VATRA, LETËR GJYKATËS SË COLMAR-it PËR LIRIMIN E HARADINAJT

March 26, 2017 by dgreca

Federata “Vatra” , Letër Gjykatës së Apelit të Colmar-it, Francë: “Lironi Ramush Haradinaj!” /

Në një letër, të shkruar në gjuhën frënge dhe dërguar Gjykatës së Apelit të Colmar-it, Francë, Federata Panshqiptare e Amerikës”VATRA” , kërkon që heroi i Luftës së Kosovës, Ramush Haradinaj, të lirohet nga akuzat e sajuara të Serbissë.

Në letrën e Federatës Vatra, ndër të tjera shkruhet: Federata Panshqiptare e Amerikës “Vatra”, shoqëria më e vjetër që përfaqëson diasporën shqiptare që prej vitit 1912, mendon se mbajtja e Z. Ramush Haradinaj nën kontroll gjyqësor, vendosur nga Gjykata e Apelit të Colmar-it, mbështetet mbi baza juridike të kontestueshme dhe se është me pasoja të rrezikshme për paqen dhe stabilitetin në Ballkan. Ajo mendon se kjo çështje është tërësisht politike dhe se po përdoret nga Serbia vetëm për qëllime provokuese që nxisin urrejtjen ndaj popujve ballkanikë, dhe posaçërisht ndaj popullsisë shqiptare të Kosovës.

Serbia vazhdon të mos njohë pavarësinë e Kosovës, megjithëse kjo pavarësi është pranuar ligjërisht më 2010 nga Gjykata ndërkombëtare e Drejtësisë dhe sot njihet nga 114 shtete. Serbia i mohon Z. Haradinaj dhe popullit kosovar çdo nënshtetësi që nuk është serbe, si dhe të drejtën për të jetuar të lirë e të pavarur në kufijtë e tyre të ligjshëm, ndërkohë që vetë Serbia nuk ka juridiksion mbi qytetarët kosovarë.

Duke abuzuar me kuadrin juridik ndërkombëtar, Serbia ka lëshuar mandate arresti ndërkombëtar ndaj tij dhe ndaj shumë personaliteteve politike kosovare, ndërkohë që Z. Haradinaj është paraqitur vullnetarisht në TPI dhe Gjykata ndërkombëtare e Hagës e ka shpallur më 2012 të pafajshëm për të gjitha akuzat që i janë bërë.

Veteran i UÇK-së, hero i Luftës së Kosovës, ish kryeministër i Kosoves, dhe drejtues aktual i AAK (Aleanca për Ardhmërinë e Kosovës), Z. Haradinaj, është një personalitet i shquar dhe shumë i respektuar në gjirin e popullit shqiptar të Kosovës.

Federata “Vatra”, që ka dorëzuar tashmë dy peticione të nënshkruara tek autoritetet franceze, bën edhe një herë thirrje për lirimin e Z.Haradinaj, me qëllim që të marrin fund veprimet provokuese të Serbisë ndaj personaliteteve politike kosovare dhe ndaj pavarësisë së Kosovës.

New York, 20 mars 2017.

Kryetari i Federatës “Vatra”

Gjon Buçaj

Sekretare

Nazo Veliu

Basha, nga SHBA në çadrën e Lirisë: Rama ka rënë…!

March 25, 2017 by dgreca

Kryetari i Partisë Demokratike Lulzim Basha, pas vizites ne ShBA eshte kthyer sot dhe ka folur nga çadra e lirisë pas kthimit nga SHBA ku zhvilloi takime me zyrtarë të lartë amerikanë dhe stafin e Presidentit Donald Trump.Gjatë bashkëbisedimit me qytetarët, kreu i demokratëve deklaroi se stafi i Presidentit amerikan Trump do të ndihmojë në fushatën e Partisë Demokratike.Basha u shpreh i vendosur gjithashtu dhe i qëndroi kushtit se nuk do të ketë zgjedhje me Edi Ramën kryeministër. Ai kërkoi krijimin e një qeverie teknike, e cila do të realizojë zgjedhje të lira dhe demokratike.“Mora mbështetje nga bashkëpunëtorët e Presidentit Trump për kauzat e PD, mesazhi i dytë ishte falenderimi për protestuesit, si një armatë që lufton për lirinë që është e kërcënuar nga krimi, ndërsa mesazhi i tretë është i mbështetjes politike të miqve nga ekipi i Trump për betejën e zgjedhjeve të lira. Do të kemi ekspertizën e ekipit fitues të zgjedhjeve në SHBA”, u shpreh Basha.

Basha: Do të kemi ekspertizën e ekipit fitues të zgjedhjeve në SHBA

Kryetari i Partisë Demokratike, Lulzim Basha, deklaroi të shtunën pasdite se mesazhet kryesore që mori gjatë vizitës së tij në SHBA, ishin mbështetja dhe përgëzimi për protestën që PD po zhvillon në Shqipëri.Pas kthimit nga Shtetet e Bashkuara të Amerikës, Basha deklaroi para protestuesve demokratë se “mori mbështetje nga bashkëpunëtorët e Presidentit Trump për kauzat e PD-së”. “Mesazhi i dytë ishte falenderimi për protestuesit, si një armatë që lufton për lirinë që është e kërcënuar nga krimi, ndërsa mesazhi i tretë është i mbështetjes politike të miqve nga ekipi i Trump për betejën e zgjedhjeve të lira. Do të kemi ekspertizën e ekipit fitues të zgjedhjeve në SHBA”, deklaroi ai.“‘Beteja ka hyrë në një fazë vendimtare, ka vetëm një përfundim; largimi i Ramës dhe një qeveri teknike për zgjedhje të lira. Me ndihmë e miqve tanë do ia dalim në betejën tonë. Erdha me besim ta kauza jonë me mbështetje nga SHBA dhe Brukseli”, u shpreh Basha.Nje dite me pare, Kryetari i Partisë Demokratike, Luzim Basha ripërsëriti qëndrimin e tij për qeveri teknike nga Washingtoni, ku ndodhet prej pak ditësh, ku sipas tij, ka zhvilluar disa takime me krerë të lartë të Senatit dhe Kongresit, si dhe bashkëpunëtorë të administratës së presidentit Trump.“Qëndrimi i Partisë Demokratike dhe i gjithë opozitës është shprehur tashmë. Partia Demokratike, opozita e bashkuar dhe shumica dërrmuese e qytetarëve shqiptarë që prej 18 shkurtit ndodhen në një lëvizje popullore e demokratike për zgjedhje të lira e të ndershme. Ne as nuk do të pranojmë dhje as nuk do të lejojmë zgjedhje farsë, me krimin, me drogën dhe për këtë kushti i patjetërsueshëm është formimi i një qeverie teknike me vullnet të të gjitha forcave politike që do të mundësojnë zgjedhje të lira e të ndershme, duke zbatuar ligjin për dekriminalizimin dhe duke luftuar influencën e krimit dhe drogës”, deklaroi Basha, në një intervistë për “Zërin e Amerikës”.Basha u shpreh se nuk do të ketë zgjedhje pa opozitën dhe këtë tha ai, e përcaktojnë qytetarët shqiptarë . “Dua të ndaj sot lajmin e shkëlqyer me qytetarët shqiptarë, jo thjesht me protestuesit, kënaqësinë e jashtëzakonshme për mbështetjen që kam marrë nga të gjithë bashkëbiseduesit e administratës Trump, Kongresit dhe Senatit për kauzën e drejtë për zgjedhje të lira dhe të ndershme dhe për betejën e qytetarëve për të mos lejuar asnjë standard tjetër, vetëm atë europian në procesin e ardhshëm zgjedhor”, deklaroi Basha.Duke folur për qëndrimin e ndërkombëtarëve, Basha tha se ambasadori amerikan në Tiranë ka mbështetur disa prej shqetësimeve që ne kemi ngritur dhe ka ofruar rrugë praktike të zgjidhjes së tyre. “Ai vetë ka ndihmuar që ligji për SPAK të kalojë me konsensusin e opozitës, ndërsa 6 ligjet e tjera kanë kaluar pa konsensusin e PD-së, sepse Edi Rama donte të përjashtonte opozitën për të kontrolluar sistemin”, tha më tej Basha, në intervistën e dhënë për “Zërin e Amerikës”.Basha tha se edhe sikur sot opozita të ishte në Parlament ligji për Vetting-un nuk kalonte dot, sepse kanë ndërhyrë në përpjekje për të kapur drejtësinë.

1 Basha Z Amerikes

INTERVISTA NE ZERIN E AMERIKES ME 24 MARS

Kryetari i PD Lulzim Basha këmbëngul në qeverinë teknike si e vetmja mundësi zgjidhjeje/

Kryetari i Partisë Demokratike Lulzim Basha i dha fund të premten një qëndrimi disa ditor në Uashington. Para largimit ai qëndroi për një intervistë në studiot e Zërit të Amerikës ku sqaroi qëndrimet e demokratëve lidhur me zgjedhjet e pritshme të 18 qershorit dhe reformën e bllokuar të drejtësisë.Intervista e plotë.

Zëri i Amerikës: Zoti Basha, sot Presidenti dekretoi datën e zgjedhjeve në Kavajë. A do të merrni pjesë ju në to?

