Sokol Paja/

Michigan, 23 Maj 2025 – Ekrem Bardha, veprimtari i shquar i çështjes kombëtare në mërgatën e Shteteve të Bashkuara të Amerikës, në një ceremoni speciale mbajtur në Kishën e Shën Palit, u nderua, vlerësua e respektua prej patriotëve, miqve, bashkëpunëtorëve, kolegëve, gazetarëve, studiuesve, drejtuesve të shoqatave atdhetare, diplomatëve e shumë të ftuarve të ardhur nga Amerika, Kanadaja, Europa, Shqipëria, Kosova e viset etnike. Nën prezantimin e shkëlqyer të Brikena Hoxhallit dhe Kjara Gjergjit e organizatorit Fran Gjoka, mbrëmja e nderimit ishte një falënderim i përzemërt dhe mirënjohje e përjetshme për shqiptarin e madh Ekrem Bardha për veprën, jetën, trashëgiminë dhe shërbimin e tij çmuar ndaj kombit, atdheut e komunitetit shqiptar në Shtetet e Bashkuara të Amerikës.

Mbrëmja e nderimit pas himneve kombëtare u hap me këngën “Kushtrimi” të interpretuar nga Fran Gjoka dhe Alberie Hadergjonaj. Ceremonia e nderimit vazhdoi me fjalën e artistit dhe organizatorit Fran Gjoka i cili recitoi një poezi kushtuar veprimtarisë së Ekrem Bardhës në Amerikë. Rreth librit të z.Ekrem Bardha “E vërteta – Pavarësia e Kosovës, Amerika dhe Diaspora”, artisti Gjoka deklaroi se Ekrem Bardha në historinë moderne shqiptare shkroi një hymn përkushtimi ndaj Atdheut. Përurimi i nuk është thjeshtë një ngjarje letrare, por një akt nderimi ndaj një figure që jetoi përtej vetes. Ky libër është dëshmi e rrallë, jo vetëm e kujtimeve të një individi, por e një fanari që shkëlqen në historinë e kombit tonë – një trashëgimi e gjallë për brezat që do vijnë, tha ndër të tjera z.Gjoka.

Ambasador Flamur Gashi theksoi se libri i Ekrem Bardhës është një dokument historik, një përvojë personale që lidhet me fatin kolektiv të një kombi. Vepra e Bardhës si përbashkues e strateg, është testament shpirtëror për fatet e një populli. Ekrem Bardha ishte ambasador i shqiptarëve që kërkoi e luftoi për të drejtat e një populli të shtypur. Kosova ishte mision personal i Ekrem Bardhës në përkushtimin e tij ndaj kombit. Në fjalën e tij Ambasador Gashi veçoi Gazetën Iliria e drejtuar nga Harry Bajraktari, Ekrem Bardha dhe Vehbi Bajrami të cilët sensibilizuan institucionet amerikane për çështjen e Kosovës. Mërgata e Amerikës ishte palca kurrizore e rezistencës sonë kombëtare, tha ndër të tjera në fjalën e tij Ambasador Flamur Gashi.

Një poezi kushtuar emigrimit të familjes Bardha në Amerikë dhe aktivitetit patriotik e diplomatik në shërbim të çështjes kombëtare interpretuar nga Brikena Hoxhalli, emocionoi të gjithë të pranishmit.

Prof. Anton Lajçaj në fjalën e tij theksoi se libri i Ekrem Bardhës “E vërteta – Pavarësia e Kosovës, Amerika dhe Diaspora”, është përpjekje e sinqertë për të ndriçuar një periudhë të rëndësishme të historisë kombëtare. Patrioti Ekrem Bardha ndërtoi ura të fuqishme bashkëpunimi, krijoi aleanca politike me Presidentë Amerikanë, suksesin personal e investoi në çështjen e përbashkët kombëtare. Vepra e Bardhës tha Prof.Lajçaj është letër dashurie për kombin.

Dokumentari mbi jetën e Ekrem Bardhës dhe përkushtimin e tij për Kosovën me regji dhe skenar nga Gani Vila, paraqiti dëshmi historike dhe të dhëna të një pune të jashtëzakonshme që mërgata shqiptare e Amerikës me në krye Ekrem Bardhën bënë në favor të çështjes kombëtare. Alberie Hadergjonaj interpretoi një këngë kushtuar Ibrahim Rugovës duke përkujtuar e nderuar dhe bashkëveprimtarët që gjendeshin të pranishëm.në promovim.

