakonshëm prej një eksperti të lartë të ushtrisë” tha z.Omari. Kryetari i Nderit të Shoqatës Skënderbej ushtaraku i lartë z.Mark Qehaja u shpreh se libri i Asllan Bushatit është referencë për studiuesit e sigurisë, botën e studimeve ushtarake dhe publikun e gjërë. Z.Qehaja vlerësoi punën e shkëlqyer të Gjeneral Asllan Bushatit në Ushtrinë shqiptare dhe komunitetin shqiptar në Shtetet e Bashkuara të Amerikës. Në fjalën përshëndetëse të studiuesit Idriz Lamaj lexuar nga mjeshtri i fotografisë Bujar Verzivolli u tha se libri është një kontribut për të informuar masat e gjera të popullit shqiptar se në çfarë gjendje mbrojtëse ndodhet populli jonë në atdheun etnik, në rast të një kërcënimi me lëndë kimike nga vendet fqinje, të cilat shekuj me radhë kanë treguar urrejtje për vdekje ndaj kombit tonë. Në fjalën përshëndetëse të Frank Shkrelit e cila u lexua nga Bujar Verzivolli, rëndësia e librit është e veçantë pasi shumë prej nesh nuk jemi të mirë informuar për këtë rrezik që vjen nga armët bërthamore, kimike dhe biologjike e me të cilin përballet njerëzimi, jo vetëm nga regjime diktatoriale por edhe nga grupe terroriste, anë e mbanë botës, që mund t’i blejnë ato armë nga shtete diktatoriale, siç mund të ketë ndodhur në të kaluarën, thuhet në fjalën e z.Shkreli.

Mark Gjonaj në fjalën e tij përshëndetëse të lexuar nga Marin Tukaj deklaroi se: “Libri që po promovoni është një dëshmi e dimensionit të tij intelektual, duke informuar rrezikun e armëve dhe dëmtimin që japin ato në përdorimin në masë (bërthamore; kimike e biologjike). Autori ndër të tjera përmend rrezikun e armatimit kimik të Serbisë që përbën një rrezik për trojet Shqiptare” thuhet ndër të tjera në fjalën e z.Gjonaj.

Në përfundim të ceremonisë së promovimit gjeneral Asllan Bushati falënderoi të pranishmit, tregoi rrugëtimin e tij në Ushtrinë shqiptare dhe ekspozoi rrugën e gjatë të daljes në shtyp të librit të tij. Rrëfeu përgatitjen e një materiali Top-Sekret për Armët kimike shqiptare. Ai u ndal te terrorizmi, rreziku i lëndëve helmuese, lufta kibernetike dhe u fokusua te:

Ndotja, rrezatimi, kriza e ushqimit dhe shpopullimi. Ceremonia e promovimit përfundoi me një koktejl të përgatitur nga patrioti fisnik Toni Musaj ku të gjithë pjesëmarrësit qëndruan deri vonë në biseda vëllazërore në Vatrën e shqiptarisë.

Federata Vatra dhe gazeta Dielli falënderojnë TV Kultura Shqiptare për dedikimin dhe përkushtimin e z.Adem Belliut në dobi të Vatrës dhe komunitetit shqiptar në Shtetet e Bashkuara të Amerikës.

Unioni i Gazetarëve Shqiptarë dhe Vatra nderuan Dalip Grecën me çmimin “Karriera”

December 23, 2022 by s p

Sokol Paja/

New York, 22 Dhjetor 2022 – Unionin e Gazetarëve Shqiptarë në bashkëpunim me Federatën Pan-Shqiptare e Amerikës VATRA nderuan Dalip Grecën, Editorin e Diellit (2009-2021), Pas Vdekjes, me çmimin “Karriera”. Në një mbrëmje të veçantë nderimi e vlerësimi në Selinë Qëndrore të Vatrës, me pjesëmarrjen e shumtë të familjarëve, drejtuesve kryesorë të Vatrës, miqve, bashkëpunëtorëve, veprimtarëve të komunitetit e

vatranëve nga disa shtete të Amerikës, u kujtua me nderim, respekt dhe vlerësim puna dhe kontributi i Dalip Grecës në median shqiptare dhe komunitetit shqiptar në Shtetet e Bashkuara të Amerikës.

Çmimi “Karriera” iu dha Dalip Grecës me motivacionin: “Gazetar i njohur me një kontribut të shquar në shtypin e shkruar shqiptar të më shumë se katër dekadave të fundit. Me një këmbëngulje dhe pasion të vullnetshëm, la në koleksionin e gazetave vendore dhe kombëtare si dhe ndërkombëtare, materien e pasur shkrimore në disa zhanre të gazetarisë. Raportimet, shkrimet, intervistat dhe investigimet memorialistike të tij, përbëjnë një pasuri profesionale në shtypin shqiptar në tërësi. Kontributi si Editor i “Dielli ” të Vatrës është kulmi i kontributit të tij në diasporë dhe në publicistikën shqiptare”.