Lulzim Basha: Qëndrimi i Partisë Demokratike dhe i gjithë opozitës është shprehur tashmë. Partia Demokratike, opozita dhe shumica dërrmuese e qytetarëve shqiptarë që prej 18 shkurtit ndodhen në një lëvizje popullore, qytetare, kombëtare dhe demokratike për zgjedhje të lira dhe të ndershme, as nuk do të pranojë, as nuk do të lejojë zgjedhje farsë, zgjedhje me krimin, zgjedhje me drogën dhe për këtë, kushti i patjetërsueshëm është largimi i Edi Ramës dhe formimi i një qeverie teknike me vullnet të të gjitha forcave politike që do të mundësojnë krijimin e kushteve për zgjedhje të lira dhe të ndershme duke zbatuar ligjin për dekriminalizimin dhe duke luftuar influencën e krimit të organizuar dhe parave të pista të drogës.

Zëri i Amerikës: Pa dyshim do të ndalemi pak më gjatë në qëndrimin e opozitës. Por le të ndalemi fillimisht tek synimi i kësaj vizite për të cilën ishit në Uashington këto ditë.

Lulzim Basha: Jam i ftuar këtu; jam mirëpritur nga udhëheqësit republikanë të Kongresit dhe të Senatit. Kam takuar krerët e komisioneve relevante: Komisionit të Jashtëm, Komisionit të Sigurisë Kombëtare; një numër të madh senatorësh dhe kongresmenësh të cilët merren drejtpërdrejt me politikën e jashtme të Shteteve të Bashkuara, si dhe bashkëpunëtorë të nivelit të lartë të administratës Trump, ku kemi diskutuar për gjendjen në Shqipëri, për zhvillimet politike në Shqipëri, për impaktin që ka kriza politike, dhe në veçanti krimi i organizuar, paratë e drogës dhe influenca e tyre mbi procesin politik në Shqipëri, jo thjesht për popullin shqiptar dhe Shqipërinë, por për rajonin në tërësi dhe për interesat gjeo-strategjike të Shqipërisë dhe Shteteve të Bashkuara dhe dua të ndaj sot, nga kjo studioja juaj lajmin e shkëlqyer, me qytetarët shqiptarë, jo thjesht me protestuesit, të cilët i përshëndes këtu nga Uashingtoni, nga studio e Zërit të Amerikës, por me të gjithë qytetarët shqiptarë, kënaqësinë e jashtëzakonshme për mbështetjen që kam marrë nga të gjithë bashkëbiseduesit në të gjitha nivelet e administratës Trump, të Kongresit dhe të Senatit për kauzën e drejtë të zgjedhjeve të lira dhe të ndershme dhe për betejën e qytetarëve shqiptarë për të mos lejuar asnjë standard tjetër, përveç standardit evropian dhe euro-atlantik në procesin e ardhshëm zgjedhor.

Zëri i Amerikës: Çfarë prisni ju nga zyrtarët amerikanë? Çfarë ndihme, ose çfarë mbështetje prisni ju prej tyre për zhvillimet që janë në Shqipëri, pasi problemet që keni ju në vendin tuaj, besoj, ka ardhur koha tashmë që mos t’i zgjidhin të huajt, apo jo?

Lulzim Basha: Jo, nuk presim zgjidhjen nga të huajt, sepse po të prisnim zgjidhje nga të huajt nuk do të ishim në këtë ditë të 35-të të një proteste të paprecedent, non-stop. Së pari, informimi ashtu siç duhet të qendrave kryesore të aleatëve tanë strategjikë: të Uashingtonit, Brukselit dhe partnerëve tanë sepse, për fat të keq, me investimin edhe të parave të narko-mafias shqiptare, është investuar fuqishëm në dizinformimin dhe keqinformimin, si të publikut ndërkombëtar, ashtu edhe të qendrave të vendim-marrjes politike. Prania ime këtu është një prani në vazhdim. Unë kam qenë këtu para disa javësh me rastin e inaugurimit të Presidentit Trump.
Zëri i Amerikës: Qeveria amerikane ka një ambasadë jo të vogël në Shqipëri. A e vini ju në dyshim informacionin që ambasada amerikane u jep politik-bërësve në Uashington?

Lulzim Basha: Jo, nuk ka të bëjë kjo. Çështja e komunikimit diplomatik midis ambasadës dhe Departamentit të Shtetit janë çështje të tjera. E kam fjalën për lobistët e paguar me paratë e narko-mafias shqiptare, të cilët veprojnë në Uashington, në Bruksel, në Berlin, në Londër për të fshehur të vërtetat e hidhura të Shqipërisë dhe për të keqinformuar aleatët tanë. Për fat të mire një nga meritat e mëdha të protestës së 18 shkurtit që vazhdon, është që është çjerrur kjo vello e paguar me paratë e drogës dhe narko-mafias shqiptare dhe qendrat kryesore të politik-bërjes shohin me tronditje të mëdha se si, nën qeverisjen e Edi Ramës, Shqipëria është shndërruar në një bazë kryesore të furnizimit të Evropës, jo vetëm me marijuanë, por edhe me heroinë dhe kokainë, se si shteti ligjor është zhbërë, bashkë me garancitë për liritë dhe të drejtat e njeriut dhe se si procesi demokratik është asgjësuar, jo nga një parti politike, jo nga socialistët shqiptarë, por nga kriminelët me damkë, të dënuar për vepra të rënda të krimit të organizuar, që sot bëjnë ligjin në shtetin shqiptar dhe brenda Partisë Socialiste të Shqipërisë. Dhe ky është një realitet që tashmë njihet nga të gjithë dhe konstatohet si problemi kryesor për të ardhmen e Shqipërisë. Këtu në Uashington, sikundër dhe në Evropë, e ardhmja e Shqipërisë shihet si e ardhmja e një vendi në Bashkimin Evropian. Por pengesa kryesore që Shqipëria të antarësohet në Bashkimin Evropian, që të hapen negociatat për antarësim, diçka që Shtetet e Bashkuara e mbështesin plotësisht, diçka për të cilën Partia Demokratike ka luftuar si në qeverisje, ashtu edhe në opozitë sot dhe do të luftojë fuqishëm edhe nesër, pengesa kryesore është kriminalizimi total i shtetit dhe kërcënimi që krimi i organizuar dhe paratë e drogës përbëjnë për zgjedhjet e lira dhe të ndershme. Diçka që Shtetet e Bashkuara e mbështesin plotësisht, diçka për të cilën Partia Demokratike ka luftuar si në qeverisje ashtu edhe në opozitë sot, dhe do të luftojë fuqishëm edhe nesër. Pengesa kryesore është kriminalizimi total i shtetit dhe kërcënimi që krimi i organizuar dhe paratë e drogës po bëjnë për zgjedhjet e lira dhe të ndershme.

Zëri i Amerikës: Padyshim konstatimet tuaja mund të jenë më se të drejta, më se të sakta, por unë dua t’ju pyes për diçka tjetër. Kërkesa juaj për qeveri teknike, është hedhur poshtë nga kryeministri i cili ka theksuar se në zgjedhjet e 18 qershorit do të shkohet edhe pa opozitën. Në se nuk plotësohet kërkesa juaj për qeveri teknike dhe zgjedhjet zhvillohen në datën që janë dekretuar, 18 qershor, a do të merrni ju pjesë në to?

Lulzim Basha: Nuk do të ketë zgjedhje pa opozitën dhe nuk do të lejojë as opozita dhe as qytetarët zgjedhje fasadë, zgjedhje farsë.

Zëri i Amerikës: Më falni, nuk do të ketë zgjedhje pa opozitën nuk e përcaktoni ju.

Lulzim Basha: Sigurisht e përcaktojnë qytetarët shqiptarë dhe qytetarët shqiptarë kanë folur qartë më 18 shkurt, po flasin ditë për ditë e natë për natë pa çensurë nga ai shesh i lirisë.

Zëri i Amerikës: Ajo janë pjesa që iu mbështet ju e qytetarëve shqiptarë. Pjesa tjetër mund të marr pjesë

Lulzim Basha: Nuk do të thoja se Dritani Hila apo Artan Fuga janë militant të Partisë Demokratike. Po përmend dy emra. Por ka me qindra, me mijëra të tjerë të cilët nuk kanë asgjë të përbashkët me programin tonë elektoral por që thonë zgjedhje me krimin, zgjedhje me krimin në pushtet, zgjedhje pa dekriminalizuar shtetin shqiptar nuk mund të ketë.

Zëri i Amerikës: A mendoni se ka mekanizma Partia Demokratike për t’i bllokuar zgjedhjet?

Lulzim Basha: Sigurisht që po.

Zëri i Amerikës: Cilat janë?

Lulzim Basha: Të gjitha mekanizmat paqësore, por të vendosura për të mos lejuar një proces farsë. Ne këto mekanizma do t’i shpalosim hap pas hapi në varësi të situatës politike në vend. E sigurtë është një gjë dhe ky është një mesazh i qartë që sot e përsëris nga Uashingtoni, zgjedhje me krimin, zgjedhje me drogën, zgjedhje me Edi Ramën kryeministër nuk do të ketë. Ka rëndësi që këtë e them sot nga Uashingtoni pas pothuajse në përfundim të vizitës pasi pas kësaj interviste kam edhe dy takime të tjera.

Zëri i Amerikës: Dakort me ju. Ndalemi teknikisht. Zgjedhjet janë dekretuar pra janë të ligjshme. Janë dekretuar nga presidenti për në datën 18 qershor. Zgjedhjet mund të organizohen nga institucionet përkatëse, KQZ-ja, qeveria, kushdo që është e ngarkuar me to. Në se zgjedhje zhvillohen, a do të mari pjesë Partia Demokratike në to apo jo?

Lulzim Basha: Zgjedhjet nuk do të zhvillohen. Unë ju garantoj që zgjedhjet fasadë nuk do ishin zgjedhje.