Kryetari i Federatës Vatra Dr. Elmi Berisha në fjalën përshëndetëse deklaroi se Ekrem Bardha është legjendë e gjallë e shqiptarizmës, patriot i pavdekshëm, ishte një mbrojtës i shenjtë i të drejtave të shqiptarëve, atdhetar e diplomat i shquar që investua në çdo kohë për kombin shqiptar dhe sidomos për Kosovën. Ekrem Bardha përgjatë gjithë jetës së tij ishte kontributor i palodhur i çështjes kombëtare, atdhetar i flaktë, patriot i zjarrtë, aktivist frymëzues e lobist vizionar, tha Dr. Berisha. Ai shprehu mirënjohje e vlerësim ndaj Ekrem Bardhës edhe për mbështetjen e pakursyer që i ka dhënë gjithmonë Federatës Vatra dhe gazetës Dielli si institucionet kombëtare më të fuqishme në mërgatën e Amerikës.

Kryetari i Komunës së Prishtinës z.Përparim Rama e nderoi jetën, veprën e përkushtimin për kombin e Kosovën të Ekrem Bardhës duke e nderuar me “Çelësin e Prishtinës”. Ky çelës është simbol i një mirënjohjeje që nuk matet me përmasa, por me peshën e gjithçkaje që keni bërë për Kosovën tonë të lirë. Ky çelës çel dyer që ju tashmë i keni hapur, me guximin, përkushtimin dhe atdhedashurinë tuaj. Dhe sot, ky çelës ju thotë një gjë të thjeshtë por të thellë: Prishtina është dhe do të mbetet gjithmonë shtëpia juaj.

Dua po ashtu ta ndaj me ju një të vërtetë të bukur:

Ideja për këtë çelës ka ardhur nga një tjetër patriot i palodhur i çështjes kombëtare, Dr. Elmi Berisha i Vatrës– të cilin e falënderoj nga zemra për këtë propozim që lindi nga zemra dhe arriti drejt në vendin e duhur.

Dhe për ta përjetësuar këtë lidhje të paharrueshme mes jush dhe qytetit tonë, në zemër të lagjes Kalabria, ne do të emërtojmë një park të ri: “Parku Bardha”. Një hapësirë publike që do të mbajë emrin tuaj —

që fëmijët të luajnë nën hijen e kujtimit tuaj, që brezat të kujtojnë jo vetëm figurën, por veprën tuaj, tha kryetari i Prishtinës Përparim Rama. Vendlindja e tij, Bashkia e Kolonjës e nderoi gjithashtu kontributin diplomatik, patriotik e filantropik të Ekrem Bardhës me “Qytetar Nderi”. Regjisorja Kjara Gjergji interpretoi një poezi të Mitrush Kutelit kushtuar Atdheut që emocionoi të gjithë pjesëmarrësit.

Atdhetari i shquar Harry Bajraktari në fjalën e tij u fokusua te veprimtaria 60 vjeçare e Ekrem Bardhës në Amerikë për Kosovën dhe të drejtat e shqiptarëve në trojet etnike. Harry Bajraktari kujtoi punën e përbashkët

40 vjeçare me Ekrem Bardhën në Senat, Kongres, Shtëpinë e Bardhë e institucionet amerikane për të ndihmuar kauzën shqiptare.

Besa Tafilaj në fjalën e saj renditi punën e shkëlqyer të Ekrem Bardhës që nga Presidenti Nikson, Ford, Bush e deri ditët e sotme. Donika Bardha, vajza e Ekrem Bardhës dëshmoi kujtime familjare të mikpritjes të personaliteteve kombëtare që lobonin për çështjen kombëtare dhe detaje të takimeve me Presidentë Amerikanë për çështjen kombëtare e deri te protestat, tubimet, demonstratat e diasporës shqiptare për kombin shqiptar në Amerikë ku Ekrem Bardha ishte në krye të veprimtarive atdhetare.

Në përfundim të ceremonisë së nderimit, Ekrem Bardha në fjalën e mirënjohjes e falënderimit modestisht tha se “Nuk jam unë, jemi të gjithë ne”. Z.Bardha u ndal te puna diplomatike për kauzën kombëtare e NAAC, Ligës Shqiptaro-Amerikanë dhe Federatës Vatra që kanë dhënë një kontribut të madh kombëtar në Shtetet e Bashkuara të Amerikës. Ai apeloi që të mos harrohet asnjëherë puna që mërgata e Amerikës ka dhënë për shqiptarinë e sidomos për pavarësinë e Kosovës.