Agim Rexhaj, Presidenti i Nderit të Vatrës në fjalën e tij ndër të tjera tha: “Na mungon shumë Dalip Greca. Ai familjarisht u përkujdes për Vatrën e për Diellin. Ai na deshi shumë të gjithëve. Në zemrat tona do të jetë përjetë”. Sekretarja e Vatrës Nazo Veliu në fjalën e saj tha se Dalip Greca ishte gazetar profesionist dhe trim. “Sot i themi Dalipit dhe familjes së tij mirënjohje pa kufi për kontributin, rolin e tij në gazetari dhe përkushtimin ndaj komunitetit shqiptar në Shtetet e Bashkuara të Amerikës. Puna e Dalipit ishte heroizëm. Ai çoi zërin atje ku i dhëmb Shqipërisë e shqiptarëve” tha zonja Veliu. Dr. Pashko Camaj kujtoi në fjalën e tij se Dalip Greca la gjurmë të pashlyeshme për median dhe kombin tonë.

Kryetari i Vatrës z.Elmi Berisha para të pranishmëve tha se “Është nder dhe privilegj që punuam me Dalip Grecën. Ai me punën e tij la gjurmë të jashtëzakonshme në Vatër e tek Dielli. S’do ta harrojmë kurrë” u shpreh z.Berisha. Kryetari i Unionit të Gazetarëve Shqiptarë z.Aleksandër Çipa në fjalën e tij e cilësoi Dalip Grecën si një “Personalitet i shtypit të shkruar. Një gazetar dhe njeri që mishëronte dhe unifikonte në shtyp inteligjencën shqiptare dhe qasjet plurale. Ishte bashkëpunëtor dhe gazetar i shkëlqyer për gjithë gazetarët nga krejt hapësira shqiptare. Kontributi i gjatë i tij në gazetarinë memorialistike dhe atë historike ishte i veçantë. Dalipi do jetë një emër i dashur për emrat që do vijnë në media dhe kryesisht studentët e gazetarisë. Ai bëri një punë madhështore për koleksionin e Diellit” tha ndër të tjera Z.Çipa.

Në përfundim të ceremonisë së dorëzimit të çmimit “Karriera”, z.Çipa i dhuroi familjes Greca dy albume me këngë dhe recitime: “Këngët e atdheut tim” dhe “Recitime nga krijimtaria e Lefter Çipës” përgatitur nga “Nderi i Kombit” Bujar Asqeriu. Në emër të familjes Greca, falenderoi vajza e Dalipit Alma Greca Sharka e cila mes lotësh shprehu mirënjohjen dhe falenderimin familjar për respektin e vlerësimin që iu bë babait, Dalip Greca.

Përgjatë katër dekadave në gazetari, Dalip Greca ka lënë gjurmë të pashlyeshme në shtypin e shkruar dhe mediat televizive në Shqipëri, trevat kombëtare shqipfolëse dhe Shtetet e Bashkuara të Amerikës, duke promovuar gjuhën shqipe, kulturën, historinë, identitin kombëtar dhe çështjen shqiptare. Dalip Greca si gazetar dhe drejtues mediash, kultivoi një stil të veçantë dhe i dha përparësi qëmtimit të fakteve historike, figurave të harruara historike dhe gazetarisë dokumentare dhe arkivore. Dalip Greca ishte gazetar i guximshëm, kurajoz në trajtimin e temave të vështira, i ndershëm në trajtimin e fakteve e provave në gazetari, ishte menaxher i shkëlqyer dhe frymëzues për brezat e gazetarëve të rinj shqiptarë.

Dalip Greca kishte durim dhe maturi të spikatur në trajtimin e problemeve publike në të gjitha mediat ku kontribuoi si gazetar dhe drejtues mediash.

Ky vlerësim është një mirënjohje për trashëgiminë e shkëlqyer mediatike, qytetare dhe komunitare që Dalip Greca na la pas largimit të tij në amshim.