Zëri i Amerikës: S’mund t’i garantoni ju zgjedhjet.

Lulzim Basha: Po nuk ka, nuk mund të ketë një proces demokratik. Votime po, ka patur 50 vjet votime në Shqipëri por nuk ishin zgjedhje.

Zëri i Amerikës: Pra kishte.

Lulzim Basha: Votime po, por zgjedhje jo.

Zëri i Amerikës: Pasojat është tjetër gjë, por zgjedhjet mund të zhvillohen.

Lulzim Basha: Proces të tillë, farsë në Shqipëri nuk ka për të pasur. Ky është zotimi ynë. Së bashku me qytetarët shqiptarë jemi të gatshëm të ndërmarrim të gjitha hapat demokratik dhe paqësor…

Zëri i Amerikës: Pra ju nuk pranoni të thoni se në qoftëse zgjedhjet zhvillohen, ju nuk do të merrni pjesë.

Lulzim Basha: E kemi sqaruar një herë e mirë këtë. Nuk do të ketë bojkot, por nuk do të ketë zgjedhje të diktuara nga krimi dhe nga droga.

Zëri i Amerikës: Nuk do të ketë zgjedhje se keni ju në dorë. Në qoftë se do të ketë zgjedhje. Qoftë edhe nga ato që mund të jenë farsë, ju do të merrni pjesë apo jo?

Lulzim Basha: Në qoftëse ka përpjekje për zgjedhje fasadë, Partia Demokratike dhe qytetarët do të bëjnë atë që i takon çdo shoqërie të civilizuar. Do të ndalin një maskaradë të tillë, dhe do t’u japin shqiptarëve në një mënyrë apo në një tjetër zgjedhje të lira dhe të ndershme. Pra nuk mund të ketë bojkot, sepse nuk do të ketë zgjedhje fasadë, zgjedhje me krimin. Edhe një herë e përsëris dhe këtë mesazh e jap sot në ditën e 35 të protestës dhe e jap këtu nga Uashingtoni pas takimeve me krerët më të lartë, me udhëheqësit më të lartë të Kongresit.

Zëri i Amerikës: Historia e Shqipërisë, në të kaluarën, këto 20 e disa vjet që janë bërë në demokraci me zgjedhje pluraliste, ka treguar se palët shkojnë buzë greminës, po e quaj pak të zmadhuar, deri në minutën e fundit. Pastaj gjendet një marrëveshje, gjendet një formë zgjidhje, dhe situata çbllokohet. A e shikoni ju ndonjë zgjidhje të mundshme përveç kërkesës maksimale me qeveri teknike?

Lulzim Basha: Zgjidhja që ne kemi propozuar është zgjidhja e vetme në këto kushte. Mos harroni që për një vit ne u përpoqëm ta zgjidhim këtë me Edi Ramën kryeministër, me këtë koalicion në pushtet. Duke propozuar paketën e Majit 2016, paketën e zgjedhjeve të lira dhe të ndershme, përfshirë votimin elektronik, duke propozuar në korrik kalimin në të njëjtën kohë me paketën kushtetuese për reformën në drejtësi edhe zhbllokimin apo largimin e gjithë pengesave ligjore, pikërisht për votimin elektronik biometrik dhe numërimin elektronik dhe një sërë propozimesh të tjera të cilat do ta adresonin problemin e shitblerjes së votës, problemin e kapjes së medias, problemin e përdorimit të shtetit në fushatë. Me vetëdije, zoti Rama asgjesoi ditë pas dite, javë pas jave, muaj pas muaji çdo mundësi për të zgjidhur këtë çështje në kuadër të institucioneve. 18 shkurti është produkti mbi të gjitha i arrogancës dhe bindjes do të thoja kriminale të zotit Rama se Shqipëria dhe shqiptarët do të pranojnë një proces zgjedhor të kontrolluar nga krimi aq më shumë tani me pretendimet absurde që ky proces zgjedhor mund të zhvillohet edhe pa opozitën. Jo nuk është e vërtetë që ne kemi ardhur me kërkesa maksimaliste. Ne kemi ardhur me kërkesa të diktuara nga koha pasi kemi shteruar çdo mundësi tjetër, është plotësisht e mundur jo vetëm, por është një rrugë e ndershme edhe për zotin Rama të çlirohet nga klanet e mafias që sot diktojnë qeverisjen dhe emërimet e ministrave, të çlirojë Partinë Socialiste është një oportunitet, një mundësi për zotin Rama edhe PS nga zgjedha e krimit të organizuar dhe t’i jap vendit së bashku me Partinë Demokratike edhe forcat e tjera politike një kabinet teknik i cili do të organizojë procesin e zgjedhjeve të lira dhe të ndershme. Ne kemi ardhë me kërkesa të diktuara nga koha pasi kemi shterruar çdo mundësi tjetër. Është plotësisht e mundur, jo vetëm kaq, por është një rrugë e ndershme edhe për zotin Rama të çlirohet nga klanet e mafias që sot diktojnë qeverisjen dhe emërimet e ministrave, të çlirojë partinë socialiste. Është një mundësi për zotin Rama të çlirojë edhe partinë socialiste nga zgjedha e krimit të organizuar dhe t’i jap vendit, së bashku me partinë domekratike dhe forcat e tjera politike, një kabinet teknik, i cili do të organizoj procesin e zgjedhjeve të lira dhe të ndershme.

Zëri i Amerikës: Ju përmendet majin e vitit 2016, kur keni paraqitur për herë të parë propozimet tuaja për të përmirësuar procesin zgjedhor, apo ligjin e zgjedhjeve. Megjithatë, ajo që bie në sy është fakti që nga maji i vitit 2016 deri më sot, deri para një muaji, ju nuk keni këmbngulur. Në qoftë se procesi zgjedhor ishte kaq problematik dhe parësor për Partinë Demokratike, nuk ju kemi parë të këmbëngulni prej kohe për një çështje të tillë, kur ju disa herë në të kaluarën e keni bojkotuar parlamentin edhe për gjëra më të vogla siç kanë qenë çështjet e konflitkit të interesit të disa deputetëve socialistë, që nuk u shqyrtuan nga parlamenti. Pra, përse partia demokratike nuk ka reaguar më përpara me një forcë kaq të madhe për çështjen e përmirësimit të kodit zgjedhor?

Lulzlim Basha: Dua të kundërshtoj këtë premisë. Fakti është që ne i atashuam kushtet për zgjedhje të lira dhe të ndershme si kusht për votimin e reformës në drejtësi. Shqiptarët e mbajnë mend dhe arkivat tuaja dhe të medias shqiptare mund të tregojnë qartë bisedat e mia telefonike me kancelaren gjermane Merkel, me ish Zëvendës Sekretaren e Departamentit të Shtetit Nuland, me komisionerin Hahn dhe me personalitetet më të larta që më telefonuar për të më përgëzuan për rolin e partisë demokratike në arritjen e konsensusit për reformën në drejtësi. Dhe në të gjitha këto biseda telefonike me ta, unë kam ngritur çështjen e zgjedhjeve të lira dhe të ndershme dhe kam marrë mbështetjen e tyre, garancitë për mbështejtje për procesin e zgjedhjeve të lira dhe të ndershme. Çdo javë në komisionin ad-hok përfaqësuesit tanë kanë ngritur këtë çështje. Është virtyti i mediave të kapura që i bien tam tamëve të qeverisë, të cilat në një mënyrë apo në një mënyrë tjetër e kanë zhdukur këtë çështje nga axhenda e tyre mediatike në Tiranë. Por e vërteta është se partia demokratike nuk ka patur asnjë çështje më të rëndësishme se zgjedhjet e lira dhe të ndershme, që pas procesit zgjedhor të vitit 2015, e në veçanti gjatë vitit 2016 duke kulmuar me zgjedhjet e Dibrës, të cilat treguan qartë se jo vetëm qeveria Rama nuk ka pas një garanci për zgjedhjet por është kthyer në kërcënimin kryesor për demokracinë dhe për zgjedhjet e lira dhe të ndershme. Kjo ka informuar aksionin tonë politik, i cili siç e thashë nuk vjenë aspak si i papritur, por si përshkallëzim dhe pasi është shterruar çdo mundësi tjetër.

Zëri i Amerikës: Zoti Basha, ka pasur kritika që kur i filluat protestat…

Lulzlim Basha: Më fal, dua të them edhe një gjë tjetër. Ne kemi bojkotuar parlamentin jo për konfliktin e interesit, por për moszbatimin e kushtetutës. Pra, kemi ardhur në një vend, ku kushtetuta dhunohet, rregullorja e parlamentit dhunohet, ligji për dekriminalizimin nuk zbatohet. Nuk mund ta them më mirë se sa senatori Mario Mauro, ish Ministri i Mbrojtjes së Italisë dhe ish zëvendës presidenti i parlamentit evropian, kur erdhi në protestë dhe tha “nuk mund t’i kërkosh opozitës pse bojkoton parlamentin kur qeveria ka bojkotuar demokracinë”.

Zëri i Amerikës: Si u përgjigjeni ju kritikave që janë bërë gjatë kësaj kohe që keni filluar bojkotimin e parlamentit, se protesta juaj po synon të zvarrisë dhe po vë në rrezik reformën në drejtësi? Pasi partia juaj me ose pa të drejtë, të paktën nga ana e imazhit, po merr përsiper koston e të qenit shkaktare për mos ngritjen e komisioneve, që do të çojnë përpara reformën në drejtësi.