Grupi artistik i Elvana dhe Anton Dedvukaj përformuan disa valle tradicionale kombëtare duke ngjallur mall dhe emocione te të gjithë të pranishmit. Kisha e Shën Palit dhe Teqeja Bektashiane Shqiptare në Michigan e nderuan me certifikatë mirënjohjeje kontributin e Ekrem Bardhës.

E veçantë në mbrëmjen e nderimit të Ekrem Bardhës ishte pjesëmarrja e personaliteteve të Vatrës ku krahas kryetarit Dr. Berisha ishin të pranishëm nënkryetari z.Alfons Grishaj, sekretari Dr. Pashko Camaj, drejtori i degëve z.Mondi Rakaj, anëtari i kryesisë z.Anton Raja, vatrani Ben Pllumaj, editori i Diellit e vatranë të shumtë që nderuan ikonën dhe nderin e kombit shqiptar Ekrem Bardha.

Patrioti Agim Pepaj, kryetar i shoqatës “Gjergj Kastrioti” në Zvicër, në një rrëfim për gazetën “Dielli” dhënë editorit Sokol Paja, pasqyron veprimtaritë historike, kulturore, atdhetare e komunitare në Zvicër në shërbim të lartësimit dhe promovimit të jetës dhe veprës së heroit tonë kombëtar Gjergj Kastriotit.

Historiku i Shoqatës “Gjergj Kastrioti” – Zvicër…

Shoqata “Gjergj Kastrioti” u themelua në vitin 2018, në një vit simbolik për kombin shqiptar – 550-vjetorin e ndarjes nga jeta të Heroit tonë Kombëtar. Ky përvjetor u shpall vit mbarëkombëtar i Skënderbeut, dhe ne e konsideruam të domosdoshme që edhe në Zvicër të ngrihej një organizatë që do të angazhohej me përkushtim për ruajtjen dhe promovimin e figurës madhore të Gjergj Kastriotit Skënderbeut, si një nga shtyllat identitare të shqiptarëve kudo që ndodhen.

Aktivitetet kulturore të Shoqatës “Gjergj Kastrioti” në shërbim të historisë kombëtare dhe komunitetit…

Që nga fillimi, shoqata jonë ka qenë aktive në organizimin dhe mbështetjen e aktiviteteve me karakter historik dhe kombëtar. Në vitin 2019, morëm pjesë në organizimin e përvjetorit të lindjes së Skënderbeut në Brekoc të Gjakovës. Edhe pse pandemia COVID-19 kufizoi aktivitetet tona fizike gjatë viteve 2020–2022, ne nuk u ndalëm. Vazhduam me pjesëmarrje në evente të ndryshme kulturore, duke e mbajtur të gjallë kujtesën për Heroin tonë.

Në vitin 2023, organizuam promovimin e librit “Bibliografia e Gjergj Kastriotit Skënderbeut” nga autori Gjon Keka. Në tetor 2022, morëm pjesë në inaugurimin e obeliskut të Skënderbeut në Trento, Itali. Viti 2024 ka qenë ndër më të pasurit me veprimtari: bashkëorganizim koncertesh për mbledhje fondesh për shtatoren në Hora e Arbëreshëve në Sicili, kontribut në vendosjen e shtatores në Gjakovë, dhe organizimi i një simpoziumi ndërkombëtar me temë “Gjergj Kastrioti – mbrojtës i civilizimit europian”, me pjesëmarrjen e studiuesve nga trojet dhe diaspora.

Në gusht 2024, shoqata jonë ishte thellësisht e angazhuar në organizimin dhe financimin e vendosjes së shtatores së Skënderbeut në Hora e Arbëreshëve, një ngjarje me peshë të veçantë simbolike dhe historike. Krahas këtyre, kemi realizuar vizita simbolike në vende të rëndësishme si Kruja, Lezha, Prekazi, dhe bashkëpunojmë ngushtë me shoqata të tjera shqiptare në Zvicër për çështje me interes kombëtar.