VATRA DHE SHQIPTARËT E AMERIKËS FESTUAN 110 VJETORIN E PAVARËSISË SË SHQIPËRISË DHE FESTËN E FLAMURIT KOMBËTAR

November 28, 2022 by s p

Sokol Paja/

Federata Panshqiptare e Amerikës Vatra bashkoi patriotët shqiptarë nga të gjitha shtetet e Amerikës, Kanadasë e Europës në New York dhe festuan me gëzim e madhështi 110 vjetorin e Pavarësisë së Shqipërisë dhe Festën e Flamurit Kombëtar. Me pjesëmarrjen ekskluzive të Ambasador Frenk Wisner, Konsullit të Nderit të Shqipërisë Ekrem Bardha, patriotit të madh Jim Xhema, ish-Kryeministrit të Kosovës Avdullah Hoti, Mark Gjonaj, Irfan Hysenbelliu, Harry Bajraktari e shumë personalitete të shquara të kombit tonë e bënë mbrëmjen patriotike të paharrueshme. Në një ceremoni mbresëlënëse patriotike: patriotë shqiptarë, autoritete fetare, veprimtarë, kontribues të çështjes kombëtare, përfaqësues të të gjitha shoqatave shqiptare, vatranë, media, familje patriotike shqiptare në diasporën e Amerikës, përfaqësues zyrtar shtetëror nga Prishtina e Tirana, deputetë, ish-kryeministra, ish-ambasadorë, profesorë, miq e të ftuar, festuan për orë të tëra nën tingujt e muzikës së mrekullueshme shqiptare me gëzim, krenari e vëllazëri. 28 Nëntori, festa e Flamurit Kombëtar si themeli dhe identiteti ynë kombëtar shqiptar bashkoi si kurrë më parë shqiptarët nën një flamur për të festuar dhe uruar njëri-tjetrin në ditën e lirisë së shtetit e kombit shqiptar. Pavarësia si datë e veçantë në kalendarin e shtetit dhe të kombit shqiptar ku Vatra ka meritë historike në të gjitha fazat historike ku ka kaluar shteti e kombi ynë. Nën drejtimin brilant të dr.Pashko Camaj, mbrëmja patriotike filloi me këndimin e dy himneve kombëtare të Shteteve të Bashkuara të Amerikës nga Mikela Nonaj dhe himinin kombëtar të Shqipërisë nga Gëzim Nika (Mjeshtër i Madh). Më pas fjalën e mori kryetari i Vatrës i cili u uroi mirëseardhjen të ftuarve dhe renditi në mënyrë kronolgjike rëndësinë e datës historike të 28 Nëntorit dhe kontributin e jashtëzakonshëm të Vatrës në dobi të shtetit e kombit shqiptar. Imam Edin Gjoni bekoi darkën e Pavarësisë dhe u ndal ndër të tjera te kontributi i burrave të shquar të kombit në pavarësinë e Shqipërisë dhe ndihmën e Shteteve të Bashkuara të Amerikës për çështjen kombëtare. Konsulli i Nderit z.Ekrem Bardha, Ambasador Frenk Wisner dhe Jim Xhema në fjalimet e tyre përshëndetëse për të pranishmit kaluan në retrospektive festimet e Pavarësisë së Shqipërisë, ndihmën që Shtetet e Bashkuara të Amerikës i kanë dhënë Kombit shqiptar sidomos në Pavarësinë e Kosovës dhe në mbështetjen e vazhdueshme të çështjes shqiptare në institucionet amerikane. Ata u ndalen dhe në kontributin dhe rolin e Vatrës si një instutucion i fortë atdhedashurie në mërgatën shqiptare të Amerikës, si një bashkësi patriotike historike në përpjekjen për shqiptarinë, historinë kombëtare të Shqipërisë dhe të Shteteve të Bashkuara të Amerikës. Këngëtarët Gëzim Nika (Mjeshtër i Madh), si drejtues artistik dhe kryetar i Darkës Gala organizoi dhe performoi në mënyrë të shkëlqyer bashkë me Grupin Rozafati të drejtuar nga koreografe Angjelina Nika (Mjeshtër i Madh), këngëtaret e mirënjohur Alberie Hadergjonaj, Barbana Dini, Argjend Lloga, duke e shëndërruar këtë festë patriotike në një natë magjike me mbresa të jashtëzakonshme te të gjithë pjesëmarrësit. Si kurrë më parë, Federata Panshqiptare e Amerikës Vatra udhëhoqi festimet dhe organizimet solemne të festimit të 110 vjetorit të Pavarësisë së Shqipërisë ku Vatra ka pjesën e saj të jashtëzakonshme në historinë e shtetit shqiptar, tregoi edhe këtë herë forcën, seriozitetin, shpirtin e saj patriotik në organizimet kombëtare në nder të flamurit e historisë sonë kombëtare. Federata Panshqiptare e Amerikës Vatra me rastin e Festës së Flamurit Kombëtar dhe të 110 vjetorit të Pavarësisë së Shqipërisë nderoi me: “Mirënjohje” miq të kombit tonë, personalitete të shquara të diasporës shqiptare në Amerikë e më gjërë për kontributin e tyre të jashtëzakonshëm në dobi të çështjes kombëtare dhe fushave të spikatura me dobi dhe interes publik kombëtar. Drejtuesit më të lartë të Vatrës kryetari Elmi Berisha, nëkryetari Alfons Grishaj, Presidenti i Nderit Agim Rexhaj, Kryetari i Këshillit të Vatrës Kolec Ndoja, përgjegjësi për degët, lobimin, zgjerimin dhe bashkëpunimin Mondi Rakaj nderuan me Mirënjohje: Ambasador Frenk Wisner, Ekrem Bardha, Avdullah Hoti, Irfan Hysenbelliu, Adem Belliu, Beqir Sina, Dritan Haxhia, Agim Aliçkaj, Bajram Hajdarmetaj, Sandra Bojaj (Tv Boin), Lulash Palushaj, Anton Raja, Halil Mula, Ruzhdija Axhoviq. Gëzuar Pavarësinë dhe Festën e Flamurit Kombëtar. Zoti e bekoftë Shqipërinë, Zoti i bekoftë Shqiptarët, Zoti i bekoftë miqtë dhe aleatët e përjetshëm të popullit, shtetit e Kombit Shqiptar.