Lulzlim Basha: Ka dy nivele dizinformimi dhe keqinformimi. I pari është që Partia Demokratike është kundër reformës në drejtësi, kur partia demokratike në fakt ka votuar, ka inicuar ndryshimet në paketën kushtetuese, ka qenë përcaktuese që ndryshmet kushtetuese të ishin të standartit evropian dhe amerikan dhe jo të standartit të Ramës, të Shullazit, të Armando Prengës, të Arben Ndokës, Elvis Roshit, Artur Bushit… se na duhet dy emisione t’i përmendim të gjithë…por të standartit evropian. Dhe ne e fituam këtë betejë. Më 22 korrik ne e fituam këtë betejë dhe ju e patë se Partia Demokratike jo vetëm e votoi, por ishte e lumtur për këtë betejë të fituar ndërkohë që dikush, edhe fytyra ia shprehte palumturinë. Ky dikush nuk e shikon reformën në drejtësi si një mundësi për t’i dhënë shqiptarëve gjyqtarë dhe prokurorë të pakorruptuar, por për të kontrolluar sistemin e drejtësisë. Prandaj, ai theu një marrëveshje të bërë me praninë e Bashkimit Evropian dhe Shteteve të Bashkaura të Amerikës, këto shtatë ligje kryesore për të zbatuar paketën kushtetuese do të kaloheshin me konsensus me opozitën. Amerikanët, të cilët ishin përgjegjës për njërin nga këto ligje, ligjin për SPAK-un dhe BKH-n, e detyruan zotin Rama ta mbante fjalën. Dhe ky ligj, nga këto shtatë ligje është kaluar me konsensusin tonë. Gjashtë ligjet e tjera janë jashtë standartit dhe garantojnë që Edi Rama sot apo Lulzim Basha nesër, apo kushdo tjetër t’fus duart në sistemin e drejtësisë. Për mua kjo është e papranueshme.

Zëri i Amerikës: Bashkësia ndërkombëtare e cila ka qenë intensivisht e përfshirë në hartimin e këtyre ligjeve dytësore, e të gjithë këtyre elementëve që dalin nga reforma në drejtësi, e ka përshëndetur miratimin e këtyre ligjeve. Nuk kemi dëgjuar nga bashkësia ndërkombëtare që të thotë që Partia Socialiste ka shkelur marrëveshjen që kishte me ju, me bashkësinë ndërkombëtare për t’i bërë këto me konsensus. Ajo i ka mbështetur, i ka përshëndetur. Atëherë si mund të pretendohet sot që socialistja paska thyer një marrëveshje, të cilën njëra palë kryesore, bashkësia ndërkombëtare, i ka përshëndetur ligjet?

Lulzim Basha: Bashkësia Ndërkombëtare është një term shumë i gjerë.

Zëri i Amerikës: Ju e përmendët…

Lulzim Basha: Ambasadori amerikan në Tiranë ka mbështetur qartësisht disa prej shqetësimeve që ne kemi ngritur. Ka ofruar rrugë praktike të zgjidhjes së tyre. Meqë jemi në Shtetet e Bashkuara të Amerikës, po flasim vetëm oër një nga përfaqësuesit e komunitetit ndërkombëtar. Ai vetë ka ndihmuar që ligji për SPAK-un të kalonte me konsensus. Gjashtë ligjet e tjera kanë kaluar pa konsensusin e opozitës. Pse, sepse Edi Rama donte ta përjashtonte opozitën nga këto ligje që të kontrollonte sistemin. Këto janë faktet. Këto nuk janë çështje opinioni. Tani të vimë tek fakti tjetër. Edhe sikur sot opozita të ishte në parlament, ligji për vetingun nuk zbatohet dot. E dini pse? Se kanë futur duart dhe kanë bërë një rrëmujë të paparë, në përpjekjen e tyre për të kapur drejtësinë.

Zëri i Amerikës: Ligjet ju i kundërshtuat në Gjykatën Kushtetuese, Komisioni i Venecias e dha mendimin e vet, pra u ezaurua procesi i kundërshtimit…

Lulzim Basha: Nuk do pranojmë kurrë ne. Jo, jo, nuk shterrohet kurrë procesi politik

Zëri i Amerikës: Jo procesi politik, procesi i kundërshtimit të ligjeve në instancat përkatëse …

Lulzim Basha: Po shumë mirë, ne jemi parti politike ne nuk jemi avokatë…

Zëri i Amerikës: U ezaurua. S’mund të dilni ju mbi ligjet …

Lulzim Basha: Jo, nuk dalim mbi ligjet

Zëri i Amerikës: Po derisa u miratua …

Lulzim Basha: Jo, absolutisht nuk dalim ne mbi ligjet. Ne shprehim vullnetin politik. Ne na përjashtuan nga ky proces…

Zëri i Amerikës: E qartë, por në momentin që Gjykata Kushtetuese vendos po …

Lulzim Basha: Ne na përjashtuan nga ky proces dhe në qoftëse na përjashtuan nga ky proces, duan ta bëjnë pa opozitën, urdhëroni ta bëjmë pa opozitën. Por kjo nuk ishte ideja e 22 korrikut dhe as ideja e partnerëve tanë, se po të ishte pa opozitën, e bënin siç donte Rama dhe Rama e do drejtësinë për Shullazin, e do për Hakmarrjen për Drejtësi, e do për Prengën, e do për Ndokën, nuk e do për qytetarët shqiptarë. Duhet të kuptoni që ne këtu jemi në një mision kombëtar për të mbrojtur jo thjesht nga qeverisja aktuale por nga çdo qeveri që të diktojë sistemin e drejtësisë, se kjo e çon Shqipërinë 27 vjet prapa, kur qeveria dhe gjyqtarët ishin një. Një nga themelet e shoqërisë perëndimore është që gjyqësori është i ndarë nga qeverisja. Pse? Sepse duhet të hetojë edhe qeverinë pra, duhet të hetojë lidhjet potenciale të qeverisë me krimin, duhet të hetojë korrupsionin qeveritar dhe kështu siç e ka bërë Rama, e ka bërë pikërisht që ai vetë dhe bashkëpunëtorët e tij, të akuzuar jo vetëm nga opozita por edhe nga faktori ndërkombëtar për lidhje me krimin…

Zëri i Amerikës: Por faktori ndërkombëtar i ka mbështetur gjithë këto ligje, ka dhënë fjalë përshëndetëse, si ka mundësi?

Lulzim Basha: Faktori ndërkombëtar ka mbështetur procesin e reformës në drejtësi….

Zëri i Amerikës: Edhe ligjet..

Lulzim Basha: Absolutisht jo. Jo, jo nuk është e vërtetë, sepse do të ishte e pamundur

Zëri i Amerikës: Po faktori ndërkombëtar po ju bën ju thirrje të shkoni në parlament për të ngritur komisionet. Faktori ndërkombëtar pra, ju ka thënë juve shkoni në parlament, votoni ngritjen e komisioneve, pastaj vazhdoni protestën. Pra, ligjet i quan të mirëqena, i quan të miratuara…

Lulzim Basha: Po mund të quhen të mirëqena shumë gjëra. Dikush mund ta quajë të mirëqenë që në Shqipëri po ecin reformat..

Zëri i Amerikës: …po nuk ka kundërshtime me ligjet …

Lulzim Basha: Një sekondë, një sekondë ta mbajmë pak këtu. Dikush ka ardhur në Tiranë dhe ka thënë “Shqipëria po ecën përpara”. Këtij dikushit duhet t’i themi dy gjëra: Ose nuk i di faktet dhe është mirë t’i marrësh …

Zëri i Amerikës: Po besoj komuniteti ndërkombëtar i di faktet, se ka qenë vetë i përfshirë…

Lulzim Basha: S’po flas për persona të caktuar. Unë po flas në tërësi, duhet të kemi parasysh, se ne tani jemi në 2017-ën, nuk mund t’i trajtojmë shqiptarët si dele. Ata që thonë që Shqipëria s’ka probleme, kur Shqipëria sapo doli këtë javë Departamenti i Shtetin me raport dhe tha do ta rifusim Shqipërinë në listën e zezë të pastrimit të parave, sepse është kthyer në vendin kryesor të prodhimit të marijuanës dhe është kthyer përsëri në vend tranziti për heroinën dhe kokainën dhe korrupsioni është “rampant” nga “widespread” (shumë i përhapur) shkoi në “rampant” (i shfrenuar), atëherë ne nuk mund të pretendojmë që në Shqipëri gjërat janë normale.

Zëri i Amerikës: Absolutisht jo…

Lulzim Basha: Dhe duke mos pretenduar këtë duhet patjetër të ndërmarrim veprime konkrete, kjo është detyra jonë, se ne nuk jemi analistë. Opozita është alternativa dhe alternativa e shqiptarëve po propozon këtë rrugëdalje: qeveri teknike dhe zbatim të reformës në drejtësi sipas përcaktimeve kushtetuese të 22 korrikut, jo sipas skemave të Edi Ramës dhe Emiljano Shullazit me shokë. Kaq e thjeshtë është. Dhe këtu nuk lëvizim ne. Dikush që nuk e di mirë, t’i shohi mirë faktet. Kush e di këtë dhe prapëseprapë thotë votoni apo vepëroni sipas një reforme e cila në vend që të çojë kriminelët para drejtësisë, i ndihmon të dalin nga burgu, siç kanë dalë këtë muaj, atëherë këtij personi i themi “e ke gabim zotëri, apo zonjë, ne do të vazhdojmë në këtë rrugë, sepse interesi ynë është interesi i qytetarëve shqiptarë”.