Aktivitetet e dedikuara ekskluzivisht për Skënderbeun…

Gjithçka që ne bëjmë është e lidhur drejtpërdrejt me figurën e Gjergj Kastriotit. Çdo organizim, nga vendosja e shtatoreve e deri te promovimi i veprave shkencore për Heroin, është një përpjekje për ta bërë më të njohur figurën e tij dhe për të ruajtur identitetin tonë kombëtar në diasporë. Ai është boshti rreth të cilit rrotullohet misioni ynë.

Kontributi në komunitetin shqiptar, mbështetja për shkollat shqipe dhe bashkëpunimi me shoqata të tjera…

Misioni ynë është i pandryshueshëm: ruajtja dhe promovimi i jetës e veprës së Skënderbeut te brezat e rinj shqiptarë dhe më gjerë. Ne jemi të përkushtuar që fëmijët tanë të rriten me vetëdije kombëtare, të njohin rrënjët e tyre dhe të ndihen krenarë për historinë tonë. Bashkëpunojmë ngushtë me shkollat shqipe në Zvicër dhe me organizata të tjera që ndajnë të njëjtin qëllim, duke i mbështetur me mundësitë tona modeste, por me vullnet të madh.

Nderimet dhe vlerësimet kombëtare e ndërkombëtare…

Deri më tani, nuk kemi marrë ndonjë vlerësim zyrtar me shkrim, por kemi ndier përherë mbështetjen morale të komunitetit shqiptar dhe partnerëve tanë në veprimtari. Kjo mbështetje na motivon të vazhdojmë punën tonë me përkushtim edhe më të madh.

Projektet e shoqatës “Gjergj Kastrioti” në të ardhmen…

Ne do të vazhdojmë me vendosmëri misionin tonë – ruajtjen dhe promovimin e figurës së pamposhtur të Gjergj Kastriotit Skënderbeut. Aktivitetet tona do të vazhdojnë në formën e simpoziumeve, bashkëpunimeve kulturore, vendosjes së shtatoreve, si dhe projekteve që synojnë afrimin e brezave të rinj me historinë dhe identitetin kombëtar.

New York, 8 Maj 2025 – Në emër të Federatës Pan-Shqiptare të Amerikës Vatra i shpreh urimet më të përzemërta shtetit të Vatikanit me rastin e zgjedhjes së drejtuesit hyjor të Selisë së Shenjtë, Robert Francis Prevost – Papa Leoni XIV.

Kjo ditë e shënuar për mbarë botën, besimtarët katolikë e veçanërisht për popullin shqiptar le të jetë një gur themeli për shpresë, paqe, drejtësi, dashuri e vëllazëri.

Kardinali Robert Francis Prevost ia kushtoi misionin e tij ungjillizimit dhe njerëzve në nevojë. Zgjedhja e tij si Papë vjen në një moment delikat ku mbarë njerëzimi ka nevojë për më shumë paqe, dialog, mirëkuptim, dashuri e drejtësi sociale.

Federata Pan-Shqiptare e Amerikës Vatra do të vazhdojë një lidhje të ngushtë bashkëpunimi institucional dhe shpirtëror duke forcuar lidhjet historike me Selinë e Shenjtë, Vatikanin.

Papa Leoni XIV, Papa i 267-të në historinë e Vatikanit dhe Papa i parë amerikan, si vazhdues i traditës së Papa Françeskut, do të ndërtojë ura të reja dhe do ta afrojë edhe më shumë Kishën Katolike më afër njerëzve në nevojë e shtresave të margjinalizuara.

Shpresojmë që Papa Leoni XIV të vizitojë trojet shqiptare dhe të bekojë tokën arbnore besnike të krishterimit dhe qytetërimit perëndimor.

I lutemi Zotit që Papa Leoni XIV të ketë bekimin dhe mbrojtjen e Perëndisë në përmbushjen me sukses dhe shenjtëri të Misionit të Tij Apostolik.

Me bekime dhe urimet më të përzemërta

Kryetari i Vatrës

Dr. Elmi Berisha

GJERGJ KASTRIOTI – SKËNDERBEU BASHKOI SHQIPTARËT E AMERIKËS NË BRONX, NEW YORK.