24 MARSI- DITA E AGUT TË LIRISË SË KOSOVËS

March 24, 2017 by dgreca

NATO-Kosove-Behlul-Jashari-1 Foto Gazeta DIELLI: Kartela e gazetarit Behlul Jashari dhënë nga NATO-KFOR për të hyrë në Kosovë në 12 qershor 1999 me kolonën e tankeve të para të forcës më të madhe planetare, paqeruajtëse-shpëtimtare/

1 Bill Klinton Rugova

DITA E AGUT TË LIRISË SË KOSOVËS/

1 NATO-hyrja ne Kosove -Sot u mbushën 18 vjet nga ndërhyrja e NATO-s, forcës më të madhe planetare, shpëtimtare për Kosovën/

2 NATO-Kosove-12Qershor1999- -Lajmi që raportova nga Prishtina, përkundër ndërprerjes së linjave, në orën e nisjes së ngjarjes historike të mbrëmjes së 24 marsit 1999/

-“Tani, bindja jonë e fortë për gjithçka që po ndodh në Kosovë, është e vetmja shpresë e popullit të Kosovës”, theksone në atë ditë e orë historike, Presidenti i SHBA-ve, Bill Clinton, derisa nga Shtëpia e Bardhë i drejtohej kombit amerikan, duke folur për zhvillimet tragjike në Kosovë dhe ndërhyrjen shpëtimtare të NATO-s/

2 Beluli Rugova -Në vitin 2005, në mesazhin e fundit të urimit për 24 marsin – Ditën e fillimit të fushatës ajrore të NATO-s për mbrojtjen e Kosovës, Presidentit historik Dr. Ibrahim Rugova theksonte: “Dita e fillimit të fushatës apo sulmeve ajrore, pra 24 marsi i vitit 1999, ka hyrë në historinë më të re të Kosovës si ditë e agut të lirisë për të gjithë ne. Kurse në historinë botërore ka hyrë si ditë për mbrojtjen e një populli dhe për shpëtimin e tij nga e keqja”/

SPECIALE-Gazeta DIELLI nga korrespondenti në Kosovë Behlul JASHARI/

NATO-Kosove-aviacini PRISHTINË, 24 Mars 2017/ Pikërisht para 18 viteve 24 marsi 1999 ishte Dita kur ndërhyrja shpëtimtare e NATO-s, forcës më të madhe planetare, kundër terrorit e gjenocidit, i hapi shteg lirisë së Kosovës. Është kjo edhe një ditë e mirënjohjes e falënderimit të përjetshëm për botën demokratike që nuk lejoi spastrimin etnik dhe zhbërjen e shumicës shqiptare të Kosovës.

Ndërhyrja e NATO-s pritej pasi Konferenca e parë ndërkombëtare për Kosovën në Rambuje, Francë, që kishte nisur në 6 shkurt 1999 kishte përfunduar, nga mesi i marsit, me refuzim nga delegacioni i Beogradit të marrëveshjes së pranuar nga delegacioni kosovar. Edhe derisa bisedohej në Rambuje-Paris, regjimi i Beogradit kishte sjellë në Kosovë paisje luftarake e trupa ushtarake shtesë, që mund të arrinin në 130.000, sipas vlerësimeve të kohës.

NATO-Kosove-aviacioni-1

Ishin orët u fundit para fillimit të bombardimeve të NATO-s kur kërkonim mundësinë e fundit për të dhënë nga Prishtina në Tiranë lajmin e madh të pritur, pasi lidhjet telefonike po bëheshin të pamundura.Të provojmë me lidhje satelitore në mbrëmje, u morëm vesh me vëllain, Demë Jashari, në Zvicër. Dhe, ishim në linjë në momentin e pritur, nga Prishtina në Lozanë- Zvicër raportoja me telefon derisa po ndodhte lajmin e madh edhe për gjithë botën që e shkruante vellai me kompjuter për ta përcjellë prej atje me telefax drejt Tiranës, Agjencisë shtetërore-zyrtare të lajmeve të Shqipërisë dhe Radio Televizionit Shqiptar-Radio Tiranës, nga të cilat lajmin e morën e transmetuan edhe shumë media botërore.

Në atë mbrëmje të 24 marsit 1999 raportoja nga Prishtina se rreth orës 20:00 u ndjenë fuqishëm goditjet e para të sulmeve ajrore të Aleancës Veriatlantike mbi pozicionet e forcave serbe.

Përshkruaja situatën në kryeqytetin e Kosovës në atë orë historike: “Nga goditjet dridheshin xhamat e ndërtesave në Prishtinë, ndërsa vazhdimisht dëgjoheshin sirenat e alarmit”.

Pasi e raportoja këtë, shtoja se “pas pak çastesh të goditjeve, e tërë Prishtina dhe Kosova mbeti në terr”, meqë u ndërprenë dritat, furnizimet me energji elektrike.

Raportoja edhe se “para goditjeve, automjete të blinduara me trupa serbe dhe armë në gjendje gatishmrie, lëviznin nëpër të gjitha rrugët e shkreta të Prishtinës, që ngjan në qytet fantazmë. Pas goditjeve, këto lëvizje tankesh dhe blindash nuk shihen më”.

Dhe, “kohë pas kohe, nëpër qytet, dëgjohen breshëri armësh”, përfundoja lajmin e parë për nisjen e bombardimeve, lajmin që shkoi edhe për botën, të dhënë nga banesa në Prishtinë, e mbushur refugjatë nga zonat e luftës.

Refugjatët sollën përvojat e tyre të pas dëbimit nga shtëpitë, të strehimit maleve, se si të bëhej dritë në terr kur s’ka as qirinj, duke ndezur ndonjë leckë të futur në vaj ushqimi të mbushur në gjysëmpatate të gërryer nga brenda. Nën atë dritëz po shkruaja lajm tjetër, ndërsa po dëgjoja lajme në një radio të vogël me bateri – tranzistor, derisa shkallëve të ndërtesës dëgjoheshin rrapllimat e ushtarëve e policëve serbë që nga momenti i nisjes së bombardimeve kishin ikur nga rrugët e sheshet ku ishin.

Në terrin e natës dhe të okupimit të egër, drita e shpërthimeve nga goditjet e aviacionit të NATO-s nga qielli shihej si një shpresë e besim për të ardhmen e ëndërrave për lirinë e paqen derisa në Kosovë kishte marrë përmasa gjenocidi terrori i spastrimit etnik kundër shqiptarëve.

“Tani, bindja jonë e fortë për gjithçka që po ndodh në Kosovë, është e vetmja shpresë e popullit të Kosovës”, theksone në atë ditë e orë historike, Presidenti i SHBA-ve, Bill Clinton, derisa nga Shtëpia e Bardhë i drejtohej kombit amerikan, duke folur për zhvillimet tragjike në Kosovë dhe ndërhyrjen shpëtimtare të NATO-s.

Mëngjesi i 25 marsit 1999 sillte lajme të reja se forcat serbe gjatë natës kishin bërë sulme dhe vrasje të tjera në familjet dhe vendbanimet shqiptare, kishin djegur edhe selitë e institucioneve të rëndësishme kosovare e ndërkombëtare, përfshirë zyrat që ndodheshin në një shtëpizë shkrimtarësh që ishte bërë seli e Presidencës dhe e institucioneve tjera të Republikës së Kosovës, atëherë të panjohur ndërkombëtarisht, dhe Zyrën e SHBA-ve në Prishtinë.

Edhe në mëngjes, si edhe natën, Prishtina dukej si një qytet fantazmë, rrugët dhe sheshet ishin të zbrazëta. Tanket dhe makineria tjetër serbe e luftës, që një ditë më parë i mbushnin rrugët e sheshet, kishin ikur dhe ishin fshehur edhe nëpër lagje të kryeqytetit, për t’i pasur banorët shqiptarë mburojë të gjallë. Nëpër shumë pika kishte snajperë serbë dhe njerëzit qëndronin të mbyllur në shtëpi, të rrethuar me kërcënimin e madh të forcave serbe, por me gëzimin e besimin e plotë se liria e Kosovës po vinte.

Mëngjesin e parë të pas fillimit të bombaredimeve, lajmet e fundit që dhash nga Kosova drejt Tiranës ishin për situatën në Prishtinë dhe për ekzekutimet nga forcat serbe gjatë natës të shqiptarëve në Mitrovicë, kryesisht veprimtarëve e intelektualëve, ndër të cilët ishte edhe poeti Latif Berisha.

U këput edhe mundësia e fundit e lidhjes me telefon dhe e raportimeve dhe nisi kërkimi i ndonjë mundësie tjetër, duke ndërruar edhe vendbanimin shkaku i rrezikut të qëndrimit të mëtejmë në banesë, e pastaj edhe duke u larguar nga Prishtina drejt kufirit jugor të Kosovës, prej nga vazhdoja raportimet.

Raportimet dëshmonin se forcat serbe vazhdonin fushatën për dëbimin e të gjithë shqiptarëve nga Kosova. U dëbuan afër një milion shqiptarë, shumica në Shqipëri. Më shumë se 12 mijë arrinte numri i shqiptarëve të vrarë e masakruar, edhe të groposur në varreza masive, në mëse 5 mijë arrinte numri i të zhdukurve, qytetet dhe fshatrat shqiptare digjeshin e plaçkiteshin nga forcat ushtareke, policore e paramilitare serbe të Milosheviçit, kasapit të Ballkanit, që pas vitesh përfundoi në Tribunalin Ndërkombëtar për Krime Lufte në Hagë.

Ende pa kaluar tre muaj nga fillimi, bombardimet përfunduan në 10 qershor 1999, pasi një ditë më parë ishte arritur Marrëveshja e Kumanovës mes NATO-s dhe Beogradit për tërheqjen e të gjitha forcave serbe nga Kosova dhe hyrjen e trupave ndërkombëtare të Alancës Veriatlantike në Kosovë.
Dita e Lirisë dhe Paqes, e hyrjes së forcave të NATO-s në Kosovë, erdhi në 12 qershor 1999. Në mëngjesin e asaj dite të lume, në orën 05 e 17 minuta, tanket e para të NATO-s hynë në Kosovë duke kaluar kufirin me Maqedoninë në Bllacë – Han të Elezit, drejt Prishtinës, e të nesërmen nga Shqipëria, duke kaluar kufirin në Morinë-Vërmicë, drejt Prizrenit…

Edhe në atë ditë e orë historike një lajm tjetër të madh se në Kosovë po ndodhte liria e raportoja drejt Tiranës nga kolona e tankeve të para të NATO-s që kalonte kufirin jugor në Han të Elezit.

Kosova, pas hyrjes së trupave të NATO-s – KFOR-it, u administrua sipas Rezolutës 1244 të Këshillit të Sigurimit të OKB-së deri në 17 Shkurtin histotik 2008 të shpalljes së Pavarësisë së njohur deri sot nga 114 shtete të botës.

Më pak se një vit para ndërhyrjes së NATO-s në Kosovë, në 29 maj 1998 Presidenti historik i Kosovës, Ibrahim Rugova në Uashington ishte takuar me Presidentin amerikan Bill Clinton. Pas takimit Rugova deklaronte: “Ne ritheksuam se zgjidhja më e mirë për Kosovën do të ishte shteti i pavarur”. Ndërsa, Clinton kishte theksuar se Kosova është një nga shqetësimet amerikane dhe se SHBA-të do të intensifikojnë angazhimin për zgjidhjen e çështjes së Kosovës në kuadër të Grupit të Kontaktit dhe të NATO-s.

Presidenti amerikan Bill Clinton, në 1 nëntor 2009, në fjalën e tij në Kuvendin e Kosovës, por edhe në sheshin me emrin e shtatoren e tij në Prishtinë, ka përkujtuar Presidentin e Kosovës, Ibrahim Rugova dhe një gurë kristali të cilin ai ia kishte dhuruar.
“Ai gurë kristal të cilin ma dha Rugova i është dhuruar një universiteti, por për një kohë ai ishte i njohur edhe në SHBA me emrin ‘Guri i Rugovës’”, ka thënë Presidenti amerikan Klinton.
Ai ka treguar se është rritur në një vend që ka gjeologji të ngjashme me Kosovën, në Arkanzas. “Atëherë, ai (Rugova), më tha se duhet të na ndihmosh”, ka përkujtuar ish-Presidenti i SHBA-ve Bill Clinton.

Presidenti amerikan Clinton me rastin e shuarjes në 21 janar 2006 të Presidentit kosovar Rugova shprehej: “Kam pasur nder ta mbështes luftën e tij për paqe dhe liri”…

Në vitin 2005, në mesazhin e fundit të urimit për 24 marsin – Ditën e fillimit të fushatës ajrore të NATO-s për mbrojtjen e Kosovës, Presidentit historik Dr. Ibrahim Rugova theksonte: “Dita e fillimit të fushatës apo sulmeve ajrore, pra 24 marsi i vitit 1999, ka hyrë në historinë më të re të Kosovës si ditë e agut të lirisë për të gjithë ne. Kurse në historinë botërore ka hyrë si ditë për mbrojtjen e një populli dhe për shpëtimin e tij nga e keqja”.

Thaci-Jackson Në 20 shtator 2016, komandanti i parë i forcës paqeruajtëse të NATO-s në Kosovë, KFOR, gjenerali Sir Michael David Jackson, është dekoruar me Medaljen Ushtarake për Shërbim në Kosovë nga presidenti i Republikës, Hashim Thaçi.Gjeneralit Sir Jackson kjo medalje i është ndarë për kontributin e tij në shërbim të paqes, sigurisë dhe stabilitetit në Kosovë gjatë mandatit të tij si komandant i KFOR-it në Kosovë. “Roli i gjeneralit Sir Jackson ka qenë i pazëvendësueshëm, i jashtëzakonshëm, historik për paqen, stabilitetin, demokracinë dhe prosperitetin në Kosovë dhe në rajon”, tha presidenti Thaçi.“Kemi punuar në kohë sfidash bashkërisht, në procesin e kthimit të refugjatëve në shtëpitë e tyre, në tranzicionin demokratik që e kemi kaluar, në përkushtimet e përbashkëta në të gjitha organizatat ndërkombëtare”, vijoi presidenti i Kosovës.Nga ana tjetër, gjenerali Sir Michael David Jackson, është shprehur mirënjohës për dekoratën dhe mikpritjen që i është bërë në Kosovë.

“U ktheva në Kosovë shtatëmbëdhjetë vite që kur kisha ardhur këtu për herë të parë, kur, më duhet të them, kisha ardhur pa pasaportë. Është e mrekullueshme për të parë se sa shumë progres keni arritur që nga ajo kohë”, tha gjenerali Sir Michael David Jackson.

Gjithashtu, gjenerali Sir Jackson ka kujtuar edhe ditët e rënda të pasluftës së vitit 1999. “Edhe pse ato ditë të rënda shënuan fillimin e këtij progresi, atëbotë kishte një atmosferë dhe gjendje shumë të rëndë, kurse sot gjërat kanë ndryshuar shumë”, tha komandanti i KFOR-it i përfundimit të luftës në Kosovë. Presidenti Thaçi u shpreh se, populli i Kosovës dhe mbarë bota e dinë se gjenerali Jackson është një nga njerëzit që ka jetësuar Marrëveshjen e Kumanovës për futjen e trupave të NATO-s në Kosovë.

7 Lajmi

Në 18 vjetorin e ndërhyrjes së NATO-s në Kosovë: Binomi i pandarë – NATO dhe Kosova