Sokol Paja/

New York, 3 Maj 2025 – Federata Pan-Shqiptare e Amerikës Vatra në bashkëpunim me Qendrën Kulturore “Nënë Tereza” të Kishës Katolike “Zoja e Shkodrës” promovoi veprën Gjergj Kastrioti- Skënderbeu, “Kryqtari i Fundit” të diplomatit e gazetarit Virgjil Kule. Me pjesëmarrjen e studiuesve, historianëve, diplomatëve, gazetarëve e veprimtarëve të çështjes kombëtare në mërgatën e Amerikës, Skënderbeu bashkoi shqiptarët e Amerikës në një festë libri në nderim të heroit tonë kombëtar. Në fjalën e mirëseardhjes famullitari Dom Pjetër Popaj vlerësoi librin si një kontribut të rëndësishëm historik për shqiptarët dhe historiografinë kombëtare pasi botimi “Kryqtari i Fundit” sjell fakte dhe këndvështrime të një punimi dhe studimi shumë serioz për lexuesit dhe institucionet shkencore.

Sekretari i Vatrës Dr. Pashko Camaj përshëndeti në emër të kryetarit Dr. Elmi Berisha, nënkryetarit z.Alfons Grishaj dhe kryetarit të Këshillit z.Kolec Ndoja. Dr. Camaj veçoi seriozitetin e punimit dhe pasurinë e fakteve e sistemimin e dokumenteve që i paraqiten lexuesit në punim.

Gazetari i shquar i VOA-s Frank Shkreli në fjalën e tij theksoi se e konsideroj këtë promovim një ngjarje me rëndësi bashkohore, mediatike, jo vetëm këtu në Nju Jork, në Amerikën e largët, por edhe një ngjarje interesi historik për botën shqiptare në përgjithësi. Sot Z. Virgjil Kule na bashkon në frymën më kastriotiane, gjithëpërfshirse, për të kujtuar Heroin tonë, Kryetrimin e Kombit dhe veprimtarinë e tij epike djplomatiko-ushtarake të përgjithmonshmit të Kombit shqiptar – Gjergj Kastriotin-Skënderbe. Këtu para bustit të tij në këtë sallë që, njëherazi, mban edhe emrin e Shën Nënë Terezës, ndërsa disa metra prej këtu qëndron monumenti madhështor i Heroit Kombëtar, në oborrin e Kishës Zoja e Shkodrës. Skënderbeu nuk është vetëm në bronz. Skënderbeu është pjesë e identitetit tonë dhe qenie Shqiptare. Historiografia shqiptare moderne kishte nevojë për një libër të tillë të mirë dokumentuar duke marrë parasyshë burimet e reja të vleshme, por të pazbuluara deri tani, e që kërkuesit shkencorë e historianët si Virgjil Kule kanë në dispozicion, për një vepër si kjo, kushtuar Gjergj Kastriotit Skenderbe.

Gazetari i VOA-s Gjekë Gjonlekaj në fjalën e tij theksoi diplomacinë e Skënderbeu në 26 vite ku veçoi lidhjen me 5 Papë të Vatikanit, fuqinë diplomatike e politike të Skënderbeut. Z. Gjonlekaj në fjalën e tij renditi kontributin e Barletit, Dr. Athanas Gegajt, Fan Nolit, Kristo Frashërit mbi veprën e jetën e Skënderbeut dhe autorë amerikanë që kanë nxjerrë në pah jetën e veprën e heroit kombëtar të shqiptarëve. “Skenderbeu është nami dhe nderi i kombit kudo ku ka vepruar” tha ndër të tjera Gjekë Gjonlekaj.

Historiani Dr.Paulin Marku theksoi se ky libër i sjellë nga z. Kule me burime të ndryshme arkivore që i japin një substancë thelbësore trajtimit të figurës së Gjergj Kastriotit, me referenca përkatëse, interpretime të shumta në fusnotë, dhe renditur në mënyrë kronologjike të fakteve dhe ngjarjeve, me një shqipe të rrjedhshme edhe për shkak të profesionit gazetaresk, plotëson studimet e deritanishme në fushën e historisë e diplomacisë mbi epokën e Skënderbeut. Nëpërmjet këtij studimi i ribotuar disa herë, i jep lexuesit shqipfolës një studim cilësor dhe përmbajtësor, i renditur me numër progresiv vit pas viti sipas ngjarjeve dhe rrethanave. Në këtë libër sipas historianit Dr. Marku jepen të thëna për mbledhjen kuvendit të Besëlidhjes së Lezhës në kishën e Shën Kollit dhe rregullat që vendosen princat shqiptar, shpalosjen e planit diplomatik, ngritja e fondit të përbashkët dhe gjenden shumë të dhëna të tjera të aspektit financiar dhe ripërtëritjes ekonomik. Sipas autorit Kule, Skënderbeu ishte njohës i mirë i dinamikës së konjukturave të kohës.