March 23, 2017 by dgreca

Shkruan: Prof. Asoc, Dr. Enver Bytyçi/Nesër mbushen 18 vite nga koha kur avionët e NATO-s filluan bombardimet kundër caqeve ushtarake të Serbisë. Në orën 19. 45 të datës 24 mars 1999 avionët e Aleancës lëshuan mbi Jugosllavinë e mbetur bombat e para, duke shënuar fillimin e një fushate historike për t’i dhënë fund një konflikti më shumë se njëshekullor në Kosovë. Presidenti amerikan, Bill Clinton, atë natë mbajti para popullit amerikan fjalimin historik, duke lajmëruar se ai kishte urdhëruar Aleancën Atlantike të fillonte operacionin ushtarak, si mundësi e vetme e zgjidhjes së konfliktit shqiptaro-serb në Kosovë. Duke njoftuar urdhërin e tij për bombardimet kundër Serbisë, Bill Clinton u tha amerikanëve se “Ne dhe Aleanca e NATO-s kemi bërë të gjitha përpjekjet, me qëllim që të arrinim një zgjidhje paqësore të konfliktit në Kosovë. Por presidenti Milosheviç, i cili në të kaluarën e afërt shkaktoi luftra të tmerrshmë në Kroaci e në Bosnjë, ka vendosur në favor të agresionit në vend se të paqes”. Presidenti amerikan në atë fjalim para kombit amerikan përcaktoi dhe objektivat strategjike të operacioneve ushtarake, të cilat konsistonin në demonstrimin e forcës kundër agresionit të Milosheviçit në Kosovë, që ai të ndalë sulmet kundër civilëve të pambrojtur, si dhe të dobësohej fuqia ushtarake e Serbisë, me qëllim që ajo të mos mund të vazhdonte me tej agresionin e saj ushtarak në Kosovë. Dhe jo vetëm Bill Clinton… Thuajse në të njëjtën njëjtën orë dolën atë natë në ekranet e televizioneve kombëtare udhëheqësit kryesorë të Europës Perendimore për t’u kumtuar popujve të tyre vendimin për t’i ardhur në ndihmë një populli që po përndiqej, masakrohej dhe shpërngulej prej trojeve të veta, shqiptarëve të Kosovës. Tony Blair në Londër, Gerhard Schreoder në Berlin, Shirak në Paris e të tjerë burra shteti u detyruan të justifikonin aksionin ushtarak të ushtrive të tyre, me qëllim që ky aksion të merrte dimensionet e veta reale. Kancelarit gjerman i duhej të shpjegonte se pse Gjermania për herë të parëpas Luftës së Dytë Botërore do ta nxirrte ushtrinë e saj jashtë kazermave të mbyllura e do t’i bashkëngjitej veprimeve luftarake të Aleancës. NATO për herë të parë në historinë e saj 50 vjeçare u bashkua njëzëri për t’i dhënë një mësim të mirë agresionit serb në Kosovë dhe për të parandaluar katastrofën humanitare dhe zgjerimin e konfliktit në rajon. Ishte aksioni i parë ushtarak i Aleancës në një territor jashtë vendeve anëtare të saj. Ishte gjithashtu kthesa më e rëndësishme në vendosjen e rendit të ri botëror pas rënies së Murit të Berlinit. Ishte kjo një ndërmarrje ushtarake më e madhja në historinë e NATO-s, pas shterrimit të të gjitha mjeteve diplomatike e politike preventive për t’i dhënë fund terrorit serb të Milosheviçit në Kosovë. Katër ditë pas fillimit të bombardimeve,më 28 mars, ministri i Mbrojtes i Gjermanisë, Rudolph Scharping kishte folur për herë të parë “për krime kundër njerëzimit” të Beogradit në Koosovë. Ndërsa pak ditë më pas, ministri i Jashtëm gjerman, Joschka Fischer, masakrat e dhunën e Milosheviçit në Kosovë i konsideroi si “Makineria e vdekjes e Milosheviçit” dhe foli për “SS-të serbë”, ndërkohë që kundështarët e sulmeve të NATO-s i quajti “përkrahës të fashizmit të ri”. Fischer shkoi më tej, kur masakrat në Kosovë i krahasoi me Aushvicin. Ai u shpreh se “Nuk kam mësuar vetëm nga nocioni “kurrë më luftë”, përkundrazi, kam mësuar nga nocioni “kurrë më një Aushvic i ri”. Po ashtu Tony Blair paralajmëroi se Europa nuk mund të pranonte që në fund të shekullit të XX të përsëritej koha e nazizmit. Nato vazhdoi bombardimet e saj kundër caqeve ushtarake e policore të Serbisë në një hark kohor prej 78 ditësh. Gjatë gjithë kësaj kohe Aleanca koordinoi jo vetëm programin e përditshëm të sulmeve ajrore, por edhe operacionin mediatik, me qëllim që opinioni publik të ishte gjithnjë i informuar dhe të mbështeste operacionet ushtarake të NATO-s. Në Shtetet e Bashkuara të Amerikës, në Bruksel dhe në disa qendra të tjera europiane u krijuan qendrat mediale të informacionit. Më e rëndësishmja prej tyre ishte Qendra Mediale e Operacioneve (Media Operations Centre – MOC) në selinë e NATO-s në Briuksel, ku u angazhuan së paku 20 ekspertët më të mirë të përpunimit të informacionit. Këtë qendër e drejtonte Alastair Campbell, një nga këshilltarët më të zotë te Tony Blair. U formuan gjithashtu kompanitë e performancës së imazhit të luftës. Të gjithë personazhet mediatikë, zëdhënësi i NATO-s Jamie Shea, gjeneralët, ekspertët, politikanët, u angazhuan të argumentonin se “Përse kjo luftë kishte kaq shumë rëndësi për rendin e ri botëror”. Zëdhënësi Jamie Shea thoshte se “Kosova ishte e para luftë mediatike. Përdorimi i medias, beteja për përpunimin e opinionit ishin po aq të rëndësishme sa edhe sulmet ajrore”. Ndërkaq videokonferencat patën një efekt të jashtëzakonshëm sa i përket ritmikës së trajtimit të tematikave dhe proceseve. Megjithatë, siç ndodh në të gjitha rastet e konflikteve në botë, edhe në rastin e ndërhyrjes së NATO-s në Kosovë konflikti çoi në polarizimin e palëve kundërshtare. Kundërshtarët e intervenimit të NATO-s në Kosovë e trajtuan konfliktin si pjesë të interesit dhe strategjisë së Perendimit dhe NATO-s, veçmas SHBA-ve, për zgjerimin e zonave të influencës. Organizatat e Lëvisjes për Paqen demonstruan dhe protestuan fushqishëm kundër luftës dhe ndërhyrjes së Aleancës në Kosovë. Në këto demonstrime kishte ndikim dhe intervenim nga pala kundërshtare Serbia dhe Rusia. Por pati gjithashtu raste kur kjo qasje u dekonspirua. Psh gjatë një proteste anti-NATO në Berlin protestuesit me kombësi serbe kishin hedhur parullat “Vdekje shqiptarëve”! Kjo e kompromentoi qëllimin e protestës, sepse në opinionin publik perendimor u dha mesazhi se “kërkohej ndalimi i përdorimit të forcës, për të legjitimuar dhunën e terrorin serb në Kosovë”. E gjithë dinamika e zhvillimeve të 78 ditëve të intervenimit ushtarak të NATO-s për Kosovën u zhvillua përmes debatit, nëse sulmet ajrore të saj ishin ose jo legjitime. E vërteta është se për këto sulme nuk pati një mandat të Këshillit të Sigurimit, siç edhe parashikohet në nenin 52 të Kartës së OKB-së. Kjo ndodhi për shkak se Rusia paralajmëroi veton e saj sa i përket autorizimit të aksionit ushtarak kundër Serbisë. Mungesa e një mandati të Këshillit të Sigurimit i çoi shumë ekspertë të konkludonin se bombardimet e NATO-s në Kosovë ishin të paligjshme nga pikëpamja e së drejtës ndërkombëtare. Formalisht kjo ka një impakt jolegjitimiteti. Por në përmbajtje ekziston një e vërtetë tjetër substanciale. Kjo për disa arësye: 1. Masat e diplomacisë preventive të Bashkësisë Ndërkombëtare për ndërprerjen e dhunës serbe në Kosovë jane unikale, të papërsëritshme, së paku deri në këtë kohë. Për t’i dhënë fund këtij konflikti bashkësia ndërkombëtare, SHBA-të, NATO dhe BE punuan në koordinim me njëri-tjetrin në një periudhë kohore të gjatë. Ata u udhëhoqën nga përvoja e mëparshme e mosveprimit në Bosnjë, ku makineria ushtarake serbe shkaktoi terror masiv e masakroi mbi 150 mijë muslimanë, në emër të idesë së çmendur të “Serbisë së Madhe”. Cituar nga historiani me famë europiane, Holm Sundhaussen, Milosheviçi më 1989 kishte deklaruar se “Serbia ose do të bëhet e madhe, ose nuk do të ekzistojë fare”. Kjo formulë hitleriane e kishte zgjuar komunitetin ndërkombëtar. Prandaj bota demokratike krijoi instrumentet e parandalimit të dhunës e agresionit serb në Kosovë. U krijua Grupi i Kontaktit, në të cilin bënin pjesë SHBA-të, Gjermania, Britania e Madhe, Franca, Rusia dhe Italia. Këshilli i Sigurimit e shqyrtoi situatën në Kosovë katër herë dhe në rezolutën 1190 të 30 shtatorit 1998 arriti në përfundimin se “Situata në Kosovë rrezikon një katastrofë humanitare dhe që ta përhapë konfliktin në të gjithë rajonin”. Ky konstatim, i votuar edhe nga Rusia, sipas kapitullit VII të OKB-së justifkon ndërhyrjen ushtarake për t’i dhënë fund konfliktit. Nëse Rusia nuk dha Ok e saj për këtë operacion, kjo ka të bëjë kryekëput me interesat e saj gjeopolitike, por jo me qëllimet dhe misionin që përcakton Karta e OKB-së. Kjo do të thotë se legjitimitetin e ndërhyrjes së NATO-s në Kosovë e ka cënuar qëllimisht e drejta për veto e Rusisë. Ndërkohë përmbajtësisht ajo parashikohet në Kartën e OKB-së, përkatësisht në kapitullin VII të saj. 2. Legjtimitetin e ndërhyrjes ushtarake të NATO-s në Kosovë e përforcon fakti se para kësaj ndërhyrjeje u zhvillua në Ramboullet të Francës Konferenca për Kosovën, marrëveshjen e së cilës e firmosi pala shqiptare dhe e refuzoi pala serbe. Refuzimi i marrëveshjes nga Beogradi ishte fundi i një procesi dialogues dhe preventiv që konflikti të zgjidhej me mirëkuptim dhe në mënyrë paqësore. 3. Por këtë legjitimitet e përforcon gjithashtu fakti se në përfundim të luftës Këshilli i Sigurimit miratoi një rezolutë të posaçme, atë me nr 1244, e cila e vuri Kosovën nën protektoratin ndërkombëtar dhe sigurinë e saj nën autoritetin e NATO-s. Kjo rezolutë e votuar edhe nga rusët pas kapitullimit të Milosheviçit e shndërroi në null gjithë procesin e mëparshëm, duke legjitimuar jo vetëm bombardimet e NATO-s kundër Serbisë, por edhe duke përcaktuar të ardhmen e Kosovës sa i përket statusit dhe ushtrimit të vullnetit politik të shqiptarëve dhe banorëve të tjerë të saj. 4. Sa i përket legjitimitetit të ndërhyrjes së NATO-s në Kosovë ekspertiza mund të operojë edhe me një lloj deduksioni të tillë: Nëse Këshilli i Sigurimit do të autorizonte një ndërhyrje të forcës në Kosovë e ndërkohë NATO nuk do të donte ta ndërmerrte këtë aksion, cili do të ishte rezultatntja e një autorizimi të tillë? Eshtë krejt e natyrshme se Këshilli i Sigurimit nuk mund të impononte një aksion ushtarak të NATO-s. Helmetkaltërit e OKB-së do viheshin në situatën e masakrës së Sebrenicës. Prandaj më i rëndësishëm se një autorizim i KS ishte dhe mbetet vullneti i vendeve anëtare të NATO-s për të ndërhyrë dhe për t’i dhënë fund konfliktit në Kosovë. Kompaktësia e vendeve anëtare të NATO-s ishte suksesi më i madh i këtij aksioni. Duhet thënë se në këtë proces pati përpjekje për të ndaluar sulmet me rastin e festave të Pashkëve Ortodokse, por ato përpjekje dështuan. Një inciativë të tillë e ndërmori ministri i Jashtëm i Italisë, Lamberto Dini, i mbështetur nga Greqia dhe Franca, por Madllein Olbright dhe Joschka Fischer paralizuan përpjekjet e tyre për t’i dhënë Milosheviçit një sinjal se ai mund të tolerohej në terrorin që ushtronte kundër shqiptarëve në Kosovë. Më 9 qershor 1999 u nënshkrua në Kumanovë marrëveshja për paqen midis NATO-s dhe përfaqësuesve të Milosheviçit. Më 10 qershor u miratua në KS të OKB-së rezoluta 1244, e cila e shkëputi Kosovën përfundimisht nga Serbia dhe i dha asaj të drejtën për vetëvendosje. Më 12 qershor 1999 trupat ushtarake të NATO-s nën siglën e KFOR-it hyjnë në Kosovë dhe e vendosin atë përfundimisht në hartën e një vendi të lidhur me Aleancën Atkantike, Bashkimin Europian dhe vlerat amerikane të demokracisë. Pa këtë ndërhyrje Kosova nuk do të mund të shpallej e pavarur më 17 shkurt 2008. Megjithatë asaj i mbetet ende rrugë derisa të pranohet në OKB dhe në të gjitha institucionet ndërkombëtare. Kosova ka nevojë të integrohet në BE e sidomos në NATO. Institucionet e saj nuk duhet të harrojnë se mund të konsolidohen së pari përmes përkushtimit të politikës, por edhe përmes mbështetjes së vazhdueshme të NATO-s, SHBA-ve dhe Bashkimit Europian.