Politologu Akri Çipa në fjalën e tij theksoi se : humbjet dhe mosnjohjet në fasha të trasha kohore e historike të së shkuarës sonë si popull, plotësohen dhe duhen plotësuar ne vazhdimësi. Përpara kësaj domosdoshmërie, ne mund të shikojmë impaktin dhe vlerën e librave të tillë si “Kryqtari i fundit”. Autori tregon dhe qartësinë metodologjike të tij, duke theksuar libri është ndërtuar nëpërmjet metodës hronotopike. Do shtoja unë, kjo metodë, ndërlidhja e kohës dhe hapesirës historike, shërben në fund të ditës për të dalë mbi një analizë sa kontekstuale aq edhe përmbushëse për ato që janë konsideruar nga studiues të mëparshëm si vakuume materiale historiografike e analitike. Libri i autorit Kule ka dy elemente realizmi brenda vetes: Përpjekjen e vetë autorit për ta paraqitur Skenderbeun real, përtej gabimeve historiografike, kritikave ideologjike ose të motivuara nga interesa meskine, ose qoftë edhe mistifikimit të misionarizmit rilindas. Realizmin si bosht politik mbi të cilin Gjergj Kastrioti ndërtoi shtetin dhe aktivitetin e tij politik.

Dr. Afrim Shabani në kumtesën e lexuar nga Nancy Kajo shprehet se: risia metodologjike që sjell Kule është ndërtimi i një “ditari diplomatik” të veprimtarisë politike dhe ushtarake të Skënderbeut, duke renditur ngjarjet dhe dokumentet sipas rendit kronologjik të viteve dhe muajve, në mënyrë që të shmangen interpretimet jashtë kontekstit historik. Kjo strukturë i jep lexuesit ndjesinë e zhvillimit të një mendimi të qëndrueshëm dhe të qëllimshëm që zgjat mbi dy dekada, e jo të një reagimi të çastit apo instinktiv. Metoda hronotopike që përmend autori lidhja e dokumenteve me kohën dhe hapësirën konkrete është qasje që krijon një narrativë logjike ku çdo ngjarje merr kuptim në funksion të projektit madhor të Skënderbeut. Kapitujt kushtuar periudhës osmane të Skënderbeut janë të thelluar në këtë libër. Kryqtari i Fundit është një kontribut me vlerë për të kuptuar më thellë figurën e Skënderbeut. Ai nuk e sheh heroin si simbol abstrakt, por si mendje realiste që punoi sistematikisht për një qëllim të madh kombëtar. Kule e vendos Skënderbeun aty ku e meriton: jo vetëm në historinë e betejave, por në historinë e ideve politike dhe të diplomacisë shqiptare. Në një kohë kur ne shpesh harrojmë se historia jonë ka pasur edhe vizion përtej qëndresës, kjo vepër na rikujton se Skënderbeu ishte edhe strateg, edhe arkitekt i një projekti europian për Shqipërinë. Dhe kjo është arsyeja pse ai mbetet i fundit ndër kryqtarët dhe i pari ndër ne, thekson ndër të tjera Dr. Afrim Shabani.

Autori Virgjil Kule në fjalën përmbyllëse dhe përshëndetëse tregoi detaje nga jeta dhe veprimtaria e Skënderbeut, rrugëtimin e tij politik e diplomatik, organizime ushtarake, marrëveshje, makinacione, kuriozitete, letra diplomatike, lidhjet e fuqishme e aleancat e betejat e Skënderbeut përgjatë sundimit të tij. “Skenderbeu ishte një politikan i zgjuar, i mençur dhe shumë i organizuar” theksoi z.Kule. Në fund të promovimit të shkëlqyer përshëndetën takimin patriotët e mërgatës: Nuredin Seci, Marjan Cubi, Tom Mrijaj, Dr.Gani Abazi dhe Bashkim Shehu. Në përfundim të promovimit, autori Kule me dashuri e respekt firmosi librin mbi heroin tonë Skënderbeun si një kontribut të jashtëzakonshëm atdhetar, kulturor, historik e kombëtar.