4 të vrarë, dhjetra te plagosur, në një akt terrorist pranë Parlamentit në Londer

March 22, 2017 by dgreca

Shtatë të arrestuar pas sulmit në Londër/

Parlamenti britanik është mbyllur pas dy përpjekjeve të koordinuara për incidente të dhunshme, të cilat policia tha se po i trajtonte si sulme terroriste.Policia e Londrës ka konfirmuar se katër persona janë vrarë në Londër – përfshirë këtu edhe një sulmues të dyshuar- nga sulmi në parlamentin britanik dhe në Urën Westminister.Policia tha se një sulmues i veshur në të zeza hyri brenda perimetrit të Pallatit Westminster në Londër dhe theri me thikë një polic në afërsi të hyrjes që shfrytëzohet nga anëtarët e Parlamentit. Polici më pas ka ndërruar jetë nga plagët e marra.Autoritetet thanë se sulmuesi u vra nga zyrtarët e sigurisë jashtë ndërtesës së parlamentit.

Një grua është vrarë kur një sulmues goditi me veturë 12 kalimatarë në Urën Westminister, në afërsi të Parlamentit dhe të Kullës Big Ben të Londrës. Ndërkaq edhe një person tjetër ka vdekur në Urën Westminister.Ndërkaq, të paktën 20 persona të tjerë kanë mbetur të plagosur.Zyrtarët spitalor thonë se dhjetra persona, që u goditën nga vetura e sulmuesit kanë pësuar lëndime “katastrofale”.

Një grua është nxjerr e gjallë nga Lumi Thames në Londër, pas sulmit në Urën Westminister, ka thënë për Reuters një zëdhënës i Autoritetet i Portit të Londrës.“Një grua është nxjerr nga uji në afërsi të urës Westminister. Ajo është e gjallë por ka lëndime serioze”, ka thënë zëdhënësi, duke shtuar se ajo tashmë është duke marrë trajtimin e duhur mjekësor.

BBC raporton se një grup i studentëve francezë, në kohën e sulmit me veturë, ishin duke ecur në pjesën verirore të Urës Westminister. Ata janë në mesin e të lënduarve nga ky sulm.Kryeministri francez, Bernard Cazeneuve ka konfirmuar se në mesin e të lënduarve janë tre nxënës francezë, të moshës 15 dhe 16 vjeçare.

Një polic është goditur me thikë brenda Parlamentit britanik, tha kryetari i Dhomës së Ulët të Parlamentit, David Lidington.Ai u tha ligjvënësve se “sulmuesi i dyshuar është qëlluar nga policia e armatosur” pas “incidentit serioz”.Stafi brenda Parlamentit është urdhëruar të qëndrojë brenda zyrave, raporton BBC.

Policia tha se është thirrur për një incident me armë zjarri në Westminster, brenda Londrës.

Raportohet për disa persona të plagosur.Stacioni i metrosë në Westminister është mbyllur, me kërkesë të policisë.

Kryeministrja Theresa May u pa të jetë shoqëruar në veturën e saj pas të shtënave që u dëgjuan në Parlament, gjatë incidentit.Një burim nga kryeministria ka konfirmuar se kryeministrja Theresa May ishte mirë, shkruan BBC.

Zoti Lidington tha: “Duket se një polic është goditur me thikë dhe se sulmuesi i dyshuar u qëllua nga policët e armatosur”.

“Ka njoftime për incidente të tjera të dhunshme në hapësirat e Pallatit Westminster por shpresoj se kolegët nga të gjitha palët do të mirëkuptonin se do të ishte e gabueshme për mua që të jap më shumë hollësi deri sa nuk kemi një konfirmim të policisë dhe nga autoritetet e Sigurisë së Parlamentit për çfarë bëhet fjalë”.

Shtëpia e Bardhë i ka ofruar mbështetjen e plotë amerikane Londrës në përgjigje të sulmit terrorist pranë parlamentit britanik ku gjetën vdekjen katër vetë dhe u plagosën mbi 20 të tjerë.

Zëdhënësi i Shtëpisë së Bardhë Sean Spicer tha se Presidenti Trump kishte folur me Kryeministren Theresa May lidhur me ngjarjen dhe i kishte ofruar ndihmën amerikane për të sjellë personat përgjegjës para drejtësisë. Sipas zëdhënësit, Shtëpia e Bardhë përgëzon Britaninë për reagimin e shpejtë ndaj incidentit.

Një sulm i përgjakshëm në kompleksin e parlamentit britanik në Londër ka lënë të vrarë 4 persona, ndër të cilët edhe një polic.Kreu i anti-terrorizmit në Departamentin Policor të Londrës e cilësoi aktin një sulm terrorist dhe konfirmoi se ndër të vrarët përfshihen autori i sulmit dhe një polic.

Mark Rowley tha se rreth 20 vetë janë plagosur dhe policia ka rrethuar dhe bllokuar parlamentin. Autoritetet po kontrollojnë zonën, për të garantuar se nuk do të ketë sulme të reja në zonë, megjithëse policia beson se vetëm një person ishte i përfshirë në këtë sulm.

Zoti Rowley tha se polici i vrarë ishte një ndër rojet e armatosura të parlamentit. Viktima tjetër ishte lënduar nga sulmi në urën Westminster.

Një person, që sipas njoftimeve ishte një burrë në moshë të mesme, qëlloi me armë të ftohtë policin brenda perimetrit të parlamentit, para se të qëllohej me armë zjarri nga policia.

Një zyrtar i lartë i policisë tha për Zërin e Amerikës se autoritetet besojnë që një person ishte i përfshirë në një sulm me tre etapa.

Incidenti filloi me një makinë në urën Westminster pranë Parlamentit Britanik. Makina hipi në trotuar dhe goditi disa këmbësorë.

Policia metropolitane tha se po e heton incidentin si akt terrorist, deri kur të dihen hollësi të tjera, duke shtuar se situata është në zhvillim dhe duke u bërë thirrje njerëzve të mos afrohen tek skena e ngjarjes.

Kryetari i Dhomës së Komuneve në parlament, David Lidington tha se ka pasur njoftime për akte të dhunshme brenda kompleksit të organit legjislativ britanik. Ai konfirmoi se personi i dyshuar si autor i sulmit është vrarë nga forcat e rendit. Sipas rrëfimeve të dëshmitarëve dhe fotografive nga skena e ngjarjes, në zonë duken dy viktima të përgjakura pranë urës Westminster, ku sipas njoftimeve policia reagoi ndaj një “incidenti me armë zjarri”.Dëshmitarët njoftuan më pas se kishin parë një makinë në lëvizje që goditi disa persona mbi urë. Në fotografi shihen një numër viktimash mbi urë.

Shtatë të arrestuar pas sulmit në Londër/

Policia britanike tha të enjten se ka arrestuar shtatë persona në lidhje me sulmin e së mërkurës afër parlamentit britanik në Londër, që la pas vetes katër të vrarë, përfshirë edhe sulmuesin.

Mark Rowley, shefi i kundër terrorizmit në policinë e Londrës, tha se arrestimet pasuan kontrollet në gjashtë adresa të ndryshme dhe se kërkimet në Londër, Birmingham dhe pjesë tjera të vendit po vazhdojnë. Ai nuk saktësoi nëse të arrestuarit kishin lidhje me sulmin e së mërkurës.

“Ne besojmë, në bazë të hetimeve se sulmuesi ka vepruar i vetëm dhe ishte frymëzuar nga terrorizmi ndërkombëtar”, u tha ai gazetarëve, duke refuzuar të publikojë emrin e sulmuesit gjatë asaj që ai e cilësoi “fazë të ndejshme” të hetimeve.

Hetimet janë përqendruar në motivet, përgatitjet dhe mbështetjen e sulmuesit i cili goditi këmbësorët me makinë në urën Westminster, pastaj qëlloi me thikë për vdekje një oficer të sigurimit para se të qëllohej dhe të vritej nga një oficer tjetër i policisë.

Rowley tha se 29 veta janë dërguar në spital, shtatë prej të clëve në gjendje të rëndë. Ai tha se numri i atyre që nuk kanë kërkuar ndihmë mjekësore është i paqartë.

Rowley më herët e identifikoi oficerin e vrarë si 48 vjeçarin, Keith Palmer, që kishte shërbyer për 15 vjet në radhët e policisë.